Saunia mo le Auaunaga Faafaifeautalai

Elder Daryl H. Garn

O Le Fitugafulu

E maeu le taua o le galulue faatasi o tama ma atalii i vaega faavae o le saunia mo se misiona

I se konafesi faalesiteki talu ai nei, sa saunoa ai se faifeautalai ua maea lana misiona i le mataupu o le saunia mo le auaunaga faafaifeautalai. Sa ia faaaogaina le tala faatusa o se tama sa faapea atu i lona atalii: “O le a ou fiafia lava pe a e taalo i lau taaloga muamua i le pasiketipolo ina ia e mafai ai ona iloa popo le polo ma togi i le mama.” Na ia faatusatusaina lena faataitaiga i se tama o loo faapea atu i lona atalii: “O le a ou fiafia pe a e alu i le misiona ina ia mafai ai ona e aoao ia avea ma se tagata lelei ma aoao atu le talalelei.” O lenei faatusatusaga e i ai sona aafiaga taua ia te au pe a ou toe mafaufau i lo’u olaga.

A o ou talavou, o lou naunautaiga sili lava sa i ai o le taalo pasiketipolo. O le mea na lelei ai, sa ia te au se tama sa naunau lava ia vaai ua ausia le manaoga o lona atalii. Ma te faataitaia ma tama ia vaega faavae o le pasiina ma le popoina o le polo pasiketi mo le tele o itula i totonu o si o matou tamai umukuka. Ou te faalogologo i taaloga pasiketipolo a kolisi i luga o le leitio ma moemiti ia avea ma se tasi o se au a le iunivesite i se aso. Sa matuai mamao lava le auauna atu i se misiona ma lo’u mafaufau i le taimi lena; o le mea lena, sa laitiiti lava se taumafaiga sa ou faia ou te saunia ai e avea ma se faifeautalai. I se taumafaiga ina ia mautinoa o loo paleni lo’u olaga, o lo’u tama—o le sa lei i ai se valaauga i le Ekalesia mo le tele o tausaga—sa taliaina le valaauga e avea ai ma ou Taitai Sikauti. Sa ia mulimulitai i tulafono ma aiaiga a le Sikauti, ma o lona maelega, sa avea ai au ma nisi o au uo ma ni Sikauti Aeto. Ua ou iloaina nei o le Sikauti o se sauniuniga sili lea mo se misiona.

O le miti sa ou moemiti ai a o ou laitiiti na taunuu lava ina ua ou sao i le au pasiketipolo a le Iunivesite a le Setete o Iuta. I lo’u tausaga lona lua i le Iunivesite, sa faauo mai ai se faifeautalai ua uma lana misiona ia te au. Ona o lana faataitaiga sa amata ai ona ou vaavaai atu i au uo i le aoga, e aofia ai i latou o loo i le au pasiketipolo, ma iloaina ai o tagata sa sili ona ou manao ia ou foliga i ai, o i latou ia sa auauna atu i ni misiona. Faatasi ai ma le taitaiga agalelei ma le alofa a lauo lelei—ma, ou te mautinoa, o se taunuuga o talosaga ma faataitaiga a lo’u tina—na suia ai ou manaoga. Ina ua mavae lo’u tausaga lona lua i le Iunivesite a le Setete o Iuta, sa valaauina loa au ou te auauna atu i le Misiona a Kanata i Sisifo.

E tolu masina talu ona ou i ai i le misiona ae tofi atu se faifeautalai fou mai Idaho e avea ma au soa. E na o ni nai aso talu ona ma faatasi ae ou iloaina se mea e matuai taua lava: sa iloa lelei e la’u soa le talalelei, ae na o lesona a faifeautalai ua ou taulotoina. Sa ou moomoo maimau pe ana ou matuai saunia e avea ma se faifeautalai e pei ona ou saunia e avea ma tagata taalo pasiketipolo. Sa saunia la’u soa mo lana misiona i lona olaga atoa ma sa vave ona avea ma se tagata aoga o le galuega. E maeu le taua o le galulue faatasi o tama ma atalii i vaega faavae o le saunia mo se misiona.

