Mulimuli i Faatonuga
A o e tatalaina lou mafaufau ma lou loto ina ia lagona ai le Agaga, o le a tuuina atu e le Alii i Lona lava taimi ma Lana lava ala ia faatonuga o le a faamanuiaina ai lou olaga.
I nai tausaga ua mavae, a o avea au ma se failautusi i le uarota, sa taunuu atu ai se oka fou a le uarota i lo’u fale. E ui i le tele o atigipusa, ae tasi lava se pusa sa faatuatusi mai i le failautusi a le uarota sa taulai atu i ai la’u vaai. Sa faapipii i le atigipusa se pepa na tusia matatetele ai upu nei: “Afai ua uma au taumafaiga ae le mafai—Faamolemole! Mulimuli i faatonuga.”
Ou te lei mafaufau o pusa uma e i ai le faaupuga lenei, ma sa ou mautinoa e i ai se tagata i le laumua o le Ekalesia na te iloa lelei lava au.
E ui lava ina malie i lena taimi, ae na avea foliga o lena faaupuga ma mea na pipii mau ai lana savali i lo’u mafaufau: “Afai ua uma au taumafaiga ae le mafai—Faamolemole! Mulimuli i faatonuga.”
E oo uma lava tagata i le tele o luitau o lenei olaga faaletino. E tofu le tagata ma lona saolotoga na te faia ai filifiliga e aafia ai lona alualu i luma. O filifiliga lelei e aumaia ai faamanuiaga folafolaina, a o filifiliga leaga e aumai ai pea lava pea taunuuga e le manaomia.
O le olaga e le mautonu. E puupuu lo tatou taimi. E taua tele o tatou taimi. O le taimi lenei e “sauniuni ai e fetaiai ma le Atua” (Alema 34:32). E le tatau ona i ai se taimi e maimau e fai ai ni faataitaiga po o le aafia o le tagata lava ia i mea na ua faamaonia e faaleagaina ai o tatou tino ma agaga.
E leai lava se tasi o i tatou e atoatoa, ma e tatou te manaomia uma lava le fesoasoani. Peitai, e le o tuulafoaiina i tatou pe afai tatou te aoao gofie, faatasi ai ma ni loto ia lagona ai ma ni taliga e faalogo ai.
“Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonutonuina ai lea e ia lava ou ala” (Faataoto 3:5–6).
Pe faapefea ona tatou mauaina faatonuga?
Muamua, e tatau ona i ai so tatou naunautaiga faamaoni.
Lona lua, e tatau ona tatou faatuatua—ia talitonu o loo silafia i tatou e le Alii, e alofa o Ia ia te i tatou, ma o le a tali mai foi o Ia ia tatou tatalo.
A o faitauina e Iosefa Samita le Tusi Paia, sa ia faitauina le Iakopo 1:5:
“Afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia.
“A ia ole atu ma le faatuatua, aua lava nei masalosalo.”
Sa mulimuli Iosefa i faatonuga ma sa ia mauaina ai le tali i lana tatalo. O le a tatou mauaina foi tali o a tatou tatalo.
I lo’u olaga atoa, sa avea au o se faifaatoaga ma se tama o se aiga toatele. E ui lava ina sa avea tatalo a le tagata lava ia ma tatalo faaleaiga o se vaega o o matou olaga i aso taitasi, ae sa i ai lava i nisi taimi so’u lagona lofituina ou te alu i le po i le fanua na faato’a pe tootuli foi i tafatafa o le faaputuga o vaomago, ma ou tepa ae ai i le lagi, ma tautala leotele atu i lo’u Tama oi le Lagi. Sa ou lagonaina pea lava Lona mafanafana ma sa ou iloaina ai foi, e pei ona ou iloaina i le taimi nei, o loo faafofoga mai o Ia ia te au, ma o le a tali mai lava i au tatalo i Lona atamai, ma le mea e sili ona lelei mo au.
Mo i latou uma, po o fea lava o e i ai—o outou o loo manaomia se faamoemoe, o outou e manaomia se faamafanafanaga, o outou e le o fiafia, o outou o loo manaomia se taitaiga ma manaomia ia iloa se faamoemoega i o outou olaga—au uo pele e, ou te faamalosiau atu ia te outou, ou te uunaia outou ina ia ifo o outou ulu pe faapauu i o outou tulivae! Ia ta’u atu i au lava upu, le faafetai i lou Tama Faalelagi mo le taulaga togiola a Lona Alo mo oe ma faafetai atu foi mo faamanuiaga uma ua Ia tuuina atu mo oe. O le a susu ou mata i loimata ma o le a oo atu foi le mafanafana o le Agaga i lou loto.
