Taua ma le Filemu

Peresitene Gordon B. Hinckley

Ou te faamoemoe ia maua e le nuu o le Atua le filemu i lenei taimi o faigata, tusa lava po o ai malo ma pati eseese e tatau ona latou faamaoni i ai.

Ou uso e ma tuafafine, o le aso Sa na tea nei, a o ou gauai atu i au suesuega ma mafaufau pe o le a se mataupu ou te tautala atu ai i lenei sauniga, sa telefoni mai se tagata ma ta’u mai ia te au ua maliu le alii Satini o James W. Cawley o le Malini a le Iunaite Setete, i se mea o Iraki. E 41 tausaga o lona soifua, ma ua tuua ai lona faletua ma se fanau laiti e toalua.

Ua luasefulu tausaga talu ai, sa avea ai Elder Cawley ma se faifeautalai o le Ekalesia i Iapani. E pei foi o le toatele o isi, sa ola ae o ia i le Ekalesia, sa taalo o se tamaitiiti aoga, sa tufa faamanatuga a o tiakono, ma sa agavaa e auauna atu i se misiona, e folafola atu le talalelei o le filemu i tagata o Iapani. Sa toe taliu mai i le fale, ma auauna atu i le Malini, ua faaipoipo, sa avea ma leoleo o le malo, ona toe valaau ai lea e tautua i tiute faamiliteli, lea foi e lei faatuai ona ia tali atu i ai.

O lona soifua, o lana misiona, o lana tautua faamiliteli, o lona maliu, e foliga mai ai se feteenaiga ma le filemu o le talalelei ma le taifana’e o taua.

Ma o lea ua tonu ai ia te au, e fai atu sa’u tala e uiga i taua ma le talalelei o loo tatou aoao atu. Sa oo foi i ai sa’u faamatalaga i la tatou konafesi i le masina o Oketopa i le 2001. Ou te sau i le pulelaa lenei i le taimi lena, ae faatoa amata lava le taua e faasaga i le au faatupu faalavelave. O le taua o loo faia nei, na faapogai mai iina ma o se faaauauina o lena feeseeseaiga. E faamoemoe lava ua oo mai lona mutaaga.

A o ou talanoa atu i le mataupu, ou te talosagaina le faatautaiga a le Agaga Paia. Ua tele ni talosaga ma ni manatunatuga loloto ua ou faia e faatatau i lenei mataupu. Ua ou iloaina o se mataupu e matua maaleale tele mo se faapotopotoga faavaomalo, e aofia ai ma i latou e le auai i lo tatou talitonuga faalelotu.

E taofi eseese atunuu e uiga i le mataupu o loo tulai mai nei [i Iraki]. E matua malolosi foi lagona. E i ai i latou e lagolagoina [le taua ae e i ai foi i latou e tetee i ai]. O i tatou o se Ekalesia ua soo ai le lalolagi, ma o le tele foi o atunuu ua i ai o tatou tagata o loo faataututu ma lenei mataupu. E i ai lagona o o tatou tagata. E i ai foi o latou atugaluga.

O taua, e moni, e le o ni mea fou. E fesuisuia’i meatau. O le tomai e fasioti ma faatamaia ai, e saga faaleleia pea lava pea. Ae sa i ai lava feteenaiga po o taua i le talafaasolopito e faatatau i mea lava nei.

O loo tautala le tusi a Faaaliga i se mataupu atonu o se feteenaiga matuia i mafaufau ma le faamaoni o fanau a le Atua. O se tala e aoga ona toe faamatala:

“Ua tau foi le taua i le lagi: o Mekaeli ma ana agelu ua latou tau ma le tarako, ua ‘au foi le tarako ma ana agelu e tau ai le taua,

“A ua latou le manumalo; e le toe maua foi i le lagi se mea latou te nonofo ai.

