Elder Shirley D. Christensen
O Le Au Fitugafulu

O le taeao o le aso 18 o Me 1980, e matua olaola le manatuaina e Elder Shirley Dean Christensen. Sa amata i se aso la matagofie o le tautotogo. Peitai e oo atu i le aoauli, ua uliuli pato’i uma le lagi sa ufitia ai le Aai Faatupu, o Uosigitone, ma ua liu efuefu uma laufanua o laau aina sa lauusiusi ma lanumeamata. Ua sasao le mu i le Mauga o Saint Helens, pe tusa ma le 150 maila (240 kilomita) i sisifo o le Aai Faatupu.

I nai aso na sosoo ai, sa maitauina ai e Elder Christensen ma le maniti o ona tino, a o toulu ifo le tele o fua faapelepele o apu mai ogalaau ua liu efuefu i lana faatoaga laau aina. Sa manatu o ia ua matua faatamaia lava le aafiaga o lana pisinisi.

Peitai, o apu na totoe, sa matua sili atu ona lelei, ma o le tuuitiitia la o fua na totoe, na faamanuiaina ai fua o ana faatoaga. “Sa puipuia lava e le Alii fua o la matou faatoaga,” o lana saunoaga lea. “Na avea lena tausaga ma tausaga aupito silisili ona faamanuiaina.” Sa ia faafesootaia lena faamanuiaga i le totogiina ma le faamaoni e lona aiga o le sefuluai, ma lo latou naunau e usitai i poloaiga a le Alii. Sa aoaoina ai foi i lea aafiaga, e i ai taimi e aumaia ai e puapuaga ia faamanuiaga i ni auala e le i faamoemoeina.

O Elder Christensen, ua 64 tausaga o lona soifua, o se uso fou o le Korama Lua a le Au Fitugafulu, sa soifua mai i Preston, Idaho, i ona matua o LeGrand ma Blanche Naef Christensen i le aso 8 o Ianuari 1939. Sa soifua ae i Idaho ma Uosigitone ma sa aoga i le Iunivesite o Polika Iaga, lea na la feiloai ai ma Geniel Johnson. Sa faaipoipo i laua i le aso 23 o Iuni 1962 i le Malumalu o Manti i Iuta. E toaono o laua alo o loo soifua nei.

Sa faamisiona Elder Christensen i Uruguay mai le 1959 i le 1961, ma o iina sa atiinaeina ai sana molimau malosi e uiga i le Perofeta o Iosefa Samita. “A o lei oo i le taimi lena, sa mafai lava ona ou faamatalaina le tala e uiga i le Uluai Faaaliga. Ae ina ua ou aoaoina atu ma le agaga tatalo i isi, sa ou maua ai se molimau patino e uiga i le Perofeta o Iosefa ma le talalelei toefuataiina,” o lana saunoaga lea. “Sa ou iloaina e moni mea sa out aoaoina atu.”

Mai le 1999 i le 2002 sa galue ai Elder Christensen o se peresitene o le Misiona a Atenitina Resistencia. Sa galue foi o ia o se tagata e faia sauniga i le malumalu, o se peresitene o le paranesi, epikopo, ma se tasi o le au peresitene o le siteki.