O Le Sulu o Lona Alofa
E malamalama le Tama Faalelagi ia i tatou taitoatasi. Na te silafia le ituaiga auala e sili ona manaomia e i tatou taitoatasi, e alofa mai ai ia i tatou.
Ina ua iva o’u tausaga, sa siitia lo matou aiga i se fale e le i uma le fogafale i lalo lea sa ma momoe ai ma lo’u uso. O nisi po ou te taotooto ai i le moega ma taumafai ona moe, sa foliga mai o ni tagata ia puipui o le fale e le’i uma. O mea na ou te fefevale ai i a’u miti. O nisi taimi ou te moe savali ai i le matou fale ma te’i ai ua ou ala mai i se isi mea.
I se tasi po sa ou moe savali ai foi, sa ou ala a’e ua matua ou fenumia’i lava ma fefe. Sa ou taumafai ou te faataio mo se fesoasoani, ae leai se upu na sau i lo’u gutu. Sa matua pogisa lava ma sa le mafai ona ou iloa lo’u alofilima. Na faafuasei ona ki e se tagata le moli, ma sa ou iloa ai le mea la ou te i ai. Ai na lagona mai e lo’u tina la’u moe savali ma sau ai i lalo e siaki au. Ina ua le maua au e lo’u tina i lo’u moega, sa ia kiina loa le moli ae sue au.
Na o le tasi lava o si eu i le ki o le moli, ae ou malamalama i le mea tonu lea ou te i ai, i le tele o le alofa o lo’u tina ia te au, ma le ala ou te toe foi saogalemu ai i lo’u moega. Talu ai ona o lo’u mata fefe i ata lafoia, o lea na ou fai ai i lo’u tina e faaola ai pea le moli. Sa malie mai o ia. Ou te faafetai ona o le alofa o lo’u tina na sau ai i lalo ma ki le moli.
O le aso ua tatou faalogoina ai foi se isi ituaiga malamalama i o tatou loto, a o tatou faalogologo atu i le aufaipese a tamaiti o lagiina upu, “Ua faamanuia a’u e le Alii ia ou iloa Lona alofa” (“O Le a Ou Mulimuli ia te Ia i le Faatuatua,” Liahona, Fep. 2003, U16). O le lagona lea e mafua ai ona tatou o i le lotu i vaiaso taitasi ma usu pese ma viiga o le Peraimeri, o nisi taimi e usu ta’i faafia nei pese. Ua tatou iloaina upu, ae e faafuasei lava ona faatutumu e upu o tatou loto i le malamalama ma le alofa. E pei ai ua tatou manatua pe o ai moni i tatou. Ona o i tatou o fanau a le Tama Faalelagi, e pei lava e sau o Ia i le lalolagi ma ki le moli mo i tatou.
O lenei lagona o le malamalama lea tatou te maua i le lotu, e pei lava o le lagona o le alofa ma le saogalemu lea na ou maua ina ua ki e lo’u tina le moli o le fogafale i lalo.
Sa faamatalaina se tala moni e se fomai e igoa ia Rachel Remen, e uiga i se tama talavou aulelei, e taalo lakapi faa-Amerika, sa ia lafoaia le lagona o le alofa lea e aumaia e le malamalama. Sa lelei lona olaga ma ana uo, e tino taalo lelei foi. Ona maua ai lea o lona vae i le kanesa. Sa tipi lona vae i luga a’e o le tuli. O le taalo lakapi ma ona tulaga lauiloa, ua le toe i ai. Sa oo ina ita o ia, ma ua pogisa ma le mautonu lona olaga. Sa faigata ona ia iloa po o ai o ia.
Sa fai atu Fomai Remen i lenei taulealea e tago e tusi pe o a foliga o lona tino. Sa ia tusia se ata faigofie o se mea tuuteu. Ona tago lea aveane se valiga’o mafiafia lanu uliuli ma tusi ai se ta’e tele i le mea tuuteu. Sa manino lona talitonu o lona tino ua pei o se mea tuuteu ua ta’e e le mafai ona toe faaaoga. E le sa’o lea mea. Sa latou faia sona vae faapipii ina ia mafai ona savali. Ae sa matua pogisa lona loto faapea o le a le toe lelei lona tino.
