Faamaoni
Ia faamaoni i mea silisili o i totonu ia te outou. Ia faatuatua ma faamaoni i feagaiga e o faatasi ma le perisitua a le Atua.
E leai se isi sauniga i le lalolagi atoa e faatusalia lenei sauniga. Pe o fea lava le mea o tatou i ai, pe o le a lava le gagana tatou te tautatala ai, o i tatou uma lava o alii sa faaee i ai lima i luga o ulu ina ia mauaina le perisitua a le Atua. Pe o tatou o ni tamaiti ua maua le perisitua maualalo po o le Perisitua Arona, po o alii ua maua le Perisitua maualuga po o le Perisitua Mekisateko, sa tofu i tatou ma lima na faaee mai i o tatou luga se mea ofoofogia ma le matagofie, o se mea o le natura moni faaleatua.
Ou te toe fai atu, e leai lava se isi faapotopotoga i le lalolagi atoa e pei o lenei. Tatou te feiloai faatasi i noataga faausoga, i se potopotoga tele naua o alii ua faaee i ai se mana faapitoa po o le pule, ua faamamaluina i le avanoa paia e tautala atu ai ma galue i le suafa o le Silisiliese. Ua silafia e Ieova o le Atua o le lagi ua talafeagai ona faaee mai i o tatou luga se mea e patino ia te Ia. O nisi taimi ou te maofa ai pe afai tatou te agavaa mo le mauaina. Ou te tau mafaufau e uiga i le leai o se gataaga o lenei mana ma le pule. E faasino i le ola ma le oti, o le aiga ma le Ekalesia, o le natura maoae musuia o le Atua lava Ia ma Lana galuega e faavavau.
Uso e, ou te faafeiloai atu ia te outou o uso o korama o le perisitua paia. Ou te faafeiloai atu ia te outou o ni auauna a le Atua soifua, o le ua tuuina mai i o tatou luga taitoatasi se matafaioi, e le tatau ona tatou solomuli ai ma e le tatau foi ona tatou le faataunuuina.
Ina ia ogatasi ma lena faafeiloaiga, o lea ua ou filifilia ai e tautala atu i vaega eseese o le upu e tasi. O lena upu o le faamaoni.
Ou te mafaufau i le faamaoni, o le faamaoni lea ia i tatou lava. Ou te mafaufau i ai o le matua faamaoni aiai lea i a tatou soa ua uma ona filifilia. Ou te mafaufau ia i o le matua faamaoni atoatoa i le Ekalesa ma le anoanoai o ana gaoioiga. Ou te mafaufau i ai o le matua faamaoni atoatoa i le Atua o le lagi, o lo tatou Tama e Faavavau, ma Lona Alo Pele, lo tatou Togola, o le Alii ia o Iesu Keriso.
E tatau ona tatou faamaoni i le mea silisili o ia i tatou. O i tatou o atalii o le Atua ua faamamaluina e umia Lana pule paia. Peitai, o loo tatou ola i se lalolagi o mea leaga. O loo i ai pea lava pea se mana, e tosoina i tatou i lalo, e faatosinaina i tatou e tatou te faia na mea e matua le ogatasi lava ma le perisitua paia o loo tatou umia. E ese foi le malie o le maitauina o le i ai pea lava pea i le tama o pepelo, lena atalii faitogafiti o le taeao, sa tuliesea mai le lagi, ia auala ma tomai e faatosina ai, ma valaaulia, ma faapotopoto atu ai i ona ala i latou e le malolosi ma le mataalia. Talu ai nei sa faaviivii ai se ata tifaga faapea o le ata sili o le tausaga. Ou te le i vaai i ai, ma ou te le o fia vaai foi i ai. Ae sa faamatalaina mai ia te au e tumu i aga faa-faiaiga, e faaaoga ai le gagana masoa i le ata atoa.
O tusi ma ata mataga o se tasi lea o mea matautia i o tatou taimi. Ua mauoa i latou e gaosia ona o i latou e faaseseina gofie e fia matamata i ai. I laina amata o le faaaliga ua ta’ua o le Upu o le Poto, o loo tautino mai ai e le Alii: “Ona o mea leaga atoa ma togafiti ua faia ma o le a tupu pea i loto o tagata faatuputupu leaga i aso e gata ai, ua ou lapataiina outou i le tuuina atu ia te outou o lenei upu o le poto i le faaaliga” (MFF 89:4).
Ona faasolo atu ai lea o Lana talanoa e uiga i meaai tatou te tuu i o tatou gutu. O le gagana foi lena e mafai ona faaaoga i mea tatou te tuu i o tatou mafaufau pe a tatou lolo atu i tusi ma ata mataga.
