Elder W. Douglas Shumway
O Le Au Fitugafulu

Pe a e fesili ia Elder Wilford Douglas Shumway e faamatala mai lona aiga, e na o le afa sekone lava e tali mai ai, “E faamaoni.” Pe o le galulue ai i le pisinisi a le aiga, po o le tausia e lona afafine o lona tina [tina o Elder Shumway] a o lei maliu, po o le tausia ma vaavaai e le fanau e toavalu o i latou lava ina ia mafai ai ona auauna atu o se peresitene o le misiona i Polivia, e faamaoni lava le aiga o Shumway o le tasi i le isi faapea foi le talalelei. O lona valaauga i le Korama Lua a Fitugafulu, ua faaalia ai foi e lona aiga lea lava lagolagosua.

“E matua le mafai lava e ma’ua ma lo’u toalua ona talia lenei valaauga pe ana faapea e leai le lagolago mai lo matou aiga,” o le saunoaga lea a Elder Shumway.

O Elder Shumway, ua 62 tausaga o lona soifua, o se alo o Wilford Jennings Shumway ma Mabel Whiting Shumway. Sa soifua mai o ia i le aso 8 o Me i le 1940, ma sa tuputupu ae i Saint Johns, i Arizona, lea na la faatoa feiloai ai ma Dixie Ann Jarvis. E mafana le faigauo a o la’ua matua, ma sa faamasani foi i la’ua i le aoga maualuga. Ina ua toe taliu mai Elder Shumway mai lana misiona i Uruguay, sa uunaia e matua [o Dixie Ann] o ia, e tuu se avanoa i le uo a le latou aiga [le alii faifeau] la te tafafao ai ma eva faamasani. Ma sa faapena ona fai, ma o lea sa la faaipoipo ai i le Malumalu o Mesa i Arizona i le 1963. E toa 8 o laua alo ma a latou fanau e 20.

Sa latou siitia mai talu ai nei mai Eagar, Arizona, i Show Low, i le mea o loo i ai le pisinisi a lo latou aiga e aofia ai se faletalimalo ma le fale e fufulu ai taavale. Sa taia lea vaega i ni afi faataumaoi i le taumafanafana talu ai. Sa faamatala e Elder Shumway, e tolu po o faasalalau mai i le televise o le a sosolo se afi i Show Low i le taeao na sosoo ai. E le i oo mai lea afi i le taulaga, ma sa iu ina faapea mai le fai faasalalauga, sa i ai se mana e sili atu na te le i vaai i ai muamua—sa le mafai ona ia faamatalaina.

“A na faapea e oo mai le afi, ou te masalo e le mafai ona ou nofo atu iinei i le aso,” o le saunoaga lea a Elder Shumway. “Semanu ua faatafunaina.”

Sa faasaoina lona aiga ma le pisinisi, ma ua tumu o ia i le faafetai ona o le avanoa fou e auauna atu ai. “Ou te manatu o se avanoa paia lenei e folafola atu ai le talalelei a Iesu Keriso,” o lana saunoaga lea.