O Le Faatuatua [a o Feagai ma Puapuaga ma Faigata] E Aumaia Ai le Filemu ma le Olioli

Elder Robert D. Hales

O Le Korama a Aposetolo e Toasefululua

Pe o le a lava le pogisa atonu o i ai le lalolagi i ona po nei, pe o a lava matagi ma afa o fetaiai ma le tagata lava ia, … e mafai ona fai mo tatou le olioli i le taimi nei.

Ina ua maea ona aoao atu Iesu i le motu o tagata, ona malaga atu ai lea o Ia ma Ona soo i le itu i sasae o le apitaogalu o le Sami o Kalilaia. Ua oo mai le po ona taoto lea o le Faaola i le aluga ma tofa lelei ai i le taumuli o le vaa. Ona to mai lea o le “afa, o le matagi tele lava, ua fati mai peau i totonu o le vaa ma ua tumu ai.” Sa matatau le au soo ona latou fafagu ai lea ia te Ia: “Le aoao e, e te le manatu mai ea ia te i matou a fano?”¹ Sa toafilemu Lana tali e pei ona masani ai: “Se a le mea ua outou matatau ai, outou e faatuatua itiiti?”² Ona tulai lea o ia ma na vavao atu i le matagi, ua fetalai atu foi i le vai, Faalologo ia, ina malu ia. Ona mate lea o le matagi, i le ua matua malu.”³

O Ia Le sa foafoaina le lalolagi, ua toe poloaiina foi elemene.⁴ Sa tuufesilisili Ona soo i le maofa tele, “Po o ai lava lenei, ina ua faalogo le matagi ma le vai ia te ia?”⁵

O loo tatou ola i taimi fesouai. Ua oo mai se matagi tele o mea leaga i le lalolagi. O loo felafoai solo i tatou e matagi o le amioleaga; ua fafati mai foi galu o taua ma taia ai lo tatou vaa. E pei ona tusi atu o Paulo ia Timoteo: “O aso e gata ai e oo mai ai aso faigata. Aua e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga, … O e ua peiseai ua amioatua; a o le mana ua i lea mea ua latou teena.⁶

E moni lava e siomia i tatou e puao taufaamatau, ae peitai, e faapei lava ona aumai e le fetalaiga a le Faaola le filemu i le Au Aposetolo, e faapena foi ona latou aumaia le filemu ia i tatou i aso nei: “Pe a tou faalogo i taua ma tala o taua, aua tou te atuatuvale; aua e tupu lava ia mea a e lei oo i le gataaga”⁷ “Afai ua saunia outou, o le a outou le matatau ai lava.”⁸

Na fetalai atu le Ieova ia Elia, “Ina alu ia oe i fafo, ma e tu i le mauga i luma o Ieova.” Sa usitai Elia, ma ina ua mavae ia matagi tetele ma mafuie ma le afi, ona afio ane ai lea o Ia i le “leo filemu ma le itiiti.” Sa fesili atu le Alii ia Elia, sa lafi i totonu o se ana, “Elia e, se a lau mea e fai iina?” Ona tali atu ai lea o Elia, “Aua ua tuua e le fanauga a Isaraelu lau feagaiga, ua latou soloia i lalo ou fata faitaulaga, ua fasiotia foi e i latou au perofeta i le pelu, ua toe na o au lava; ua latou fia fasioti foi ia te au.” Peitai, sa i ai galuega taua a le Alii e tatau ona faia e Elia, ma o le mea lea na “fetalai atu ai ia te ia, Ina alu ia oe, ma toe foi i lou ala.”⁹ Ona alu ai lea o Elia.

E ao foi ia i tatou ona tatou o ese mai i o tatou ana mafanafana, aua e i ai foi a tatou galuega taua e tatau ona fai. O le a puipuia i tatou e le Alii, ma fesoasoani mai, e ala i le leo filemu ma le itiiti o Lona Agaga.

