Elder Quentin L. Cook
Ena Kuoramu ni iApositolo Le Tinikarua

E dina ga ni a tukuna o koya ni a sega ni namaka na veikacivi me laki veiqaravi ki na Kuoramu ni iApositolo Le Tinikarua, sa vakavulica tiko mai ena nona bula o Elder Quentin La Mar Cook ni se cauravou gone kina me dau ivakadinadina bula ni iVakabula o Jisu Karisito

“Ena noqu bula taucoko au sa solegi tu mai vei ira era sa lomana dina na iVakabula,” e kaya o Elder Cook.

A sucu o koya ena ika 8 ni Sepiteba,1940, mai Logan e Utah, kivei rau o J. Vernon kei Bernice Cook, ka sa vakavinavinaka vakalevu o Elder Cook kivua e dua na tama kei na tina erau daulomani koya ka veitokoni ka rau “lomana na iVakabula. Erau vakayacora na veika kecega erau rawata rawa me keitou susugi vakadodonu kina.”

Sa vakavinavinakataki rau tiko na tacina kei ganena ka nanuma sara o koya na gauna a se qai yabaki 15 tiko kina ka rau a veivosaki sara kina vakabibi kei Joe na tuakana, ka raica kina o koya ni na kauta mai na veika vinaka ka cecere na ivakadinadina me baleta na iVakabula. Sa gadrevi vei Joe me digia me sa tomana tikoga nona vuli veiqaravi vakavuniwai se me sa laki kaulotu. Na veivakadeitaki rau a dui ciqoma me baleta ni sa dina na Lotu ka sa vakalou o Jisu Karisito ka sai koya na iusutu ni vakatulewa ki na digidigi me vakayacori.

Me vaka ga a yaco vei Elder Cook, a laki veiqaravi talega o tuakana ki na Tabana ni Kaulotu e Peritania. Oi rau na nona peresitedi ni kaulotu, ka wili kina o Elder Marion D. Hanks, ena gauna o ya e a lewe tiko ni iMatai ni Matabose ni Vitusagavulu, ka rau a vakauqeta sara vakalevu na nona bula.

“Sa dua dina na ka bibi me tiko na noda dui ivakadinadina me baleta na iVakabula ka veimaliwai vata tiko kei ira na tamata era lomana dina na iVakabula,” e kaya o Elder Cook. A sotava talega o koya e dua sa vakaoqo, o ya o Mary Gaddie, ka a vakamautaka ena Valetabu e Logan Utah ena ika 30 ni Noveba, 1962.

Ni oti na nona qeretueti mai na Utah State Univesiti ena diqiri ni vakadidike ni politiki, erau a toki na veiwatini ki California ka laki taura kina o Elder Cook na koroi ni vuku ni lawa mai na Univesiti o Stanford. Ena gauna erau sa susuga cake tiko kina e tolu na luvedrau, a cakacaka tiko kina o Elder Cook ena lawa ni bisinisi, ka laki manidia veivuke ena dua na kabani ni lawa ena Baravi ni Yasana o San Francisco, ka lesi sara me peresitedi ka vakailesilesi liu (CEO) ni California Healthcare System, ka yacova sara me laki ivukevuke ni jeameni ni Sutter Health Systems.

Ena gauna o ya e a lesi talega me bisopi, peresitedi ni iteki ka daunivakasala, mata ni iwasewase, ka Vakaitutu ni iWasewase. Ni lewena tiko na mataveiliutaki ni iteki, e a sega walega ni nona ilesilesi na veitabanalevu vosa Vakavalagi, ia kivei ira talega na ivavakoso era vosa vaka-Sipeni, Toga, Samoa, Tagalog, kei na Mandarin kei na Canton.

“Eda taleitaka vakalevu na nodra gugumatua na lewenilotu kei na nodra yalodina tiko ki na kosipeli i Jisu Karisito. Era sa veivakauqeti kaukauwa ki na noqu bula.”

