Alualu i Luma i le Perisitua
O le perisitua o le mana ma le pule lea ua tuuina mai e lo tatou Tama Faalelagi i le tagata. O le pule ma le mamalu o i ai e sili atu nai lo le mea tatou te malamalama i ai.
E maeu se vaaiga i le vaavaai atu i lenei Maota mo Konafesi ua matuai faatumulia ma le mafaufau atu i fale i le lalolagi atoa o loo faatumulia i alii o loo umia le perisitua. Atonu o le faatasiga sili lenei ona tele o le perisitua i le talafaasolopito o le Ekalesia. O lo’u mafaufau atu i ai o le a faamaonia lena mea aua o loo faaauau pea lo tatou alualu i luma i tausaga taitasi.
O la’u uluai fesootaiga lava ma le perisitua o le taimi na ou papatiso ai. Sa ou papatiso i se alavai i le tamai nuu o Oakley, Idaho. Sa matou faatasi ai ma au uo i auvai o le alavai. Sa fai o matou ofu taele i na ona po ina ia aua ai ne’i e magoto faapea ma pupu sa otiina i taga. Matou te lei vaai lava i se ofu taele e fai mai ni ie lalaga. Na savavali mai i fafo lo’u tama ma ona fesoasoani mai le falelotu a le Uarota Muamua. Sa ia amoina mai se nofoa, ona ia tuu lea o le nofoa i autafa o le alavai. Sa faapea mai lo’u tama, “Tavita, sau iinei; o le a matou papatisoina oe.”
Sa ou puna i totonu o le alavai ma aau atu i le isi itu, ma lo’u tete i le maalili. O le vaitaimi lea o Setema ae sa taufai lava sina malulu, ma e maalilili ai tamaiti laiti, e pei ona outou iloa, pe afai na o ni ofu taele o loo fai. Na alu ifo lo’u tama i lalo i le alavai. E pei ona ou manatuaina, e lei aveesea ona seevae pe suia foi se mea ae na o ona ofu lava e masani ai. Sa ia faaali mai le auala e uu ai o’u lima, ona ia papatisoina lea o au. Ina ua ou alu a’e i luga mai le vai, sa ma taufai fetolofi uma atu i luga o augutu o le alavai. Sa ou nofo i le nofoa, ona tuu lea o o latou lima i luga o lo’u ulu ma faamauina au o se tagata o le Ekalesia. Ina ua uma lena ona ou toe puna foi lea i totonu o le alavai ma aau atu i le isi itu ma tafafao ai ma au uo.
O lo’u aafiaga muamua lava lenei i le perisitua.
Ou te faamanatu atu ia te outou e faapea o le perisitua o le mana ma le pule a le Atua ua tuuina mai i le tagata. Ou te toe fia fai atu: O le perisitua o le mana ma le pule a le Atua ua tuuina mai i le tagata. O lenei faapotopotoga i lenei afiafi, o loo faatasia ai i latou o e o loo umia le Perisitua Arona, le perisitua maualalo, ona sosoo ai lea ma le Perisitua Mekisateko, o le perisitua maualuga. Pe le o se mea ea e faagaeetia ai le vaai faalemafaufau atu i le auala na faatulagaina ai e le Alii ma Lona Tama Faalelagi le ata o le faaolataga, ina ia mafai ona lava le agavaa o alii ma mafai ona faamamaluina e umia le perisitua ma auai faatasi i le autau tele o alii o e o loo moomia e faataunuuina fuafuaga e faavavau a lo tatou Tama Faalelagi, ina ia faataunuu le faaofuina o le tagata i le tino ola pea ma le ola faavavau—tagata uma i soo se mea? O le a aofia ai se vaega toatele o le perisitua!
