Elder William W. Parmley
O Le Au Fitugafulu

O nai masina ua mavae atu o le soifua o Elder William Watts Parmley, e foliga mai o se aotelega lea o le tolusefulu i le fasefulu o tausaga na mavae atu nei o lona soifua. Sa tonu ia te ia ma lona faletua o Shanna Nielsen Parmley, o le a litaea mai o ia mai lana galuega o se fomai tipitipi faapitoa i le fatu, ma se polofesa o vailaau i le Iunivesite o Kalefonia i San Francisco, ina ia mafai ai ona o e faamisiona. Sa sauniuni Elder Parmley mo se misiona—a o lea ua tofia e galue auauna i le Korama Lua a Fitugafulu—ua manino ai le aafiaga o lana molimau i lona olaga atoa.

“Latou te silafia uma lava lona faamaoni ma lona alofa i le aiga,” o le saunoaga lea a Sister Parmley, a o ia ta’ua i latou sa faifai mea faatasi ma Elder Parmley. “E matua matilatila lava lona alofa i le Atua.”

O le litaea mai se galuega e seasea ona malolo mai ai ni tagata, e tele avanoa sa maua e Elder Parmley, ua 67 nei tausaga o lona soifua, e fetufaai atu ai i tagata le mafuaaga ua ia faataatia ese ai tulaga faafomai po o vailaau. Sa ia ta’ua se tagata sa la feiloai talu ai nei i se fonotaga faafomai faaletausaga. Sa ia faamatala atu i tagata sa auai, le mafuaaga o le a le toe faigaluega ai. O le aso na sosoo ai, sa faapea atu ai sana paaga, “Sa le mafai ona ma momoe ma lo’u toalua i lo ma mafaufau i lau saunoaga lea sa fai. Toe faamatala mai le misiona lea na e ta’ua.” Sa toe faamatala e Elder Parmley, ona faapea mai lea o le tagata lea, “Pe mafai ona tatou o?”

O le valaauga o Elder Parmley i le Au Fitugafulu, e fiafia o ia e auauna atu. O le tali masani lava lea mai se tasi e faamatalaina lona soifua o se fomai, o se tane, o se tama ma se tamamatua, ma se tagata o le Ekalesia.

“E faapei ona fai mai le Tupu o Peniamina, o le mea moni lava lena lea na tatou o mai e fai,” o le tala lea a Elder Parmley. ”Tatou te auauna atu o le tasi i le isi, o le tatou auauna atu lava lea i le Atua.”

Sa faaipoipo Elder ma Sister Parmley i le 1961 i le Malumalu o Sate Leki. E toafa o la’ua alo ma a latou fanau e toavalu. Na soifua mai Elder Parmley, o le alo o Thomas Jennison Parmley ma LaVern Watts Parmley, i le Aai o Sate Leki i le aso 22 o Ianuari 1936. Sa faamisiona o ia i le Misiona a le Setete o Matu i sisifo, ma sa avea foi o ia o se epikopo, peresitene o le siteki, ma se sui risone, ma se Fitugafulu Pule Eria.