O Tausaga o le Matua
Ia faatauaina tagata matutua i ituaiga tagata o loo i ai i latou, ae le na o mea e mafai ona latou faia.
I tausaga ua mavae i le afiafi o le aso a o lumanai le Kerisimasi, na maliu ai se tama a so’u tei e lima tausaga le matua i le niumonia. Sa faapotopoto atu le aiga i tafatafa o le pusa maliu mo le tatalo faaleaiga. Sa faataatia se tamai palanikete, na faia e lona tina, e faalava i luga o vae o le tamaitiiti.
Ae latou te lei tapunia le pusa maliu, sa savali atu lo’u tina, ma opoopo i le tina faavauvau, ma fesoasoani ia te ia e tatalaina le palanikete ma aui uma ai le tino o le tamaititi. O le taimi mulimuli lava na vaai ai ona matua i le la tama, e pei lava o loo moe, ma sa ufiufia i lena palanikete e fiafia lava i ai. O se taimi matuitui naua. O le mea lena e fai e tina matutua!
Na matou toe foi atu i le Aai o Polika mo le maliu o le tama o lo’u toalua, o William W. Smith. O se alii talavou sa ou iloaina o se tamaitiiti aoga o le seminare sa tutu i autafa o le pusa maliu, sa matuai ootia lava. Ou te leiloa na te iloaina le tama o lo’u toalua.
Sa fai mai o ia: “O le tasi taumafanafana sa ou faigaluega ai ia te ia i le faatoaga. Sa talanoa mai le Uso ia Smith ia te au e uiga i le alu i se misiona. Sa le mafai e lo’u aiga ona tausia se faifeautalai. Na ta’u mai e le Uso ia Smith ina ia ou tatalo i ai, ma fai mai, ‘Afai e te fuafua e te alu i se misiona, o le a ou totogia lau misiona,’ ma sa ia faia lava.”
E leai ma se isi o lo’u toalua po o lona tina na iloa lena mea. O se tasi lena o mea e faia e tama matutua.
E 10 le ma fanau. I se tasi taeao o se Aso Sa faalemanuia a o laiti lo ma aiga, sa i ai lo’u toalua i le sauniga faamanatuga. Ou te lei i ai i le Aso Sa, e pei lava ona masani ai. Na toeitiiti tumu lelei le nofoa i le ma fanau.
Sa savali filemu mai lava le Tuafafine ia Walker, o se tina matua ua sinasina lona lauulu, mai se laina nofoa i tua ma faavava mai i le laina o loo i ai le ma fanau ulavavale. Ina ua mavae le sauniga, sa faafetai atu lo’u toalua ia te ia mo le fesoasoani.
Sa faapea atu le Tuafafine ia Walker, “E tele naua au mea e fai, a ea?” Sa luelue atu le ulu o lo’u toalua. Ona popo lea o lona lima e le Tuafafine ia Walker ma faapea atu, “E tele nei au mea e fai; ae tumu lou loto i le olioli i se taimi mulimuli ane!” E pei o se valoaga lana faamatalaga malu. O le mea lena e faia e tina matutua!
Sa ma pulefaamalumalu i le Misiona a Niu Egelani. O se tasi o a ma faifeautalai na faaipoipo ma e toalima le fanau. Na malaga o ia e aumai se taavale lapoa mo lona aiga ma e lei toe foi mai lava. Na maua mulimuli ane lona tino i lalo o se alalaupapa; ae ua gaoia lana taavale.
Sa ou telefoni atu i le peresitene o lana siteki ina ia tuuina atu le fesoasoani i le aiga. Ua uma ona ia tuuina atu.
Na faapea mai le tama matua: “Ua matou iloa lo matou tiute. Matou te le moomia se fesoasoani mai le Ekalesia. Ua matou iloa lo matou tiute.” O le mea lena e fai e tama matutua!
O lo’u faamoemoe o le lauga atu lea ia te outou e uiga i matua o matua ma lauga atu ia te i latou—o tama ma tina matutua—ma isi tagata matutua e leai ni a latou lava fanau ae o loo avea ma ni matua o matua.
Ua ta’u mai e tusitusiga paia ia i tatou: “O loo i ai le poto i e ua toeaina; o le faalevaleva foi o aso e i ai le faautauta” (Iopu 12:12).
I se tasi fonotaga a se siteki, sa ou maitauina ai se aofaiga toatele e le masani ai o tagata matutua, o le toatele lava o i latou ua maliliu a latou tane. Sa ou tauina atu i le peresitene o le siteki lo latou lelei tele.
