O le Taua o le Aiga

Elder L. Tom Perry

O Le Korama a Aposetolo e Toasefululua

Ia avea ma a tatou faaiuga i lenei tausaga le fausia o se aiga e faaautuina i le talalelei, o se uafu saogalemu mai matagi a le tiapolo.

I totonu o se lalolagi fenumiai ma le le mautonu, ua sili atu ona taua nai lo se isi taimi muamua le avea o o tatou aiga ma totonugalemu o o tatou olaga ma le faatumutumuga o mea uma tatou te faamuamuaina. O aiga o loo taoto i le totonugalemu o le fuafuaga a lo tatou Tama Faalelagi. O le faamatalaga lenei mai le “O le Aiga: O Se Folafolaga i le Lalolagi” o loo folafolaina mai ai tiutetauave o matua i o latou aiga.

“O le tane ma le ava ua i ai le tiutetauave paia e alofa ma tausi e le tasi le isi ma a la fanau. ‘O fanau o le tofi lea mai le Alii’ (Salamo 127:3). Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai. O tane ma ava—tina ma tama—o le a latou tali atu i le Atua mo le faataunuuina o nei mea e ao ona faia.”¹

I ni fonotaga talu ai nei faatasi ma le Au Peresitene Sili, sa latou faailoa mai ai lo latou popolega e uiga i suiga leaga ua i ai le aiga. O le latou faatonuga i le Aufono Faapitoa a le Perisitua o le taulai atu lea o o matou tofiga uma i le aiga.

I le tali atu i le Au Peresitene Sili, e tele fuafuaga ma taumafaiga ua faatulagaina. O le a tatou faaaogaina uma lava ia punaoa ua tatou maua ina ia uunaiina ai le faateleina o le lotogatasi, faateleina le fealofani, ma faateleina le aafiaga i le iunite faapitoa ua tofiaina e le Alii—o le aiga.

E moomia ona tatou avea o tatou fale ma se nofoaga e sulufai i ai mai le afa, lea o loo matuai faateteleina le malosi o loo siomia ai i tatou. E oo lava i nai avanoa laiti afai e le ano i ai, e mafai lava e aafiaga leaga ona ati mai i totonu o o tatou fale. Sei o’u tuuina atu se faataitaiga.

I le tele o tausaga ua mavae, sa matou faiaiga ai o le afiafi ma lo’u afafine ma lona aiga. O se vaaiga lava e masani ai i le tele o aiga e i ai ni fanau laiti. Sa taumafai lo’u afafine e uunaiina lana tama tama laitiiti e tolu tausaga ina ia ‘ai se meaai e paleni lelei. Sa ia ‘aia uma lava meaai i luga o lana ipu e fiafia i ai. Sa na o ni nai pi lanumeamata lava sa totoe ai, aua e le fiafia i ai. I sana taumafaiga mulimuli, sa tago atu ai le tina i le tui ma taumafai e uunaiina o ia e ‘ai ia pi. Sa onosai le alii laitiiti lenei mo le umi na ia mafaia. Ona ia ee lea, “Vaai Tina, aua e te faaleagaina se mafutaga lelei!”

O upu tonu lava na sa ia faalogo i ai i luga o se faasalalauga faapisinisi i le televise i ni nai aso e lei leva atu. Oka, e maeu ia aafiaga o faasalalauga, polokalama o le televise, o le Initoneti ma isi faasalalauga e i ai i o tatou iunite faaleaiga!

Matou te toe faamanatu atu ia te outou o matua e taitaia o latou lava aiga.

O le a maua mai fesoasoaniga ma faamanatu mai le tuatusi faava o malo a le Ekalesia i le Initoneti ma ala ata o le televise, e faapea foi i taitaiga a le perisitua ma ausilali ina ia lagolagoina outou a o tatou taumafai atu i le faataunuuina o o tatou tiutetauave faaleaiga.

I nisi eria o le lalolagi, ua matou saunia ai ni vaega e suitulaga i faasalalauga faapisinisi a televise ma nisi o a latou polokalama e faasagatau ai i le aiga. O loo i ai la tatou Televise a le BYU, lea o loo tuuina mai ai polokalama e talafeagai ona matamata i ai le aiga. E faaopoopo atu i polokalama lea e aumaia ai le aoaoina atu o le talalelei, o loo i ai foi polokalama ua faaautuina ina ia aoaoina ai matua faapea ma faafiafiaga faaleaiga. O le a matou taumafai foi ina ia faateleina le lelei ma le faifaisoo o a tatou faasalalauga pupuu faapisinisi i le televise lea e faamamafaina ai le Faatauaina o le Aiga.

