O Ira na Tina Era Kila

Julie B. Beck

Peresitedi Raraba ni iSoqosoqo ni Veivukei

E umani tu ena itutu vakatina na veivakauqeti kei na kaukauwa tawamudu.

Eda wilika ena iVola i Momani na kedra itukutuku e 2,000 na cauravou yalodei, yaloqaqa, ka kaukauwa sara. “Raica era sa tamata dina sara ka yalomatua, era sa vakavulici me ra muria tikoga na vunau ni Kalou ka caka dodonu e matana” (Alama 53:21). O ira na cauravou yalodina oqo era dau vakacaucautaki ira na tinadra, Era kaya vakaoqo, “Sega ni vakatitiqataka na nodra ivakavuvuli na tinai keimami” (Alama 56:48). Au vakabauta kina ni o iratou na tinai Kavetani Moronai, Mosaia, Momani, kei ira eso tale na iliuliu era sa kila talega vakakina.

Na nodra ilesilesi na tina ena gauna oqo sa gadrevi vakalevu kina na yaloqaqa. Mai na veigauna taucoko kei vuravura, e sega ni se bau gadrevi kina vakaoqo o ira na tina era kila. Era sucu mai na gone ki na vuravura oqo ka ra na “sega ni veivala walega kei ira na tamata, [era] veivala talega kei ira era sa liu, kei ira era sa kaukauwa, kei ira era sa veitaliataka na butobuto kei vuravura oqo, kei ira na veivavakoso yalo ca ena veiyasana vakalomalagi” (Efeso 6:12).¹ Ia, me ra kakua kina ni rere na tina. Ni ra sa kila tiko na tina o cei o ira ka o cei na Kalou ka ra sa vakayacora Vua na nodra veiyalayalati, era na rawata na kaukauwa e cecere kei na veivakauqeti me baleta na nodra bula vinaka na luvedra.

O Ira na Tina era Kila era na Vakaluveni

O ira na tina era kila era sa gadreva tu me ra vakaluveni. Ia ena gauna vata oqo ena veivanua eso e vuravura era sa “sega so ni dua na ka na gone,”² ia ena bula vakosipeli eda vakabauta tikoga na vakaluveni. O ira na parofita, daurairai, ka dauvakatakila era tokoni ena koniferedi oqo era sa vakaraitaka raraba “Ni se tudei tikoga na Nona ivunau na Kalou vei ira na luvena me ra tubu ka lewevuqa ka vakatawai vuravura.”³ E vakavulica o Peresitedi Ezra Taft Benson ni o ira na veiwatini gone me ra kakua ni lokuyarataka na nodra vakaluveni, baleta “ni sa iusutu tawamudu o ira na gone—ni sai ira na noda iyau talei cecere duadua—ka sega ni veika eda taukena, se itutu, se keda irogorogo.”⁴

Era na dau gadreva o ira na luvena yalewa yalodina na Kalou me ra vakaluveni. Eda wilika ena ivolanikalou na italanoa kei Ivi (raica Mosese 4:26), o Sera (raica Nai Vakatekivu 17:16), Repeka (raica Nai Vakatekivu 24:60), kei Meri (raica 1 Nifai 11:13–20) era sa digitaki taumada tu mai me ra mai tina ni bera ni ra mai vakasucu gone. Eso na yalewa e sega ni soli vei ira na ilesilesi me ra vakaluveni ena bula oqo, ia me vakataki Ana ena Veiyalayalati Makawa a masuta vagumatua me dua na luvena (raica 1 Samuela 1:11), o ira na marama era doka na itutu vakatina ena bula oqo kei na isolisoli ni vakaluveni era na taukena eke ena tiko vata kei ira ena gauna ni nodra Tucaketale (raica V&V 130:18). O ira na yalewa era gadreva ka cakacakataka na veivakalougatataki o ya ena bula oqo sa yalataki tu vei ira ena veigauna tawamudu ka na balavu cake sara mai na bula oqo na veigauna tawamudu. E umani tu ena itutu vakatina na veivakauqeti kei na kaukauwa tawamudu.