Na tali mai le peresitene, “Ioe, ae le o malolosi i le Ekalesia,” o lona uiga e lei auauna atu o ni taitai po o ni faiaoga. Na ia tautala e pei o loo fai i latou ma se avega.
Sa ou toe ta’uina atu ana upu, “E le o malolosi i le Ekalesia?” ma fesili atu, “Ae o malolosi i latou i le talalelei?” Sa tau le malamalama lelei o ia i le taimi muamua.
E pei lava o le toatele o i tatou, ua manatu tele o ia i mea e faia e tagata ma ua ia le amanaiaina ai ia ituaiga tagata e i ai i latou, o se punaoa taugata o le malamalama, atamai, ma musumusuga.
O loo tatou faafeagai ma se luitau taufaamatau. O le faitau aofai o tagata i le lalolagi atoa ua pau i lalo. O le aofai o tagata e fananau mai i le tele o atunuu ua alu i lalo ae o mea e faamoemoeina mai le olaga ua alu i luga. Ua toalaiti aiga—ua taofiofia ma le manatu i ai. O nisi atunuu, i ni nai tausaga o lumanai o le a toatele atu matua o matua nai lo fanau. O le matutua o tagata e i ai ona taunuuga taua i le tamaoaiga, tulaga faalauaitele, ma le faaleagaga. O le a aafia ai le alualu i luma o le Ekalesia.
E tatau ona tatou aoaoina a tatou talavou ina ia faalatalata atu i tama ma tina matutua.
Na faatonuina talu ai nei e le Au Peresitene Sili ia tamaitai talavou ua taulalata atu i le avea ma se tamaitai matua ina ia auai faatasi ma tina ma tina matutua i le Aualofa (tagai i le tusi a le Au Peresitene Sili, 19 Mati 2003).
O nisi tamaitai talavou e le mananao i ai. E sili ia i latou le faatasi ai pea ma tamaitai latou te tupulaga.
Tamaitai talavou: Aua ne’i outou faavalevalea i le misia o lenei fegalegaleaiga ma tuafafine matutua. O le a tele atu se aoga latou te aumaia i lou olaga nai lo gaoioiga na tou te fiafia tele i ai.
Taitai: Aoao teineiti ina ia faalatalata atu i o latou tina ma tina matutua ma tamaitai matutua o loo i le Aualofa. O le a latou maua ai se fegalegaleaiga e pei o lea o loo maua e alii talavou i korama a le perisitua.
O mea uma lava o loo taulai atu i a tatou talavou, o polokalama uma, o mea uma tatou te faia mo i latou, o le a le atoatoa sei vagana ua tatou aoaoina i latou i le faamoemoega o le Toefuataiga. O ki o le perisitua ua toefuatai mai ma ua faaalia mai le pule e fai ai faamauga ma ua fausia malumalu e faamauina ai faatasi augatupulaga. Mai lava anamua o loo aumaia ai ia faaaliga lea o loo aofia ai lena mataupu taua ma le faavavau, “E faaliliuina loto o matua i fanau, ma loto o fanau i o latou matua” (Malaki 4:6).
Epikopo: Pe e te iloaina ea o nisi o faafitauli o loo e popole ai e uiga i le autalavou, faapea ma isi, e mafai ona foiaina pe afai o le a latou faalatalata atu i o latou tama ma tina faapea o latou matua matutua, o e matutua?
Afai o loo mamafatu lau avega i le tele o fautuaga e tuuina atu, o loo i ai tuafafine matutua, o tina matutua i totonu o le uarota, o i latou na e mafai ona faa-aafiaina tamaitai faatoa faaipoipo ma avea e pei o ni tina matutua ia te i latou. Ma o loo i ai foi tama matutua mo alii talavou. O tagata matutua o loo i ai le toamalie, le filemu lea e maua mai aafiaga na oo i ai. Ia aoao e faaaoga lena punaoa.
Na saunoa mai le Perofeta o Iosefa Samita, “O le auala e malamalama ai i se mataupu taua o le aumaia lea ia te outou o alii atamamai [ma tamaitai], o alii [ma tamaitai] ua lava le silafia, ina ia lagolago i aufono i taimi uma o faigata” (Teachings of the Prophet Joseph Smith, sel. Joseph Fielding Smith [1976], 299).