O loo i ai foi isi a tatou fesoasoaniga, o le a aafia ai se vaega e sili atu nai lo le televise: o loo i ai sa tatou Tuatusi Faava o malo a le Ekalesia, le lds.org. Na toe faafouina talu ai nei ina ia aofia ai se itulau fou o le fale ma le aiga. O loo aofia ai i lea itulau ia manatu mai tusitusiga paia ma taitai o le Ekalesia ina ia faamalosia ai le aiga. O loo aofia ai foi ia manatu mo gaoioiga faaleaiga. O se vaega fou o le fale ma le aiga o loo tuuina atu ai ia:

Aoaoga mai taitai o le Ekalesia e patino mo le aiga.
Manatu mo gaoioiga faaleaiga.
Faamatalaga faavavave mo afiafi faaleaiga ina ia fesoasoani ai ia te outou ina ia maua ni afiafi faaleaiga aoga ma le fiafia.
O loo aofia ai tala i autu e pei o le avea ai o afiafi faaleaiga ia sili atu ona faamanuiaina, faamalolosia o sootaga i le va o le tane ma le ava, manatu mo le lagonaina o le vavalalata o tagata o le aiga.

A o faafouina le tuatusi, o le a faapea foi ona vaaia ai ni manatu faaopoopo mo le fuafuaina o afiafi faaleaiga. O se tasi o nei autu o le a tuuina mai ai ni fautuaga mo gaoioiga mo polokalama o le Faatuatua i le Atua, Tiute i le Atua, ma le Alualu i Luma o le Tagata Lava Ia.

Ae peitai, o loo i ai sa tatou auala se tasi o faasalalauga o loo mafai ona oo atu i le Ekalesia atoa—o a tatou mekasini matagofie ia. O nei mekasini e oo mai e le aunoa i totonu o lou fale ma o se tasi o auala taua e momoli atu ai ia faamatalaga ina ia fesoasoani ai e faamalosia le aiga. Atonu ua outou maitauina i le lomiga o Mati o le Ensign ma le Liahona, le mekasini a atunuu lautele—se savali mai ia Peresitene Gordon B. Hinckley e uiga i afiafi faaleaiga.

“‘O loo i ai sa matou polokalama o afiafi faaleaiga e faatasi i le vaiaso [po o Aso Gafua] i le Ekalesia atoa lea e nonofo faatasi ai i lalo ia matua ma a latou fanau. Latou te suesueina ai tusitusiga paia. Latou te talanoaina ai faafitauli faaleaiga. Latou te fuafuaina ai gaoioiga faaleaiga ma ituaiga mea faapena. Ou te le faalotolotolua e faapea atu afai e faatinoina e aiga uma i le lalolagi lena mea e tasi, o le a e vaaia se eseesega tele i le lotogatasi o aiga o le lalolagi’ (faatalatalanoaga, Boston Globe, 14 Aok. 2000).”²

I le mavae ai o le faamalosiau a Peresitene Hinckley mo i tatou ina ia faia ia afiafi faaleaiga, o le isi tala na sosoo ai i totonu o le Ensign na faaulutalaina “O Le Valaauga Ou te Leiloa O Loo Ia te Au”:

“Sa avea afiafi faaleaiga ma luitau a o laiti le ma fanau. Sa matuai o ma faatauaina lava ma la’u tane le fautuaga a perofeta o aso e gata ai ina ia faia afiafi faaleaiga e le aunoa, ae o le va o o ma valaauga faaleEkalesia ma isi tiutetauave, sa masani ona ma iloaina ai le leai o se taimi po o le malosi e fuafuaina ai se afiafi faaleaiga lelei ma le manaia pe a oo i le afiafi o le Aso Gafua.

“A o o’u asiasi atu i le Peraimeri i se tasi Aso Sa, na ou maitauina ai le maofa o tamaiti i tala, o fesoasoaniga vaaia, ma gaoioiga pupuu ma fuafuaina lelei mo le taimi o fetufaaiga ma le taimi o pesepesega. Sa ou matuai taulai atu foi i le aoaoina mai taumafaiga saunia lelei a le fesoasoani o le Peraimeri ma le taitai musika na tuuina i o la valaauga. ‘Sa iloga mai lava le tele o lo la taimi sa faaaluina i ai ae lualuagia i le alofa,’ sa ou manatu ai. ‘Sa la faia ni mea matagofie i o la valaauga.’

