O Oe o se Atalii [po o se Afafine] o le Atua
Ia aua lava nei galo, au uo laiti pele, o outou moni lava o ni atalii [po o ni afafine] o le Atua … , e alofaina e Ia ma finagalo e fesoasoani ma faamanuia ia te outou.
Au uo laiti pele, o tamaiti ma teineiti e pele ia te au, e ese lo’u fiafia ina ua tatou mafuta i le faamanatuina o le aso fanau lona 125 o le Peraimeri.
Ou te manatu e le i i ai lava muamua se sauniga faapenei a tamaiti ma teineiti. O loo ou tautala atu ia te outou mai le Nofoaga Autu mo Konafesi i le Aai o Sate Leki. Ua matua faatumulia i tamaiti, o o latou matua ma o latou faiaoga—e 21,000 i latou. Ma o loo tauaofia foi le fia afe o outou i isi fale i vaega eseese o le lalolagi, e faamanatu ai lenei sauniga maoae. O le a faaliliuina a’u upu i ni gagana se tele. Tatou te nonofo i atunuu eseese ma tatou fa’alo atu i fu’a eseese. Peitai e i ai lava le mea e tasi tatou te tutusa ai. O i tatou uma lava o ni tagata O Le Ekalesia a Iesu Keriso o le Au Paia o Aso e Gata Ai. Ma o lo outou potopoto mai la i nei nofoaga eseese e tele, o se faailoga lena o le olaola matagofie ua oo i ai lenei Ekalesia talu mai lona faatoa faavaeina.
E le i faapea sa i ai se Peraimeri i le taimi atoa o le Ekalesia. I le uluai 48 tausaga o lona talafaasolopito, sa le i ai se faapotopotoga a tamaiti ma teineiti lava latou. Sa i ai se tamaitai pele o lona igoa o Aurelia Spencer Rogers, sa manatu o ia, e tatau ona i ai se faalapotopotoga a tamaiti laiti lava latou o le Ekalesia, ina ia mafai ai ona “aoaoina i latou e avea ma alii e sili atu ona lelei.”
Sa aveina atu lana fautuaga i le Peresitene o le Ekalesia sa i ai i lena taimi, o Ioane Teila. Sa mafaufau Ioane Teila, afai e lelei se faalapotopotoga mo tamaiti, e tatau foi la ona lelei mo teineiti, aua foi e mafai ona latou faaleomalieina le usuina o pese. Ma o lea, i le 125 tausaga talu ai, sa potopoto ai le uluai Peraimeri e 224 tamaiti ma teineiti “e aoaoina ai le usiusitai, faatuatua i le Atua, tatalo, faatuatuaina, ma le amio solia” (Encyclopedia of Mormonism, p. 1146).
Mai si na amataga itiiti, sa tuputupu ae le Peraimeri seia oo lava ina avea ma se vaega o le Ekalesia i le lalolagi atoa. O le taimi nei, toeitiiti atoa le miliona o outou tamaiti i le Peraimeri.
E lelei tele, aua e tatau lava ona i ai se faalapotopotoga a tamaiti ma teineiti e faapei foi o alii talavou ma tamaitai talavou, ma tagata matutua foi o le Ekalesia e i ai lava a latou faalapotopotoga e aoao ai.
O tamaitai e toatolu sa saunoa atu ia te outou, o i latou ia e taitaiina le galuega a le Peraimeri i le lalolagi atoa. A tuu faatasi a latou fanau, e 23, ma o lea ua latou iloa ai mea na tou te faanaunau i ai.
E ese le manuia o outou, a’u uo laiti pele, ona ua i ai ni outou faiaoga ofoofogia. Latou te alolofa tele ia te outou, ma ua latou sagisagi fiafia tou te feiloai i vaiaso taitasi ma aoao outou i ala o le Alii.
