Na Yalo sa Raramusumusu Kei na Yalo sa Bibivoro
O ira sa yalo raramusumusu ka yalo bibivoro era na cakava na veika kecega sa rawa kei na veika kecega e tukuna vei ira na Kalou
Au sa lomani Elder Joseph B. Wirthlin! A vola o Rudyard Kipling na dauniserekali na malanivosa oqo ena 1897, me ivakasala ki na Matanitu o Bolatagane me baleta na dokadoka:
Sa sega tale ni voqa na rorogo kei na maue;
Era sa yali yani na turaganivalu kei na tui.
Sa tawamudu tu ga na nomuni isoro taumada,
Na yalo sa malumalumu ka bibivoro.
(“God of Our Fathers, Known of Old,” Serenilotu, naba 80).
Ni tukuna tiko o Kipling na yalo sa bibivoro me sa dua na “solibula taumada” e rairai vakasamataka tiko na vosa nei Tevita na Tui ena ika 51 ni Same: “A isoro vua na Kalou na yalo sa raramusumusu” (t.17). E vakaraitaka tiko na vosa nei Tevita ni gauna mada ga ni Veiyalayalati Makawa, era sa kila vakavinaka tu o ira na tamata ni Turaga ni sa dodonu me isoro vua na Kalou na yalodra, ni sa sega duadua walega ni vinaka na isoro kama.
E a mai vaqaqacotaki na isoro vakaoqo ena gauna i Mosese ka sa vakatakarakarataka tiko na solibula veisorovaki ni Mesaia, ka sa ikoya duadua ga ena rawa me na vakalesuya tale na tamata ivalavala ca vua na Kalou. Me vaka a vakavulica o Amuleki, “Raica oqo na ibalebale dina ni vunau, ia na veitikina kecega sa dusia tu na ilutua ka iotioti ni soro; … na Luve ni Kalou” (Alama 34:14).
Ni oti na Nona Tucaketale, a laki vakaraitaka o Jisu Karisito kivei ira na tamata ena Vuravura Vou:
“Raica au na sega tale ni vakadonuya na nomudou imadrali kei na nomudou isoro kama, ka niu sa na sega ni vakadonuya tale e dua [vei ira]… .
“Ia mo dou cabora ga me isoro vei au na yalo sa raramusumusu kei na yalo sa bibivoro. Ia ko koya yadua sa lako mai vei au ena yalo raramusumusu … , au na papitaisotaki koya ena bukawaqa kei na Yalo Tabu” (3 Nifai 9:19–20).
Na cava mada na yalo sa raramusumusu ka bibivoro? Ka cava na vuna e vakatokai tiko kina me isoro?
Me vaka ena veika kecega, na nona bula na iVakabula sa solia vei keda na kena ivakaraitaki e uasivi duadua: e dina ga ni sa sega sara ni ivalavala ca o Jisu na kai Nasareci, e a bula voli o Koya ena yalo sa raramusumusu ka bibivoro, me vaka sa vakaraitaki tu ena Nona talairawarawa ki na lewa nei Tamana. “Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai” (Joni 6:38). A kaya kina vei ira na Nona tisaipeli “Ka vuli vei au; niu sa yalomalua ka yalomalumalumu” (Maciu. 11:29). Ia ena gauna sa yaco mai kina me vakayacori na solibula cecere e gadrevi kina na Veisorovaki, a sega ni vakasuka na Karisito me gunuva na bilo sa gaga ia ka me talairawarawa vakatabakidua ga ki na lewa nei Tamana.
Na talairawarawa uasivi ni iVakabula kivua na Tamana Tawamudu sai koya sara ga o ya na yalo sa raramusumusu kei na yalo sa bibivoro. Na ivakaraitaki nei Karisito e vakavulica vei keda ni yalo sa raramusumusu sai koya e dua na yavu dina ni bula vakalou tawamudu. Ena gauna eda sa yalo raramusumusu kina, eda sa dolava kina na yaloda taucoko ki na Yalo ni Kalou ka da kila rawa ni sa dodonu ga me da vakararavi Vua se cava ga na veika eda sa rawata kei na veika e baleti keda. Na isoro sa gadrevi dina sai koya na isoro ni dokadokai koya ena kena gacagaca kecega. Me vaka ga na tete buli rawarawa ena ligai koya na dautuli kuro, sa rawa vakakina na yalo sa raramusumusu me natu ka buli ena liga i Koya na iVakavuvuli.