Manatua sa Ia aoaoina le uso o Iareto i le auala e fau ai vaa mo lona aiga, e fesoasoani ai ina ia latou laasia ma le saogalemu vasa e tele, ina ia faasaoina ai i latou mai matagi ma galu, ma ia latou taunuu atu ai i le nuu na folafolaina.

O nei vaa e tulaga ese lava lo latou fausaga, ae na matua saogalemu lava: “Ua oo foi ina ua tanumia i latou i le sami, ua le afaina i latou i le suasami, … ua le mafai foi e manu o le sami ona faamalepe ia vaa, ua le mafai foi ona faasaunoa i ai se i’a manu.”¹⁰

Peitai, sa leai ni sulu o nei vaa. O lea sa atugalu ai le uso o Iareto. Sa le manao o ia e faimalaga lona aiga i le pogisa; ma o lea, sa le faatalitali ai ina ia poloaiina o ia, ae sa ia ava’e lea atugaluga i le Alii. “Ona fetalai mai ai lea o le Atua i le uso o Iareto: Po o le a se mea tou te loto i ai ou te faia, ina ia ia te outou le malamalama i o outou vaa?”¹¹

O le tali a le uso o Iareto i lenei fesili, sa manaomia ai se taumafaiga maelega i lana pitolaau. Sa alu a’e o ia i le Mauga o Selema “ma gaosia mai le papa o maa laiti e sefulu ma le ono.”¹² Ona ia fai atu lea i le Alii ina ia totoo ane i nei maa ina ia mafai ai ona maua le malamalama.

I le avea ai o i tatou o ni matua ma taitai, e tatau ona tatou manatua “e le tatau ona poloai [mai le Alii} i mea uma.”¹³ Ia faapei o le uso o Iareto, e tatau ona tatou manatunatu ma le faaeteete i mea o loo manaomia e tagata o o tatou aiga, ia fai se fuafuaga e taulima ai na tulaga o loo manaomia, ona ave lea o le tatou fuafuaga i le Alii i le tatalo. O le a manaomia ai i lea tulaga le faatuatua ma taumafaiga i la tatou pitolaau, ae o le a fesoasoani mai o Ia ia te i tatou a o tatou sailia Lana fesoasoani ma faia Lona finagalo.

Ina ua maea lenei aafiaga ma le Alii, sa faaauau pea e le uso o Iareto ona saunia o ia lava i le maelega atoatoa mo le malaga o lo o lupe.¹⁴ E ao foi ia i tatou ona gauai atu i aoaoga a o tatou perofeta. Ua fautuaina i tatou e perofeta soifua i lea taimi ma lea taimi ina ia faatulagaina lelei o tatou olaga—ia aloese i le aitalafu, ia teu faaagaga meaai ma isi mea e tatau ai, ia totogi a tatou sefuluai, ia maua aoaoga e tatau ai, ma ia tausi i poloaiga. Pe ua tatou usitaia ea nei faatonuga taua?

Pe a tatou tilotilo atu i mata o a tatou fanau ma a latou fanau, tatou te vaaia le faaletonu ma le atuatuvale i nei aso. Soo se mea lava o le lalolagi e o atu i ai nei fanau faapelepele, latou te faalogo i le leai o ni galuega, o le mativa, o taua, o le ola le mama, ma solitulafono. Latou te tau mafaufau, “Pe mafai ea faapefea ona matou taulimaina nei faafitauli?”

Ina ia maua tali, latou te toe tilotilo mai foi i o tatou mata ma faalogologo mai i a tatou upu. Pe o latou faalogo mai ea o tatou tautatala ma le faamaoni ma tutumu i le faamoemoe, tusa lava pe o a faigata o o tatou taimi?

E tatau ona latou vaaia i tatou o faaauau pea ona tatalo ma suesue faatasi i tusitusiga paia, fai afiafi faaleaiga, ma aufono faaleaiga, ia auauna atu ma le faamaoni i o tatou valaauga faaleEkalesia, ulu atu e le aunoa i le malumalu, ma usiusitai i a tatou feagaiga. A latou vaai mai o tatou tutumau i le tausiga o poloaiga, ona magoto ai lea o o latou atuatuvalega ae faateleina lo latou talitonuga i le Alii.