O loo tatou taumafai e faapotopoto mai le autalavou ae galo ia i tatou ona aumaia ma isi augatupulaga. E tele naua mea e mafai ona faia e tagata matutua. Afai e te vaaia ni tagata matutua e le o malolosi i le Ekalesia, ia e fesili ifo ia te oe lava, “Pe o malolosi ea i latou i le talalelei?”
Aua nei le amanaiaina se mana lagolago o loo i ai i tatalo a matua ma matua o matua. Ia manatua “e aoga tele le tatalo faatauanau a le tagata amiotonu” (Iakopo 5:16).
O Alema le Itiiti, o se tagata tetee. Sa taia o ia e se agelu o le na tauina atu ia te ia, “Faauta, ua faafofogaina e le Alii talosaga a lona nuu, atoa foi ma talotaloga a lana auauna o Alema, o lou tama lea. Aua ua tatalo o ia ma le faatuatua tele ona o oe, ina ia aumaia oe i le malamalama o le upumoni; o le mea lea, na ou sau ai e faamautinoa ia te oe le mana ma le pule a le Atua, ina ia talia talosaga a na auauna, e tusa ma lo latou faatuatua” (Mosaea 27:14).
Na ma vaai ma lo’u toalua i le maliliu o o ma matua matutua ona sosoo ai lea ma o ma matua. O nisi o aafiaga na oo i ai, sa ma manatu muamua lava i ai o ni avega po o ni faafitauli ae o lea ua avea o ni faamanuiaga.
Na maliu le tama o lo’u toalua i totonu o lo matou fale. Sa ia moomia le tausiga faifai pea. Na aoaoina e tamaitai tausimai le ma fanau i le auala e tausia ai lo matou tama matua ua faataotolia i lona moega. O le mea na latou aoaoina e matuai taua lava ia i latou ma i ma’ua. E maeu lo matou faafetai ona o le latalata mai o ia ia i matou.
Na faafiaafe ona toe totogi i ma’ua i aafiaga na mauaina i le ma fanau. O se aafiaga sili lena mo le ma fanau, o se mea na ou aoaoina a o ou laitiiti ina ua maliu lo’u Tamamatua o Packer i lo matou fale.
Ia faatauaina tagata matutua i ituaiga tagata o loo i ai i latou, ae le na o mea e mafai ona latou faia.
Pe ua outou manatunatu ea i le mafuaaga na faatulagaina ai e le Alii le Au Peresitene Sili ma le Korama a Aposetolo e Toasefululua ina ia avea pea alii matutua ma taitai sinia o le Ekalesia? O lenei faatulagaga o le faasolo mai le matua e faatauaina le atamai ma le malamalama e sili atu nai lo le talavou ma le malosi faaletino.
O le averesi o le matutua o le Au Peresitene ma le Toasefululua i le taimi nei o le 77 tausaga le matua. Matou te le o toe vavave ma faigofie ona gaoioi. Atonu ua pasi lo matou taimi tiotio. Ae ui i lea, ua faatulagaina lava e le Alii i le auala lenei.
Po o le tasi i le lua konafesi talu ai, na saunoa ai ia Joseph Wirthlin o le a ia luiina se tasi o le Toasefululua i se tuuga. Sa ou mafaufau i se tasi taimi, “Ua lelei, o le a ou taliaina le lui.” Ona ou mafaufau lea e sefe atu le taututuu ma le Uso ia David Haight lea ua 96 tausaga le matua. Ona ou toe manatunatu lea i ai ma ou mafaufau ai loa faapea e mafai lava ona tapa au e David i lona tootoo, ona ou faiaina ai lea. O lea na ou tuu ai loa!
Afai e tuufaatasi tausaga o le Au Peresitene ma le Toasefululua, matou te mauaina ai le 1,161 tausaga o le olaga faatasi ai ma se anoanoai o malamalama uiga eseese. Ae 430 tausaga tuufaatasi, o le avea ai ma ni Au Pulega Aoao o le Ekalesia. E toetoe lava o mea uma matou te talanoa i ai, e i ai lava se tasi o i matou sa i ai iina, ua uma foi lena—e aofia ai le auai i le militeli!
O loo tatou ola nei i taimi faigata. I olaga atoa o a tatou talavou, o le a le faaitiitia lava ia faafitauli ma e mautinoa lava le faateleina. E tuuina mai e tagata matutua se malamalama mautinoa lea e faapea e mafai ona tumau mea uma.
Ua faaipoipo le ma fanau ma ua tuua uma le aiga ma ua ola lava i latou.
