O Uiga Faaleatua o Afafine Amiotonu o le Atua
Ou te uunaia outou ina ia faamalolosia uiga faaleatua na ua outou maua ma ia faia se faaiuga o le a toe atiina a’e isi uiga faaleatua e tele.
Ou tuafafine talavou pele e, ua matua faagaeetiaina lava au i lo’u faatasi ai ma outou aua o loo ia te outou se malosiaga sili mo le faia o le lelei. O outou o se vaega taua tele o le tulaga o le a i ai le Ekalesia ma le lalolagi, e faapei foi ona i ai o outou tina, o o latou uso ma tuafafine o outou tama, ma tina matutua i tausaga ua mavae. E mafai ona outou maua le fiafia ae le na o ni moomooga ma ni faamoemoega mo mea e tatau ona i ai.
Ua faapitoa ona faamamaluina i tatou i lenei afiafi ona o lo tatou faatasi ai ma Peresitene Gordon B. Hinckley, Peresitene Thomas S. Monson, ma isi Pulega Aoao. Ou te faamalo atu i le Tuafafine o Tanner, Tuafafine o Beck, ma le Tuafafine o Dalton mo a latou savali matagofie i le tumau faamaoni ia Keriso. E matua maoae foi musika sa saunia e lenei aufaipese a tamaitai talavou.
O le aso 19 o Mati, 2003, sa auina atu ai e le Au Peresitene Sili se tusi i taitai o le perisitua e uunaia ai i latou ina ia fesoasoani i tamaitai talavou i le taimi faigata o lo latou siitaga i luga i le tulaga faatamaitai. E matua taua tele lenei tulaga. O loo faamamafaina i lea tusi faapea e ui lava o matua o loo i ai le uluai matafaioi, ae e tatau foi i au epikopo, o taitai o Tamaitai Talavou ma le Aualofa ona galulue faatasi e faamalosi o tatou tamaitai talavou matutua i lenei siitaga.
O’u tuafafine talavou pele e, a o o’u femalagaai ai i tofiga faale-Ekalesia i vaega eseese o le lalolagi, sa ou feiloai atu ai i ni tamaitai talavou maoae, ma e faafiafiaina lava au i lo outou tutumau ma le faamaoni. E mafai ona ou fai atu e aunoa lava ma se faatuai, e mafai ona outou maua “se faamoemoega atoatoa” mo lo outou lumanai ma le olioli e le uma, pe afai tou te “fetaomi atu i luma” o ni afafine amiotonu o le Atua.1 O outou o ni tamaitai talavou e i ai uiga faaleatua ma le folafolaga tele. Ou te fia uunaia outou ina ia faamalolosia uiga faaleatua na ua outou maua, ma ia outou faia se faaiuga o le a toe atiina a’e isi uiga faaleatua e tele.
O le po nei ou te fia tautala atu ai e uiga i nisi o na uiga faaleatua. O le toatele lava o tagata e le malamalama atoatoa i le faauigaga o le uiga faaleatua. O se tasi o faauigaga masani o le legavia po o le ola mama lea, ae o le uiga faaleatua lava ia i lona atoaga, e aofia ai itu uma o le amiotonu lea e fesoasoani e fau ai a tatou amio. Sa mauaina ia se faataitaiga tuai i le falemataaga i Newfoundland o se ie na su’iina i le 1813, e faitauina faapea: “O uiga faaleatua o le mea pito sili lea ona matagofie o le mafaufau, o le teuteu aupito tamalii lea o le tagata soifua. O uiga faaleatua o lo tatou maluapapa lea ma lo tatou fetu taiala e faatupu manatu pe a sese o tatou lagona.”
Sei ou fautuaina atu lava ni uiga faaleatua se 10 lea e mafai e outou uma taitoatasi ona sailia i la outou sailiga mo le mea atoatoa ma le fiafia:
1. Faatuatua
Ua ou lisiina faamuamua le uiga faaleatua o le faatuatua aua e aupito sili ona taua. Sa aoao mai e le Perofeta o Iosefa Samita e faapea o le faatuatua i le Alii o Iesu Keriso, “o le faavae lea o le amiotonu uma.”2 Ou te folafola atu ia te outou tamaitai talavou lelei, afai tou te taumafai e ola i poloaiga, o le a faaauau pea lava ona tupu lo outou faatuatua. O le faatinoga o le faatuatua, tatou te fiafia ai ma tumu i le faamoemoe, agaalofa ma le lototoa, aua o le faatuatua o le faavae autu lea o nei uiga faaleatua uma.