Ia, ki na nona bula vakacakacaka, e a veiqaravi vakacakacaka vakalevu ga o Elder Cook kei ira na tamata era sega ni lewe ni Lotu. A vulica kina o koya “ni vuqa sara tu na tamata e taudaku ni Lotu era lomana talega na iVakabula. E vuqa vei ira era veivakauqeti vinaka talega ki na noqu bula. O koya gona niu vakamacalataka tiko na nomu rawa ni solegi mai vei ira na tamata era lomana na iVakabula, au sega ni tukuna tiko mo drotani mai vei ira na tamata.”

Ni oti na nona veikacivi ena iKarua ni Kuoramu ni Vitusagavulu ena ika 6 ni Epereli, 1996, sa tarava sara na nona sa kacivi ki na iMatai ni Kuoramu ena ika 4 ni Epereli, 1998, a laki veiqaravi o Elder Cook ki na Mataveiliutaki ni iWasewase e Filipaini/ Micronesia, ka Peresitedi ni iWasewase ni Lotu ena Pasivika kei na Vualiku ni Ra ni Vualiku kei Amerika.

Na nona veiqaravi Vakaitutu Raraba sa vaqaqacotaka kina na nona vakabauta “ni sa rawa ni da kunei ira na tamata vinaka era lomana na iVakabula ena vanua cava ga eda tiko kina.” E vakabauta o Elder Cook ni sala eda na kunei ira rawa kina sai koya ga meda bulataka na kosipeli ena yalomalua ka sega ni maduataka.

“Au vakabauta ni cala levu duadua era vakayacora tiko o ira na Yalododonu Edaidai o ya ni ra sega ni tukuni ira tiko yani,” e kaya o koya. “E vuqa na lewenilotu era sega ni tukuna vei ira na nodra itokani kei ira era kila na kedra itukutuku dina kei na nodra vakabauta vakalotu ka sa laki yaco me dredre sara vei ira. Kivei ira era sa vakatakila ni o ira era Yalododonu Edaidai ka tukuna vakamatata na nodra vakabauta vakalotu sa lailai sara na veika dredre era sotava.”

Ena nona a veiqaravi tiko vaka-Dairekita Liu ni Tabacakacaka ni Kaulotu ni bera ni mai kacivi me lewe ni Mataveiliutaki ni Vitusagavulu ena Okosita ni 2007 a raica talega kina o koya ni dau yaco o ira na tamata oqo me ra lewenilotu daukaulotu vinaka cake.

Ena imatai ni nona vosa ena koniferedi ni oti na nona tokoni me iApositolo ena ika 6 Okotova, 2007, a vosa kina o Elder Cook me baleta na nodra malumalumu na lewenilotu ni ra dau “matavulo tiko” ka sa vakayaloqaqataki ira kina me ra bula ga “ena vakabauta ka sega ena rere.”

“Era tiko o ira era dau veivakalialiai,” a kaya o koya. “Sa ka dina sara na vale vakaitamera o ya. Ia e vuqa sara vei ira na tamata era wavoki voli ena yasa ni vale vakaitamera o ya, sa yalodra dina tu, me ra qumia na ititoko kaukamea, ka ra sa ‘sega ga ni kila rawa na ka dina, ni ra sa sega ni kila na vanua me ra vakasaqara kina’ (V&V 123:12). Ia ena gauna sa cakacaka dodonu kina e dua na tamata ena yalo e veinanumi, dauloloma, ena veivakurabuitaki na levu ni tamata era na vakauqeti kina.”

Sa vakabauta dina tiko o Elder Cook ni ra na vakauqeti vakaoqo o ira na tamata mai vua ena nona veikacivi vou oqo, se cava ga na yalo ni veilecayaki e vakila o koya, sa dodonu ga vua me na bula voli ena vakabauta ka sega ena rere ena nona vakatakilai koya yani kivei ira na tamata kei na veika e vakabauta ni sa dua o koya na ivakadinadina bula kei Karisito.

“Au sa lomana dina na iVakabula,” a vakaraitaka o koya. “Au marautaka vakalevu na noqu bula meu dua na ivakadinadina bula kei Jisu Karisito ki vuravura taucoko.”