Ona ia talanoa atu lea i ni tagata e faapena foi o latou faafitauli. Sa malamalama o ia i o latou lagona. Sa amata ona ia fesoasoani atu i isi tagata ia latou maua ni lagona lelei. Sa oo mai se malamalama i lona lava loto, o lea na amata ai ona faamaloloina o ia.
Sa la feiloai ma se tamaitai talavou e faapena foi ona faafitauli. Sa faatumulia lona loto i le atuatuvale. Ina ua ulufale atu lenei taulealea i le potu o lea tamaitai i le falemai mo le taimi muamua, sa musu le tamaitai e tilotilo mai ia te ia, ma sa na o lona taoto lava i lona moega ma moeiini ona mata. Sa taumafai lenei alii i mea uma na ia iloa, ia pa’i atu ai ia te ia. Sa ia kiina le leitio, sa faamatala ana tala malie, ma mulimuli ai tago ma tatala lona vae faapipii ma faapau i le fola. Sa te’i o ia, ma pupula atu ona mata ma vaaia ai lea taulealea mo le taimi muamua, o musamusa solo i le potu ma faapa ona tamatamailima i le musika. Sa ata o ia ma fai atu, “Afai e mafai ona e siva, atonu la e mafai ona ou pese.” Sa fai se la faigauo. Sa fetufaai o laua popolega, ma fesoasoani le tasi i le isi ia lagonaina e i ai se faamoemoe.
I le asiasiga mulimuli a le taulealea i le fomai, sa ia vaavaai atu i lana ata sa tusi o le mea tuuteu ma le ta’e ma fai atu, “E le i uma lo’u ata lena.” Ona ia tago lea i le valiga’o lanu samasama, ma tusi ai ni laina mai le ta’e agai i pito o le pepa. Sa tuu lona limatusi i le ta’e mataga ma faapea atu, “O i lea e sau ai le malamalama.” (Tagai Kitchen Table Wisdom, [1996], 114–118). Ou te talitonu o le uiga o lana tala, o le pogisa ma aafiaga faigata, e fesoasoani tatou te lagonaina ai le malamalama mai le alofa o le Tama Faalelagi.
O le po sa ou moe savali ai i le fogafale i lalo ma ou fefe ina ua ou ala ae, sa ou i ai lava i tafatafa o lo’u uso i na taimi uma. Sa lelei lava o ia, peitai sa ou manaomia se tagata e fesoasoani mai ina ia ou maua le malamalama.
E tupu ia i tatou uma lenei mea. O le matagofie e le faapea ona e i ai ni o tatou aafiaga eseese, ae e malamalama le Tama Faalelagi ia i tatou taitoatasi. Na te silafia le ituaiga auala e sili ona tatou manaomia e alofa mai ai ia i tatou. O nisi taimi tatou te lagonaina ai Lona alofa e ala mai i o tatou matua, o faiaoga, ma uo. O nisi taimi tatou te lagonaina Lona alofa e ala i uunaiga a le Agaga Paia. O nisi taimi tatou te lagonaina Lona alofa e ala i musika ma le opo [mai o tagata], e ala mai i tusitusiga paia ma tatalo. E mafai ona ia siomia i tatou i lona alofa pe a tatou tatou moomia, aua o i tatou o Lana fanau.
Ou te iloa e alofa le Tama Faalelagi ia i tatou taitoatasi. “O le i ai pea o le alofa o le Atua i o [tatou] loto” (Alema 13:29), tatou te maua ai le toafimalie lelei i le faia o mea faigata. Ua ou lagonaina lena alofa a o ou tautala atu ia te outou i le aso. Ou te faamoemoe o le a outou manatuaina lagona tou te maua pe a outou faalogo i ni molimau e uiga i le alofa o le Tama Faalelagi mo outou. Ona outou taumafai ai lea ina ia outou i ai i nofoaga e mafai ona outou lagona ai le malamalama o Lona alofa.
Ou te tatalo ia lagona e tamaiti uma ma teu loto le alofa o lo tatou Tama Faalelagi, i le suafa o Iesu Keriso, amene.