O Le Matafaioi Taua a Tagata o le Ekalesia i le Galuega Faafaifeautalai
E tatau ona tatou saunia i tatou lava ina ia lagolagoina ia faifeautalai i le sailia o na fanau a lo tatou Tama Faalelagi o e o le a taliaina le savali o le Toefuataiga.
Uso e ma tuafafine, o le Eseta o se taimi e taulai atu ai le lalolagi Kerisiano ma olioli ai i le Toetu mai o lo tatou Alii ma le Faaola o Iesu Keriso. O lena mea e tasi na tupu na suia ai mea uma e faavavau. Na aveeseina e le Faaola ia puniala uma lea e faalavelave i lo tatou auala e toe foi atu ai i se Tama Faalelagi alofa. I le tali atu i ai na Ia talosaga mai ai ina ia tatou “o atu … e fai nuu uma lava ma soo, ma papatiso atu i le suafa o le Tama, ma le Atalii, ma le Agaga Paia:
“Ia outou aoao atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi” (Mataio 28:19–20).
O se isi faamatalaga auiliili o lenei lava savali e tasi o loo tusia lea i le Talalelei a Ioane. I luga o auvai o le Vai o Kalilaia, na fesili faatolu atu ai Iesu ia Peteru, “Pe e te alofa mai ea ia te au?” Na tutusa le tali a Peteru i taimi uma taitasi: “Ua e silafia ou te alofa ia te oe.” Ma o taimi uma lava taitasi na poloaiina ai e le Faaola ia Peteru: “Fafaga i au tamai mamoe… . Fafaga i au mamoe… . Fafaga i au mamoe” (Ioane 21:15–17).
O le poloaiga a le Faaola na tuuina atu ma le lagona i ai ina ia “fafaga i [Ana] mamoe” o loo faaauau pea ona avea ma matafaioi i aso nei. E pei o Peteru ma ona uso anamua, o loo faapea foi se luitau o loo i ai i Aposetolo a le Alii o Iesu Keriso i aso nei ina ia avatu le talalelei i le lalolagi uma. O lenei tiute e seasea lava ona mamao ese mai o matou mafaufau. Soo se Pulega Aoao lava ua i ai le tiutetauave e avea ai ma se faifeautalai.
Ae le na o Aposetolo na fetalai atu i ai le Faaola. Na Ia fetalai atu foi i tagata uma o e ua faamanuiaina e faalogologo i le talalelei ma o se tagata o Lana Ekalesia. I le faaaliga i le Perofeta o Iosefa Samita, na faafaigofie ona faaupuina atu i ai e le Alii: “E tatau foi i tagata uma ua uma ona lapataiina ona lapatai i lona tuaoi” (MFF 88:81).
I le taimi o le konafesi aoao talu ai na matou luitauina ai o tatou alii talavou ina ia saunia lelei i latou e auauna atu i le Alii o Iesu Keriso. Na matou talosaga atu ia i latou ina ia avea o ni faifeautalai tauaogaina, agavaa, ma maelega faaleagaga. Faatasi ai ma tulaga le mautonu o loo i ai i le lalolagi i le taimi nei, e moomia ai ona avea i latou ma “tupulaga sili ona maoae o faifeautalai i le talafaasolopito o le Ekalesia.” (Tagai i le M. Russell Ballard, “O Se Tupulaga Sili Ona Maoae o Faifeautalai,” Liahona, Nov. 2002, 46.) Matou te le o faamoemoe ina ia atoatoa i latou, ae manaomia ona latou naunau, saunia, ma tautino atu ina ia mafai ona latou ausia ia faatulagaga fou o le faaleagaga i le avea ai ma faiaoga o le talalelei. E moomia ona latou iloa le savali o le Toefuataiga o le talalelei a Iesu Keriso ma aoao atu ma le mana i a latou lava upu i lalo o le taitaiga a le Agaga Paia.