O se tasi aiga sa malaga ese atu i se latou taavale tuai ma le la fanau. Sa tagi lo’u toalua. Sa ou faamafanafana ia te ia, i lo’u faapea atu i ai, “O loo i ai foi le Ekalesia i le mea la e o i ai. O le a i ai foi se tina matua iina e tali i ana fesili e uiga i le kuka po o le tausiga o fanau ma se tama matua e aoao lona toalua i mea e fai.”
E mafai ona maua se tinamatua fai i le Aualofa. Ae o le a maua se tamamatua fai i korama a le perisitua. Ae le maua uma foi i le Ekalesia ia ni tamamatutua ma ni tinamatutua.
Na faatau e se tasi atalii se tamai fale i se setete mamao ese. Na ia faaali mai ia te au ia piliki o loo i se tulimanu ua solo i lalo. Na ia fesili mai po o le a le mea e tatau ona ia faia.
Ou te leiloa, ae sa ou fesili atu, “E i ai se ulugalii matutua e nonofo latalata mai ia te oe?”
“Ioe,” o lana tala lea, “e i le isi itu auala, e na o ni nai fale i le faasologa atu i lalo o loo i ai se ulugalii matutua.”
“Aisea e te le alu ai e fai i ai e sau e vaai i ai. Na te iloa lelei lava le tau o outou iinei.”
Sa faia lena mea ma sa ia maua mai se fautuaga i se toeaina matua o le sa vaai foi i faafitauli faapena e pei o le toatele o isi. O mea na e mafai e tamamatutua fai ona latou faia.
“Ia e ava i lou tama ma lou tina: ina ia faalevaleva ai ou aso i le nuu o le a foaiina mai e Ieova lou Atua ia te oe” (Esoto 20:12).
Na aoao mai le Aposetolo o Paulo e faapea o “loomatutua” e tatau ona aoaoina ia fafine muli ae o “toeaiina” e tatau ona apoapoai atu i taulelea, “ia avea oe ma faaaoao o galuega lelei” (tagai i le Tito 2:1–7).
O lenei ua tatou matutua, ma e i ai le taimi, o le a valaauina atu ai i tatou i le isi itu o le veli. Tatou te le teenaina lena mea. Tatou te taumafai e aoao atu ia mea e mafai ona tatou aoaoina i le tele o tausaga ia i latou o e laiti—i o tatou aiga ma isi.
E le mafai ona tatou faia le mea sa tatou faia muamua, ae ua sili atu i tatou nai lo le taimi muamua. O lesona o le olaga, o nisi e matuai tiga lava, e agavaa ai i tatou e fautuaina, faasa’oina, ma lapataia o tatou talavou.
I le pulapula la goto o o outou soifua e tele naua mea e ao ona faia, tele mea e ao ona faataunuu. Aua e te faasee atu i se tulaga litaea mai le olaga, i le na o fiafiaga. O lena mea o le a leai se aoga, o se manatu faapito foi. Atonu ua uma sau misiona ma ua faamaloloina oe ma ua e manatu ai ua maea lau auaunaga i le Ekalesia, ae lei faamaloloina lava oe mai le malosi i totonu o le talalelei. “Afai,” na fetalai ai le Alii, “o ia te outou le manao e auauna atu i le Atua ua valaauina outou i le galuega” (MFF 4:3).
Atonu e oo atu i le taimi mulimuli, ua e matua ma vaivai, ma e iloaina ai o le misiona sili lava o misiona uma o le faamalosia lea o lou lava aiga, ma aiga o isi, ina ia faamauina augatupulaga.
O lenei, o loo o’u aoaoina atu se mataupu faavae moni. O lea ou te aoaoina ia le mataupu autu. Ua tusia “e tutusa lelei lava le mataupu ma le mataupu faavae ua poloaiina ai outou i le faaaliga” (MFF 128:7).
I le viiga “Le Faavae Malosi,” lea sa lolomiina i le 1835 i totonu o le uluai tusipese a le Au Paia o Aso e Gata Ai, tatou te mauaina ai upu nei:
“E faamaonia lo’u alofa le liua
E o’u tagata i lo latou matutua;
Ma a sinasina o o latou ao,
Ou te sapai lava, ia te i latou.”
(“Le Faavae Malosi,” Viiga, nu. 45, f. 6.)
Ia faamumu pea le maelega o lau molimau i le talalelei toefuataia ma lau molimau i le Togiola ina ia mafai e a tatou fanau ona faamalosia i latou lava i le maelega o lou faatuatua. O le mea lena e fai e tama ma tina matutua! I le suafa o Iesu Keriso, amene.