Elder Mervyn B. Arnold
O Le Au Fitugafulu

A na fai e faapipii ni pepa o igoa i tagata e pei ona i ai i oloa, semanu o le a feaveai ma le mitamita e Elder Mervyn Bennion Arnold, ua 54 tausaga o le soifua, o se uso fou o le Korama Lua a Fitugafulu, se pepa e tusia ai se faaupuga faapea “Na Gaosia i Granger, Iuta.”

Sa soifua mai Elder Arnold i le Aai o Sate Leki, i le aso 19 o Iulai 1948, ma sa tuputupu ae o ia i se vaega e fai ai faatoaga i le itu i sisifo o le Vanu o Sate Leki. “E afe a matou moa sa i ai,” sa tomanatu ai o ia, “ma se povi sa matou tatauina le suasusu. Sa tele foi le laau aina suamalie matou te eliina.” O ona tuaa o John Everett Sorensen Arnold ma Jasmine Bennion Arnold, e toalima atalii ma afafine e toalua sa la tausia ma sa la aoaoina i latou i le taua tele o le galue malosi, o le loto faafetai mo mea ua latou maua, ma se alofa i le aiga ma le talalelei. “Sa ou aoao e fiafia i aoaoga faavae o le Ekalesia,” o le saunoaga lea a Elder Arnold, “ma ou te alofa ma fiafia i le Tusi a Mamona.”

Ina ua fesiligia pe sa faapefea ona maua lana molimau, sa faaalia e Elder Arnold, “o se faagasologa faifai malie. E oo mai tagata i lou olaga, e amata a o e laitiiti lava. Latou te fesoasoani ia te oe ina ia matua loloto le faavaeina o lena molimau ia te oe.” E mafai ona ia ta’u maia igoa o faiaoga uma ma taitai perisitua sa aoaoina ma taitaia o ia ma pe na faapefea foi ona uunaia ai o ia.

Sa faamisiona Elder Arnold i Mekisiko i matu. Ona ulufale aut ai lea i le Iunivesite o Polika Iaga, ma maua ai lona faailoga i ma tau pisinisi, ma se faailoga o le Matua o Faiva i mea tau pulega i nofoaga faitele. O le 1971, i le Malumalu o Idaho Falls, sa faaipoipo ai ma Devonna Kress. Sa ia faamatalaina o ia [lona faletua] “o se tamaitai ofoofogia e i ai se molimau malosi o le talalelei.” O i laua o ni matua o se fanau e toaono, ma a latou fanau e toafa. O lo latou aiga, “o le olioli lea o o matou olaga,” o la latou tala lea.

Sa faigaluega Elder Arnold i se pisinisi o mea tau fanua, ma mulimuli ane i mea tau faletupe. Mai le 1985 i le 1988, sa galue auauna ai o se peresitene o le misiona i Costa Rica, Panama, ma Atu Motu o San Blas. Talu ai nei lava, sa avea ai Elder Arnold ma faatonusili o le Matagaluega a Faifeautalai faapea ma fesoasoaniga mo peresitene o misiona ma faifeautalai.

A o amataina lona valaauga fou, o loo faaalia e Elder Arnold lona alofa i Le na aupito sili ona faamanuiaina lona soifua nai lo tagata uma: “Ou te iloa o loo soifua le Faaola! E matua tele naua lo’u alofa ia te Ia.”