O Le Loto Faamagalo E Suia ai le Oona Matuitui i le Alofa
O le faamagalo atu o lona uiga, e le toe faatonuina o tatou taunuuga e faafitauli ua te’a, ma ua mafai ona tatou tulimatai atu i le lumanai, ma le alofa o le Atua i o tatou loto.
E le o se mea ea e maofa ai, ona o meaalofa a le Agaga na tuuina atu e le Alii ia Elder Nelson. E le na o le Ekalesia ua faamanuiaina i ana taleni, a o le lalolagi atoa.
Ou te fia tautala i le aso e uiga i le loto faamagalo.
Sa ou ola ae i se nuu laitiiti e faifaatoaga ma sa avea le vai ma elemene aupito taua o le tamaoaiga solo lelei. Ou te manatuaina tagata o le matou nuu, latou te mataituina pea i taimi uma, latou te popole ma tatalo ia timu, latou te tatalo foi ia latou maua aia tatau e faaaoga ai vai e fui ai faatoaga, ma ua avea lava le vai ma o latou popolega masani. O nisi taimi e ula ai la’u fanau ia te au; fai mai, latou te le iloaina lava se isi tagata ua matua tele lona taimi e popole ai i le timu. Ou te faamatala atu i ai, e sa’o aua o le mea sa ou ola ae ai, sa le na o se popolega le timu ae sa sili atu. O le mea lea sa ola ai!
Ona o toatuga ma le faigata o le tau, e i ai taimi e le faia ai e tagata amioga e tatau ona fai i taimi uma. E i ai taimi e tauaimisa ai tuaoi pe a tele le vai e faaaoga e le isi faifaatoaga. Na faapena foi isi alii e toalua sa nonofo latalata i le matou fanua i le mauga, ma o le a ou faaigoa ia Setu ma Uati. Sa amata ona tauupu tuaoi nei ona o le vai e fui ai faatoaga, lea sa la tau fai faaaogaina. O le taimi muamua, sa pei e le ano i ai, ae ua oo ina tele ma iu ina avea ai lo laua eseesega ma mea ua feitagai ai, ona tauaimisa ai lea—ma oo ai lava ina taufaamatau.
I se tasi taeao i le masina o Iulai, sa toe manatu ai foi nei aualii ua le lava le vai. Sa taufai o i laua i le faatanoa vai e vaai po o le a le mea la ua tupu, ma sa mafaufau ifo lava le tagata ia, o la ua gaoi e le isi ana vai. Sa taunuu faatasi atu i laua i le faitotoa. Sa taua’iupu ai foi ma iu ai loa lava ina fepa’ia’i. O Uati o se alii lapoa ma e malosi tele. O Setu e faa’ause ma malosi ma finau mauai. I le vevela o a la fusuaga, na la faaaogaina ai loa suo sa ia te i laua e fai ma auupega. Sa tau le suo a Uati i le isi mata o Setu, ma sa po ai lona mata lena.
Sa mavae masina ma tausaga. Ae sa le mafai e Setu ona faagalo pe faamagalo foi. Sa pupuna pea le ita o lona loto ona o lona mata ua le toe aoga, ma sa matua faateleina lona inoino. Na oo i se tasi aso ona alu ai lea o Setu i lona fale e teu ai ana meafaigaluega, ma to mai i lalo lana fana mai lona faamoega, ona oso ai lea i lana solofanua, ma agai sao atu ai loa i le faitotoa o le faatanoa vai. Sa ia faia se poloka i le faatanoa vai e seu ese mai ai le vai mai le faatoaga a Uati, ma sa ia iloa lelei lava e le o toe mamao ae sau Uati e vaai po o le a le mea ua tupu. Sa lafi Setu i le pupuvao ma faatalitali ai. Ina ua taunuu ane Uati, sa fanaina loa e Setu. Ona oso ai lea i lana solofanua, ma foi i lona fale, ma telefoni le leoleo e tau i ai ua faatoa maea lava ona ia fanaina Uati.
Sa talosagaina lo’u tama e avea o se tasi o faamasino fesoasoani o le faamasinoga na molia ai Setu i le fasioti tagata. Sa teena e lo’u tama aua o ia o se paaga ua loa a nei alii e toalua faapea foi o la’ua aiga. Sa faamasinoina Setu ma faamaonia le solitulafono o le fasioti tagata, ma faasalaina ai i le solo atoa i le falepuipui.
Ina ua mavae le tele o tausaga, sa oo mai le toalua o Setu i lo’u tama ma talosaga i ai pe mafai ona ia sainia se talosaga i le kovana ina ia alofagia lona toalua ua matua afaina lona soifua maloloina ona o le umi tele o le taimi o falepuipui. Sa saini e lo’u tama le talosaga. Na mavae ni nai po, ae tutu mai atalii matutua e toalua o Uati i le matou fale. Sa matua tiga o la’ua loto ma ua le malilie. Fai mai talu ai ua saini e lo’u tama le talosaga, o le ala foi lea ua toatele ai tagata ua saini ai. Sa talosaga mai i la’ua i lo’u Tama e aveese lona igoa mai le talosaga. Sa fai atu lo’u tama e leai. Sa lagona e lo’u tama, ua vaivai Setu ma ua ma’i. Ua tele naua tausaga o mafatia i le falepuipui ona o lena solitulafono mataga o lagona malolosi o le inoino. Sa manao o ia ina ia falelauasi faalelei Setu i lona aiga.
