O Nofoaga Paia, Avanoa Mamalu
O lo tatou mafaia ona saili, iloa, ma ava ma migao i le mea ua sili atu ona mamalu nai lo le lalolagi, e faamatalaina ai lo tatou faaleagaga.
I le tali i le fesili a Pilato “O oe ea le Tupu o tagata Iutaia?” na tali le Faaola, “E le mai le lalolagi nei lou malo” (Ioane 18:33, 36). Faatasi ai ma nai nei upu, na tautino atu ai e Iesu o Lona malo e tutoatasi ma ese mai lenei lalolagi. O aoaoga a le Faaola, ma mataupu autu, ma Ana lava faataitaiga e siitia ai i latou uma o e talitonu moni ia te Ia i se tulaga paia lea e manaomia ai le tepa taulai atu o le vaai ma le mafaufau i le mamalu o le Atua (tagai MFF 4:5; 88:68). O le mamalu o le Atua e aofia ai mea uma e paia ma mamalu. O lo tatou mafaia ona saili, iloa, ma ava ma migao ai i le mea ua sili atu ona mamalu nai lo le lalolagi, e faamatalaina ai lo tatou faaleagaga. E moni, a aunoa ma le paia ma le mamalu, ua tuua i tatou na o le amioleaga ma mea faalelalolagi.
E ui i le vevesi o le lalolagi, faapea ma le mautinoa o le le mautonu, e tatau lava ona i ai ni nofoaga e maua ai se sulufaiga faaleagaga, faafouina, faamoemoega, ma le filemu. O loo i ai moni ni nofoaga faapena. E paia uma ma mamalu. O nofoaga ia tatou te feiloai ai ma le lagi ma maua ai le Agaga o le Alii.
E faatolu ona fautuaina e le Alii ona tagata i totonu o le Mataupu Faavae ma Feagaiga, ina ia “tutu i mea paia” (tagai MFF 45:32; 87:8; 101:22). O le tulaga o Lana fautuaga e sili atu ona taua pe a tatou vaai i le tulaga o loo i ai nei lo tatou lalolagi. O faamai faatamai, sauaga, ma taua o ni mea e tutupu ua tatou masani ai ma ua oo mai faamalosi i o tatou aafiaga i aso taitasi. I le faafetauia la o faafitauli ogaoga faapena, ua fautua mai ai le Alii, “Faauta o lou lava loto, o i latou uma o e valaau mai i lou igoa, ma tapuai mai ia te au e tusa i lau tala lelei faavavau, e ao ina potopoto faatasi, ma tutu i mea paia” (MFF 101:22).
O mea paia e taua mo le ala sao e tapuai ai i le Atua. Mo le Au Paia o Aso e Gata Ai, o nei mea paia e aofia ai nofoaga e taua i le talafaasolopito, o o tatou fale, sauniga faamanatuga, ma malumalu. O le tele o mea tatou te ava ma migao i ai, ma mea tatou te aoao a tatou fanau e ava ma migao i ai o ni mea paia ma le mamalu, o loo atagia mai i nei nofoaga. O le faatuatua ma le ava ma le migao e o faatasi ma ia nofoaga, ma o le faaaloalo ua ia i tatou mo mea e faaalia mai ai pe na faaalia mai ai i totonu ua mafua ai ona paia. O le taua o nofoaga paia ma avanoa mamalu i a tatou tapuaiga e le mafai ona le amanaiaina.
E manaomia ni sauniuniga se tele faaletagata lava ia mo lo tatou mauaina o le manuia faaleagaga o le tutu i mea paia. O nofoaga paia ma avanoa mamalu e faailogaina i le taulaga e manaomia ai. Na aoao mai i tatou e Elder M. Russell Ballard “o le upu taulaga o lona uiga moni ‘o le fai ia paia’ po o le ‘tuu ia paia’” (“O le Tulafono o le Taulaga,” Liahona, Mati 2002, 13). O upu paia ma le taulaga e tupuga mai le upu e tasi. O le isi atonu e maua ai le paia e aunoa ma le taulagaina muamua o se mea mo ia. E le mafai ona i ai le paia e aunoa ma le ositaulaga o le tagata lava ia. O le ositaulaga e faapaiaina ai le paia.
O le toatele lava o tagata, o le togavao o loo lata ane i le faatoaga o Samita i Niu Ioka e matagofie ma toafilemu. Ae peitai, i le Au Paia o Aso e Gata Ai i le lalolagi atoa, e paia ona o le faatuatua ma le migao tatou te avatu i ai ma le loloto o le taulaga ua faatusaina ai.
I ni nai masina ua mavae, i se aso matagofie o le tautoulu, sa ma nofonofo ai ma la’u ava i lena togavao. E moni lava e matagofie, ma sa ma fiafia i le filemu mautinoa sa ma maua ai iina. Ae peitai, e sili atu le taua nai lo lena, aua sa ma nofonofo i le nofoaga tonu lava lea na faaali mai ai le Atua le Tama ma Lona Alo o Iesu Keriso i le Perofeta taulealea o Iosefa Samita. O lo ma faatuatua ma lo ma ava ma le migao mo le laua asiasiga ma lana lava ositaulaga lea na oo mai ona o lea mea, i le soifuaga o le Perofeta, faapea ma olaga o o matou augatama, na liua ai lenei nofoaga matagofie i se nofoaga paia ma se avanoa mamalu.