I nai tausaga talu ona ou papatiso, ma ua ou masani lelei foi i nisi o tiute i le Ekalesia, sa faauuina loa au i le Perisitua Arona. O lo’u tama, o le sa papatisoina au, na maliu i le vaitaimi lena ina ua pe lona fatu, o lea na faaee mai ai e le epikopo le Perisitua Arona i o’u luga ma faauuina au i le tofi tiakono. Ou te manatuaina sa ou maua se faalogona lelei a o ia faaeeina mai le perisitua i o’u luga, ma o lea ua i ai nei o’u tiutetauave ma o le a faamasinoina au i mea ou te fai ma o le a ou aoaoina foi ni mea e fai a o o’u agaigai i luma i le olaga. Sa i ai so’u lagona faapitoa e faapea ua ou lagonaina si o’u suia, ma o le a le tutusa au ma uo e le o umiaina le perisitua po o tagata matou te feiloai i ai i le lalolagi. O lenei ua i ai ni o’u tiutetauave, o tiutetauave matou te aoaoina i Aso Sa i le lotu a o matou nonofo ai faataamilomilo i le ogaumu koale tuai i le vaega pito i lalo o le falelotu.
O Aso Toonai, matou te faamamaina ai le falesa, faatutumu ia pakete koale i le koale, ma vaai ua saunia le fale mo sauniga o le Aso Sa. E i ai mea matou te faia i le perisitua maualalo, i mataupu uma lava faaletino o le uarota—o le aoina o taulaga anapogi ma le faia o tiute mo le epikopo. O ia ma isi taitai e aoaoina i matou e uiga i le Perisitua Arona ma le tofi o se tiakono, ona sosoo ai lea ma le aoao, ona sosoo ai lea ma se ositaulaga a o matou agaigai i luma i le perisitua. Na foliga mai ia te au sa ou atinaeina se malamalama uiga ese, o se malamalama loloto i le galuega e ao ona faataunuuina, ma ua i ai lava ni o’u tiutetauave, e ui lava sa na o au o se tamaitiiti i se nuu maotua. Sa i ai se mea taua lava e uiga i ai.
Ina ua 11 o’u tausaga, sa maliu ai lo’u tama, ma sa ou matuai ootia lava i lona maliu a o o’u faalogo atu i tagata o lauga e uiga ia te ia o se tagata agalelei. A o latou tuuina ifo i lalo le pusa maliu i le tuugamau ma amata ona asu atu ia suo palapala ma maa i luga o le pusa maliu, sa ou tutu ma matamata, ma mafaufau o ia o la’u toa manumanu, ma ou manatunatu po o le a se mea o le a tupu ia te au ona o lea ua leai nei so’u tama. Sa ou vaai i ni alii lelei o faaaogaina le perisitua ma faia le mea sao—o alii o e sa fesoasoani i le eliina o le tuugamau ma le faia o isi mea o le maliu—ma sa ou vaai i se alii lelei o toe faafoiina atu se lima tala pepa i lima o lo’u tina, o le sa ofoina atu i lea alii se tupe mo le eliina o le tuugamau. Sa ia toe faafoiina atu lena tupe i lo’u tina ma faapea atu, “Leai, tuu ia te oe aua o le a e manaomia i se taimi mulimuli.”
Ma o lea, ou te fia faailoa atu ai ia te outou uma o loo i ai i lenei faapotopotoga i lenei afiafi, i le Perisitua Arona ma le Perisitua Mekisateko, pe le o se mea ea e faagaeetia ai i le atamai o lo tatou Tama Faalelagi ma Lona Alo, le tuufaatasia o nei mea uma, le auala na matou aoaoina ai i le perisitua maualalo le faia o galuega faaletino? O le a i ai ni o tatou tiute faaletino, e aoaoina i se auala maualalo ma le faigofie ia mea na e moomia ona fai. O le a aoaoina ai i tatou i lenei mea i le auauna atu ma le ola ai i poloaiga a le Alii, e saunia ai i tatou i se aso e siitia atu ai i le Perisitua Mekisateko, faatasi ai ma mamalu ma tulaga faaeaea uma e faavavau o loo aofia ai.