Ona e talanoa atu lea i le Alii, ma ole atu i ai mo se faamafanafanaga, taitaiga, ma le malamalama. A o e tatalaina lou mafaufau ma lou loto ina ia lagona ai le Agaga, o le a tuuina atu e le Alii i Lona lava taimi ma Lana lava ala ia faatonuga o le a faamanuiaina ai lou olaga.
O loo i ai foi i tusitusiga paia ia faatonuga a perofeta anamua ma ona po nei. “O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu” (2 Timoteo 3:16).
Sa tuuina mai e le Alii ia i tatou i lenei tisipenisione, le fautuaga faamafanafana ina “ia aua nei fefefe ai i o outou fili, aua ua ou poloaiina i totonu o lo’u loto … o le a ou faataitaiina outou i mea uma, pe tou te tumau i la’u feagaiga, e oo i le oti, ina ia iloa tou te faamaoni” (MFF 98:14).
O le mulimuli i faatonuga e manaomia ai le galue malosi, o le naunautai, ma le tumau e oo i le iuga.
“O le mea lea e tatau ai ona outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau” (2 Nifae 31:20).
“O lenei foi ou te fai atu ia te outou, afai o le a outou tausia ma faia so o se mea ou te poloaiina ai outou, o au, le Alii, o le a liliuese le inoino ma le ita uma ia te outou, o le a le manumalo foi ia te outou faitotoa o seoli” (MFF 98:22).
“Ae afai ua saunia outou o le a outou le matatau ai lava” (MFF 38:30).
E faapei foi o aso ua mavae, tatou te maua mai faatonuga i le perofeta soifua a le Alii. Ou te molimau atu ia te outou ou te iloa o Peresitene Gordon B. Hinckley o le perofeta a le Alii i ona po nei. Na te tuuina mai ia te i tatou ia fautuaga musuia mo o tatou taimi.
I le konafesi aoao ia Oketopa i le 2001, na ia saunoa mai ai:
“O lenei, o aso nei, o loo tatou feagai ma ni faafitauli matuia, e matautia ma faigata, ma e tatou te popole uma ai lava. E moni lava tatou te manaomia le Alii… .
“E faalagolago lo tatou saogalemu i le mama o o tatou olaga. E maua lo tatou malosi i lo tatou amiotonu. Ua faamanino mai e le Atua afai tatou te le faagaloina o Ia, o le a Ia le faagaloina foi i tatou” (“Seia Tatou Toe Feiloai,” Liahona, Ian. 2002, 104–5).
A uma ona tatou mauaina o faatonuga, e moomia ona tatou usiusitai ma faia loa lava tatou te mauaina. E tatau ona tatou faalogo ma mulimuli i o tatou taitai ua tofia.
Sa i ai se taimi na silasila atu ai le Faaola i le motu o tagata ua faapei o ni mamoe ua leai so latou leoleo mamoe (tagai Mataio 9:36). E tofu tagata uma o le Ekalesia lenei ma leoleo mamoe. Tatou te ta’ua i latou o taitai o korama, epikopo, ma peresitene o siteki.
Ua apoapoai mai le Alii ia te i tatou ina ia sailiili i tusitusiga paia ma mulimuli i poloaiga.
Ua Ia folafola mai o le a faataunuuina Ana upu uma “pe fai atu i lo’u lava leo po o le leo o a’u auauna, ua tusa lava ia” (MFF 1:37–38).
Ua faailoa mai e le Alii e faapea “soo se mea foi o le a latou tautala atu ai pe a musuia i latou i le Agaga Paia o le a faia ma tusitusiga paia, ma loto o le Alii, ma mafaufauga o le Alii, ma upu a le Alii, ma leo o le Alii, atoa ma le mana o le Atua i le faaolataga” (MFF 68:4).
“Afai ua uma au taumafaiga ae le mafai—Faamolemole! Mulimuli i faatonuga.”
Ia tatou faia lenei mea, ou te tatalo atu ai, i le suafa o Iesu Keriso, amene.