O lagona loloto faapenei ma le faaaloalo e faaosofia e isi mea paia i le lalolagi e faatatau i le talafaasolopito ma le faavaeina o lenei Ekalesia. O nei nofoaga paia e musuia ai lo tatou faatuatua ma aumaia ai ia i tatou le faamalosiauga ina ia faamaoni i lena talitonuga ma ia agai i luma, e ui lava i luitau atonu tatou te fetaiai i o tatou olaga.
E faapena foi o tatou fale, o ni nofoaga paia e faatumulia i avanoa mamalu. E ui lava ina e le o taimi uma e sologa lelei ai, ae mafai ona faatumulia o tatou fale i le Agaga o le Alii. Ua aoao mai le Au Peresitene Sili ma le Korama a Aposetolo e Toasefululua i totonu “O le Aiga: O se Folafolaga i le Lalolagi”: “E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega ma gaoioiga faafiafia atoatoa” (Liahona, Oke. 1998, 24).
O se aiga faapea e manaomia ai le ositaulaga o le tagata lava ia. Na fetalai mai le Alii i le Perofeta o Iosefa Samita, “E tatau ona salamo lou aiga ma lafoai nisi mea” (MFF 93:48). E fetaiai o tatou aiga taitoatasi ma le tele o mea eseese o gaoioiga ma faafiafiaga, ma e le o ia mea uma e atoatoa ma lelei—ma o le tele o ia mea o le mea moni e le manaomia. E faapei foi o le aiga o le Perofeta, pe manaomia ea e o tatou aiga ona salamo ma lafoai nisi mea e mafai ona fesoasoani ia i tatou e faatumau ai le natura paia o o tatou fale? O le faavaeina o o tatou fale e avea o ni nofoaga paia e atagia ai le loloto o le taulaga ua tatou naunau e osia mo o tatou aiga.
O sauniga faamanatuga e sili atu nai lo na o ni sauniga. O ni taimi paia i se nofoaga paia. I le taimi o nei sauniga faamanatuga, tatou te mafaufau ai i le galuega sili ona alofa o le ositaulaga ua silafia e lenei lalolagi. Tatou te mafaufau loloto i le alofa o le Atua, o le na auina mai Lona Alo Pele e Toatasi na Fanaua ina ia tatou maua le ola e faavavau. Pe a tatou fetagofi atu i le faamanatuga, tatou te manatua o Ia ma faaali atu lo tatou naunau e ave i o tatou luga Lona suafa, ma tausi Ana poloaiga. O le saunia ma le faaeteete o le tagata lava ia, e aofia ai la tatou lava taulaga o le loto momomo ma le agaga salamo, o se mea e manaomia mo le faafouina faaleagaga i vaiaso taitasi, e tuuina mai e ala i le auai ma le agavaa. E tatau ona tatou naunau ma mafai ona tuua mea faalelalolagi mo sina taimi ina ia mafai ona tatou mafaufau i mea e sili atu ona paia. A aunoa ma lenei faafouina faaleagaga, e faigofie lava ona faatoilaloina lo tatou faatuatua i mea a le lalolagi ma le amioleaga.
O le tele o tausaga ua mavae, ao laiti le ma fanau tama, sa ou faia ai se faamatalaga i le taimi o le taumafataga i le afiafi e uiga i le manaia tele o a matou sauniga faamanatuga ma le tele o mea sa ou aoaoina. O la latou tali mai o se vaaiga na tau mai ai ia te au, latou te le o mautinoa pe sa matou i ai faatasi i lea lava sauniga. O le eseesega o lou aafiaga ma i latou o se mea faigofie ona o le lei lava o le matutua ma le saunia o le tagata lava ia. O le faafouina faaleagaga tatou te maua mai i a tatou sauniga faamanatuga o le a le sili atu i a tatou lava sauniuniga ma lo tatou naunau ma le manao ia aoaoina.
O malumalu, faatasi ai ma le “E Paia ia Ieova” o loo tusia ai i luga, o nisi ia o nofoaga ua sili ona paia i nofoaga uma i le lalolagi. E tutu o ni faamaoniga o le alofa o le Atua i Ana fanau uma, i aso ua mavae ma aso nei. O faamanuiaga o le malumalu ua fusia ma ua le mafai ona tuueseeseina ma taulaga taua. O sauniga e faataunuuina ai i totonu, ua mafai ona tatou sao atu ai i le faasafuaina mai atoatoa o le taulaga togiola a le Faaola. O le auai i nei sauniga o le a taua ai le malumalu e paia ma mamalu. Ae peitai, e manaomia foi le ositaulaga o le tagata lava ia. Tatou te taulagaina taimi e sailia ai o tatou augatuaa ma le taimi e auai atu ai i o tatou matafaioi o le malumalu. Tatou te taumafai foi e ola i le tulaga aupito maualuga o le agavaa o le tagata lava ia, tatou te agavaa ai e ulu atu i le avanoa mamalu o lenei nofoaga sili ona paia.
I nofoaga paia ma avanoa mamalu, tatou te maua ai sulufaiga faaleagaga, faafouina, faamoemoe, ma le filemu. Pe le taua ea nei mea i taulaga talafeagai a le tagata lava ia? Ou uso e ma tuafafine, tau ina ia tatou ava ma migao ma faaaloalo i le paia ma le mamalu i o tatou olaga. Ia tatou aoao a tatou fanau, ia faia foi faapea. Ia tatou taufai tutu uma i nofoaga paia ma avanoa mamalu o le filemu faaleagaga.
Ou te faailoa atu la’u molimau i le Alii ma le Faaola o Iesu Keriso, o le Alii ia o le Filemu ma le Faamoemoe, i le suafa o Iesu Keriso, amene.