O na tausaga i le Perisitua Arona o ni tausaga mananaia na o lo’u olaga. Sa ou aoaoina lava ni mea fou ma sa faalauteleina pea le malamalama ma lagona e uiga i le talalelei ma lo tatou tiutetauave i le momoliina atu o lenei savali i le lalolagi uma. O lena faiga tatou te aoao ai e femiomioa’i faatasi ma isi tagata. O nisi taimi tatou te maua ai le lagona faapea atonu e le taliaina i tatou e tagata ona e maualuluga o tatou tulaga faatonuina. E i ai mea tatou te le faia. Ua ia te i tatou le Upu o le Poto, lea e fesoasoani ai ia i tatou ina ia ola i se olaga maloloina, o se olaga e fesoasoani ai ia i tatou ina ia tatou tutupu ae i le avea ai ma tama tane ma maua tulaga faatonuina ma mataupu ma se ituaiga olaga lea e toatele le lalolagi e mananao ia maua. Na ou iloaina afai e te ola i le auala e tatau ona e ola ai, e maitauina e tagata, ma e faagaeetia i ou talitonuga, ona i ai lea o sou aafiaga i olaga o isi tagata. Afai latou te iloa e le tatau ona latou ulaula po o le inu pia po o le faaaogaina o fualaau oona lea ua matuai leaga ai le lalolagi, o le mea moni lava o lou le faia o na mea o le a i ai se aafiaga i na tagata.
O le faatumauina o ou tulaga faatonuina e faaagavaaina ai oe mo le faaipoipoga i le malumalu. A o tatou i ai i lea mataupu, o le lona 173 lenei o konafesi aoao o le Ekalesia, ma e na o sina faamatalaga e le taua tele, ua 73 nei tausaga talu ona ma faaipoipo ma lo’u toalua. O le tausaga na ma faaipoipo ai, sa faia ai le konafesi faaletausaga lona 100 a le Ekalesia. E mafai ona ou manatuaina lena mea a o o’u uuina le lima o Ruby i luga o le fata faitaulaga o le malumalu—ma faalogologo atu i upu o le faamauga—sa i ai se lagona faapitoa i lo’u loto, e le gata i lona paia ae o le tiutetauave e ao ona ou ola ai e pei ona tatau ai, ina ia tausia o ia ma le ma fanau, ona sosoo ai lea ma a latou fanau, ona sosoo ai lea ma isi augatupulaga lea o le a oo mai. Sa ou fuafua ou te faia se faataitaiga o le ola ai i se auala e mafai ai e se tagata ona faamamaluina le perisitua ma feagaiga o le faaipoipoga.
O le afiafi nei ua tatou feiloai ai o nisi o loo umia le perisitua, ia mafaufau i le tiutetauave o loo ia i tatou uma taitoatasi a o tatou mafaufau i se mea e tupu i lenei lalolagi—atonu o ni mea fou tatou te le o malamalama i ai i le taimi nei—a maea lenei taua ma ua toe tuu mea uma i le mea sa tatau ona i ai. E tele naua ni mea e ao ona tatou faia. Ina ia tatou faia, e moomia ona tatou agavaa mo le perisitua o loo ia i tatou ina ia mafai ai ona tatou fesoasoani e taimua a o agai i luma le Ekalesia, atonu i se tulaga sili ona lautele nai lo le taimi muamua. O se aso sili lena o le a i ai!
