Ia Faaali Atu Ua e Iloa

Coleen K. Menlove

Peresitene Aoao o le Peraimeri

E tuuina mai ia i tatou i aso taitasi ni avanoa e faaali atu ai ua tatou iloa le ala e avea ai faapei o Iesu ma mulimuli atu ia te Ia i le faatuatua.

Le fanau peleina e o le Peraimeri, o le tausaga lenei ua tatou faamanatuina ai le lona 125 tausaga talu ona faatulagaina le Peraimeri. Sa faatulagaina e se Perofeta a le Atua ina ia fesoasoani ai i tamaiti ia aoao ma ola ai ma le fiafia i le talalelei a Iesu Keriso. E taua tele le Peraimeri ma o se tausaga matagofie lenei ao tatou faamanatuina. O le mea e sili ona taua, o i matou—o o outou matua, taitai, ma faiaoga—matou te faamamaluina outou tamaiti. Matou te alolofa ia te outou. Matou te fiafia i ituaiga tagata ua i ai outou, ma ituaiga tagata e mafai ona avea ai outou.

O outou o ni fanau a le Atua. O loo i ai so outou Tama Faalelagi alofa o Le e faafofoga ma tali mai ia outou tatalo. E finagalo o Ia ia outou agavaa tou te toe foi atu ma mafuta faatasi ma Ia i se aso. O le iloaina o lenei mea, e mafai ona fesoasoani ia te outou e tapenapena ai mo o outou lumanai faalelalolagi ma le faavavau, faatasi ai ma se faamoemoe atoatoa lelei. Ao outou vaavaai atu i le lumanai, ia vaavaai mamao i tua atu o le aso a taeao. O tusitusiga paia, o aoaoga a Perofeta o aso e gata ai, faapea foi ma pese a le Peraimeri, e mafai ona fesoasoani ia te outou ia malamalama ma saunia ai ina ia outou ausia o outou faamoemoega e faavavau. Ua tuuina mai e Iesu Keriso se faataitaiga ia i tatou i le ala tatou te ola agavaa ai ina ia mafai ona tatou toe foi atu i le afioaga o lo tatou Tama Faalelagi. O le a maua e outou taitoatasi ni avanoa e aoao ai e uiga ia Iesu Keriso ona outou mulimuli atu lea ia te Ia i le faatuatua.

Tatou te faaali atu ua tatou iloa le ala e mulimuli atu ai ia te Ia, e ala i le faia ma le tausia o a tatou feagaiga o le papatisoga i le mauaina ma le faalogo atu i le Agaga Paia. Tatou te faaali atu ua tatou iloa le ala e mulimuli atu ai ia te Ia i taimi uma tatou te aai ma feinu ai ma le agavaa i le faamanatuga ma manatua ai Iesu. Ou te fia talanoa atu ia te outou e uiga i se tasi auala tatou te faaali atu ai ua tatou iloa—e ala i le tausia o poloaiga.

Ua fetalai mai le Alii: “E moni, e moni, ou te fai atu ia te outou, o lau talalelei lenei; ua outou iloa foi mea e tatau ona outou faia i lau Ekalesia; aua o galuega na outou vaai i ai ua ou faia, ia faia foi e outou.”¹ Ou te fiafia tele i le pese a le Peraimeri “O Loo Ou Taumafai e Avea e Pei o Iesu,”² ma ou te fiafia foi i lagona ou te maua pe a ou usuina lea pese. E tuuina mai ia i tatou i aso taitasi ni avanoa e faaali atu ai ua tatou iloa le ala e avea ai faapei o Iesu ma mulimuli atu ia te Ia i le faatuatua.

Ina ua i ai Ioane e 10 ona tausaga i le au feausi, sa ia tau atu i lona faiaoga, e mafai ona ia tauva i tauvaga e faia i aso Toonai ae le mafai ona ia tauva i Aso Sa. I le tauvaga mulimuli lava o lea vaitau, sa fuafuaina ai le moligafua a Ioane e faia i le Aso Sa. Sa ia manatua se lesona o le afiafi faaleaiga e uiga i le faia o filifiliga i se taimi mamao ao lei oo i le aso o se faamoemoe, ina ia mafai ona faigofie ona faia le mea sao pe a oo atu i ai. Sa faapea mai Ioane, “sa ou faia se faaiuga ou te le aau i Aso Sa ae ou te lei lavea i le au. O le mea lena sa faigofie ai ia te au ona tau atu i lou faiaoga e le mafai ona ou aau i le moligafua. Sa ou faapea o le a le fiafia le faiaoga ia te au. Ae ina ua oo i le faaiuga o le tausaga, sa ia tau atu i le au lona mimita ia te au ona o ou talitonuga ma lou ola ai e tusa ma ou tulaga faatonuina.”³ Ua faaalia e Ioane ua ia iloa e ala i le faapaiaina o le Aso Sapati ma le avea ma se faataitaiga o se tasi e mulimuli atu i aoaoga a Iesu. Soo se taimi lava tatou te faapaiaina ai le Aso Sapati, tatou te faaali atu ai ua tatou iloa le ala tatou te mulimuli ai i Ana faataitaiga.

Atonu na oo ia te oe se aafiaga e pei o le mea na oo ia te au ao sefulu tasi ou tausaga. E i ai sau uo ou te fiafia lava i ai ona e foliga mai sa ia iloa le tele o mea. O se tasi aso na ia ofoina mai ai ia te au se sikaleti. Sa ia faapea mai, o le a ia fesoasoani e faaaoao mai ia te au le ulaina o le sikaleti, ma sa taumafai malosi lava o ia e faaoso au i upu e pei o le “e leai se afaina—na o le tasi lava lea.” Sa ou le manao e faaita o ia, ae sa ou filifili ao ou laitiiti o le a ou le ulaula lava. O lenei faaiuga na faigofie ai ona ou faapea atu e leai. Ia faaali atu ua e iloa e ala i le usitaia o le Upu o le Poto.