Sa gadrevi taumada na yalo sa raramusumusu kei na yalo sa bibivoro ni bera na veivutuni. A vakavulica o Liai:
“Ia sa yaco na bula ena vukui koya na Mesaia Yalosavasava.
“A sa vakacabori Koya me isoro ni ivalavala ca, me vakayacori kina na ka sa tukuni ena ivunau, vei ira sa yalo raramusumusu ka bibivoro; raica sa sega ni dua tani tale sa rawa me vakayacora na ka sa tukuni ena vunau” (2 Nifai 2:6–7).
Ni da caka cala ka gadreva na veivutuni, sa kena ibalebale me sa gadrevi kina na yalo sa raramusumusu ka bibivoro ka vakilai ena dua “na yalo rarawa vakalou”[sa] “vakayacora na veivutuni ” (2 Korinica 7:10). Oqo ena yaco mai ni da sa gadreva vakaidina me da vakasavasavataki mai na ivalavala ca o ya ka yaco me mosi dina sara na yaloda ka da gadreva me da rawata na veivakacegui mai vua na Tamada mai Lomalagi. O ira sa yalo raramusumusu ka yalo bibivoro era na cakava na veika kecega sa rawa kei na veika kecega e tukuna vei ira na Kalou ka sega tale ni vorata se besetaka. Eda sa sega tale ni murimuri yaloda ka da vakayacora ga ena sala sa tukuna vei keda na Kalou. Ena veigauna ni yalo talairawarawa vakaoqo, ena dau mana kina na Veisorovaki ka yaco sara e dua na veivutuni dina. Na tamata veivutuni ena qai vakila na kaukauwa veivakatabui ni Yalo Tabu, ka na vakasinaiti ira ena yalo ni veivakacegui kei na yalo e rekitaka na veivinakati tale kei na Kalou. Ena veivakaduavatataki lagilagi vakalou oqo, na Kalou vata ga ka a vakavulici keda me da lako voli ena yalo sa raramusumusu, sa sureti keda tiko me da reki ka yalo vakacegu.
Ena gauna eda sa ciqoma kina e dua na veivosoti ni ivalavala ca, sa yaco kina na yaloda sa raramusumusu me isasabai vakalou mai na veitemaki. A masu o Nifai, “Me sogo tu ga vei au na matamata ni koro ki eli, niu sa yalo raramusumusu ka bibivoro!” (2 Nifai 4:32). A vakavulica o Penijamini na Tui vei ira na nona tamata ni kevaka era na lako voli ena nodra vakamalumalumutaki ira, era na marau vakalevu kina ka“vakasinaiti ena loloma ni Kalou ka bokoci na [nodra] … ivalavala ca” (Mosaia 4:12). Ena gauna eda dolava kina na yaloda vua na Turaga, ena laki madra ga mai na veika ni veitemaki kei vuravura, ka da bula marau ena ivalavala dodonu.
E tiko tale e dua na ivakarau ni yalo sa raramusumusu, o ya na noda vakavinavinaka titobu me baleta na Nona vakararawataki na Karisito ena vukuda. E Kecisemani, e a “lako sobu mai ki ra sara” na iVakabula (V&V 88:6) ka mai colata o Koya na noda ivalavala ca na kai vuravura kecega. Mai Kolikoca, e a “solia oti na nona bula ki na mate” (Aisea 53:12), ka yaco me ramusu dina na Yalona qaqa ena nona kovuti ira ena loloma na luve ni Kalou. Ena gauna eda nanuma kina na iVakabula kei na Nona vakararawataki, ena ramusu talega vakakina na yaloda ena vakavinavinaka vei koya Sa Lumuti.
Ni da sa vakayacora na isoro kecega Vua ena veika kece sa tu vei keda kei na keda ituvaki taucoko, ena vakasinaita na Turaga na yaloda ena vakacegu. O Koya ena “vakabulai ira sa ramusu na yalodra” (Aisea 61:1) ka na vakalougatataka na noda bula ena loloma ni Kalou,“sa kamikamica sara mai na veika kamikamica kecega … ka savasava sara mai na veika savasava kecega” (Alama 32:42). Au sa vakadinadinataka oqo, ena yaca i Jisu Karisito, emeni.