Faamanuiaina i le Vai Ola
O le vai ola na te faamaloloina. Na te fafagaina ma lagolagoina. Na te aumaia le filemu ma le fiafia.
I popofou o le galuega a Keriso, sa Ia femaliuai ai mai Ierusalema agai atu i Lona nuu na soifua ae ai a o tamaitiiti, o Nasareta i Kalilaia. Sa Ia ui atu i Samaria ma, ona o Lona vaivai tele mai Lana faigamalaga, o lea sa mapu ane ai o Ia e malolo i le vaieli anamua o Iakopo. Ao faatalitali Iesu mo Lona au soo sa malaga atu e saili taumafa i se aai lata ane, ae taunuu ane loa se fafine Samaria i le vaieli. Ua outou silafia le tala. Ina ua talosaga atu Iesu mo sina vai e inu ai, sa faateia [le fafine] ona o le mafai ona fai atu e se tagata Iutaia o lea manaoga ia te ia. Sa manatu tagata Iutaia ma tagata Samaria i le tele o auga senituri o i latou o ni fili. Ae peitai, sa tau atu e Keriso ia te ia, ana faapea ua ia iloa le ua fai atu ia te ia, pe ua ia ole mai ia te Ia mo se vai—o le vai ola, le vai o le a faamalieina ai lona galala e oo i le faavavau. O le mea moni, sa le malamalama o ia, ma o lea sa Ia faamalamalama atu ai:
“O le inu i lenei vai e toe fia inu ia:
“A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau” (Ioane 4:13–14).
Sa fiafia le fafine Samaria i le manatu o le le toe fiainu lava. O le mea moni lava, o le a ia le misia le galuega faisoo i aso taitasi o le tauaveina o le kate vai mamafa mai le vaieli agai atu i lona fale. Ae ina ua molimau atu Keriso ia te ia e faapea o Ia o le Mesia, ma ina ua faamaonia atu e le agaga ia te ia e moni, sa amata ona ia malamalama sa fetalai atu Iesu i ni upumoni sili atu. Sa ia tuua le kate vai ma faataalise ese atu e saili mai isi o e atonu o le a omai ma faalogologo. Ae peitai, ou te masalosalo, ailoga na malamalama lelei o ia—pe faamata ua tatou malamalama atoatoa foi—i le uiga o le i ai o se vaipuna o le vai ola i totonu o i tatou.
O le vai ola na te faamalolo. Na te fafagaina ma lagolagoina. Na te aumaia le filemu ma le fiafia.
O se tamaitai ou te masani i ai sa tauivi ma le ita i se tasi o le sa faatiga ia te ia ma lona aiga. E ui lava sa ia tau atu i lana fanau ina ia aua nei avea ma nisi e lototiga ma inoino, ae sa tauivi lava na o ia ma na lagona. I le mavae ai o ni vaiaso o talosaga mo se fesoasoani mai lona Tama Faalelagi, na iu lava ina ua ia lagonaina se suiga. Sa ia faamatalaina e faapea, “O se tasi aso i le totonugalemu o ni tatalo faisoo, na oo mai ai le faamalologa. Sa ou lagonaina se lagona malosi ua oo mai i lo’u tino atoa. Mulimuli ane, sa ou faalogoina se lagona o le saogalemu ma le filemu. Sa ou iloa e ui lava i le mea na tupu, o le a sologa lelei pea au ma lou aiga. Sa aluese atu le ita mai ia te au, ma faapea foi ma lo’u naunau ia taui ma sui.”
O le vai ola o le talalelei lea a Iesu Keriso; o le e fesootai mai o le Agaga Paia. Sa silafia e la’u uo le mea tonu. Sa ia fai atu upu talafeagai i lona aiga. Ae sei vagana ua lava lona faamaualalo o ia lava, e inu ai i le vai—e lagonaina ai le Agaga Paia—ona faatoa mafai lea ona amata faamaloloina o ia.