“Ua lafo foi le tarako tele, o le gata tuai lea, ua igoa i le tiapolo, i le ma Satani, o le faasese i le lalolagi uma; ua lafo ifo i le lalolagi, ua lafo foi ana agelu faatasi ma ia” (Faaaliga12:7–9).

O loo tautala foi Isaia e faatatau i lena taua tele (tagai Isaia 14:12). O loo aumaia foi i faaaliga i ona po nei se malamalama faaopoopo (tagai MFF 76:25), e faapei foi o le Tusi a Mose (tagai 4:1–4), o loo faamatala mai ai le fuafuaga a Satani ina ia faatamaia le saolotoga o le tagata e filifili ai.

E i ai nisi taimi tatou te tau lilifa atu ai e faaviivii i malo tetele ua tuanai, e pei o le Malo o Otomani, o Malo o Roma ma Paisanitina, ma o aso nei, o le Malo tele o Peletania. Peitai, e i ai se itu e leaga ai i na malo uma lava. E i ai se vaega matautia e aofia ai pulea faamalosi, o le faatoilaloina, o faiga saua, ma le tele naua o soifua ma tupe e alu ai.

Sa faamatala mai faauigalua e se tusitala tautaua o Peletania o Tomasi Kalaila se mea na ia mataituina, “Ai o soisoi mai le Atua i Ana foafoaga, o le tagata lea, i ana mea o fai i lalo nei” (sii mai i le Sartor Resartus [1836], 182). Ou te manatu ai o tutulu lo tatou Tama oi le Lagi, a o silasila ifo i Lana fanau, o faamaimau o latou tofi a o gasolo senituri, i le faataumaoiina e le tasi o le isi.

I le talafaasolopito atoa lava o loo tulai mai ai pulega saua mai lea taimi i lea taimi, latou te pulea faamalosi o latou lava tagata ma taufaamatau i le lalolagi. O le talitonuga lena o le toatele o tagata i le mea lea o loo tulai mai nei, ma o le ala lea o le taufaamatau o meatau matautia a autau i le feagai ai ma le taua.

E toatele tagata o la tatou Ekalesia o loo aofia ai i lenei feteenaiga. Ua tatou vaaia i televise, ma nusipepa, le fetagisi o fanau a o taupeupe i o latou tama, ua fai o latou toniga o le militeli e agai atu i le malae o le taua.

I se tusi faamomoiloto sa ou taulimaina i lenei vaiaso, sa tusia ai e se tina e uiga i lana tama tama o loo i ai i le Malini, o loo tautua atu nei mo le taimi lona lua i le taua i Sasae Tutotonu. Fai mai a ia, i le taimi na auina atu ai o ia i le taua muamua i Iraki, “na foi mai o ia mo sina taimi e le tumau ma sa ia fai mai, ma te o ma te savalivali… . Sa ia faauouo mai ia te au ma faamatala mai lona alu ai i le taua. Sa … fai mai o ia, ‘Mama, e tatau ona ou alu ina ia mafai ai e oe ma le tatou aiga ona saoloto, saoloto e tapuai i le mea tou te mananao ai… . Ma afai foi e uma ai lo’u ola … ona aoga foi lea o le tuuina atu o lo’u ola.’” O lea foi la ua toe i ai o ia iina ma sa tusi mai talu ai nei i lona aiga, fai mai, “Ua ou mitamita lava ina ua ou i ai iinei e tautua i lo’u atunuu ma le tulaga tatou te ola ai… . Ou te matua lagonaina lava lo’u saogalemu i lo’u iloa o loo ma faatasi ma lo tatou Tama Faalelagi.”

E i ai isi tina, ma tagata lautele e le tausalaina, o loo taofiofi mamau ma atuatuvale i a latou fanau, ma o loo tepa ae i le lagi ma aioi atu ma le faatauanau mo lo latou saogalemu ao galulu le eleele o loo tutu ai o latou vae, ma siomia i le felelei solo o pomu ma papa i le vateatea pogisa.