Sa faamatala e le Uso ia Artel Ricks se tala manaia lava e uiga i se faiaoga musuia o le Peraimeri. O le taimi lena o tamaitiiti o ia ma pe ua lima i le ono ona tausaga. I se tasi po, sa nofonofo ai lo latou aiga i le laulau ‘ai ma talatalanoa e uiga i le sefuluai. Sa latou faamatala atu ia te ia “o le sefuluai o le tasi vaesefulu lea o mea uma latou te maua ma e totogi atu i le Alii e i latou e alolofa ia te Ia.”
Sa alofa o ia i le Alii ma o lea na manao ai e avatu i le Alii lana sefuluai. Sa ia ave le tasi vaesefulu o si ana teugatupe itiiti sa i ai. Sa ia fai mai, “Sa ou alu i le potu e tasi o le fale e i ai se loka i le faitotoa—o le faletaele lea—ma sa ou tootuli i tafatafa o le tapu taele. Sa faataliaga lo’u lima ma tuu i ai sene e tolu pe fa, ona ou ole lea i le Alii e talia a’u tupe [sa ou talitonu o le a afio mai o Ia ma avatu la’u tupe mai ia te au]. Sa umi sina taimi o ou aioi atu i le Alii [ae leai se mea na tupu. Aisea Na te le taliaina ai la’u sefuluai?] Ina ua ou tu ae mai ou tulivae, sa matua ou lagona le le agavaa ma sa le mafai ona ou faamatalaina i se tasi le mea na tupu… .
“Ina ua mavae ni nai aso mulimuli ane i le Peraimeri, sa fai mai le faiaoga ua uunaia lava o ia e aoao mai se mea e le o i ai i le lesona. Sa ou maofa ina ua ia aoaoina mai i lena taimi ia i matou le auala e totogi ai sefuluai [i le epikopo, le auauna a le Ali]. Peitai, o le mea sa ou aoaoina sa sili atu lona taua nai lo le auala e totogi ai sefuluai. Sa ou aoaoina ai sa faafofogaina e le Alii la’u tatalo ma tali mai i ai, e alofa o Ia ia te au, ma e taua au ia te Ia. I ni tausaga mulimuli ane, sa ou talisapaia ai foi se isi lesona sa aoao mai e lo’u faiaoga o le Peraimeri i lena aso—ia aoao atu e tusa ma uunaiga a le Agaga.
“Ona o le faamomoiloto o manatunatuga o lena mea, o lea sa le mafai ai ona ou faamatalaina i se tasi mo le tolusefulu ma ona tupu tausaga. E oo lava i le taimi nei, ina ua mavae tausaga e onosefulu, o loo faiagata pea lava ia te au ona faamatala e aunoa ma le maligi o ou loimata. O le mea faagauloto, o le le’i iloaina e se faiaoga lelei tele o le Peraimeri, na avea o ia ma auala e talanoa mai ai le Alii i se tamaitiiti” (“Coins for the Lord,” Artel Ricks, Ensign, Dec. 1990, p. 47).
Sa ou alu foi i le Peraimeri a o ou laitiiti. O aso na sa matou feiloai ai i le afiafi o le Aso Lua pe a tuua aoga. E foliga mai ia te au, matou te vaivai lava ma fia aai i afiafi pe a tuua aoga. Ae e ese le lelei o o matou faiaoga ma agalelei ia i matou. E masani ona latou aumaia ni a matou kuki e ‘ai, ae o le mea e sili atu ona taua, latou te aoaoina i matou i ni lesona ‘anoa ma le matagofie. O i sa matou aoao ai e uiga ia Iesu ma Lona alofa tele mo i tatou. Sa matou aoao ai e uiga i le Atua lo tatou Tama e Faavavau, lea e mafai ona tatou o i ai i le tatalo.