A o ou feiloai atu i le toatele o tamaitai i le tausaga ua mavae atu—ma o latou taitai perisitua—sa ou faalogo ai i le tele o tala i le mana faamalolo o Keriso. Ua tele naua puapuaga i le lalolagi, ua tele naua faapogai o le pagatia. Ou te iloa ni tagata ua latou auina atu o latou atalii ma afafine i le ala e fano ai, ma o loo latou tatalo ia latou saogalemu i le taua. Sa ou talanoa atu i ni matua o e ua matatau mo a latou fanau, ua latou nofouta i faaosoosoga ua latou fetaiai. E i ai ni au uo faapelepele o e o loo tigaina ma mafatia i taunuuga leaga o togafitiga o le mai o le kanesa sa faaaogaina ai kemikolo. Ou te iloa o loo i ai matua nofo toatasi, ua tuulafoaiina e taitoalua, o e o loo tausia toatasi ni fanau. Sa ou oo lava foi i ni aafiaga faavaivai tagata o le atuatuvale. Peitai, ua ou aoao mai i o’u lava aafiaga, ma ua ou aoao mai ia i latou sa ou feiloai atu i ai, e le mafai ona tuuaunoaina i tatou e tauivi taitoatasi e aunoa ma se fesoasoani. E le mafai ona tuulafoaiina i tatou. O se vaipuna o le agalelei, o le malosi ma le talitonuina o loo i totonu o i tatou, ma afai tatou te faalogologo lelei faatasi ma se lagona o le faatuatua, e siitia i tatou i luga. E faamaloloina i tatou. E le gata ina tatou sao mai ai, ae tatou te alolofa foi i le olaga. Tatou te talie, tatou te fiafia; tatou te agai i luma ma le faatuatua.
O le vai ola foi na te fafagaina. Ou te molimau atu ia te outou, e pei lava ona Ia folafolaina mai, e oo mai Keriso ia i latou uma o e tigaina ma mafatia i avega; O Ia foi tatou te malolo ai (tagai Mataio 11:28). Na te lagolagoina i tatou pe a tatou vaivai. O le vaipuna e puna pea, e ofoina mai le faafouina faifaipea—pe afai tatou te feinu ai. O le faamaualuga e mafai ona faatamaia ai ona aafiaga, e faapena foi i le le uai atu i musumusuga a le Agaga Paia. Ae o i latou o e feinu faamaoni, e le gata ina faaatoatoaina ai i latou lava, ae avea foi i latou ma vaipuna i isi, ao tausia ma fafagaina e le isi agaga le isi foi agaga.
O le tausaga ua mavae atu nei, na maliu ai se uo pele a le matou aiga. O Lucile e 89 ona tausaga ma sa avea o se tina na maliu lana tane mo le silia i le 20 tausaga. E le o ia o se tamaitai mauoa, e le tautaua, ma o le toatele o le lalolagi latou te lei silafiaina lona maliu. Ae sa iloa e lona aiga. Sa silafia e ona tuaoi. Sa silafia e tagata o lana uarota. Mo i latou uma o e na aafia i lona alofa, o lona maliu na aveesea ai se mea lelei mai le lalolagi. I le gasologa o tausaga ao avea ma se tina ua maliu lana tane, sa onosaia ai e Lucile ni luitau faigata, e aofia ai le maliu o se atalii pele o sona alo, faapea ma gasegase na maua ai ona o lona matua. Ae sa faaauau pea ona tausia e Lucile tagata uma sa ia silafia i lona agaga; i ana meaai mananaia sa taoina, o ana ie soosoo ma pulupulu; i ona uiga malie ma lona alofa. Ma e fiafia tele o ia e galue i le malumalu. O se tasi aso o le tautotogo i le 1981 sa ia tusia ai i lana tusi o talafaamaumau e faapea: “O le taeao lenei i le 3:30 i le vaveao, ao ou savalivali atu i le auala agai atu i le malumalu, sa ou vaavaai atu i le fu’a o loo agiagia malie i le sau ma vaavaai atu i le matagofie o le lagi ma ou mafaufau i lo’u fiafia tele i lo’u i ai iina. Sa ou lagona le faanoanoa mo tagata uma o e [sa] tofafa pea ma misia ai le alausu ae o se aso matagofie.”
O le toatele o i tatou, tatou te le mafaufau e “alausu ae” le lalolagi i le 3:30 i le vaveao, ma sa tatou matuai fiafia lava e taavalevale solo i luga o o tatou moega i lena taimi o le taeao ma faatagaina ai Lucile e manatu alofa mo i tatou. Ae faauta i sea ituaiga amioga! Ua na o le agalelei lava e tafe mai i totonu e mafai ona faamatalaina ai lea mea. Pe na ia umia ea lenei mama o le agaga i le 15, i le 25, pe o le 55 foi? Ou te leiloa. O le tele o tulaga, atonu e faaaluina le olaga atoa e faalogologo ai i le Agaga Paia ona faatoa tatou iloa lelei ai lea o le siufofoga o le Atua, ona faatoa lava foi lea o lo tatou faatuatuaina o le vai ola e tofo i ai i le aso atoa—ae maise lava i se aso e amataina i le 3:30 i le vaveao. Ou te talitonu o le vai ola na lagolagoina Lucile i le faagasologa o na tausaga uumi lea atonu sa mafai lava ona ia filifili e manatu alofa mo ia lava, ma o lona olaga, lona agaga, na avea ma faamalosiauga i tagata uma sa ia silafiaina.