Ua i ai tagata manunua i lenei feteenaiga matautia, ma o le a faatoateleina. E foliga mai foi o le a faifai pea lava solo tetee a tagata lautele. O taitai o isi atunuu, ua latou soona tuuaia ma tausalaina le fuafuaga faataatia a le autau soofaatasi.

Ua tulai mai ai foi le fesili, “O le a se tala a le Ekalesia i nei mea uma?”

Muamua, ia malamalama lelei, tatou te le finau ma tagata Musalemi po o i latou foi o i ai i nisi faatuatuaga. Ua tatou iloa, ma aoao atu o tagata uma lava o le lalolagi, o le aiga o le Atua. Ma talu ai o Ia o lo tatou Tama, o lea, o i tatou o uso ma tuafafine ua i ai matafaioi faaleaiga o le tasi i le isi.

Peitai, o le avea ai o i tatou ma tagatanuu, o lea tatou i ai uma i lalo o le taitaiga a o tatou taitai faaleatunuu. E mafai ona latou maua faamatalaga e tele atu faaupufai o malo ma le militeli, nai lo tagata lautele. O i latou o i ai i le militeli, ua ia i latou le matafaioi i o latou malo e faataunuu ai le finagalo o le pulega aupito maualuga. Pe a auai tagata i le tautua faamiliteli, latou te sainia se konekarate e noatia ai, ma e latou te tali atu ai ma le lotonuu.

O se tasi o a tatou Mataupu Faavae o le Faatuatua, lea e faaalia ai se tasi o a tatou aoaoga faavae, o loo faapea mai: “Matou te talitonu i le usiusitai i tupu, ma peresitene, ma faipule, ma faamasino, i le usiusitai, ma faamamalu ma lagolagoina le tulafono” (Mataupu Faavae o le Faatuatua: 1:12).

Peitai o loo faapea mai faaaliga i ona po nei e tatau ona tatou “ia tetee atu i taua ma talai atu le filemu” (MFF 98:16).

I faigamalo faatemokalasi, e mafai ona tatou tetee atu i taua ae folafola atu le filemu. E i ai le avanoa e tetee atu ai. E toatele ua faaalia taofi, e matua tetee malosi i ai. O lo latou lena finagalo. O la latou lea aia tatau, pau lava le mea ia latou faia faaletulafono. Peitai, e tatau foi ia i tatou uma ona manatu i le isi tiutetauave e sili atu ona taua, lea foi e mafai ona ou faaopoopo atu i ai, o loo faafoeina ai o’u lava lagona ma faatonutonuina ai lo’u lava faamaoni i le tulaga o i ai nei.

Ina ua vevela le taua i le va o sa Nifae ma sa Lamana, o loo ta’ua mai i le tusi “sa faaosoina sa Nifae i le mea e sili ona lelei, aua na latou le tau mo … le fiapule, a ua latou tau mo o latou aiga ma lo latou saolotoga, ma a latou ava ma a latou fanau, ma a latou mea uma, ioe, atoa ma a latou sauniga i a latou tapuaiga ma la latou ekalesia.

“Na latou faapea ifo i o latou loto, ua faia e i latou le mea e tatau i lo latou Atua” (Alema 43:45–46).

Sa apoapoai atu le Alii ia te i latou; “Ia outou faamamaluina o outou aiga e oo lava i le faamasaaina o le toto” (Alema 43:47).

O Moronae foi ua ia “saeia lona ofu; ua ia ave foi le fasi ofu ma ua tusi i ai—O le mea lenei e faamanatuina ai lo tatou Atua, ma la tatou ekalesia, ma saolotoga, ma lo tatou filemu, ma a tatou ava, ma a tatou fanau—ma ua ia faamauina ai foi i le pito o le laau.