O loo matou galulue i le Ekalesia atoa ina ia fesoasoani i a tatou faifeautalai uma ina ia faateleina lo latou matutua faaleagaga. O lenei taumafaiga i le lalolagi atoa ua faatatauina o le “siitia i luga le fua” po o le “siitia i luga le faatulagaga.” Matou te faafetai atu ia te outou matua, epikopo, ma peresitene o siteki mo la outou lagolago i lenei taumafaiga. Matou te faafetai atu foi i le autalavou faamaoni o le Ekalesia mo lo outou naunautai e ola e tusa ai ma faatulagaga a le Alii. Ia faaauau pea ona faamanuiaina outou e lo tatou Tama Faalelagi a o outou saunia e auauna atu ia te Ia i lenei lalolagi pagatia.
A o tatou siitiaina i luga le maualuga o le faatinoga e faamoemoeina mai a tatou faifeautalai, e tatau foi ona tatou siitia i luga le maualuga o le faatinoga e faamoemoeina mai tagata uma o le Ekalesia i le faataunuuina o o tatou tiute faafaifeautalai. Matou te moomia la outou fesoasoani, uso e ma tuafafine, ina ia lagolago ma fesoasoani i a tatou faifeautalai i le sailia ma le papatisoina o ni fanau se toatele a lo tatou Tama Faalelagi. Matou te manaomia outou ina ia outou vaavaaia, puipuia, ma musuia ia faifeautalai, o e o loo avea ma auauna a le Alii. Afai ua ao ona siitia i luga ia faatulagaga, ua siitia i luga mo i tatou uma. E tatau ona sili atu lo tatou faamaoni. E tatau ona sili atu ona tatou mauaina le faaleagaga. E tatau ona tatou saunia i tatou lava ina ia lagolagoina ia faifeautalai i le sailia o na fanau a lo tatou Tama Faalelagi o e o le a taliaina le savali o le Toefuataiga.
Ia manatua, uso e ma tuafafine, matou te le o taumafai e faatalitonu se isi e faatauina se oloa. E leai ma se mea o tatou faatauina atu. Tatou te le o taumafai e faatosina se tasi i le toatele o lo tatou faitau aofai po o lo tatou alualu i luma. O i tatou o tagata o le Ekalesia toefuataiina a Iesu Keriso, ua tuuina mai i ai le mana ma ua auina mai e le Alii lava Ia ina ia saili, tausia, ma aumai ma le saogalemu i Lana Ekalesia ia i latou uma o e saili e fia iloa le upumoni.
I le vaai atu i ai mai lena vaaiga e faavavau, o le mea e ao ona tatou faia e foliga mai e matuai faigofie lava ma manino, ae ua ou iloa o le faia e tagata o le Ekalesia o le galuega faafaifeautalai e mafai ona luitauina ma faapopoleina ai i nisi taimi. Faamolemole, ia faataga mai au ou te fautuaina atu ni nai mea faigofie se tolu lea e mafai ona tatou lagolago atu ai i lenei tiutetauave paia ua tuuina mai e le Alii ia i tatou.
Muamua, e tatau ona tatou faatinoina lo tatou faatuatua ma ia tatalo taitoatasi ma tatalo o ni aiga, ma ole atu mo le fesoasoani e sailia ai ia auala e fetufaai atu ai le talalelei toefuataia a Iesu Keriso. Ole atu i le Alii e tatalaina le auala. Ia faatulagaina ma le agaga tatalo ma lou aiga se aso e avatu ai se tasi i lou fale e aoaoina e faifeautalai. Ia manatua, uso e ma tuafafine, o le Ekalesia lenei a le Alii. Ia tuu atu ia te Ia e taialaina oe e ala i le tatalo faifaipea. Ia talanoa atu i tagata uma e te mafai ona fesootai atu i ai, faatasi ma se tatalo i lou loto. Aua e te faia ni faaiuga ae te lei fesili atu. Aua e te taofia le tala fiafia mai soo se tasi. Ia talanoa atu i soo se tagata, ma faalagolago i le mana ua folafolaina mai o le Agaga ina ia tuu atu ia te oe upu e tatau ona e tautala atu ai. Ia tuu atu ia i latou e faia le faaiuga e talia pe teena ai lau valaaulia. O le a i ai le taimi, o le a tuuina atu ai e le Alii i lou ala i latou o loo sailia le upumoni. O ia le Leoleo Mamoe Lelei. Ua Ia silafia Ana mamoe, ma o le a latou iloa Lona siufofoga, o loo tautala e auala atu ia te oe, ma o le a latou mulimuli atu ia te Ia (tagai i le Ioane 10).