Uso e, o alii uma ma tamaiti o loo oo atu i ai lo’u leo, ua iloa le mea e faamaina ai. Tou te le tau manaomia se faafanua o le ala e tau atu ai ia te oe, lou taunuuga pe a e faalolololo atu i tusi ma ata mataga. Faatusatusa lena i le matagofie, le filemu, ma le ofoofogia o lagona e maua mai le ola latalata i le Alii, ma le aloese mai faiga faatiapolo o loo siomia ai i tatou ia faapuaoa ai o tatou mafaufau i le agasala.
E faatatau lenei mea ia te outou, tamaiti pele o loo i ai i lenei sauniga. O taulaiga patino outou a le fili. Afai e mafai ona ia maua outou i le taimi nei, na te iloa foi e mafai ona ia manumalo ia te outou i le olaga atoa. Ua uma ona totoina ia te outou ia mana ofoofogia ma mauli mo se faamoemoega paia. Peitai, a oo ina faaaoga sese, ona avea ai lea ma fili faataumaoi ae le o ni tufuga aao.
Ou te matua faafetai lava ona o le malosi o o tatou tupulaga talavou. Ae ou te iloa e i ai nisi ua see ese atu ma tatou. Soo se tasi e leiloa, o se mala matautia. E manaomia e le malo o lo tatou Alii outou. Ia outou agavaa. Ia faamaoni ia te outou lava. Ia aua lava nei faamamasagiaina outou i le faia o soo se mea, e aveesea ai le malosi e teena ai mea faataumaoi.
O outou alii, ou te tuuina atu i ai se luitau. Sosola ese mai le taifana’e o mea inosia e ono lofia ai outou. Sosola ese mai mea leaga o le lalolagi. Ia faamaoni ia te outou lava. Ia faamaoni i mea silisili o i totonu ia te outou. Ia faatuatua ma faamaoni i feagaiga e o faatasi ma le perisitua a le Atua. E le mafai ona outou taalolo ai i le tuinanau, e le mafai ona outou talapepelo, e le mafai ona outou faaaimamago, e le mafai ona outou faaaogaina isi i le amioletonu e aunoa ma le faafitia o le tulaga paia na tofu maua e i tatou taitoatasi, ina ua tatou o mai i lenei lalolagi. Ou te tatalo ma lo’u malosi atoa, uso e, ina ia tatou aloese mai ai ma ia tatou faamaoni ia i tatou lava.
Ia faamaoni i a outou fegalegaleaiga faaleaiga. Ua ou molimauina mea silisili e tele faapea foi mea ua sili ona leaga i faaipoipoga. O vaiaso uma lava, ou te tauaveina ai le matafaioi o le taulimaina o talosaga mo le faaleaogaina o faamauga i le malumalu. Ua avea le tatalaga o faaipoipoga ma mea taatele i le lalolagi atoa. E oo lava foi i tulaga e le faatulafonoina ai, ua na ona laa atu lava o alii ma tamaitai i le isi itu o le laina [o le solitulafono] ma nonofo faaulugalii ai. Ou te faafetai lava ona e mafai ona ou fai atu, e seasea lava tulai mai le tatalaga o faaipoipoga ia i latou e faaipoipo i le malumalu. Ae tusa lava foi, ua matua tele naua lava faaipoipoga ua talai nai lo le mea e tatau ona i ai.
E o mai le tamaitai ma le alii faaipoipo i le maota o le Alii e tautino atu ai le alofa o le tasi i le isi. La te feosia’i ai feagaiga paia ma le faavavau faatasi ma le Alii. E faamauina lo la’ua sootaga i se feagaiga e faavavau. E leai se tasi e faamoemoe o le a atoatoa ona lelei faaipoipoga uma. Ae e mafai e se tagata ona faamoemoe o faaipoipoga uma i le maota o le Alii, na te tauaveina se feagaiga o le faamaoni o le tasi i le isi.
Ua leva ona ou iloaina o se elemene aupito sili i se faaipoipoga fiafia, o le popolega naunautai lea mo le manuia ma le tulaga solo lelei o lana soa. O le tele lava o mea e tutupu, o le manatu faapito o le autu lea e mafua ai feupuaiga, o teteaga, tatala o faaipoipoga, ma loto nutimomoia.
Uso e, e finagalo le Alii i se mea e sili atu mai ia te i tatou. E finagalo i se mea e sili atu ona lelei nai lo le maua ai i le lalolagi. Ia aua lava nei galo o oe lava na e filifilia lau soa. O oe lava na e lagonaina ua leai se isi i le lalolagi atoa e tusa ma ia. O oe lava na e moomoo ia lua mafuta e faavavau ma ia. Peitai, ua tele naua mea ua tutupu ona ua mou atu foliga o le mea na oo i ai i le malumalu. Atonu foi o le tuinanau e mafua ai. Ua suia e le sailiili masei le faaviivii. Pe a tatou saili mea e silisili ona leaga i se tagata, o le a tatou maua lava. Ae afai tatou te taotasi i mea silisili, o le a tupu ma ola lena elemene seia oo ina feilafi.