“Na ofu foi o ia i lona puloutau, ma lona ufifatafata, ma ona talita, ua ia fusia foi lona ofu tau i ona sulugatiti; ona tago ai lea o ia i le laau ua i ai i le tasi pito lona ofu masaesae, (ua ia ta’ua ai o le tagavai o le saolotoga) ma ua ifo toele o ia, ma ua tatalo faatauanau i le Atua, ina ia tumau i ona uso manuia o le saolotoga” (Alema 46:12–13).

Ua manino mai ai i nei tulaga, ma isi tusitusiga, o le mea moni e i ai taimi ma tulaga e alagatatau ai i atunuu, ona i ai o se matafaioi e tau ai mo le aiga, mo le saolotoga, ma faasagatau atu ai i pulega saua, o taufaamatau, ma le pologa.

Pe a uma ona manatunatu i ona itu uma, o i tatou lava ia o lenei Ekalesia, o tagata o le filemu. O i tatou o ni soo o le Togiola, o le Alii o Iesu Keriso, o le Alii o le Filemu. Peitai, na Ia fetalai mai, “Aua tou te manatunatu ua ou sau e avatu le filemu i le lalolagi: ou te lei sau e avatu le filemu, a o le pelu” (Mataio 10:34).

O lea ua tuu ai i tatou i le tulaga o i latou o loo matua naunau mo le filemu, o e aoao atu le filemu, e galulue mo le filemu, ae o i tatou foi o tagatanuu o atunuu ma e tatau ona tatou usitaia tulafono a o tatou malo. E le gata i lena, o i tatou [tagata o le ekalesia] o ni tagata saoloto alolofa, ua tautino atu e puipuia le saolotoga i soo se mea lava ua faoa ai. Ou te talitonu o le a le faamasinoina e le Atua alii ma tamaitai o i ai i le militeli, ua i ai le matafaioi e avea ma sui o o latou malo e faataunuu mea ua faatonuina i latou faaletulafono ia faia. Atonu lava foi Na te tausalaina i tatou pe a tatou taumafai e faalavelave pe tausuai i le ala o i latou o loo aofia ai i se fetauiga ma au a e amioleaga ma e pule saua.

O lenei, e matua tele naua mea e mafai ona tatou faia i nei taimi matautia. E mafai ona faaalia o tatou manatu e uiga i itu eseese o le tulaga e pei ona tatou vaai i ai, ae ia aua lava nei o tatou faia ni upu pe auai foi i le faatinoga o galuega faatiapolo e faatatau i o tatou uso ma tuafafine i atunuu eseese i le tasi itu po o le isi. E le tauamiotonuina lava le inoino po o le loto mataua i eseesega faaupufai. Ou te faamoemoe ia maua e le nuu o le Atua le filemu i lenei taimi o faigata, tusa lava po o ai malo ma pati eseese e tatau ona latou faamaoni i ai.

Ia tatou tatalo mo i latou ua valaau e o latou malo e faaaoga meatau, ma ia tatou talosagaina le puipuiga a le lagi mo i latou ina ia mafai ona latou toe taliu mai ma le saogalemu i aiga ma fanau.

I o tatou uso ma tuafafine ua i tulaga pagatia o latou soifua, matou te faapea atu matou te tatalo mo outou. Matou te tatalo ia tausia outou e le Alii, ma ia faasaoina outou mai manu’aga ma ia outou toe taliu mai i o outou aiga e toe afua le taeao. Matou te iloa tou te le i o atu i na toafa matagia ma le vevela, ona e faapea tou te fiafia i taua. O le malosi o a outou tautinoga, e fuaina lea i lo outou naunautai e ofoina atu o outou soifua mo mea ua outou talitonu i ai.