O Ira na Tina era Kila era Dau Rokova na Cakacakatabu Vakalotu kei na Veiyalayalati Tabu

Era dau rokova na cakacakatabu vakalotu kei na veiyalayalati tabu o ira na tina era kila. Au a dau tiko talega ena soqoni ni sakaramede ena so na vanua dravudravua sara e vuravura ka ra dau vakaisulu rakorako mai o ira na tina, ka dina ga ni ra taubaletaka vakayawa mai na gaunisala kuvu ka ra vodoka mai na tolili makawa ituvaki ca. Era vakaisulutaki ira mai vakavinaka na luvedra yalewa ka seru toka mai vakavinaka na uludra; ka ra tokara na luvedra tagane na sote vulavula kei na neketai ka ra koti vakataki ira na daukaulotu. Era sa kila tu o ira na tina oqo ni ra gole tiko ki na soqoni ni sakaramede me laki vakavoui na veiyalayalati. Era sa bulataka ka doka tiko o ira na tina oqo na veiyalayalati ni valetabu. Era sa kila tiko ni kevaka era na sega ni muataki ira na luvedra ki na valetabu, era sa sega tiko ni muataki ira ki na kena gadrevi na inakinaki tawamudu. Era tina dau veivakayarayarataki ka qaqa.

O Ira na Tina era Kila era Dauniveisusu

O ira na tina era kila era sa dauniveisusu. Sai koya oqo na nodra ilesilesi ka itavi cecere ena ruku ni yavu ni bula marau.⁵ Na veisusugi sai koya na veivakarautaki, veimaroroi, kei na veivakatuburi. O koya gona o ira na tina era kila era na tauyavutaka e dua na bula ni tubucake vakayalo ka vakayago ena loma ni nodra matavuvale. Na vosa veisusu sai koya talega na veicakacaka e vale. Na veicakacaka e vale e oka kina na vakasaqa, na sava isulu kei na iyaya ni kana, kei na tuvalaki vinaka ni itikotiko. Na itikotiko ni vale sai koya na vanua era na qaqaco ka veivakauqeti sara kina vakalevu na marama; o koya gona, sa dodonu kina vei ira na marama ni Yalododonu Edaidai me ra daunicakacaka e vale uasivi duadua e vuravura. Na cakacaka vata kei ira na gone e vale ena vakavurea kina e dua na madigi me ra vakavulici ka vakaraitaki vei ira na gone na veika vivinaka mera vakatotomuria. O ira na tina dauniveisusu era kila ka vakavuku ,ia ena sega ni mana na veika era sa kila tu na tina, kevaka era na sega ni yalomatua ka tauyavutaka ena nodra vuvale na bulataki ni tubu vakayalo. Na tubu ena vakavotukanataki vakavinaka sara ena dua na “vale ni caka dodonu” ka sa dodonu me ra bulia na tina na nodra vale me vakataka na vale ni Turaga (raica V&V 109). Na veisusugi e gadrevi kina na ituvatuva vakayalomatua, na vosota, na loloma, kei na cakacaka. Na vukei ni tubu ena gauna ni veisusugi sa dua dina na ilesilesi qaqa ka veivakauqeti era sa vakatikori kina na marama.

Era Sa iLiuliu O Ira na Tina Era Kila

Era sa iliuliu o ira na tina era kila. Me vaka ni ra sa duavata ena ka oqo kei ira na watidra, era sa liutaka tiko kina e dua na isoqosoqo e cecere ka tawamudu. O ira na tina oqo era tuvanaka na inakinaki ni nodra isoqosoqo. Era tuvanaka na kaulotu, vakamau ena valetabu, kei na vuli. Era tuvanaka me caka na masu, vulici ni ivolanikalou, kei na lotu vakamatavuvale. O ira na tina era kila era susuga cake na luvedra me ra laki iliuliu ka ra sa ivakaraitaki taumada ni ituvaki ni dua na iliuliu. Era na sega ni vakanadakuya na nodra ituvatuva o ya ena nodra laki vakaogai ira tu ena veiogaoga lelevu vakamatatamata kei na iwalewale ni veisusugi e vakavuravura. O ira na tina era kila, ka ra yalomatua era na dau digitaka vakavinaka sara na veioga era vakaitavi kina me rawa ni ra vakayagataka vakavuku na nodra gauna donu me rawa kina ni ra laki gugumatua ena veika e bibi cake.