2. Faamaoni
Sa faamatala mai e se tamaitai talavou o se au volipolo a le iunivesite le taimi na la taaalo faatasi ai ma lana uo o Muki i se suega siamupini:
“Ou te manatuaina lava le vavalalata o ‘ai o le taaloga… . Sa faasauni ia Gracie, sa oso i luga, ma tu’i malosi mai le polo i le malosi sa ia mafaia… . Sa sii le lima o le tafu’a sa tu i le laina ma fai mai na alu i fafo le polo, ma sa sii a’e le lima o le laufali ma faapea mai ua maua le ‘ai [o le matou au]. Sa amata ona tasii ae i luga o matou lima ma taufai po e le tasi le lima o le isi e faaalia ai le fiafia, ae matou vaaia le lima o Muki o tusitusi atu i le laufali e faapea sa pa’i lona lima i le polo a o taumafai e poloka. Sa ta’u lava e Muki o ia na pa’i i le polo. Sa … faailoa mai foi e le tafu’a sa tutu i autafa … le alu i fafo o le polo [e ta’u mai ai] e leai se tasi na pa’i i le polo.
Sa faaalia e le tamaitai matamuli o Muki se aga o le amiosa’o ma le faamaoni ou te lei vaai muamua i ai. Sa matua fiafia Gracie Shute ina ua la talanoa ma Muki ina ua maea le taaloga… . Sa foai atu e Muki i se taimi mulimuli ane ia Gracie se Tusi a Mamona. Ou te le iloa pe ua faitau e Gracie le tusi … , ae ou te iloa sa ootia lava Gracie i le faataitaiga a Muki, e pei foi o matou uma.”3
E le mafai ona e faamaoni i isi sei vagana ua e faamaoni ia te oe lava.
3. Legavia
I totonu “O Le Aiga: O Se Folafolaga i le Lalolagi,” tatou te faitau ai, “O mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.”4 E le gata foi i lea, ae ua fetalai mai le Alii i le Tusi a Mamona, “O au o le Alii le Atua e fiafia au i le legavia o fafine.”5 O i latou o loo faia ni mafutaga faaulugalii i fafo atu o faaipoipoga, e ono mafatia i lagona o le tausalaina faapea foi le loloto o tiga o lagona ma le faaletino. O mafutaga faaulugalii a alii ma tamaitai i fafo atu o noataga ua faatuina e le Alii e aumaia ai le faanoanoaga tele, o le maasiasi, faatoilaloina, ma le le fiafia ia i latou e aofia ai.
Pe a faatusatusa i ai, afai e faaaoga nei meaalofa paia e pei ona fuafuaina e le Alii i totonu o noataga o se faaipoipoga faalemalumalu, o le a oo ia i tatou le fiafia ma le olioli silisili. E avea ai i tatou ma foafoa fesoasoani i le Atua ina ia maua ai aiga ma fanau. O le legavia a o lei faaipoipo ma sosoo atu ai ma le faamaoni pe a maea le faaipoipoga, o se tusifolau paia lea i le faaaloalogia o le tagata lava ia ma le fiafia mo tagata uma. Na tuuina mai e Peresitene N. Eldon Tanner se fautuaga lelei ou te toe fia faamanatu atu: “Ia manatua e le aunoa, e mafai ona e saga alualu pea i luma pe a faaaloalogia oe e tagata nai lo lou tausaafia.”6 Ou te faatepa outou i le fautuaga silisili e faatatau i feusuaiga mama atoatoa o loo i le tamaitusi o le Mo Le Malosi o le Autalavou.
4. Lotomaualalo
O le lotomaualalo o le tausisia lea o le tulaga paleni o se tagata. Mo se faataitaiga, a faaviivii atu oe, ia e talia ma le faaaloalo, ae aua e te faamaualuga ai. Ua tele mea ua outou iloa tamaitai talavou, ae e tele isi mea e ao ona outou aoao. O se tagata e lotomaualalo, e faigofie foi ona aoao. Ioe, ua folafola mai le Alii, “Aua ua auina atu lo’u Agaga i le lalolagi e faamalamalama e lotomaualalo ma loto salamo.”7 O se tasi o faaupuga ou te fiafia lava i ai o lea: “Aoao e fai atu, ‘Ou te le iloa.’ Afai e faaaoga pe a talafeagai ai, o le a masani ai.”8
5. Amio Pulea
E tatau ona outou maua le malosi e pulea ai outou lava ina ia mafai ai ona ausia a outou sini ma faateleina lo outou malosi faanatura. O mausa o le amio pulea sa fatua’i mai a o outou laiti, o le a avea ma vaega o a outou amio i aso uma o outou olaga. O le ituaiga tagata la e fatua’i mai i le amio pulea, o le a tutu a’e ma outou i le toetutu.9
O le mataupu faavae o le galue o se vaega o le amio pulea. O’u tuafafine talavou pele e, e tele atu naua tausaga ua ou ola ai nai lo outou, ae e oo lava i tua i aso o Tamamatua, sa i ai lava se mea sa mafua ai ona e fia taoto i lalo ma e moe lelei ai i le po—sa latou faaigoaina o le galue.