Matou te iloa ua i ai nisi ua maliliu, o isi foi atonu o le a maliliu i lenei taua aasa ma le matautia. E mafai ona tatou faia mea uma i lo tatou malosi e faamafanafana ai ma faamanuia i latou e pele e uma ai le soifua. Ia faamafanafanaina i latou o e faanoanoa, i le mafanafana e na o Keriso le Togiola e maua mai ai. O ia foi lea na fetalai i Ona soo pele:

“Aua le atuatuvale o outou loto: ia outou faatuatua i le Atua, ia faatuatua mai foi ia te au.

“E tele mea e nonofo ai i le maota o lo’u Tama: ana leai, po ua ou fai atu ia te outou; ou te alu e sauni se mea e nonofo ai outou, … ina ia i ai outou i le mea ou te i ai au.

“Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:1–3, 27).

Tatou te valaau atu i le Alii, o lona malosi e silisili ese lava ia ma e le uma lona mana, e faamuta ai le feeseeseaiga, o se iuga e afua mai ai se olaga e sili atu mo i latou uma lava e faatatau i ai. Sa folafola mai e le Alii, “Aua o au le Alii, o loo pule i le lagi i luga ma au fitafita a le lalolagi” (MFF 60:4).

E mafai ona tatou faamoemoe ma tatalo mo lena aso mamalu na muai taua e le perofeta o Isaia pe a “tu’i [e tagata] a latou pelu e fai ma uamea o suotosina, o latou tao foi e fai ma polo e teu a’i vine; e le sii atu le pelu e le tasi nuu i le tasi nuu, latou te le toe aoao foi i taua” (Isaia 2:4).

E ui lava ina o outou soifua ma tatou ola i se lalolagi leaga, ae e mafai lava ona tatou ola ia agavaa mo le tausiga ma le puipuiga a lo tatou Tama i le Lagi. E mafai ona avea i tatou ma tagata amiotonu e ola faatasi ma e faatiapolo o Sotoma ma Komora. Sa aioi atu Aperaamo ina ia faasaoina nei aai ona o e amiotonu. (Tagai Kenese 18:20–32.)

A o le sili o na mea uma, e mafai ona tatou atiinae se malamalama ma se naunautaiga i o tatou loto, ma folafola atu i le lalolagi, le faaolataga a le Alii o Iesu Keriso. O Lana togiola ua tatou mautinoa ai o le a faaauau pea le ola i talaatu o le oti. E mafai ona tatou aoao atu lena talalelei e taitai atu ai i tatou i le faaolataga o le usiusitai.

E ui lava ina o loo tatagi meatau o le taua ma o loo i ai le pogisa ma le feitagai i loto o nisi tagata, ae o loo i ai pea le alofa lautele e le maluelue, faamautinoa, faamafanafana, o le Atalii o le Atua, le Togiola o le lalolagi. E mafai ona tatou folafola atu faatasi ma Paulo:

“Aua ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali.

“Po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii” (Roma 8:38–39).

O lenei olaga ua na o sina vaega itiiti i le fuafuaga e faavavau a lo tatou Tama. O lenei olaga e tumu i feteenaiga ma mea e foliga e le ogatasi ma le talalelei. O nisi tagata e uma le soifua a o laiti. O nisi foi e faafualoa le soifua. E le mafai ona tatou faamatalatalaina. Ae tatou te taliaina lava ma se malamalama patino, o le taulaga togiola a lo tatou Alii o le a tatou alualu ai pea i luma, ma o le faamautinoaga faamafanafana lea o Lona alofa e le mafuatiaina.

Sa Ia fetalai mai, “Ia iloa au, ma faalogo i au upu; savali i le agamalu o lo’u Agaga, ma o le a e maua le filemu ia te au” (MFF 19:23).

Ma o na afioga, ou uso e ma tuafafine, ia tuu i ai lo tatou faatuatua. Tusa lava pe o a tulaga, ua ia te i tatou le mafanafana ma le filemu o Keriso lo tatou Faaola, lo tatou Togiola, o le Alo soifua o le Atua soifua. Ou te molimau atu ai i Lona suafa paia, le suafa o Iesu Keriso, amene.