E Pele Mamoe Ua Taase

Peresitene James E. Faust

Fesoasoani Lua i le Au Peresitene Sili

I matua loto mafatia, o e amiotonu, maelega, ma loto tatalo i le aoaoina o a latou fanau le usitai, matou te fai atu ia te outou, o loo leoleo i latou e le Leoleo Mamoe lelei.

Ou uso e ma tuafafine ma uo pele, o la’u savali i lenei taeao o se savali o le faamoemoe ma le faamafanafanaga i matua loto nutimomoia sa latou faia le mea sili e tausi ai a latou fanau i le amiotonu, faatasi ai ma le alofa ma le faamaoni, ae ua leai se faamoemoe ona ua faasagatau mai le tamaitiiti pe ua taitaiseseina foi ma mulimuli atu ai i le ala o le amioleaga ma le faatafunaga. Ina ua ou mafaufau i le ogaoga o lo outou mafatiaga, sa faamanatu mai ai ia te au upu a Ieremia, “Ua lagona le leo i Rama … ua tagi Rasela ona o lana fanau, e le mafai foi ona faanaina.” O lea na aumai ai e le Alii lenei faamautinoaga mafanafana, “Soia e te tagi, … e fai le taui o lau galuega …; e toe foi mai lava i latou ai le nuu o e ita mai.”¹

E tatau ona ou amata i lo’u molimau atu lea o le afioga a le Alii i matua o lenei Ekalesia, o loo maua lea i le vaega e 68 o le Mataupu Faavae ma Feagaiga i le aoaoga ofoofogia lenei, “O lenei foi, afai e maua fanau e matua i Siona, po o se siteki ua faatulagaina, e le aoao atu ia te i latou ia malamalama le mataupu o le salamo, ma le faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia i le faaeeina o lima, pe a valu tausaga o lona matua, o le a pau lea agasala i matua.”² Ua aoaoina matua ina ia “aoao atu foi i a latou fanau ia tatalo, ma savavali ma le amiotonu i luma o le Alii.”³ I le avea ai o au o se tama, tamamatua, ma se tama o le tamamatua, ou te taliaina lenei afioga a le Alii, ma o le avea ai ma se auauna a Iesu Keriso, ou te uunaia ai outou matua ina ia mulimuli i lenei apoapoaiga ma le matua faaeteete lava i le mea e gata mai ai.

O ai ea matua e lelei? O i latou ia na taumafai ma le alofa, ma le agaga tatalo e aoao a latou fanau e ala i a latou faataitaiga ma le aoaoga ia “tatalo, ma savavali tonu i luma o le Atua.”⁴ E moni lenei mea e ui lava o nisi o a latou fanau e le usitai ma e faalelalolagi. E o mai fanau i lenei lalolagi ma o latou lava agaga e tulaga ese faapea foi o latou uiga faaletagata. O nisi fanau “latou te luitauina matua i soo se tulaga… . Atonu foi e i ai nisi o le a faamanuiaina olaga, ma aumaia le olioli i nisi foi tama ma tina.”⁵ O matua faamanuiaina o i latou ia sa ositaulaga ma tauivi e fai le mea sili latou te mafaia i o latou lava tulaga faaleaiga.

E le mafai ona fuaina le loloto o le alofa o matua mo a latou fanau. E le pei o se isi lava sootaga. E sili atu nai lo le popole mo o latou lava ola. O le alofa o se matua mo se tamaitiiti, e faifai pea tusa lava pe i ai le loto nutimomoia ma le le fiafia. E faamoemoe matua uma ma tatalo ina ia faia e a latou fanau ni faaiuga poto. O fanau e usiusitai ma taunapa i ai o latou matua, latou te aumaia le mitamitaga e le uma ma le lotomalie i o latou matua.