Na saunoa mai Peresitene Gordon B. Hinckley talu ai nei, “O le a avea ma se aso matagofie pe afai o le a tatalo o tatou tagata e le gata mo na o faifeautalai i le lalolagi atoa, ae ole atu foi i le Alii ina ia faamanuia i latou ina ia lagolago atu i faifeautalai o e o loo galulue i totonu o a latou lava uarota” (“Galuega Faafaifeautalai,” Uluai Fonotaga Faaleaoaoga a Taitai i le Lalolagi Atoa, Ian. 11, 2003, 19).
Lona lua, e tatau i taitai ona latou taitai e ala i faataitaiga. O le a musuia ma taitaiina oe e le Agaga i le sailia o i latou o e o loo naunau i la tatou savali. O lou lava tauaogaina o le a e maua ai le lototele ma le malosi faaleagaga e musuia ai ou tagata ina ia matuai fesoasoani i faifeautalai.
I nai tausaga ua mavae atu, sa valaauina ai se tagata liliu mai faamaoni, le Uso ia George McLaughlin, e pulefaamalumalu i se paranesi laitiiti e 20 tagata i Farmingdale, Maine. O ia o se tagata lotomaualalo, e ave loli i se tiliva susu mo le tausiga o le aiga. O lana anapogi ma le tatalo faamaoni, na aoaoina ai o ia e le Agaga i le mea na moomia ona fai e ia ma tagata o lana paranesi ina ia fesoasoani ai ia alu i luma le Ekalesia i lo latou eria. O lona faatuatua tele, tatalo e le aunoa, ma le mana o faataitaiga, na ia aoaoina ai ona tagata i le auala e fetufaai atu ai le talalelei. O se tala ofoofogia, o se tasi o tala maoae faafaifeautalai o lenei tisipenisione. I totonu o le tausaga e tasi, e 450 papatisoga liliu mai i totonu o le paranesi. O le tausaga na sosoo ai na i ai se faaopoopoga e 200 o tagata liliu mai. Na faailoa mai e Peresitene McLaughlin: “O la’u galuega o se peresitene o le paranesi o le aoao [ia tagata fou liliu mai] i le auala e avea ai ma ni Mamona. Ou te aoaoina i latou i le auala e tuu atu ai ni lauga ma ni lesona i le lotu. Ou te aoaoina i latou i le auala e aoao atu ai le talalelei i a latou fanau. Sa ou aoaoina ia tagata fou ina ia avea ma ni tagata malolosi.” Faigofie tele.
I le na o le lima tausaga mulimuli ane ai, sa toe faatulagaina ai le Siteki o Augusta Maine. O le toatele o taitai o lena siteki fou na maua mai lea i tagata fou liliu mai i le Paranesi a Farmingdale. Atonu tatou te fesili nei pe aisea na tele ai se faamanuiaina faapena i na aso, ma o le tali atonu ona sa matuai manaomia vave lava le faamalosia o le Ekalesia. Ou te toe fia faamautinoa atu ia te outou e faapena foi le taua o se tulaga manaomia vave o loo i ai i iunite uma o le Ekalesia i le taimi nei e pei ona sa i ai i lena taimi.