“Ona oo mai lea o se manatu i lo’u mafaufau: ‘O afiafi faaleaiga o se tasi lea o o’u valaauga. O le mea moni lava, o se vaega o lo’u valaauga sili ona taua—o le avea ma tina!’ Sa ou mafaufau i ai i lena manatu. ‘Afai e mafai ona ou faaavanoaina se taimi e faalautele ai o’u valaauga i le avea ai ma faatonu o le nusipepa ma le faiaoga asiasi, e mautinoa lava e mafai ona ou faalauteleina lo’u valaauga o le afiafi faaleaiga.’”³

E maeu se manatu matagofie ua ia aumaia ia i tatou ina ia uunaia ai i tatou ina ia tatou matuai lelei atoatoa i a tatou fuafuaga mo lenei afiafi faapitoa ua tuueseina mo le aiga.

E mafai foi ona matou muai logoina atu outou i le manatu moni e faapea o a tatou lomiga ia Iuni o mekasini a le Ekalesia o le a tuuina atu lea i se autu faaleaiga. E faaopoopo atu i ai, o le tausaga atoa lava o le a i ai lomiga o le Liahona, Ensign, New Era, ma le Friend e aofia ai mea e faaaogaina mo aoaoga i le fale. O le a i ai ni fautuaga matagofie mo afiafi faaleaiga ma manatu mo taimi o aoaoga i aso taitasi. O tala o loo tusia ina ia faigofie ona fetuunaia mo lesona mo lou aiga.

O fanau laiti ma le autalavou o loo faaalia e ala mai i upu faavaloaga ma auala mai i faataitaiga ola, le taua o le alolofa ma le ava i o latou matua. E aoaoina e matua ia auala o le fausiaina ma le faatumauina o sootaga vavalalata faaleaiga, e le gata i taimi lelei ae faapea foi i taimi faigata. O le agaga lelei o loo i totonu o nei mekasini o le a fesoasoani e faatumulia o outou fale i le mafanafana, alofa, ma le malosiaga o le talalelei.

O le Church News o loo fesoasoani foi e faasalalau atu le savali o le aiga. O loo i ai foi tala i le faamalolosia o le alofa ma le faaaloalo i totonu o le aiga, o le faatinoina o le talalelei, ma le fuafuaina o faafiafiaga aoga ma lelei.

Matou te faamoemoe o le tuuina atu i le Ekalesia o se aofaiga tele o faamatalaga e ala i faasalalauga e faaautu i le aiga, o le a lagolagoina ma uunaia ai tagata o le Ekalesia ina ia fausia ni aiga malolosi ma lelei. Matou te faamoemoe o le a faatupuina ai se taumafaiga magafagafa ma tumau i le fausiaina o se iunite faaleaiga e faavavau. O se aofaiga tele o mea e faaaogaina e le Ekalesia o le a tuuina atu ia te outou tou te filifili mai ai ni manatu aoga. O le vaaia o le ta’uina soo atu o mataupu e uiga i le aiga, o le a matou faamanatu atu ai pea lava ina ia taulai atu la tatou vaai i le faalapotopotoga sili ona taua ua faavaeina e le Alii i le lalolagi.

Mai lava i le amataga na faavaeina ai e le Alii le faatauaina o le faalapotopotoga o le aiga mo i tatou. E lei leva talu ona tuua e Atamu ma Eva le Faatoaga o Etena, ae fetalai atu le Alii ia te i laua:

“Na afio ifo ai i luga o Atamu le Agaga Paia, [ma] o Le e molimau i le Tama ma le Alo… .

“[Ma] sa viia e Atamu le Atua i lena aso ma sa faatumuina o ia i le Agaga Paia, ma sa amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua ua pupula ou mata ona o lou solitulafono, ma o le a ou maua le olioli i le olaga nei, ma o le a ou toe vaai i le Atua i le tino.

“Ma sa faalogo Eva, le ava a Atamu, i ia mea uma, ma sa ia fiafia, ma faapea atu: [Ana le seanoa] la ta solitulafono, semanu ta te le maua ni fanau, ma le iloa le lelei mai le leaga, ma le olioli o le togiolaina o i taua, ma le ola faavavau e tuuina mai e le Atua ia i latou uma o e usiusitai.