Ae faapefea fanau na aoaoina e matua alolofa ma faamaoni, ae ua faasagatau mai pe ua taitaiseseina foi? Pe o i ai ea se faamoemoe? O le faanoanoa o se matua i se tamaitiiti e faasagatau mai, e toetoe lava ina le mafai ona faamafanafanaina. O le atalii lona tolu o le Tupu o Tavita, o Apisaloma, sa na ia fasiotia se tasi o ona uso, ma sa ia taulamua foi i se au faasagatau i lona tama. Sa fasiotia Apisaloma e Ioapo. Ina ua faalogo le Tupu o Tavita i le oti o Apisaloma, sa ia tagi tautala i lona faanoanoa ma faapea, “Lo’u atalii Apisaloma e, lo’u atalii e Apisaloma! ta fia oti e sui ai oe Apisaloma, lo’u atalii e, lo’u atalii e!”⁶

O loo faaalia foi lenei alofa faatama i le faataoto i le atalii faamaumau oa. Ina ua toe taliu mai lona atalii vaogata i le fale ina ua uma ona faamaimau lona tofi i se olaga soona fai, sa fasi e le tama se tamai povi peti ma faia ai se fiafia ona o le toe foi mai o lona atalii faamaumau oa, ma sa ia faapea atu i lona atalii usitai e pei ua ita, “Ua tatau foi ona tatou fiafia ma olioli, aua o lou uso lena na oti, a ua toe ola mai; na leiloa foi, a ua maua.”⁷

Ou te talitonu ma talia le saunoaga faamafanafana a Elder Orson F. Whitney:

“Sa tautino mai e le Perofeta o Iosefa Samita—ma na te le i aoaoina mai se mataupu faavae e sili atu ona faamafanafana loto—o le faamauga e faavavau o matua faamaoni ma folafolaga paia ua tuuina atu ia i laua mo le galulue faamaoni i le Talalelei, e le gata ina faasaoina ai i laua, ae faapena foi a laua fanau. E ui lava atonu o le a se ese nisi o mamoe, ae o loo sisila mai pea fofoga o le Leoleo Mamoe ia te i latou, ma o le a i ai se taimi, latou te lagona ai le aapa atu o aao alofa o le Atua ia te i latou ma aumaia i latou i le lafu. Po o le olaga nei po o le olaga a sau, o le a latou foi mai lava. O le a latou totogia la latou aitalafu i le faamasinoga tonu; o le a latou mafatia mo a latou agasala, ma atonu foi latou te ui atu i se ala matuitui; ae afai e taitaiina mulimuli ane ai i latou, e pei o le atalii faamaumau oa na salamo, i se tama alofa ma le loto faamagalo ma le aiga, ona aoga ai lea o mea tiga na oo i ai. Ia tatalo mo a outou fanau vaogata ma le le usiusitai; ia tausia pea i latou ma le faatuatua. Ia tumau i le faamoemoe ma le faatuatua, seia outou vaaia le faaolataga a le Atua”⁸

O se mataupu faavae o i lenei saunoaga e masani ona le amanaiaina o le, e tatau ona latou salamo atoatoa ma “pagatia mo a latou lava agasala” ma “totogi la latou aitalafu i le faamasinoga tonu.” Ou te iloa o le taimi lenei “e sauniuni ai e fetaiai ma le Atua.”⁹ Afai e le tupu i lenei olaga le salamo o fanau vaogata, pe mafai pea lava la e maea tuaiti o le faamauga ona lava le malosi mo i latou ae o loo galulue ina ia salamo? O loo tau mai i le Mataupu Faavae ma Feagaiga: “O e ua oti e salamo o le a togiolaina, e ala i le usiusitai i sauniga o le maota o le Atua,

“Ma pe a mavae foi ona totogi e i latou le faasalaga mo a latou solitulafono, ma faamamaina e maua e i latou se taui e tusa ma a latou galuega, aua o i latou o suli o le faaolataga.”¹⁰

Tatou te manatua sa faamaumau e le atalii faamaumau oa lona tofi, ma ina ua uma, sa ia toe foi mai i le fale o lona tama. O iina sa talia ai ma le fiafia e lona aiga, ae ua uma ona faamaumau lona tofi.¹¹ E le avea le alofa mutimutivale ma mea e taofia ai tulaga manaomia o le faamasinoga tonu, ma o le mana o le faamauga o matua faamaoni, e na o tuutuuga lava o le salamo o a latou fanau vaogata ma le Togiola a Keriso, e toe maua mai ai. O le a olioli fanau vaogata ua salamo, i le faaolataga ma faamanuiaga uma e aumai faatasi ai, peitai o le faaeaga e matua sili atu. E tatau ona galue ina ia maua lona atoatoaga. O le fesili la pe o ai e faaeaina, e ao lava ona taatia atu i le Alii i Lona alofa mutimutivale.

