Sa Latou Saunoa Mai ia te i Tatou

O se Lipoti mo Tamaiti o le Ekalesia mai le Konafesi Aoao Lona 173 Faaletausaga, 5–6 Aperila 2003

Peresitene Gordon B. Hinckley: O le talalelei a Iesu Keriso o le ala lea o le filemu. O le tele o lo tatou mulimuli i ai ma faaaoga i o tatou olaga, o le tele foi lena o lo tatou faamanuiaina ma le uluola. Se mea ina a matagofie o le aofia ai i lenei galuega mamalu. Ia tatou fiafia ma olioli i lo tatou avanoa sili. Ia tatou auauna atu ma le fiafia.

Peresitene Thomas S. Monson, Fesoasoani Muamua i le Au Peresitene Sili: O le moomoo e le aveesea ai le sauniuni lelei e fetaiai ma fitaituga o le olaga. O le sauniuni e faigata, ae e matua taua lava mo lo tatou alualu i luma

O la tatou faigamalaga i le lumanai, o le a le o se alatanu lamolemole e alu atu iinei e tau i le faavavau. Ae, o le a i ai vaeluaga o magaala ma pioga o le auala, ou te le i ta’ua foi patupatu e le manaomia. E ao ina tatou tatalo i aso taitasi i se Tama Faalelagi e alofa, ma e finagalo ina ia manuia o tatou olaga taitoatasi.

Peresitene James E. Faust, Fesoasoani Lua i le Au Peresitene Sili:

E tele naua vaega o le sao ma le sese lea e tatau ona fuafua e outou uma taitoatasi po o fea e tatau ona gata mai ai. Ou te uunaia malosi outou afai e i ai soo se fesili i o outou mafaufau po o loto e uiga i le sao po o le sese o lau amio, aua e te faia. E tofu i tatou uma ma le saolotoga o amioga ma le meaalofa o le Agaga Paia lea o le a faamaninoina mai ia i tatou le mea e sao ma le mea e sese, tonu po o le le tonu.

Elder Russell M. Nelson o le Korama a Aposetolo e Toasefululua: O le tatalo e mafai ai ona faaalia lo tatou alolofa i le Atua. Ma ua Ia matua faafaigofieina mo i tatou. E mafai ona tatou tatalo atu ia te Ia i soo se taimi lava. E le tau manaomia se ituaiga masini faapitoa. Tatou te le tau fafagaina foi ni maa pe totogi se tupe i masina taitasi mo le faaaogaga… .

E mafai ona tuuina atu le leoa ia tatalo. E mafai ona tatalo se tagata i le mafaufau, aemaise pe a faalavelave upu… .

E faauma a tatou tatalo “i le suafa o Iesu Keriso, amene.” A tatou faalogo i le tatalo a se tasi tagata, tatou te leotetele foi e faaopoopo atu la tatou “amene,” o lona uiga “O la’u tatalo foi lena.”

Elder Dallin H. Oaks o le Korama a Aposetolo e Toasefululua: E pei o paionia, e tatau foi ona tatou faafetai atu i le Atua mo o tatou faigata, ma tatalo mo le taitaiga ina ia faatoilaloina ai. O lena uiga ma lo tatou faatuatua ma le usiusitai, o le a aoga ai ia folafolaga ua tuuina mai e le Atua ia i tatou. O se vaega uma lava o le fuafuaga.

Elder Joseph B. Wirthlin o le Korama a Aposetolo e Toasefululua: O le Agaga Paia o se peresona o le Agaga, o se sui e tulaga ese ma mavaevae o le Aigaatua. O ia o se molimau po o se na te tautino mai le mana o le Atua, o le paia o Keriso, ma le moni o le talalelei ua toefuatai mai… . .

Ina ua faamauina i tatou, ua tuuina mai ia i tatou le aia i le mafutaga a le Agaga Paia, ae o se aia e tatau ona tatou faaauau pea ona mauaina e ala lea i le usiusitai ma le tauaogaina. E le mafai ona tatou alo tamala i lenei meaalofa.

Elder Dennis B. Neuenschwander o le Au Peresitene o le Au Fitugafulu:

O sauniga faamanatuga e sili atu nai lo na o ni sauniga. O ni taimi paia i se nofoaga paia. I le taimi o nei sauniga faamanatuga i vaiaso taitasi, tatou te mafaufau ai i le galuega sili ona alofa o le ositaulaga ua silafia e lenei lalolagi. Tatou te mafaufau loloto i le alofa o le Atua, o le na auina mai Lona Alo Pele e Toatasi na Fanaua ina ia tatou maua le ola e faavavau. Pe a tatou fetagofi atu i le faamanatuga, tatou te manatua o Ia ma faaali atu lo tatou naunau e ave i o tatou luga Lona suafa, ma tausi Ana poloaiga.