Ia Outou Saili, ona Outou Maua Ai Lea

Elder Craig C. Christensen

O Le Au Fitugafulu

Ou uso e ma tuafafine pele, ou te tatalo ina ia taialaina au e le Agaga o le Alii a o ou faasoa atu ia te outou o’u lava lagona ma la’u molimau.

O se tasi o valaaulia malosi ma folafolaga maoae na tuuina mai e le Faaola o loo maua lea i le fasifuaitau faigofie “ia outou saili, ona outou maua ai lea.”¹

E ui lava o le faiga o le sailiga e aofia ai le tatalo ma le faatoga, ae e loloto atu nai lo le na o lena. O le saili o se faiga e faifai pea ae le o se mea e tupu i se taimi e tasi. Ou te faatusaina i se tafaoga umi e aeae i mauga ma ifoifo i vanu. E ui lava ina ua tatou iloa le mea tatou te taunuu i ai, ae o le tamaoaiga o aafiaga ma mea o le a aoaoina mai ai, e oo mai i lea aso ma lea aso a o tatou agaigai atu i le tini po o la tatou sini.

A o tatou saili atu i mea a le Atua, e ao ina tatou faamaulalo i tatou lava i Ona luma, ia manatua o Lona alofa tunoa tatou te maua ai, ma ia tulimatai atu o tatou mafaufauga ma a tatou tatalo, o lo tatou faatuatua ma o tatou faanaunauga, e oo lava i le malosi atoa o o tatou loto ina ia mafai ai ona tatou maua le sulu ma le malamalama tuusao mai se Tama Faalelagi alofa.

O le mamanu e saili ai tali mai le Atua, e faigofie ona faamatala ae e sili atu ona patino i le tagata lava ia pe a faaaoga. O le amataga, e valaaulia i tatou e suesue i o tatou mafaufau ma manatunatu i o tatou loto i mea e aupito sili ona tatou mananao ai mai ia te Ia.² O lenei faiga o le mafaufau loloto, e maua ai le tomai e malamalama tonu ai ma musumusuga i o tatou loto. Ona faatonuina ai lea o i tatou e ta’u sao atu o tatou mafaufauga ma manaoga i le Tama Faalelagi i se tatalo lotomaulalo faatasi ai ma le folafolaga, afai tatou te ole atu ia te Ia, i le suafa o Keriso, afai foi e sa’o le mea o loo tatou sailia, ma afai tatou te “ole atu ma se loto faamaoni ma le manatu tonu i ai, ma le faatuatua ia Keriso, o le a ia faaalia le tonu o ia mea ia i [tatou], e ala i le mana o le Agaga Paia,” aua “o le mana o le Agaga Paia” tatou te “iloa ai le tonu o mea uma lava.”³

Ma o a mea e tatau ona tatou sailia?

Ua aoaoina i tatou e tusitusiga paia e tatau ona tatou “matua … saili i mea alofa [e aupito] sili,”⁴ e ao ona tatou saili atu i le poto ma le malamalama ma ia “saunia mea tatau uma.”⁵ Ua apoapoaiina i tatou ina ia faamaumau o tatou ola e auauna atu ai i isi6 ma saili atu i mea e “mama, matagofie, po o mea e logoleleia pe tauleleia.”⁷

O le taimi lava foi lea, ua lapataia ai i tatou e aua tatou te sailia mea eleelea o le lalolagi.⁸ Na saunoa mai Peresitene Hinckley: “Ua matua tele naua mea leaga, o mea faatiapolo faatosina i le lalolagi. Ia lafoai, uso e ma tuafafine. Aloese mai ai. O se faamai matautia. Ua pei o se mea oona e faatamaia ai oe. Ia e aloese mai ai.”⁹ I le tusi a Amosa tatou te faitau ai e faapea, “Ia outou saili i le lelei, a e le o le leaga, ina ia ola ai outou: ona i ai lea ia te outou o Ieova o le Atua o ‘au.”¹⁰

O le mea tatou te muai saili, e sili atu nai lo isi mea uma, o le “malo lea o le Atua ma lana amiotonu.”¹¹ Tatou te saili ia iloa “le Atua moni e toatasi ma Iesu Keriso lea [na Ia] auina mai.”¹²

I se faaupuga patino lava o le valaaulia ina ia tatou saili ma maua ai, na fetalai mai ai le Faaola, “Ia faalatalata mai ia te au ona ou faalatalata atu ai lea ia te outou; ia saili ia te au ma le filifiliga ona outou maua ai lea o au.”¹³

A o le a la le uiga o le maua o Ia?