Sa matou aoao ai e uiga i le taulealea o Iosefa Samita, lea sa alu i le vao e tatalo ai ma o lana tatalo lea na tali mai i le asiasi mai i ai o lo Tama Faalelagi ma Lona Alo o Iesu Keriso. O i na matou aoao ai e uiga i le talafaasolopito o le Ekalesia, e uiga i alii ma tamaitai ma tamaiti ma teineiti totoa, sa matua galulue malosi ina ia faamalosia. O i foi na matou aoao ai e uiga i le agalelei o le tasi i le isi ma ia loto fesoasoani i tulaga uma. Sa matou aoao ai foi e matua taua tele le fesoasoani i mea o loo faia i totonu o le aiga. Sa matou aoao ai e faatulagaina lelei le amio.
O lea ua faia nei le Peraimeri i Aso Sa. O le tele lava o itu, e sili atu le taimi lenei. Tatou te le o vaivai faapea sa tatou i ai i aoga i le aso atoa. E fai lava si umi o le Peraimeri, ae ua saunia lelei lava o tatou faiaoga, ma e le gata ina lelei a tatou lesona, ae faapena foi ona lelei a tatou gaoioiga.
O i tatou te pepese faatasi ai i na pese matagofie o le Peraimeri. O se tasi o pese sa matou usuina a o ou laitiiti e faapea:
Tama e, faasusulu mai, lou malamalama
Pa’i mai matou vaai, usitai i ai.
Tala’i lau savali o;
Lo matou tofi lea.
E fai o au mea moni mo
Matou fetu ao.
(“The Light Divine,” Viiga, Nu. 188).
O upu o lena pese matagofie sa tusia e Matilda W. Cahoon, o lo’u faiaoga a o ou laitiiti.
Ua ia te outou nei le Tusipese a Tamaiti e ese le matagofie, ua tumu i le mau musika eseese mo outou. O lea sa usuina i le aso nisi o nei pese. Sa tatou auai faatasi uma i le lagiina o lena pese matagofie, lea sa tusia mo outou tamaiti o le Peraimeri, ae ua usuina e le Ekalesia atoa. O se pese e matua matagofie tele. Ma o loo tautala i se upumoni sili ma le ofoofogia.
O le Atua lo’u Tama,
Ia aumai o ita,
I se aiga i lalo nei
I matua agalelei.
Ta’ita’i a’u,
faasino mai,
Le ala e ui ai.
A’oa’o mai mea e ao na ou fai
Ma te toe mafuta ai (“I Am a Child of God,” Viiga, Nu. 184).
Oka se pese ina a matagofie. Oka foi se upumoni o loo aoao mai ai. E i ai sou tama faalelalolagi. O ia o le paaga faapelepele a lou tina. Ou te faamoemoe o loo e alofa ia te ia, ma e te usitai foi i ai. Peitai e i ai foi se isi ou tama. O lou Tama lena i le lagi. O ia o le Tama o lou agaga, e faapei foi ona avea lou tama faalelalolagi ma tama o lou tino. Ma e tutusa lelei lava le taua o lou alofa ma lou usiusitai i lou Tama i le lagi, ma lou alofa ma lou usiusitai i lou tama faalelalolagi.
Tatou te talanoa ma lo tatou tama faalelalolagi. O ia o se tatou uo faapelepele, o lo tatou leoleo, o ia foi lea e masani ona aumaia a tatou meaai ma lavalava ma fale. Ae tatou te talanoa foi i lo tatou Tama i le lagi. Tatou te faia lenei mea e ala i le tatalo. Ou te faamoemoe o po uma lava ma taeao uma, tou te tootutuli ai ma talanoa atu i lo outou Tama i le lagi. Ou te faamoemoe a oo i le taeao, tou te faaali atu foi le faafetai ona o se malologa sa faia i le po, mo le mafanafana ma le fiafia atoa ma le alofa o loo outou lagonaina i o outou aiga. Ou te faamoemoe o le a outou ole atu ia te Ia e puipui outou ma faamanuia ma taitai outou i le aso atoa. Ou te faamoemoe o le a outou tatalo mo tama ma tina ma uso ma tuafafine, ma o le a outou manatua i latou uma lava o loo mama’i ma i latou e manaomia le fesoasoani. Ou te faamoemoe o le a outou manatuaina faifeautalai a le Ekalesia pe a outou tatalo.