O Ira na Tina Era Kila Era Qasenivuli Talega

Era sa qasenivuli talega o ira na tina era kila. Me vaka ni ra sega ni daumeimei saumi, era na sega ni vakalutu cakacaka. A kaya vei au e dua na noqu itokani vuku ni sega ni dua na ka e a vulica ena lotu me se bera mada ni vulica mai vale. Erau a vakayagataka na nona itubutubu na gauna ni vulici ni ivolanikalou, masu, lotu vakamatavuvale, gauna ni kana, kei na soqoni tale eso me rau veituberi kina. Sa rawa me da raica na nodra kaukauwa o ira era na laki kaulotu kevaka me ra bulia o ira na tina na nodra vale me dua na koronivuli ni kaulotu. Sa na qai yaco kina na ivakavuvuli ni kosipeli e vakavulici ena KNK me ka ni veivakadeitaki ka sega ni so na ivakatakila vou. Oqori na veivakayarayarataki; oqori na qaqa.

O Ira na Tina era Kila e Vakalailaitaki na Nodra iTavi

O ira na tina era kila ena vakalailaitaki na nodra itavi. Era na sega ni vakatara na veika ena sega ni vuataka mai na veika vinaka sa tawamudu. Era na sega ni vakatara na itukutuku vakavuravura ena nodra vale, na veivakasosataki, na veitaviqaravi ka na kauti ira tani na gone mai vale. Era dau gadreva na tina era kila me ra bula mamaroroi ka sega ni bula vakasabusabu ena veika vakavuravura me rawa kina ni ra veivolekati sara vakavinaka kei ira na luvedra—veivolekati ena kana vata, veivolekati ena cakacaka vata, veivolekati ena wilivola vata, veivolekati ena veivosaki vata, marau vata, lagasere, kei na veivakatataki. O ira na tina oqo era dau digidigi vakavinaka sara ka ra qarauna na nodra digidigi. Sa nodra inakinaki me ra vakarautaka e dua na itabatamata gone me ra na kauta yani na kosipeli i Jisu Karisito ki vuravura taucoko. Sa nodra inaki me ra vakarautaki o ira me ra laki tama ka tina era na laki tara cake sara na matanitu ni Turaga ena 50 na yabaki ka tu mai. Oqori na veivakayarayarataki; o ya na qaqa.

O ira na Tina era Kila era Qaqa ka Sega ni Yavalati Rawarawa

O cei beka ena vakarautaki ira na itabatamata luveda tagane kei na yalewa yalododonu oqo? Era na vakayacora o ira na marama Yalododonu Edaidai—sai ira na marama era kila ka lomana na Turaga ka dau tukuna na nodra ivakadinadina baleti Koya, sai ira na marama yaloqaqa ka sega ni yamekemeke ka sega ni yalolailai ena gauna ni dredre kei na leqaleqa. Eda sa liutaki tiko mai vua e dua na parofita ni Kalou ka sa vakamasuti ira na marama lewe ni Lotu me ra “tamata qaqa ka sega ni vakayavalati rawa ena veika sa dodonu ka dina ena ruku ni ituvatuva ni Turaga.”⁶ E sa kerea o koya kivei keda me da “tekivutaka sara ga ena [noda] veivale”⁷ me ra vakavulici kina na gone ena salatu sa dina. Sa dodonu vei ira na marama Yalododonu Edaidai me ra sa kenadau e vuravura taucoko ena nodra tokoni, susugi, ka taqomaki na veimatavuvale. Au sa vakabauta vakaidina ni sa rawa vei ira na noda marama me ra vakayacora rawa na veika oqo ka yaco me ra na vakatokai me ra tina era a sa “kila” (Alama 56:48). Ena yaca i Jisu Karisito, emeni.