Ua faamanino mai e le Au Peresitene Sili ma le Korama a Aposetolo e Toasefululua e faapea o le galuega faafaifeautalai e ao ona faaogatotonu i totonu o le uarota. Ua i ai i peresitene o siteki ma epikopo le tiutetauave ma le tali atu pe a fesiligiaina ina ia fesoasoani atu i tagata e saili e loto mama ma saunia i latou mo le papatisoga ma se olaga o le auauna atu i totonu o a latou uarota ma siteki. Na saunoa mai foi Peresitene Hinckley, “Ou te fia fautuaina atu e faapea o epikopo uma lava i totonu o le Ekalesia e tuuina atu e avea ma anavatau i ona tagata le, ‘Ia tatou galulue uma ina ia faatoateleina le uarota’” (“Saili Tamai Mamoe, Fafaga ia Mamoe,” Liahona, Iulai 1999, 120).
O se tasi epikopo i le setete o Uosigitone sa mulimuli ma le agaga tatalo i lena fautuaga. O le mea lenei o loo ia faia. E faamaoopoopoina e le aufono a le uarota le galuega faafaifeautalai i totonu o le uarota e auala atu i taitai o le perisitua ma ausilali. E valaaulia atu ia faifeautalai i fonotaga a le aufono a le uarota e talanoaina ai le latou galuega. E tofiaina tagata o le Ekalesia e auai i taimi e feiloai ai ia tagata sailiili ma faifeautalai. E asia faatasi foi e tagata o le Ekalesia ma faifeautalai ia tagata le toaaga ma tagata o le Ekalesia e le auai uma o latou aiga i le Ekalesia. O le tausaga na tea nei na papatisoina ai e le uarota lenei ia ni tagata fou se 46, ma e maualuga foi le faatumauina o na tagata. O i latou o e omai i totonu o le Ekalesia po o e ua toe malolosi mai i lenei uarota ua i ai ni a latou uo ona o loo aofia ai ia le perisitua ma ausilali i le faagasologa o le faaliliuina i lalo o le taitaiga a le epikopo e auala atu i le aufono a le uarota (tagai i le “Ward Council Is Secret of Centralia Ward Success,” Church News, 1 Fep. 2003, 5).
Epikopo, ia faaaofia le uarota atoa i le talaiga o le talalelei. O le a e vaai i ai o le a faamanuiaina oe ma ou tagata e le Alii i le tele o nisi tagata liliu mai ma le toatele o isi o le a toe foi mai ma toaaga. O le galuega faafaifeautalai e le na o le faasologa o mataupu e talanoaina i fonotaga a le aufono o le uarota e i ai ae tatau ona i ai foi i luga o mataupu e talanoaina e le korama a toeaina; o le Aualofa; ma isi korama, vaega, ma ausilali. E tatau ona tuu atu le faamamafa i le papatisoina ma le faatumauina o le toaaga o tama ma tina faatasi ma a latou fanau. O le galuega faafaifeautalai lea a taitai o le perisitua ma ausilali e tatau ona faamaopoopoina e le taitai misiona a le uarota ma le epikopo e ala i le aufono a le uarota. O le faia o lea mea, o le a matuai toaaga ai lava tagata i totonu o a latou uarota.
O le taimi nei, ua i ai i tagata o le Ekalesia se avanoa faapitoa e fetufaai atu ai le talalelei i le faaaogaina lea o se DVD ua ta’ua o le Mauaina o le Faatuatua ia Keriso lea sa auina atu faatasi ma lau mekasini o le Ensign o Aperila 2003. Ia valaaulia ou tuaoi ma uo e faaalu se afiafi faatasi ma oe i le vaitaimi o le Eseta, e fetufaai faatasi ai i le soifuaga, galuega, ma le Toetu mamalu o lo tatou Alii o Iesu Keriso. E mafai foi ona talafeagai lou auai faatasi atu ma faifeautalai ma aoao atu le auala na toefuatai mai ai e le Alii Lana Ekalesia e ala mai i le Perofeta o Iosefa Samita.
Lona tolu, o le galuega faafaifeautalai a tagata o le Ekalesia e le moomia ai le atinaeina o ni fuafuaga faigata po o ni togafiti. E moomia ai le faatuatua—le faatuatua moni ma le faalagolago i le Alii. E moomia ai foi le alofa moni. O le uluai poloaiga sili o le “alofa atu i le Alii lou Atua ma lou loto atoa, ma lou agaga atoa, ma lou manatu atoa… . E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37, 39).