I tausaga ua mavae, a o o’u i ai i le neivi i le taimi o le Taua Lona II a le Lalolagi, sa ou maua ai se faatonuga ina ia ou lipoti atu i le nofoaga autu o manuao i Pearl Harbor. Sa ave au e lo matou aiga i le Motu o Teugaoloa i le Vaifagaloa o San Francisco, o iina sa ou alu ai i le vaalele, o se vaalele tuai o le sami sa taua o le Pan-American. O luga o lena vaalele sa i ai ni taitai maualuluga o le falemai o loo malaga atu e saunia ma faatuina se fesoasoaniga tau falemai ona e le o toe mamao ni vaiaso ae amatalia le taua i Tarawa. Talu ai ona o lo’u tulaga, o lea sa tofi ai au ou te moe i lo’u moega taga i le faatausiusiuga o le vaalele, lea e mafai ona iloa atu ai le afi o le vaalele i le itu taumatau a o matou felelei ae i luga o San Francisco, lea sa faasaina ai ni moli i le po ona o le taua. Sa pogisa le taimi na matou felelei atu ai i le Pasefika, ma sa ou manatu ua mu le afi i le itu taumatau o lena vaalele tuai a le Pan-American. Sa le mafai ona ou moe a o o’u vaavaai atu i ai i le taimi atoa o le faigamalaga.
I lena po atoa e aunoa ma se moe, sa ou manatunatu ai i lo’u olaga ma pe sa ou ola agavaa i avanoa e ono avea ma au, ma le tiutetauave o le a ia te au i le avea ai ma se tasi e umia le Perisitua Mekisateko—o le tiutetauave o le avea ma se faataitaiga ma ia ola i le auala e tatau ai ina ia mafai ai ona ou faataunuuina ia valaauga e oo mai. I lena po e leai ma se moe, sa ou faia ai se iloiloga o lo’u lava tagata, o o’u uiga, ma mafaufau pe o o’u faia mea uma ou te mafaia. E ui lava sa ou taliaina pea ia o’u tofiga faaleEkalesia, ae sa ou mafaufau pe sa ou faataunuuina ma lo’u loto atoa, malosi atoa, ma le mafaufau atoa, ma le agaga atoa ma ina ia agavaa e faataunuuina ai le tiutetauave, le faamanuiaga, lea na ou mauaina o se tasi e umia le Perisitua Mekisateko ma le mea o loo faamoemoeina mai soo se tasi o i tatou e mauaina lenei faamanuiaga.
I le toe vaavaai atu i tua i lena po e aunoa ma se moe, ou te faafetai ai i le Alii mo Ana faamanuiaga i le taimi nei ma mea uma ua ou maua le avanoa e aafia ai. Sa ou taumafai pea e ola i le talalelei i lona atoatoaga, e faia mea uma e valaauina ai au e fai ma lo’u loto atoa, manatu atoa, mafaufau atoa, ma le malosi atoa, ina ia faataunuuina ai soo se valaauga e oo mai ia te au in a ia mafai ona ou agavaa e faia soo se mea e talosagaina ai e fai i se aso.
O lenei po pe afai tatou te faamamaluina le perisitua, outou alii talavou o le perisitua, ia faia nei se faaiuga ina ia ola i le auala e tatau ona e ola ai. Aua ne’i aafia outou i nisi o mea mataga o loo tutupu nei i le lalolagi, ae ia manatua le mea ua tuuina atu ia te oe. O le a ou toe fai atu, o le perisitua o le mana ma le pule lea ua tuuina mai e lo tatou Tama Faalelagi i le tagata. O le pule ma le mamalu o i ai e sili atu nai lo le mea tatou te malamalama i ai.
Ou te tuuina atu la’u molimau, o la’u tautinoga, o lenei galuega e moni. Ua ou fiafia ina ua ou mafaia, i le pulapula lagoto o lo’u ola, e tu atu ma molimau atu i le moni o le talalelei, e pei ona ou molimauina i aso uma o lo’u olaga mai lo’u papatisoga e oo mai i le taimi nei. Ou te alofa i le Alii. Ou te alofa i lo tatou Tama Faalelagi ma lenei galuega. Ou te molimau atu foi i le moni o lenei galuega.
Ia te outou uma o taitai perisitua, ia outou ola e pei ona tatau ai. E ese lava i tatou, ma e le o se mea lelei le pei outou o isi tagata uma aua ua outou umia le perisitua a le Atua, faatasi ai ma na folafolaga ma faamanuiaga silisili ma mea o loo faamoemoeina mai ia te outou.
E moni lenei galuega. I le suafa o Iesu Keriso, amene.