“Ona viia lea e Atamu ma Eva le suafa o le Atua, ma sa la faailoa atu ia mea uma i o la atalii ma afafine.”⁴

“Na faamatala mai e Peresitene Polika Iaga e faapea e lei avea o tatou aiga ma tatou. Ua tuuina mai e le Alii i latou ia i tatou, e vaai pe o le a le ala tatou te tausia ai i latou. Seiloga tatou te faamaoni ona faatoa tuuina mai lea o i latou ia i tatou e faavavau. O mea tatou te faia i le lalolagi e iloa ai pe tatou te agavaa e avea ma ni matua faalelagi.”⁵

Ua faavaeina e le Ekalesia ia ni taimi faapitoa se lua mo aiga ina ia faatasia ai. O le taimi muamua lava o loo faaautuina lea i le tausia tonu o le aso Sapati. O le taimi lea e ao ona tatou auai uma faatasi atu ai i a tatou sauniga e masani ai, e suesue ai i le soifuaga ma aoaoga a le Faaola ma perofeta. “O isi gaoioiga e talafeagai ai o le Aso Sa e aofia ai le (1) tusia o tusi o talaaga o le olaga o le tagata lava ia ma le aiga, (2) faia o fonotaga faaleaiga, (3) faavaeina ma le faamautuina o faalapotopotoga faaleaiga mo le aiga lava ia ma le aiga potopoto, (4) faatalanoaga faaletagata i le va o matua ma fanau, (5) tusi atu i aiga ma faifeautalai, (6) gafa, (7) asiasi atu i aiga ma i latou o e o loo mama’i pe ua nofo toatasi, (8) galuega faafaifeautalai, (9) faitauina atu o tala i fanau, ma le (10) usuina o viiga o le Ekalesia.”⁶

O le taimi lona lua o le afiafi lea o le Aso Gafua. E ao ona tatou aoaoina ai a tatou fanau i se afiafi faaleaiga fai soo ma lelei ona fuafuaina. E le tatau ona i ai nisi gaoioiga e aafia ai tagata o o tatou aiga i afiafi o Aso Gafua. O lenei taimi atofaina e ao ona faatasia ai ma o tatou aiga.

Matou te faamoemoe na outou maitauina uma le faamamafa faapitoa na tuuina e le Au Peresitene Sili i afiafi faaleaiga. O le savali a le Au Peresitene Sili o le aso 4 o Oketopa, 1999, sa toe ta’ua mai talu ai nei i mekasini:

“Mo: Tagata Uma o le Ekalesia i le Lalolagi atoa

“Uso e ma Tuafafine Pele:

“O po o Aso Gafua ua faasaosaoina i le Ekalesia atoa mo afiafi faaleaiga. Matou te uunaia tagata o le Ekalesia ina ia faatulagaeseina lenei taimi e faamalosia ai sootaga faaleaiga ma aoaoina ai le talalelei i totonu o o latou fale.

“I le amataga o le tausaga nei na matou talosaga atu ai i matua ina ia tuuina atu atoatoa a latou taumafaiga sili i le aoaoina ma le faafaileleina o a latou fanau i mataupu faavae o le talalelei ia o le a faaauai atili ai i latou i le Ekalesia. Na matou fautua atu foi i matua ma fanau ina ia tuu atu le faamuamua aupito maualuga i tatalo faaleaiga, o afiafi faaleaiga, suesuega ma aoaoga o le talalelei, ma gaoioiga lelei faaleaiga.

“Matou te talosaga atu i tagata o le Ekalesia, i vaega e mafai ai, ina ia taofia le faia o ni fiafia po o nisi gaoioiga faapea i po o Aso Gafua. E aoga foi, pe afai e mananao tagata o le Ekalesia ina ia uunaia ia taitai o le afioaga ma a’oga ina ia aloese mai le fuafuaina o ni gaoioiga i po o Aso Gafua lea e moomia ai ona o ese mai fanau po o matua mai o latou fale.

“O fale ma fanua o le Ekalesia e tatau ona tapunia i afiafi o Aso Gafua. E le tatau ona i ai ni gaoioiga a le uarota po o le siteki e fuafuaina, ma o isi mea e faalavelave i afiafi faleaiga e tatau ona tuuese.”⁷

Ia avea ma a tatou faaiuga i lenei tausaga le fausia o se aiga e faaautuina i le talalelei, o se uafu saogalemu mai matagi a le tiapolo. Ia tatou toe manatuaina ia folafolaga ma faatonuga mai le Alii i Lana fanau:

“O le mamalu o le Atua o le malamalama lea, o lona uiga, o le malamalama ma le upu moni.

“O le malamalama ma le upu moni e lafoaiina le leaga… .

“A e oo mai le amioleaga ma aveesea le malamalama ma le upu moni, mai le fanau a tagata, i le le usiusitai, ma uputuu a o latou tama.

“A ua ou poloaiina outou e taitaiina a outou fanau i le malamalama ma le upu moni.”⁸

Ia avea lenei tausaga ma o tatou tausaga e olioli ai i le malamalama ma le upu moni o le talalelei i totonu o o tatou fale. Ia avea moni o tatou fale ma nofoaga e sulufai i ai mai le lalolagi o la’u tatalo faamaualalo lea i le suafa o Iesu Keriso, amene.