6. Sa’o
E tatau ona tatou sa’o ma alolofa i a tatou feutagaiga ma isi tagata soifua. Sa tuuina mai e le Faaola ia i tatou se faataoto o le auauna le faamaoni sa nofo aitalafu i se tupe tele. Sa faamagalo e lona matai le aitalafu, ae toe alu le auauna lava lenei ma tuu i le falepuipui se tagata na aitalafu ia te ia i sina tupe itiiti. Sa aoaiina o ia e lona matai ona o lona le faaalia o le alofa lava lea e tasi na tuuina atu ia te ia, ona ia tuuina atu foi lea o ia ina ia faasalaina e pei o lona uso a auauna.10
Afai e te sa’o i isi tagata, o le a sa’o foi isi ia te oe. Sa faamatalaina se tala i se faiaoga o le Aoga Sa sa ia aoao atu i le vasega lenei mataupu faavae ona ia fai atu lea i le vasega, “Ia manatua, na tatou o mai iinei ina ia tatou fesoasoani atu i isi.” Sa fesili se teineitiiti o lana vasega, “Ae o le a la le mea na o mai ai isi?”
7. Faautauta
O se vaega o le agaga o le Upu o le Poto o le faautauta i mea uma, sei vagana ai mea ua patino ona faasa mai e le Alii. E lelei le aloese mai le papanu o laei, o le soona sitaili o ulu, vali, o amioga soona fai, o tala soona lafo ma musika e le talafeagai. O le soona fai e mafai ona tosina atu i ai manatu o nisi, ae e mafai ona tupu ai foi le inoino o i latou o loo e manao moni e faatosina mai.
A o avea au o se alii talavou, sa matou o ai ma ni au uo i se paka e fai ai faafiafiaga, lea sa matou tietie ai i se sasa lele. O ona foliga e pei o se ipu mafolafola ua faafao ona alu taamilomilo lea. O le toatele lava o i matou sa taumafai ina ia nonofo i le ogatotonu ina ia aua ai nei pauu ese pe a featofai le tino o le sasa pe a faasolo ina saoasaoa. O nisi taimi e pipii mai ai se tasi sa nofo i le pito i se uo sa latalata i le ogatotonu, ae o iina foi e toso ese faatasi atu ai i la’ua mai le sasa. E lei pine ae ou iloaina e tau leai se malosiaga e featofoai ai i le ogatotonu. Sa ou saogalemu lava i le ogatotonu e ui lava ina taamilomilo le sasa. Ae le saogalemu pe a taupeupe mai se isi o loo i le pito ia te au. Sa ou aoaoina ai, e saogalemu pe a nonofo faatasitasi i le ogatotonu.
8. Tumama
I tausaga ua mavae, sa matou asiasi atu ai ma Peresitene Howard W. Hunter, ma Sister Faust i nisi o tamaiti aooga o le BYU a o faia le polokalama e suesue ai i fafo i Ierusalema, i se nofoaga faifaatoaga, o se nofotumau i Isaraelu. I luga o le faitotoa o le potu o ni tamaiti aoga se toalua, sa i ai se faaupuga faapea, “Afai e latalata atu le tumama i le faaleatua, ia afio maia i le faasalaga!”
Sa tuuina mai e Peresitene Hinckley se fautuaga silisili ina ua ia saunoa mai, “Ia mama i ofu ma le amio… . O le vaitau ua tatou ola ai nei ua avea ma vaitau o lavalava e le matagofie, faapea foi ma amioga le lelei. Peitai ou te le o popole tele i lavalava tou te oofu ai e pei ona ou popole ina ia mama… . Ia e mautinoa lou lava tumama.”11 Ia manatua o le a faamasinoina oe ma le Ekalesia i se isi vaega, i lou tumama ma le mama o ou foliga vaaia.