Ina ua ono tausaga o Katelina, sa ia talosaga atu i lona faiaoga o le ausiva pe mafai ona ia ofuina se toniga e sili atu ona tauagafau mo le faaaliga siva. Ina ua fai atu lona faiaoga e leai, sa iloa e Katelina le mea e tatau ona ia faia. Sa ia tau atu i lona faiaoga o le a alu ese mai o ia ma le vasega ona e tatau ona ia faia le mea e finagalo Iesu na te faia. Sa faapea mai Katelina, “O se faaiuga sa faigata tele ona fai, ae mulimuli ane sa ou lagonaina ai le fiafia.”⁴ Tatou te faaaloalo i o tatou tino e ala i le faia o laei tauagafau. Tatou te faaali atu ua tatou iloa e ala i le tausia o poloaiga ma mulimuli atu i le Faaola.

Tatou te faaali atu ua tatou iloa e ala i le ola i le poloaiga o le alofa atu o le tasi i le tasi. Na saunoa mai lo tatou Perofeta o Peresitene Gordon B. Hinckley e faapea, “E i ai le malosi sili e sau mai lo tatou iloa o oe ma au, o ni atalii ma ni afafine o le Atua… . O se ua i ai lenei malamalama ma na te le faa-aafiaina o ia i se mea uigã po o se mea tauvalea.”⁵ Ua poloaiina i tatou e Iesu ina ia tatou alolofa atu i o tatou tuaoi ia pei o i tatou lava. Ua ia faaalia lenei aoaoga maoae i le faataitaiga i le Samaria agalelei, o le na faia se galuega o le agalelei ma le alofa ina ua leai se isi e fesoasoani atu. Ona fetalai mai lea o le Faaola, “Ina alu ia, ma ia e faapea ona fai.”⁶ Ua aoao mai i tatou e le Faaola ina ia tatou alolofa atu ma faia mea lelei i isi—e oo lava ia i latou e i ai ni tulaga e ese mai. O nei eseesega e le o ni ‘alofaga o le taumafai e aloese mai isi po o le le alofa.

O se uo a Chelsea e valu tausaga na faapea mai, e i ai se tamaitiiti patino lava e le fiafia i ai ona e le o ia o se tasi o la tatou Ekalesia. E te manatu o le a le mea sa fai e Chelsea? O le a se mea e te faia? Sa tau atu e Chelsea i lana uo, e le afaina le le avea o ia ma se tasi o la tatou Ekalesia, ae o ia lava o se tagata lelei.⁷ Tatou te faaali atu ua tatou iloa le ala e mulimuli ai i le Faaola pe a tatou agalelei atu ma faaaloalo i isi.

Ae faapefea le agalelei tatou te faaali atu i tagata o o tatou lava aiga? O le nofoaga e sili ona taua ma o nisi foi taimi o le nofoaga e sili ona faigata ona faaalia ai le agalelei o totonu o o tatou lava aiga, i o tatou matua ma o tatou tuagane ma uso. Ina ua 10 tausaga o lo ma atalii o Mitch, sa manao o ia e fesoasoani mai i lo matou aiga, aemaise lava pe a manao e fiamalie. Pe a le tilotilo atu se tasi, ona ia nonoa lea o se logo i se manoa ma tautau i lona ua, ma faafoliga o ia o se tamaitiiti e faia feau i se faletalimalo, ao ia fesoasoani i feau o le aiga. Pe a iloa e tagata o le matou aiga ua uma ona faia ni feau, na o le pau lava lana tala, “e masalo o le tamaitiiti faifeau.” Na avea Mitch ma se fesoasoani sili ia i matou ma na faapea foi ona ia aumaia mea malie ma le fiafia i lo matou aiga.

O nei tama ma teine ua ou taua, ua latou faaalia ua latou iloa e ala i le faapaiaina o le Aso Sapati, usitaia o le Upu o le Poto, ma le faaalia o le tauagafau i o latou lavalava, ma le agalelei atu i uo ma aiga. E mafai foi ona outou faaali atu ua outou iloa e ala i le tausia o nei poloaiga ma isi foi poloaiga.

O le avea ma se tagata O Le Ekalesia a Iesu Keriso o le Au Paia o Aso e Gata Ai, o lona uiga ua tuuina mai ia i tatou se avanoa e maua uma ai faamanuiaga o le talalelei. E mafai ona e faapea mai i aso taitasi ma le mautinoa lelei:

“O au o se atalii [po o se afafine] o le Atua.

“Ou te iloa e alofa le Tama Faalelagi ia te au ma ou te alofa foi ia te ia.

“E mafai ona ou tatalo atu i le Tama Faalelagi i soo se taimi, ma soo se nofoaga.

“O loo ou taumafai e manatua ma mulimuli atu ia Iesu Keriso.”

Ia fai nei loa se filifiliga o le a outou faaali atu ua outou iloa e ala i le mulimuli atu ia Iesu Keriso i le faatuatua. O le a le faigofie le ala e toe foi atu ai i le Tama Faalelagi. O le a outou manaomia le lototele e taumafai ai pea i lea aso ma lea aso ao outou mulimuli atu i le Faaola. Ou te molimau atu, a outou faia se filifiliga e faaali atu ua e iloa e ala i le mulimuli atu ia Iesu Keriso i le faatuatua, o le a mafai ona e lagonaina le filemu ma le fiafia i le taimi nei seia oo atu i le faavavau. I le suafa o Iesu Keriso, amene.