Pe a tatou faaaogaina lo tatou faatuatua ma tuuina atu i tatou atoatoa ma lo tatou malosi e faalatalata atu ai ia Iesu Keriso, ona tatou amata malamalama ai lea ma saga malamalama atoatoa ai i Lona tagata moni. Pe a tatou saili atu ia te ia ma le filiga atoatoa, ona tatou maua ai lea o se molimau loloto ma le mausali e uiga i Lona alofa e le mafaatusalia, o Lona soifua lelei atoatoa ma le faataitaiga, ma faamanuiaga o Lana taulaga sili o le togiola. Pe a tatou faalatalata atu ia te Ia, tatou te maua tonu lava o Ia ma iloaina o Ia o le Foafoa o le lalolagi, o le Togiola o tagata uma, o le Alo Pele e Toatasi o le Tama, o le Tupu o tupu, o le Alii ia o le Filemu.

O le loloto o le tatou sailiga, o le tele foi lena o lo tatou talisapaiaina o Lana matafaioi o le Ieova Silisili o le Feagaiga Tuai ma le Mesia Paia o le Feagaiga Fou. E amata ai foi ona tatou malamalama atoatoa i Lana savali e faavavau o le faaolataga ma le faaeaga. Tatou te iloa ai Na te faaauau pea ona talotalo mai tatou te o atu ma mulimuli atu ia te Ia, o Ana aoaoga e mautinoa ma e faatatau i ona po nei e pei foi ona i ai i augatupulaga uma o taimi. Ua amata ai foi ona tatou iloa, faatasi ai ma lo tatou matua talisapaia o le mea na tupu i Ketesemane ma Kalevario. E ui lava ina sa momoli seseina o Ia ma faasalaina, ae na Ia tuuina atu ma le naunautai Lona soifua; ma ina ia faataunuuina Ana lava afioga faavaloaga, na Ia toetu ai i le aso tolu. O lenei mea alofa anagata, ua aumaia ai le tino ola pea i tagata uma ma le ola e faavavau ia i latou e usiusitai ma faamaoni.

A o amata ona tatou iloa o Lana savali e mo tagata ola uma i soo se vaipanoa, tatou te taliaina ma le naunautaiga tele, le tala faatusi paia o Lana asiasiga i e na nonofo i le konetineta o Amerika anamua. Ua tatou olioli i le oo mai o le Tusi a Mamona, o se molimau lona lua—ioe o se isi lea molimau—o Lana misiona o le mesia, o le Faaola ma le Togiola o le lalolagi. Ua tatou iloa e mafai ona latalata atili atu se tagata ia te Ia e ala i le sailiili ma tatalo e uiga i le Tusi a Mamona nai lo le suesueina o se isi lava tusi.¹⁴

A tatou saili ina ia maua o Ia, tatou te maua se molimau o Lana asiasiga, faatasi ma Lona Tama, i le perofeta taulealea o Iosefa Samita, ma tatalaina mai ai le “augatupulaga o le faaatoatoaina o aso” ua loa ona faatalitali i ai.¹⁵

A tatou saili atu ia te Ia, tatou te iloa ai ua Ia toefuatai mai Lana Ekalesia i le fogaeleele, O le Ekalesia a Iesu Keriso o le Au Paia o Aso e Gata Ai, ma i totonu o Lana Ekalesia, ua Ia faaee mai ai le mana ma le pule e maua ai sauniga e tatau ai, e mafai ai ona tatou toe foi atu ma toe mau faatasi ma Ia.

A tatou saili ia te Ia, tatou te iloa ai o loo faaauau pea ona Ia taialaina Lana Ekalesia e ala i Lana perofeta soifua, o Peresitene Gordon B. Hinckley, ma o le faalapotopotoga foi o Lana Ekalesia o loo fausia i luga o le faavae o aposetolo ma perofeta, a o “Keriso lava ia o le maatulimanu autu.”¹⁶

A tatou sailia o Ia ma le filiga, ona tatou lagonaina ai lea o Lona alofa mo i tatou, ma tatou saga malamalama atili ai i tali o a tatou tatalo. Tatou te faailoa atu foi o Lona Agaga, tatou te maua ai le “poto ma oa sili o le malamalama, e oo lava i oa natia”¹⁷ ma maua ai se naunautaiga sili atu tatou te ola e tusa ai ma Ana poloaiga ma faatonuga.

A tatou sailia o Ia, ona tatou iloa ai lea o Ia “o le malamalama ma le ola o le lalolagi.”¹⁸ A tatou sailia o Ia, uso e ma tuafafine, o le a tatou maua lava o Ia ma tatou iloa ai le filemu i le loto, lea na Ia folafola mai ia te i tatou. Ou te molimau atu ai, i le suafa o Iesu Keriso, amene.