O lea ia tuu atu ai i le mana o le alofa e taialaina i tatou i le fetufaaiina atu o le talalelei i tagata o aiga, uo, tuaoi, o e masani ai i galuega, ma soo se tasi tou te feiloai i ai a o tatou i ai i le olaga. E toetoe lava o tagata uma e mananao ina ia ‘ae’aeina le filemu ma le fiafia. O se manaoga faanatura lava lena o le tagata. E mananao tagata e sailia ia tali i faafitauli o loo latou faafeagai. E matuai faateteleina lava le moni o lenei mea i le lalolagi pagatia o loo tatou nonofo ai nei.
O le alualu i luma i galuega, faateleina o tupe maua, o fale lapopoa, po o taavale fou ma masini faafiafia e le aumaia ai le fiafia ma le filemu tumau. O le fiafia e maua mai le malamalama i le Atua ma le iloaina lea o loo i ai Sana fuafuaga mo lo tatou olioli ma le filemu e faavavau. O le fiafia e maua mai le iloa ma le alofa i le Faaola ma ola i o tatou olaga e tusa ai ma Ana aoaoga. O le fiafia e maua mai le aiga malosi ma sootaga i le Ekalesia e faavae i tulaga taua o le talalelei.
O nisi tagata o le Ekalesia ua faapea mai, “Ou te fefe e fetufaai atu le talalelei ina ne’i faatiga ai i se tasi.” Ua faaalia i aafiaga na oo i ai e faapea e le ita se tagata pe a fetufaai atu i ai le talalelei ma le alofa moni ma le manatu popole i ai. E mafai faapefea ona ita se tasi pe a tatou tauina atu i ai se mea faapenei: “Ou te fiafia i le auala o loo fesoasoani ai la’u ekalesia ia te au” ona faaopoopo atu lea soo se mea lava e taitaiina ai e le Agaga. E faatoa tatou faatiga lava i se isi pe afai e na o lo tatou faataunuuina lava o se tofiga ma ua tatou toilalo e faailoa atu le naunautaiga moni ma le alofa. Aua ne’i galo, uso e ma tuafafine, o loo ia te outou ma au ia mataupu moni lea o le a aumaia ai tagata i le Alii. O le talalelei toefuataia a Iesu Keriso o loo i ai i totonu le mana e aumaia ai le fiafia loloto ma le tumau i le agaga o le tagata—o se mea o le a faatauaina ma faapelepele i ai mo le olaga atoa ma le faavavau. E le na o lo tatou taumafai e aumai tagata ina ia auai i la tatou Ekalesia; o loo tatou faasoa atu ia i latou le atoatoaga o le talalelei toefuataia a Iesu Keriso. Ae pei ona malosi la tatou savali, e le mafai lava ona faamalosia ai tagata. E mafai ona fetufaai atu—o le loto i le loto, agaga i le agaga—ma le avea ma tuaoi lelei faapea ma le fetausiai ma le faaalia o le alofa. E moomia ona tatou vaavaai e le tasi le isi ma ia aapa atu i isi. Afai tatou te faia faapea, o le a tatou faasusulu atu le talalelei i o tatou lava olaga, ma o le a faasusulu atu ai foi ia faamanuiaga o loo tuuina mai e le talalelei.
Ia tatou mulimuli i le apoapoaiga a le Perofeta o Iosefa Samita, “Ina ua mavae ona tautalagia mea uma, o lo [tatou] tiute silisili ma le taua o le talai atu lea o le Talalelei” (History of the Church, 2:478).
E mafai ma e tatau ona tatou faia faalelei, uso e ma tuafafine. Ou te tatalo ina ia tuuina mai e le Atua ia i tatou uma taitoatasi le faatuatua ma le lototele e faateleina ai lo tatou aafia i le lagolagoina o a tatou faifeautalai faamisiona i le faasoaina atu o le talalelei i fanau uma a le Atua i le lalolagi atoa. I le suafa o Iesu Keriso, amene.