O le faaalia o lo tatou faatuatua i taimi o faigata ma puapuaga, tatou te faamautinoa atu ai ia te i latou tatou te le toilalo i le matamataita o le fili. Sa tatalo Iesu i Lona Tama mo i tatou: “Ou te le ole atu ina ia e aveese ia te i latou i le lalolagi, a ia e tausi ia te i latou ina nei leaga.”¹⁵ O le a tali mai lena tatalo e tusa ai ma lo tatou faatuatua, i le itula ma le vaitau a le Tama Faalelagi.

O le taimi lenei, o lo o i ai le aano ma le faamoemoega o o tatou luitau faalelalolagi. Manatu i le Perofeta o Iosefa Samita: o lona soifuaga atoa sa feagai ai o ia ma faafitauli taufaamatau—o ma’i, faalavelave, o le mativa, o le le malamalama, o tuuaiga sese, ma sauaga. Atonu o le a faaosoosoina se tasi e fesili faapea, “Ae aisea na le puipuia ai e le Alii Lana perofeta mai nei toatuga, ma saunia mo ia ni punaoa e puna pea, ma tapunipuni gutu o tagata na tuuaia o ia?” O le tali, E ao ona tofu oo i tatou taitoatasi i aafiaga patino e avea atili ai e faapei o le Faaola. I le faleaoga o le olaga nei, e tele lava o tiga ma puapuaga o faiaoga na, peitai o le aano lava o lesona o le faaatoatoaina ma faamanuia ma faamalolosia i tatou, ae le o le faatamaia. Na fetalai atu le Alii ia Iosefa, o le ua tumu i le faamaoni ma le faatuatua:

“Lo’u atalii e, ia i ai le filemu i lou agaga; o lou tiga ma ou puapuaga o le a na o sina ituaso itiiti lava.”¹⁶

“Afai e tuulafoaiina oe i le sami loloto; afai e taupulepule peau o le sami e faasaga atu ia te oe; afai e avea matagi afa mou fili; afai e faaputuputuina le pogisa e le lagi, ma au faatasi elemene uma e puipuia le la; … ia e iloa ai, lo’u atalii e, e tuuina atu ia te oe le poto masani ona o ia mea uma, ma avea ai mou lelei.”¹⁷

E ui lava ina tele puapuaga ma faigata i le soifua o le Perofeta o Iosefa, ae na faataunuuina ai mea silisili mo le Toefuataiina mai o le talalelei i nei aso e gata ai. Na malamalama ai Iosefa, ma sa aoaoina ai i tatou, a o tauivi o ia ma se luitau, sa le i tuulafoaiina o ia e le Faaola ia fano. E faapena foi, o tofotofoga o lo tatou faatuatua, o avanoa anagata ia e iloa ai le loloto o le manatu mai o le Matai i le manuia o o tatou agaga ina ia tumau ai e oo i le iuga.

I o tatou vaitaimi, e aapa mai le aao faatonutonu o le Alii ia i tatou e ala i sauniga o Ona malumalu paia. Na saunoa le Perofeta o Iosefa i uluai Au Paia i Navu, “Tou te manaomia se faaeega paia, uso e, ina ia mafai ai ona saunia outou ma mafai ona manumalo i mea uma18 E maeu lona sa’o! O le faamanuiaina i feagaiga o le malumalu ma le maua o faaeega paia, e mafai ai e le Au Paia o Aso e Gata Ai ona onosaia ma le faatuatua ia puapuaga. Ina ua tini taunuu lana malaga faapaionia, sa tusia ai e Sarah Rich, “A na leai le faatuatua ma le malamalama na faaee mai ia i matou i lena malumalu … semanu e pei le matou faigamalaga … o se osooso i le pogisa.”¹⁹

Ou te matuai maofa lava i le tele naua o faigata ma puapuga na oo i ai le Faaola. E ui lava o Ia o le Alo Pele e Toatasi o le Tama, ae sa saili foi mai le amataga ia tagata agapiopio e faaumatia Lona soifua. Sa mulimulitai foi ia te ia i Lana misiona atoa se matagi o tala faatupu, o talapepelo, ma sauaga i soo se mea lava sa Femaliuai ai o Ia.