Ou te talitonu e talafeagai le faatusatusaina o le taaloga o le pasiketipolo i le galuega faafaifeautalai. O le taaloga o le pasiketipolo e le gata e aofia ai le taimi e te tauva ai ma le isi ‘au i luga o le malae, ae o itula foi o sauniuniga ma koleniga. O le galuega sili o le laveaiina o agaga e le faatapulaaina na o le lua tausaga lea e te auauna atu ai i se misiona, ae moomia ai ni tausaga o le ola amiotonu ma saunia ina ia mafai ona ausia faatulagaga mo le auaunaga faafaifeautalai faamisiona.

O le aso 11 o Ianuari, 2003, o se vaega o le faasalalauga o le aoaoga a taitai perisitua i le lalolagi atoa, na aoaoaina ai e Peresitene Gordon B. Hinckley ia taitai perisitua e uiga i le galuega faafaifeautalai. O ana saunoaga na faatupu lagona ia i tatou uma ina ia toe silasila i o tatou tiutetauave taitoatasi e fetufaai atu le talalelei. Na saunoa Peresitene Hinckley, “Ua oo mai le taimi e tatau ai ona tatou siitia i luga ia faatulagaga o i latou o e valaauina e avea ma amepasa a le Alii o Iesu Keriso i le lalolagi” (Uluai Fonotaga Faaleaoaoga a Taitai i le Lalolagi Atoa, 11 Ian. 2003, 17).

E lua vaega o le siitiaina i luga o faatulagaga mo le auaunaga faafaifeautalai lea e tatau ona tatou mafaufau i ai. O le vaega muamua o le vave saunia lea o alii ma tamaitai talavou. I le latou tusi e faailoa mai ai nisi o suiga i polokalama a Alii Talavou ma Tamaitai Talavou, na saunoa ai le Au Peresitene Sili: “A o galulue ai le autalavou i nei sini, o le a latou atiinaeina ai ia tomai ma uiga ia o le a taitai atu ai i latou i le malumalu ma saunia ai mo se auaunaga i le olaga atoa i o latou aiga ma le Alii” (Tusi a le Au Peresitene Sili, 28 Setema, 2001). Faalogo lelei i a latou saunoaga: “atiinaeina ai ia tomai ma uiga.” I le avea ai ma matua ma taitai o le autalavou, e moomia ona tatou fesoasoani atu i o tatou tagata talavou ina ia mauaina nei tomai ma uiga.

O le vaega lona lua e faaautu lea i le agavaa o le tagata lava ia, lea e maua mai i le tausiga o poloaiga a le Atua. O nisi alii talavou ua i ai le manatu faapea e mafai ona latou solia ia poloaiga, ona tautau atu lea i a latou epikopo i le toe tasi le tausaga ona latou fuafua lea e o i se misiona, ona faapea lea ua agavaa lea e auauna atu. O le faagasologa o le salamo, e tele atu nai lo na o se fuafuaga e tautau atu agasala ma sosoo ai ma se vaitaimi e faatalitali ai. E masani ona tatou faalogo i le fesili lenei a se tasi ua solitulafono: “O le a le umi ou te faatali ai ona mafai lea ona ou alu ou te faamisiona?” Ia manatua o le salamo e le na o le faatali mo se vaitaimi. Na fetalai mai le Faaola: “Ia outou fai ma taulaga ia te au le loto momomo ma le agaga salamo. Ai se sau foi ia te au ma le loto momomo ma le agaga salamo, ou te papatisoina o ia i le afi ma le Agaga Paia” (3 Nifae 9:20).

O le taimi lenei e salamo ai ma agai atu ai i le faamagaloga. Na saunoa Peresitene Hinckley, “Tatou te le na ona faatagaina i latou e le o agavaa ina ia o atu i le lalolagi e talai ma folafola atu le talalelei” (Uluai Fonotaga Faaleaoaoga a Taitai i le Lalolagi Atoa, 11 Ianuari, 2003, 17). Ua tatou malamalama nei mai le saunoaga a le Au Peresitene Sili i le galuega faafaifeautalai e faapea e i ai soligatulafono o le a taofia ai alii talavou ma tamaitai talavou mai le auaunaga faafaifeautalai (“Faamatalaga i le Galuega Faafaifeautalai mai le Au Peresitene Sili ma le Korama a Aposetolo e Toasefululua,” 11 Tesema 2002).