9. Lototoa
O outou na tamaitai talavou, o le a outou matua manaomia le lototoa naua—le lototoa e tetee atu ai i uunaiga a uo, e tetee atu ai i faaosoosoga, e tatalia ai le taufaifai po o tauemuga, e tutu atu ai mo le upumoni. O le a outou manaomia le lototoa e feagai ai ma luitau o le olaga. Sa tusia e se tasi tamaitai talavou e tamoe i taufetuliga alu mamao, “E masani ona tofotofoina au e aua le faaauauina se tuuga. I le taimi o la’u tuuga muamua i lenei tausaga, ina ua toetoe lava a ou faavaivai ma taofi la’u tamoe, sa faatumulia lo’u mafaufau i upu o le fuaiupu lona tolu o le viiga ‘Le Faavae Malosi.’ O na upu na ou maua ai le lototoa e faauma ai la’u tuuga.”12
Ia aua le fefe, ou te i ai ia te oe;
O A’u lou Atua e fesoasoani pea,
Ou te faamalosi, faamanuia oe.
I lo’u aao ua amiotonu,
Lo’u aoao amiotonu,
Lo’u aao amiotonu, mamana naua.13
10. Alofa tunoa
Ua tau mai ia i tatou i le Mataupu Faavae ma Feagaiga “e ao ina tutupu [i tatou] i le alofa tunoa.”14 O le alofa tunoa o se uiga atua ua tuuina mai e le Atua. O se natura ia agalelei ai ma faia mea e lelei. O se uiga faatausala po o se mea matagofie ua faataunuuina; o se foliga tauagafau faamalieloto.15 O le tauagafau o le faatosina lea e maua mai i lagona malualii o le tagata, o se matagofie i totonu lea e maua mai se lagona o le tauaogaina. Ua ta’ua e faapea o ou foliga vaaia o le mea aupito taua lea e mafai ona e laeiina. E i ai se alii talavou lelei ou te iloaina, e i ai sana lisi o uiga taua o loo ia sailia i le tagata o le a faaipoipo i ai. O le laufofoga fiafia o loo pito i luga o lana lisi.
E tele taimi tatou te iloa ai e le o amanaiaina ia aafiaga a tamaitai lelei. O se tosinaga e masani ona maaleale ae maoae ona taunuuga. E mafai e le tamaitai e toatasi ona faia se eseesega tele mo se atunuu atoa. Ou te fia ta’ua ni faataitaiga se lua mai tusitusiga paia, o le tasi e faatiapolo a o le isi e lelei.
I le tusi a Eteru, sa faatosina ai e le afafine lalelei o Iareto ia Akiso ina ia faaipoipo atu ia te ia, e ala i se siva faatosina loto. E mafai e Akiso ona faaipoipo atu ia te ia, pe afai na te fasiotia lona tamamatua, le Tupu lea o Omera, ina ia mafai ai ona avea ma tupu lona tama. O lana faatosinaga, na faatautoina ai e Akiso se pulega faalilolilo ma o iina na afua ai le faatafunaga o le nuu o sa Iareto.16
I se isi itu, o Eseta, o se tamaitai Iutaia i le Feagaiga Tuai, sa faasaoina lona nuu. Ina ua faapagotaina Iutaia, sa faaipoipo atu Eseta i le Tupu o Asueru. Sa sainia e le tupu se avea’i ina ia fasiotia uma tagata Iutaia. Sa uunaia Eseta, e lona tausoga o Moretekai, ina ia faatoga atu i le tupu mo ona tagata i lona faapea atu, “E iloa e ai po ua fai oe ma masiofo ona o se aso faapenei.”17 Sa aioi atu Eseta i le tupu mo ona tagata ina ia faasaoina, e ui lava ina lamatia ai lona ola. Sa faafofogaina e le tupu lana olega ma sa faasaoina ai i latou. E mafai e se tamaitai e toatasi ona faia se eseesega tele, e oo lava i se atunuu.
O taimi faigata nei. Ou te talitonu na faapolopoloina o outou agaga mo nei aso e gata ai; e faapei foi outou o Eseta, ua outou o mai i le lalolagi “i se taimi faapenei.” O mea sili tou te faataunuuina o le a avea ma o outou aafiaga amiotonu i isi; o lou matagofie paia faatausala i totonu ma ou lagona o le a faaalia i lou malosi e le leoa, agamalu, mamalu, tausaafia, tauagafau, sogasoga, magafagafa, susulu, ma lou faaleagaga. Ia faalautetele nei meaalofa musuia faatamaitai. O le a faalaleleia ai outou ma tosina atu ai tagata a o avea ai outou ma auauna fafine a le Atua.
Ou te molimau atu afai tou te ola ai i nei uiga faaleatua, o le a mafai ona outou “fetaomi atu i luma ma le faamaoni ia Keriso, ina ua i ai le faamoemoe atoatoa lelei, ma le alofa i le Atua atoa ma tagata uma.”18 I le suafa o Iesu Keriso, amene.