E sili lo’u maofa pe a ou mafaufau i le vaiaso na oo ai ina maliu o Ia: sa tofotofo e le aufaitaulaga sili Lana pule, sa taumafai e maileia o Ia, ma e faalua ona latou taupulepule e fasioti ia te Ia. I Ketesemane, a o momoe Ona soo, sa mafatia o ia i agasala a tagata uma ma sa puna mai le toto i puninii uma o lona tino. Sa faalataina o ia, saisai, tu’i i fesili, fepo, tuufeanu i ai, ma sasaina. Ina ua maea ona tu’i i fesili e le aufono a faipule, sa tauemuina o ia e Herota ma iu ina auina atu ia Pilato, i le mea na faatu ai o Ia i luma o le motu o tagata lototiga. Sa sasaina o Ia ma faapaleina i le paletuitui, ma sa faatonuina e amo Lona satauro agai i Kolokota. Sa tutui fao i Ona lima ma vae. Sa sii ae Lona tino ma faatautau i le va o tagata faomea. Sa faia foi e fitafita se vili i Ana meatotino, ma latou tuuina atu se vineta e faamalie ai Lona fiainu. Ina ua mavae itula e ono,²⁰ ona Ia tuuina atu lea o Lona agaga i aao o Lona Tama, ona to ai lea o lana manava, ua maliu.

Pe a tatou mataituina le toe vaiaso o le soifua o le Faaola mai se vaaiga faale-olaga nei, atonu o le mea muamua lava e tau i ai manatu o le mafatia ma le faataumaoia. Atonu o le na o le tina o le Faaola ma isi o loo fetagisi i le satauro o le a tatou iloa atu, o fitafita ua matatau, o le galulu o le fogaeleele, o papa ua mavaevae, o le ie pupuni o le malumalu ua saeluaina, ma le pogisa na ufitia ai le lalolagi i le tolu itula. Sa i ai foi se vaaiga faapena na tulai mai i le Lalolagi Fou. O le aotelega, sa tatou vaaia matagi malolosi matautia.

Ae toe vaai nei la i ai—o le taimi la lenei vaai i ai e ala i mata o le faatuatua.

I na toe vaiaso aupito mafatia o Lona soifua, sa aoao mai ai e Iesu, ma molimau, siitia, faamanuia, ma faamalosia i latou sa siomia ai o Ia. Sa Ia toe faatuina mai Lasalo mai le oti, aoao atu e uiga i Lona Tama, faatulagaina lelei le malumalu, faamatala atu isi faataoto, molimau e uiga i le fafine ua oti lana tane na foai atu lana tupe itiiti, aoao Ona soo e uiga i faailoga o Lona Afio Mai Faalua, asiasi atu i le fale o Simona le lepela, faatulaga le faamanatuga, mulumulu vae o le Au Aposetolo, ma aoao Ona soo ina ia fealofani. Sa Ia molimau atu i Lona tulaga paia o le Alo o le Atua ma sa aoao atu foi e uiga i le Fesoasoani—o le Agaga Paia. I Lana tatalo maoae o le Faatoga, sa Ia tatalo atu ai i Lona Tama mo Ana Aposetolo ma i latou uma e talitonu i a latou upu, “ina ia maua e i latou [Lona] olioli i totonu ia te i latou.”²¹

I Ona itula aupito pogisa, e le i faaitiitia le sulu o le filemu ma le olioli. Sa atili ai ona malamalama! Ina ua mavae Lona maliu, sa faaali atu o Ia ia Maria le Makatala. Ai se tele o le olioli na lagonaina i lena taeao a o salalau atu le talafou: “Ua toe tu mai o Ia”!²² E le i leva ae oo atu i fafine i luga o le ala, o Kaleopa foi ma se soo sa malaga atu i Emau, o Aposetolo ma le au soo i le afeafe aupito i luga, o Toma sa masalosalo, ma isi. Ioe, sa i ai le olioli ma le fiafia i le Togiola ma le Toetu.²³