Sa vave ona tali mai atalii o Uati ma le ita tele, “Afai ae tatala mai o ia mai le falepuipui, o le a matou faatamaiaina o ia ma lona aiga.”
Sa iu ina tatala mai Setu i tua ma ua mafai ona sau i lona aiga ma maliu ai lava. O le mea e laki ai, sa le toe i ai se isi taua i le va o aiga. E masani lava ona tagi talatala lo’u tama ona o le tulaga matautia ua oo i ai ana uo o Setu ma Uati, o ona tuaoi ma uo mai lo la talavou, ae ua la faatagaina le ita e pulea i la’ua, ma ua faatamaia ai o laua ola. Oka se matautia o le faatagaina o se lagona malosi na oso mai loa lava ona le toe taofiofia loa lea— na iu ai lava ina faaumatia le soifua o nei aliiona o le le mafai lava ona faamagalo e le tasi le isi i nai nei lava vai faatauvaa.
Na fetalai mai le Faaola, “Ia vave ona oulua lelei ma le o loo tagi i ana mea ua ia te oe, manu o i le ala oulua ma ia”1 o lea ua poloaiina ai i tatou ina ia vave ona faaleleia o tatou feseeseaiga, ina nei faateteleina le malosi o le lagona i lena taimi ma oo ai ina mafatia i la le tino po o lagona, ma tatou nofo pologa ai i lo tatou ita.
E leai se isi mea e sili atu ona faatatau i ai lenei mataupu faavae nai lo o tatou aiga. Atonu o lou atugaluga patino e le o ni vai, o i tatou uma taitoatasi i lenei lalolagi, e soifua ma ola i le gaogaosa ma le mamafatu o lenei lalolagi le atoatoa, o le a i ai mafuaaga—pe moni pe na ona faafoliga foi—e uunaia ai e soli le tulafono. E faapefea la ona tatou tali atu? Pe tatou te solia ea? Pe tatou te sailiili masei ea? Pe tatou te tuu atu ea i le lagona malosi o lea taimi na te faatoilaloina i tatou?
Sa faatusina e Peresitene Polika Iaga le faatausuai i se ‘ona o le u a se gata. Na ia saunoa mai “e lua ituaiga taga e fai pe a u se tagata e se gata uogo. O le tasi, atonu ona o le ita, atuatuvale, po o le fia taumasui foi, na te tuliloa ai le meaola ma fasi mate. Pe faanatinati loa lava e aveese mai le ‘ona i lona tino.” Fai mai a ia, “Afai tatou te faia le taga lona lua, e ono faasaoina lo tatou ola, ae afai tatou te taumafai e fai le mea na ta’ua muamua, e ono le lava se malosi o ia i tatou e fasi mate ai.”2
Sei ou pa’i atu lava i le vaega lea, e ao ina tatou matua faaeteete i o tatou aiga ina ia aua nei o tatou faatausuai atu! O le tele lava o tu ma agaifanua taatele i nei ona po, ua manatu mama ai i uiga faaleatua o le loto faamagalo ma le agalelei, ae ua uunaia le taufaifai, lotoita, ma faitioga matuia. Afai tatou te le faaeteete, e mafai foi ona tosina atu i ai i tatou i nei mausa i totonu lava o o tatou fale ma aiga, ona le pine lea ae tatou faitioina o tatou taitoalua, o a tatou fanau, po o tagata o o tatou aiga lautele. Ia aua lava nei o tatou faatiga ia i latou e sili lo tatou alolofa i ai i lo tatou faitioina lea ma le manatu faapito. O totonu o o tatou aiga, o nai feupuaiga laiti ma nai faitioga iti, afai tatou te tuufauina, e mafai ona faataumaoiina ai a tatou sootaga ma oo atu ai ina va, seia oo lava ina sauaina ma tatala faaipoipoga. Nai lo lena, e pei lava o le ‘ona o le gata uogo, e “tatau ona tatou matua faanatinati” e faaitiitia feupuaiga, faaitiitia le taufaifai, aua le faitio, ma aveese le mataua ma le ita. E le tatau ona tatou mafaufau e faatino nai lagona malolosi matautia—ia aua lava nei faia i se aso se tasi.
E i ai le eseesega o le tala matautia ia Uati ma Setu ma le tala ia Iosefa i Aikupito. Sa loto leaga ma inoino uso o Iosefa ia te ia. Sa latou taupulepule e fasioti ia te ia, ma sa iu ina latou faatauina atu o ia e fai ma pologa. Sa aveina atu Iosefa i Aikupito ma tauivi ai mo le tele o tausaga ina ia alu ese mai le nofo pologa. O na taimi faigata, na mafai e Iosefa ona ta’usalaina ona uso ma tauto e taui ma sui ia i latou. Na ono mafai foi ona ia faamalie ona tiga i le fuafuaina o se togafiti e toe faafetaui ai. Ae na te le i faia.