I le po ae tou te le i momoe, ou te faamoemoe o le a outou toe tootutuli foi ma faafetai atu ia te Ia mo faamanuiaga o le aso. Toe faafetai atu ia te Ia mo o outou matua ma o outou faiaoga. Aioi atu ia te Ia e faamanuia outou ina ia maua se moe lelei, ma faamanuia uma isi, aemaise i latou o loo manaomia le fesoasoani, ma i latou e le o lava meaai pe leai foi se mea lelei e momoe ai.
Pe moi ea ua tele naua mea ua poloai atu ai, ina ia faaalu ni nai minute o aso taitasi e talanoa atu ai i lou Tama i le lagi, ina ua e iloaina o oe o se atalii po o se afafine o le Atua?
Afai ua e iloa moni o oe o se atalii po o se afafine o le Atua, o le a e iloaina foi e tele mea e finagalo ai o Ia mai ia te oe, Lona atalii [ma lona afafine.] E finagalo o Ia e te mulimuli i Ana aoaoga ma aoaoga a Lona Alo pele o Iesu. E finagalo ia te oe ina ia e limafoai ma agalelei atu i isi. O le a le fiafia o Ia pe a e palauvale pe faaaoga gagana masoa. O le a le fiafia o Ia pe afai e te le faamaoni i soo se mea, pe afai e te kopi pe matagaoi tusa pe laitiiti se mea. O le a fiafia o Ia pe afai e te manatua i latou e le atoatoa le malolosi i a outou tatalo ia te Ia. O le a Ia puipuia oe ma taiala oe ma leoleo ia te oe. O le a Ia faamanuiaina oe i au meaaoga ma le Peraimeri. O le a Ia faamanuia ia te oe i lou aiga ma o le a avea oe o se tamaitiiti po o se teineitiiti sili atu, e te usitai i ou matua, tou te le tauaimisa ma ou uso ma tuafafine, ma e te fesoasoani foi i le fale.
Ma o le a e tupu ae o se alii po o se tamaitai talavou malosi i lenei Ekalesia. O le a avea oe ma tagata sili atu o le nuu.
O tane uma po o fafine sa savavali i le fogaeleele, e oo foi i le Alii o Iesu, sa avea foi i latou o ni tamaiti ma teineiti e pei o outou. Sa latou ola e tusa ai ma faatulagaga sa latou mulimuli ai. Afai na lelei lena faatulagaga, o lona uiga sa avea i latou ma alii ma tamaitai lelei.
Ia aua lava nei galo, a’u uo laiti pele, o oe moni lava o se atalii [po o se afafine] o le Atua, ua outou fananau mai ma se mea o Lona natura faalelagi, e alofaina e Ia ma finagalo e fesoasoani ma faamanuia. Ou te tatalo ia faamanuia outou e lo tatou Tama Faalelagi. Ia silasila atu o Ia ma le alofa ia te outou. Ia outou savavali i Ona ala ma mulimuli i Ana aoaoga. Ia aua lava nei outou tautatala i le gagana faatiapolo ua amata ona talanoa ai tamaiti ma teineiti i aoga. Ia tutumu outou i le agaga tatalo ia te Ia, ia tatalo foi e le aunoa i le suafa o Lona Alo Pele, o le Alii ia o Iesu Keriso. Ia taitasi i tatou ma faatu se sini e mulimuli e le aunoa, ma le faatuatua ia te Ia. Ia agalelei atu le olaga ia te oe, aua e moni lava o oe o se atalii ma se afafine o le Atua, ua agavaa ma ua tatau i ai Lona alofa ma faamanuiaga.
Ia aua lava nei galo o outou o ni tagata O Le Ekalesia a Iesu Keriso o le Au Paia o Aso e Gata Ai. Ou te tatalo ia faamanuia outou e le Alii ma ou te alofa tele ia te outou i le suafa paia o Iesu Keriso, amene.