E i ai ou aafiaga patino. E le o toe mamao ona atoa lea o le 66 tausaga talu ona ma faaipoipo ma Sister Hinckley. Ou te le iloa pe na faapefea ona ia onosaia au i lenei taimi umi. O lea ua ma matutua. Ae ou te matua faafetai lava ia te ia. E ese lo’u naunau e vaai o toafimalie lelei o ia. Ou te matua naunau mo le mea sili mo ia. Oka se soa ina a matagofie. Oka se toalua ina a ofoofogia ma o se tina ma se tinamatua ma se tina o se tinamatua maoae tele o ia.
E moni, ua outou faalogo i se tamaloa ua pulapula lagoto le ola ma ua toeaina, ma sa fesiligia e le aufai lipoti pe o le a se mafuaaga o le umi o lona ola. Sa tali atu o ia, ina ua faaipoipo i la’ua ma lona toalua, sa tonu ia i laua afai e tauaiupu, ona alu lea o le tasi i fafo ma le fale. Fai mai a ia, “Alii e, o le mea moni ua umi ai lo’u ola, ona o le tele o le ea fou sa ou manavaina i nei tausaga uma e tele.”
Uso e, ia e faamaoni i lau soa. Ia faamanuiaina la oulua faaipoipoga i se faamaoni e le mafetuuna’ia o le tasi i le isi. Ia maua le fiafia o le tasi i le isi. Ia tuu atu i lau soa le avanoa e faatupulaia ai mea e fiafia i ai, e atiinae ai ana ia foi taleni, e saili ai mea e faaleleia atili ai o ia i ona lava ala, ma ia iloa ai foi e ia lava ona lagona ua ia faataunuuina se mea.
Sei ou fai atu nei se upu e faatatau i le faamaoni i le Ekalesia.
Ua tele naua manatu faasausili ua tatou vaaia. E i ai nisi e faapea mai, “E le faatonuina au e le Ekalesia pe faapefea ona ou mafaufau i le mea lea, ma le mea lena, po o se isi, ma pe faapefea foi ona ou ola.”
E leai, ou te tali atu, e le faatonuina faamalosi i se tagata pe faapefea ona mafaufau pe o le a foi le mea e tatau ona fai. O le a faasino atu e le Ekalesia le ala ma valaaulia tagata uma o le au paia ina ia ola i le talalelei ma olioli ai i faamanuiaga e maua mai i le ola ai faapena. E le faatonuina faamalosi e le Ekalesia se tagata, ae e apoapoai atu, e faatauanau, e uunaia, ma faamoemoe e maua mai le faamaoni ia i latou o loo faapea mai o i latou o tagata o le ekalesia.
A o ou aoga i le iunivesite, sa ou fai atu i lo’u tama i se tasi aso, ou te lagona ua soona faaaoga e le Au Pulega Aoao a latou aia tatau ina ua latou fautuaina mai se tasi o mataupu faapitoa. O ia o se tagata atamai ma lelei. Fai mai a ia, “O le Peresitene o le Ekalesia sa faatonuina i tatou, ma ou te lagolagoina o ia o se perofeta, tagata vaai, ma le tali faaaliga, ma ou te manao e mulimuli i lana apoapoaiga.”
O lenei ua 45 tausaga o ou galue i aufono aoao o lenei Ekalesia. Sa avea au o se Fesoasoani i le Toasefululua, sa avea ma se uso o le Toasefululua, o se Fesoasoani i le Au Peresitene Sili, ma o lea ua valu tausaga talu ona avea ma Peresitene. Ou te fia tuuina atu ia te outou la’u molimau, e ui lava ina sa ou nofo ai i le fiaafe o fonotaga e talanoaina ai tulafono ma polokalama a le Ekalesia, ae e le i ai se fono e lei sailia ai le taitaiga a le Alii, e leai foi se mea na i ai se tasi e manao e fautuaina pe fai se mea e faamanualia ai se tasi pe fai faamalosi ai foi se tagata e faia se mea.
O loo tau mai i le tusi o Faaaliga: “Ua ou iloa au galuega, e te le maalili e te le vevela foi: ou te loto ina ia e maalili, pe vevela.
“O lenei ua e faaleogalua, e te le maalili e te le vevela foi, o le mea lea ou te luai atu ai ia te oe i lo’u gutu” (Faaaliga 3:15–16).