Na saunoa Peresitene James E. Faust: “E i ai vaega e moomia ona matuai faamaoni a’ia’i ai i le olaga. E i ai nisi o mea sa le tatau lava ona faia, o nisi o tuaoi sa le tatau lava ona sopoia, o feagaiga sa le tatau ona solia, o upu sa le tatau ona lafoina, ma manatu sa le tatau ona faamalieina” (“Integrity, the Mother of Many Virtues,” Ensign, May 1982, 48).

O faatulagaga moomia mo le auaunaga faafaifeautalai ua siitia i luga. “O tagata taitoatasi e le mafaia ona ausia ia tulaga manaomia i le faaletino, mafaufau, ma lagona o le galuega faafaifeautalai faamisiona, e tuusaunoa lava i latou ma le mamalu. E mafai foi ona valaauina i latou e auauna atu i isi valaauga ia o le a faamanuiaina ai o latou olaga.” (“Faamatalaga i le Galuega Faafaifeautalai mai le Au Peresitene Sili ma le Korama a Aposetolo e Toasefululua,” 11 Tesema, 2002). Tatou te talitonu o le mulimuli i taiala e fautuaina mai e le Au Peresitene Sili, o le a i ai se faatelega i le aofaiga o faifeautalai faamisiona, ua agavaa ma saunia e auauna atu.

E masani ona tatou vaai maualuga i tagata taaalo maoae i taaloga, ma tatou te taumafai e atiinaeina ni tomai ina ia faapei ai o i latou. I o tatou olaga faaleagaga e i ai foi a tatou faataitaiga silisili tatou te mulimuli i ai, o le faataitaiga sili lava o lo tatou Alii ma le Faaola o Iesu Keriso, o le na tali atu i le fesili a Toma, “Matou te mafai faapefea ona iloa o le ala?” (Ioane 14:5).

O loo tusia i tusitusiga paia, “Ua fetalai atu Iesu ia te ia, o au nei le ala” (Ioane 14:6). I le 2 Nifae, tatou te faitau ai: “Ina mulimuli mai ia outou ia te au. O lenei, o’u uso pele e, e mafai ea ona tatou mulimuli atu ia Iesu, pe afai tatou te le loto ina tausi i poloaiga a le Tama?” (2 Nifae 31:10).

Au uo talavou e, e toatele o loo mulimuli “i le ala” a le Faaola, o le e mafai ona outou saili e mulimuli i ai e avea ma o outou faataitaiga a o outou sauniuni atu mo le auaunaga faafaifeautalai. O le a outou mauaina i latou i o outou aiga, o a outou uo, ma o outou taitai i le Ekalesia. E oo mai lava i le taimi nei, ou te faitauina pea o se tasi o o’u faamanuiaga silisili ia na uo pele o e na faatuina le faataitaiga lelei e ala i le mulimuli i le Faaola.

O la’u tatalo ina ia maelega outou alii talavou i o outou manaoga amiotonu, ma o le a outou manuia i mea uma tou te faia, ma o le a outou manuia lava, e pei ona saunoa mai ia Elder M. Russell Ballard, “o se augatupulaga sili ona maoae lenei o faifeautalai i le talafaasolopito o le Ekalesia” (“O Se Tupulaga Sili Ona Maoae o Faifeautalai,” Liahona, Nov. 2002, 47).

Ou te molimau atu, e pei ona saunoa talu ai nei ia Peresitene Hinckley e uiga i le auaunaga faafaifeautalai, e faapea “e leai se galuega e sili atu lona maoae. E leai se isi galuega e sili atu ona taua” (Faasalalauga o le Fonotaga Faaleaoaoga a Taitai i le Lalolagi Atoa, 11 Ianuari, 2003, 21). I le suafa o Iesu Keriso, amene.