E toaitiiti lava i latou e matua tele naua a latou amioga faatiapolo ma le fouvale, “ua aveesea ai le mana e salamo ai.”¹² E tatau lava foi ona taatia atu lena faamasinoga i le Alii. Sa ia fetalai mai, “O au le Alii e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.”¹³

Atonu e le mafai ona tatou malamalama atoatoa i lenei olaga, i le malosi o le maea tuaiti o le faamauga o matua amiotonu i a latou fanau. Atonu o lo o i ai nisi sosia fesoasoani o loo galulue nai lo le mea ua tatou iloa.¹⁴ Ou te talitonu o lo o i ai se mana malosi faaleaiga a o faifai pea le faatosinaga a tuaa faapelepele mo i tatou mai le isi itu o le veli.

Sa maitauina e Peresitene Howard W. Hunter e faapea, “o le salamo o le ma’i manatu lea o le agaga, ma o le tausiga le motusia a le matua o le ituaiga aupito manino lea o le faamagaloga le masuia a le Atua.” Pe le o le aiga ea le faatusa aupito lata mai lea na sailia i le misiona a le Faaola ina ia faatuina?¹⁵

Tatou te aoaoina mai le tulaga faamatua mai o tatou lava matua. Sa matua faalolotoina lo’u alofa i lo’u tama pe a ia agalelei, alofa, ma malamalama. Ina ua leaga ia te au le taavale a le matou aiga, sa agamalu lava o ia ma loto faamagalo. Peitai e iloa lava e ona atalii o le a i ai se aoaiga malosi mai ia te ia, pe afai e i ai se faanenefu o le mea moni, pe faifai pea foi le solia o tulafono, aemaise lava pe a faaalia se le faaaloalo i lo matou tina. Ua toeitiiti atoa le afa senituri talu ona maliu lo’u tama, ae ou te matua misia lava lo’u alu atu ia te ia mo se fautuaga poto ma le alofa. Ou te ta’u atu sa i ai taimi ou te fesiligia ai ana fautuaga, ae sa le mafai ona ou fesiliga lona alofa mo au. Ou te le i manao lava e faaita ia te ia.

O se elemene taua o le faia o le mea sili tatou te mafaia o ni matua, o le tuuina atu lea o aoaiga mausali ma le alofa. Afai tatou te le aoaia a tatou fanau, atonu o le a faia e nuu po o faalapotopotoga i se auala tatou te le mananao ai pe mananao ai foi a tatou fanau. O se vaega o le aoai o fanau, o le aoao lea o i latou ia galulue. Na saunoa mai Peresitene Hinckley, “O se tasi o uiga faatauaina aupito sili … o le uiga faaleatua lea o le galue faamaoni. O le malamalama e aunoa ma se galuega, e leai se mea e maua ai. O le malamalama e i ai ma le galue o le matua atamai lena.”¹⁶

Ua matua faateleina lava mailei ua salalau solo a Satani, ma ua atili ai foi ona faigata le tausiga o le fanau ona o lea tulaga. O le mea lea, ua tatau ai i matua ona faia le mea e aupito sili latou te mafaia, ma faaaoga fesoasoani e mafai ona maua mai i auaunaga ma gaoioiga faale-Ekalesia. Afai foi e le amiolelei matua ma see ese foi i latou i nisi taimi, o le a manatu foi nisi o a latou fanau e le afaina pe a latou faataitai i mea la e fai e o latou matua.

E i ai la le isi itu o le mafutaga lea a matua ma fanau e ao ona tautalagia. Ou te aioi atu mo fanau ua tuueseese mai o latou matua ina ia aapa atu ia te i latou, tusa lava pe e le i lelei matua e pei ona tatau ona i ai. O fanau e sailiili masei i o latou matua, e tatau ona latou manatuaina le apoapoaiga poto a Moronae ina ua ia saunoa mai, “Aua nei outou tauleagaina au ona o o’u sese; po o lo’u tama ona o sona sese, po o i latou o e na tusitusi muamua ia te ia; a e sili ona ia avatu le faafetai i le Atua ina ua faaalia mai e ia ia te outou o matou sese, ina ia aoaoina ai outou ia sili ona popoto ia i matou.”¹⁷

Ina ua asiasi atu Moronae i le Perofeta talavou o Iosefa Samita i le 1823, sa ia sii atu i ai le fuaiupu lea e faatatau i le misiona a Elia: “Ma o le a ia totoina foi i loto o fanau folafolaga na faia i tama, ma o le a liliu foi loto o fanau i o latou tama.”¹⁸ Ou te faamoemoe o le a iu ina liliu atu loto o fanau uma i o latou tama faapea foi o latou tina.