Ou te tuuina atu ia te outou se folafolaga, ou uso pele, a o ou auauna atu i lo’u tiute o i ai i le taimi nei, o le a ou le faatagaina lava pe fautuaina se tulafono, se polokalama, se aoaoga faavae, o le a le aoga i tagata auai o lenei Ekalesia a le Alii.
O Lana galuega lenei. Sa Ia faatuina. Sa Ia faaalia mai ona aoaoga faavae. Sa Ia faataatia maia ana faiga. Sa Ia foafoaina lona malo. O Lana galuega ma Lona malo, ma sa Ia fetalai mai: “O i latou o e le au ia te au e au ese ia te au” (2 Nifae10:16).
I le 1933, sa i ai se vaega i le Iunaite Setete sa taumafai e fuli le tulafono sa faasaina ai le gaosiga ma le faatauina atu o ava malolosi. Ina ua faia se palota, o Iuta o le setete lea na faia le faaiuga.
Sa ou i ai i se misiona, ma sa ou faigaluega i Lonetona, i Egelani, i le taimi sa ou faitauina ai le faaulutala o le nusipepa sa tusia matamata tetele ai, “Ua Fasimate e Iuta le Sa.”
Sa aioi atu Peresitene Heber J. Grant, a o Peresitene i le Ekalesia lenei i lena taimi, i o tatou tagata ina ia aua nei palota e faaleaogaina le Sa. Sa matua ootia ai lona finagalo ona o le toatele naua o tagata o le Ekalesia i lenei setete na le amanaiaina lana apoapoaiga.
O le aso, o le a ou le talanoa atu e uiga i mea e lelei ai po o mea foi e leaga ai le sa, ae o le faamaoni e le mafetuunaia i le Ekalesia.
E maeu se loto faafetai, ua ou lagona ou uso e, e maoae lou loto faafetai ona o le faatuatua tele naua o le anoanoai o le Au Paia o Aso e Gata Ai, o e a fetaiai ma se faaiuga tele e faia e le Ekalesia, ona latou faatutusa lelei lea o i latou ma lena tulaga. Ma e sili ona ou faafetai i le mafai ona ou fai atu o i ai i e faamaoni ni alii ma ni tamaitai ua ausia ni sini, o e ua faataunuuina ni mea, o e ua aoaoina, o e ua malamalama, o e malolosi—e maualuluga le atamai ma o ni tagata tomai.
E tatau ona taitasi i tatou ma iloilo le mataupu—pe moni le Ekalesia, pe o se taufaasese. E leai se mea e tu ai i le va o nei itu e lua. A le o le Ekalesia ma le malo o le Atua, o lona uiga e selo.
Faafetai atu ou uso pele, o outou na o alii o le malosi tele ma le lotonuu tele ma le faatuatua tele atoa ai ma le faamaoni tele.
O le mea mulimuli, o le faamaoni i le Atua lo tatou Tama e Faavavau ma Lona Alo Pele, le Alii ia o Iesu Keriso.
E tofu i ai i tagata uma o lenei Ekalesia le aia tatau i le malamalama o le Atua o lo tatou Tama e Faavavau ma o Lona Alo Pele o lo tatou Togiola. Na aumaia e le Faaola le ki ina ia mafai ai ona tatou maua lena malamalama. Na Ia tautino mai, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17).
Ua lauiloa Iuta le Sekara i le talafaasolopito, o le faalata sili, o le na ia faatauina lona faamaoni i le 30 tupe siliva (tagai Mataio 26:15).
E toafia i latou i nei aso, pe a ta’ua upu a Paulo, “Ua toe faasatauroina … le Alo o le Atua, ma faainosia o ia i luma o tagata” i upusa ma le gagana masoa (tagai Eperu 6:6).
Ua outou iloa le palalauvale o lotoa o aoga ma le aualatele. Aloese mai ai. Ia aua lava nei oo atu i ou laugutu. Ia faaali atu lou faamaoni i le Atua ma le Togiola o le lalolagi e ala i le tausisia o le paia o o Laua suafa.
Tatalo i lo outou Tama Faalelagi i le suafa o le Alii o Iesu Keriso, ma ia faia e le aunoa, i tulaga uma lava i o outou olaga, le faaali atu o lo outou faamaoni ma lou alofa.
O ai e i le itu a le Alii? O ai?
Le taimi nei ia faaali mai.
Fesili e leai se mea e fefe ai
O ai e i le itu a le Alii? O ai?
(Hymns, no. 260.)
Ia i ai faamanuiga o le lagi i o outou luga ma o outou aiga, ou uso pele e. Ia tofu maua mai i tatou uma taitoatasi e le aunoa, o tumau ma faamaoni, alii ma tamaiti o le amiosa’o ma le faamaoni a’ia’i, ou te tatalo atu ai i le suafa paia o Iesu Keriso, amene.