O le vai ola e mafai ona aumaia ai le filemu ma le fiafia e tusa lava pe ua foliga mai le vaipuna i totonu o i tatou ua matutu. Talu ai nei lava sa ou faalogo ai i se tamaitai sa mafatia lana tama tama i se gasegase o lagona, ma na oti faafuasei. Sa matuai mafatia lava le aiga. Sa le iloa e le tina pe mafai ona ia toe iloaina le fiafia. Peitai, sa faamanuiaina o ia i se auaunaga a se tamaitai talavou, o se tasi sa i ai i lana vasega o le Lora—o le taimi nei ua avea o se uso o le Aualofa ma o lana faiaoga asiasi—o le sa faapea atu, “Sa e fesoasoani ia te au; o le taimi lenei, o le a ou fesoasoani atu ia te oe—ma o le a ta onosaia faatasi lenei mea.” O le filemu, e oo lava foi i le fiafia, na amata ona toe foi atu i lona olaga.
Atonu o le olaga atoa—ma e umi atu foi—e toe faamamaina atoatoa ai o tatou agaga, ae o le vai ola e mo tagata uma lava, e aofia ai tagata talavou. E musuia lava au pe a ou vaavaai atu i tamaitai talavou o le Ekalesia, i le mavae ai o le mauaina o aoaoga faaleagaga mai lo latou laiti, ua ulufale atu i le Aualofa ma aumaia ai se malosiaga faaopoopo i le taimi lava lea i tamaitai ua sili atu lo latou poto masani. Ou te matuai fiafia lava pe a ou vaavaai atu i nei lava tamaitai talavou ua latou iloaina le tele o mea e mafai ona latou aoaoina mai i tamaitai e matutua atu ia i latou. O le filemu e oo mai ia i tatou mai le Alii, ae e mafai ona tatou fesoasoani atu le tasi i le tasi ia lagonaina lena filemu pe a tatou fetufaai atu a tatou avega ma lo tatou fiafia.
O le folafolaga a Keriso e faigofie ma musuia: “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14: 27). Uso e ma tuagane, ua siomia i tatou i puapuaga ma faigata. Ua vaivai le tamaoaiga; o loo tauivi aiga; e pei ona saunoa ai Peresitene Hinckley, o loo tatou ola i “taimi matautia” (“O Taimi o loo Tatou Ola Ai,” Liahona, Ian. 2002, 83). Ae peitai o loo ofoina mai pea e le vai ola le filemu ma le fiafia. Afai tatou te ola amiotonu, afai ua tatou faia mea uma tatou te mafaia, o le tasi o meaalofa tatou te mauaina o le lototele. Ua fetalai mai le Alii ia i tatou, “Ia filemu, ma ia iloa o Au o le Atua” (MFF 101:16). I le totonugalemu o le le mautonu, e tatau ona tatou faatali. E tatau ona tatou faalogologo mo le Agaga e tauina mai ia i tatou “O loo lelei mea uma,!” (“Omai, Outou le Au Paia,” Viiga, nu. 17) e pei lava ona sa faia e uluai Au Paia. O loo i ai se mafuaaga e tatau ai ona faapopoleina, ae o loo i ai foi se faapogai sili atu e tatau ai ona toafilemu.
Sa vaavaai atu le fafine Samaria i fofoga o Keriso, sa faalogo i Lona siufofoga, ma ia iloaina o Ia i se taimi na toatele isi na teenaina mea uma na Ia aoaoina atu. Ua tatou iloa foi o Ia, pe tatou te mafai foi, pe afai tatou te faatagaina Lona mana faamalolo, Lona malosi faamalosiau, Lona filemu ma le fiafia, e tafe i totonu o i tatou e “faapei o le vaipuna, e puna i luga i le ola e faavavau.” Ia tatou faia faapea, o la’u tatalo lea, i le suafa o Iesu Keriso, amene.