Ina ua oo i le taimi e tatau ai, sa avea Iosefa ma pule i le nuu uma lava o Aikupito, ua lima taumatau i ai Farao. I se taimi o le oge matautia, sa faimalaga atu ai uso o Iosefa i Aikupito mo ni meaai. Latou te le i iloaina Iosefa ae sa latou ifo atu ia te ia ona o lona tofiga maualuga. O le mea moni, sa i ai ia Iosefa le malosi e taui ma sui atu ai ia i latou. Sa mafai foi ona ia lafoina ona uso i le falepuipui pe faasalaina foi i latou i le oti. Ae sa ia faamaonia iina lona loto faamagalo. Fai mai a ia: “O au o lo outou uso o Iosefa, na outou faatauina mai i Aikupito. O lenei, aua nei tiga outou, pe fai ma mea leaga i o outou manatu ina ua outou faatauina mai ia te au i le mea nei… . Na auina mai foi au e le Atua e muamua ia te outou e faasaoina outou i le lalolagi … e faaola foi ia te outou i le faaolataga tele. O lenei, e le o outou na auina mai au iinei, a o le Atua.”3
O le naunau o Iosefa e faamagalo atu, na suia ai le oona matuitui i le alofa.
Ou te fia faamanino atu, o le faamagaloga o agasala, e le tatau ona fenumiai ma le faapalepale i le leaga. I le Faaliliuga a Iosefa Samita, na fetalai mai le Alii, “Ia faia le faamasinoga tonu.”4 Ua poloaiina i tatou e le Faaola ina ia lafoai ma tetee atu i mea leaga uma, ma e ui lava e tatau ona tatou faamagalo atu i se tuaoi e faatiga mai ia te i tatou, ae e tatau lava ona tatou galulue i se auala lelei e puipuia mai ai lena tiga po o le manumai le toe tupu mai. O se tamaitai e sauaina pe faia faatautala, e le tatau ona saili e taui ma sui atu i ai, ma e le tatau foi ona manatu faapea e le mafai ona ia faia se laasaga e puipuia mai ai mai le toe sauaina. O se tagata fai pisinisi foi sa tulai mai ai se faaletonu i taualumaga faapisinisi, e le tatau ona inoino i le tagata sa le faamaoni, ae e tatau ona ia uia laasaga e tatau ai ina ia foia ai le sese. O le faamagalo atu e le manaomia ai lo tatou taliaina po o le faapalepale i le leaga. Peitai, a o tatou tetee atu i agasala, e le tatau ona tatou faatagaina le inoino po o le ita e puleaina o tatou mafaufauga po o taga.
Na fetalai mai le Faaola, “O le mea lea, ou te fai atu ia te outou, e tatau ona outou faamagalo atu le tasi i le tasi; aua o le le faamagalo atu i lona uso i ana solitulafono ua tausalaina i luma o le Alii; aua e i ai pea ia te ia le agasala sili ona mamafa.”5
Ou te le fai atu e faigofie le faamagalo atu. Pe a faatiga e se tasi i tatou po o i latou foi tatou te alolofa i ai, e toetoe lava ina a lofituina i tatou i lena tiga. E mafai ona avea lena tiga po o le le tonu o se mea e aupito sili ona taua i le lalolagi, ma ua leai ai se isi lava mea tatou te faia ae taumafai e taui masui. Peitai, ua aoao mai i tatou e Keriso, le Alii o le Filemu, se auala e sili atu. E mafai ona faigata tele ona faamagalo atu i se tagata se mea leaga na latou faia ia i tatou, peitai, a tatou faamagalo atu, o lona uiga ua tatou savalia le ala mo se lumanai e sili atu. E le toe pulea lo tatou ala i se sese e fai mai e se isi tagata. A tatou faamagalo atu i isi, ona faasaolotoina lea o i tatou e filifili pe faapefea ona tatou ola. O le faamagalo atu o lona uiga, e le toe faatonuina o tatou taunuuga e faafitauli ua te’a, ma ua mafai ona tatou tulimatai atu i le lumanai, ma le alofa o le Atua i o tatou loto.
Talosia ia le totoina lava i o tatou aiga ia fatu o le le loto faamagalo lea na lofia ai o’u tuaoi [ia sa faamatalaina i le tala]. Ia tatou tatalo i lo tatou Tama Faalelagi e fesoasoani mai ia te i tatou ina ia faamagalo atu ma ia alolofa, ina ia mafai ona avea i tatou ma uo a lo tatou Faaola, o isi, ma i tatou lava. “Faapei ona faamagalo mai Keriso ia te outou, ia faapea foi outou.”6 I le suafa o Iesu Keriso, amene.