Ae sa le na o le pau lena. I se faaaliga, sa vaai ai Peresitene Iosefa F. Samita—o se perofeta, tagata vaai, ma le tali faaaliga—i le asiasiga a le Faaola i le lalolagi o agaga:

“Sa faapotopoto faatasi i lea mea le manomano o agaga o e amiotonu, o e na faamaoni i le mau ia Iesu a o i ai i latou i la le tino… .

“O agaga uma ia na mavae atu mai le olaga faaletino, ua mautu lo latou faamoemoe mo se toetu mamalu, …

“… [Ma] faatumulia i latou i le olioli ma le fiafia, ma sa olioli faatasi ona ua latalata mai le aso o lo latou laveaiina.

“Sa faapotopoto i latou e faatalitali le afio atu o le Alo o le Atua i le lalolagi o agaga, e tau atu le togiolaina o i latou mai noataga o le oti.”

Sa iloa e nei agaga faamaoni e le o toe mamao ae “toefuataiina le efuefu o o latou tino oti i le atoatoa, o le ivi i lona ivi, ma sooga o ivi ma aano o le a i ai, ona toe faatasia ai lea o le agaga ma le tino e le toe tuueseeseina, ina ia maua e i latou le atoatoa o le olioli.”

“[Ma] a o faatalitali lenei manomano o agaga ma talatalanoa, ma olioli i le itula o lo latou laveaiina mai filifili o le oti, sa oo mai le Alo o le Atua, ma ua tau mai o le a faasaolotoina e ua saisaitia, o i latou ia na faatuatua.”²⁴

Ou uso e ma tuafafine, pe o le a lava le pogisa atonu o i ai le lalolagi i ona po nei, pe o a lava matagi ma afa o fetaiai ma le tagata lava ia, o totonu o tatou fale ma o tatou aiga, e mafai ona fai mo tatou lenei olioli i le taimi nei. O nisi taimi tatou te le malamalama ai i le oti, o ma’i, o tulaga faaletonu o le mafaufau ma le tino, o tulaga pagatia faaletagata, o taua, ma isi fitaituga. O nisi o nei mea, o se vaega lava e tatau ai o lo tatou olaga faataitai. O isi, e pei ona muai iloa e Enoka, o se vaega o le sauniuniga mo le Afio Mai Faalua o le Faaola, “o le a pogisa le lagi, ma o le a ufitia foi le lalolagi i le pogisa; o le a luluina le lagi faapea ma le lalolagi; o le a i ai foi puapuaga tetele i le fanauga a tagata, ae peitai,” ua fetalai mai le Alii, “o le a ou faasaoina lou nuu.” Ina ua vaai Enoka i nei mea uma, sa ia “mauaina le olioli atoatoa.”²⁵

O le taeao nei, i lenei vaitau o le soifua mai o le Faaola ma le Toetu, ou te tuuina atu ai la’u molimau faatasi ma le olioli ma le fiafia i Lona afio mai i lenei lalolagi, ma puapuagatia ai mo a tatou agasala, ma o le a toe afio mai foi. O lo tatou faatuatua ia te Ia ma le usiusitai i Ana poloaiga, o le a tatou maua ai “se faamoemoega atoatoa lelei”²⁶ ma aveesea ai le pogisa ma le faamalumalu mai o le faasiasia i nei taimi o faigata. O Le o loo i ai le mana e faafilemu ai elemene o le fogaeleele, o loo i ai foi le mana e faatoafilemu ai o tatou agaga, ma aumaia lo tatou maluapapa mai afa, “Faalologo ia, ina malu ia.”²⁷

Ou te molimau atu ai, i le suafa o Iesu Keriso, amene.