E i ai se ulugalii lelei tele sa ou iloaina a o ou talavou, e i ai se la tama tama sa fouvale ma ia faaesea o ia lava mai lona aiga. Peitai, i ni tausaga mulimuli ane, sa ia toe faalelei ma i laua ma sa avea o se tamaitiiti aupito alofa ma loto fesoasoani o le fanau atoa. A o agai ina tatou matutua, e faateleina foi le malosi o le mana mai o tatou matua ma matua matutua o i le isi itu o le veli. O se aafiaga matagofie tele pe a latou asiasi mai ia te i tatou i miti.

E matua le fetaui lava ma le le alofa le faamasino o ni matua faamaoni ma le maelega ona e fouvale nisi o a latou fanau pe see ese foi mai aoaoga a o latou matua alolofa. Amuia ulugalii e i ai fanau ma fanau a a latou fanau, latou te aumaia le filemu ma le lotomalie. E tatau ona tatou manatunatu i matua lelei, ma le amiotonu o loo tauivi ma mafatia i fanau faalogogata. E i ai se tasi o au uo e masani ona faapea mai, “Afai e lei i ai lava se faafitauli mai lau fanau, ia faatalitali la mo sina taimi.” E leai lava se tasi e mafai ona ia ta’u mai ma le mautinoa ni mea o le a fai e a latou fanau i ni tulaga patino. A vaaia e le tina o lo’u toalua isi tamaiti o ulavavale e masani ona ia faapea mai, “Ou te le i fai atu lava e le faia e la’u fanau lena mea aua e le iloa pe o la ua latou faia i le taimi nei a o lea ou te tautala!” Pe a faanoanoa matua ona o le le usiusitai ma le see ese mai o a latou fanau, e tatau lava ia i tatou, faatasi ma lo tatou alolofa, ona faasa ona “lua’i togi se maa.”¹⁹

E i ai se tagata o le Ekalesia e lei faailoa maia le igoa, sa tusia e uiga i le lototiga o ona matua sa matua’ia pea lava pea e lona tuagane. Sa faaaoga e lea alii ia fualaau faasaina. Sa ia teena taumafaiga uma e faatonutonu ai ma aoai. Sa pepelo ma faalogogata. E eseese ma le atalii faamaumau oa, aua o lenei atalii e lei foi mai i le fale i lona lava loto malie. Sa pueina o ia e leoleo ma faamalosia ai ona fetaiai ma taunuuga o ana amio. E lua tausaga o lagolago e matua o Pili lana polokalama e togafitia ai o ia, ma sa iu ina toe manuia mai fualaau faasaina. I se aotelega, sa ta’ua ai e le tuafafine o Pili: “Ou te manatu e matua tulaga ese lava ou matua. E le i solomuli lava lo laua alolofa ia Pili, e ui lava ina sa la inoino pe le i fiafia foi i le mea sa ia faia ia te ia lava ma lo latou aiga. Peitai na lava lo la naunau atu i lo latou aiga e lagolagoina Pili i soo se auala e mafai, ina ia fesoasoani e aveeseina mai o ia i taimi faigata ma avatu ai i se tulaga mautu. Sa ola i la’ua i le talalelei e sili atu ona loloto, sili atu ona maaleale, ma le lautele a Keriso e ala lea i lo la’ua alolofa i le ua se ese.”²⁰

Aua tatou te faasausili ae ia faafetai ma le lotomaualalo pe afai e usiusitai a tatou fanau ma ava i a tatou aoaoga e uiga i auala o le Alii. I matua loto mafatia, o e amiotonu, maelega, ma loto tatalo i le aoaoina o a latou fanau le usitai, matou te fai atu ia te outou, o loo leoleo i latou e le Leoleo Mamoe lelei. Ua silafia e le Atua ma malamalama foi o Ia i lo outou faanoanoaga loloto. O loo i ai le faamoemoe. Ia faamafanafanaina outou i upu a Ieremia, “E fai le taui o lau galuega” ma “e toe foi mai lava lau fanau mai le laueleele o le fili.”²¹ Ou te molimau atu ma tatalo ai i le suafa o Iesu Keriso, amene.