Ko Ira na Malumalumu kei na Tamata Wale ena Lotu

Peresitedi Boyd K. Packer

Peresitedi Vakatawa ni Kuoramu ni iApositolo Le Tinikarua

E sega ni dua na lewenilotu se dua na ilesilesi e raica na Turaga me levu cake se lailai sobu mai na dua tale.

Eda vakarokorokotaki Peresitedi James E. Faust. Eda nanumi ko ya. Na watina lomani o Ruth, e tiko vata kei keda ena mataka nikua, eda vakaraitaka na noda lomani koya. Eda kidavaki ira talega sa mai vakaraitaka na yacadra o Peresitedi Hinckley vata kei na nodra itutu.

Niu vosa ena vukui keimami kece sara na tokoni nikua, keimami yalataka na neimami na solia na neimami vinaka duadua me ganita nomuni veivakabauti vei keimami.

Eda sa tokoni ira na vakailesilesi raraba ni Lotu, e dua na ivalavala tabu ka bibi. Na ivalavala dau caka wasoma oqo e dau yaco ena veigauna kece era kacivi kina se vagalalataki mai na nodra itutu na iliuliu kei ira na qasenivuli se ena gauna e tauyavutaki se veisautaki kina e dua na iteki se tabanalevu se kuoramu se na mataisoqosoqo. (raica V&V 124:123, 144; raica talega V&V 20:65–67; 26:2). E vakayacori ga ena Lotu i Jisu Karisito ni Yalododonu Edaidai

Eda kilai ira era kacivi me ra veiliutaki se ra veivakavulici ka soli vei keda na galala me da tokona se saqata na veikacivi. E sega ni yaco mai na ka oqo ena vakasama vakatamata ia a vakatakilai mai: “Sa sega ni kilikili vua e dua me laki vunautaka na noqu ivakavuvuli se tauyavutaka na noqu isoqosoqo lewe ni lotu, io vei koya walega sa lesi me kitaka vakakina, io me lesi koya e dua sa kilai raraba ena lotu ni ratou sa solia vua na kaukauwa ni veilesi ko iratou na iliuliu ni lotu” (V&V 42:11; vakamatatataki). Ena sala oqo sa taqomaki kina na Lotu mai vei koya e via vakamatavulo mai me liutaka e dua na kuoramu, tabanalevu, iteki, se na Lotu.

E dua tale na ivakavuvuli e tiko duadua ga ena Nona Lotu na Turaga. Na itutu kece ni veiliutaki kei na veivakavulici era vakatawana na lewe ni Lotu. Oqo e sa volai taumada tu ena ivolanikalou. E dua na tikina ena Vunau kei na Veiyalayalati sa tukuni kina na ivakarau ni veiliutaki ena Lotu ena veigauna kece sara. A sega mai liu, e sega ni kena ivakarau ena veimatalotu Vakarisito ena veigauna ko ya se ena gauna oqo:

“Raica, koi au na Turaga, au sa kila tu na veika rarawa ena yaco vei ira na kai vuravura, a ka oqo au sa kacivi Josefa Simici, Jnr., kina na noqu tamata ka vosa vua mai lomalagi, ka solia vua na vunau; …

“Raica na veika malumalumu e vuravura ena vakamalumalumutaka na veika sa kaukauwa ka qaqa, …

“ Me ra vunau ko ira ena yaca ni Turaga na Kalou, na nodra iVakabula na kai vuravura;

“Ia me ra vakabauta kina na kai vuravura kecega;

“Io me vakataudeitaki na noqu veiyalayalati tawamudu;

“Ia era na vunautaka yani na uto ni noqu ivakavuvuli dina ko ira sa malumalumu kei ira na tamata wale io me ra vunautaka yani ki vuravura taucoko, vei ira talega na tui kei ira na turaga.

“Raica, oqo na ka au sa vakarota koi au na Kalou. Ia au sa vakatakila na noqu vunau vei ira na noqu tamata ena nodra vosa me vaka na ivakatagedegede ni nodra kila ka” (V&V 1:17, 19–24).

Au sa vakavinavinaka vakalevu ena vuku ni ivolanikalou oqo, ka vakamacalataka ni na vakayagataka na Turaga na “veika e malumalumu e vuravura”

Sa nona itavi na lewenilotu yadua me ciqoma na kaci ni veiqaravi.

E kaya ko Peresitedi J. Reuben Clark Jr.: “Ena veiqaravi vua na Turaga, e sega ni vanua ko veiqaravi kina ia na kena ivakarau. Ena Lotu i Jisu Karisito ni Yalododonu Edaidai, ena taura e dua na itutu ga e kacivi kina, na itutu oqori e sega ni vaqara me taura se na vakasuka” (ena Conference Report, Epe. 1951, 154). E sega ni dua na italai ni Lotu e saumi. Na veikacivi ki na itutu ni veiliutaki e vuravura raraba e tauri ga mai vei ira na ivavakoso. E sega na koronivuli me ra tuberi kina o ira na iliuliu me ra saumi.

Na veika kece sara e vakayacori ena Lotu—na veiliutaki, na veituberi, na veikacivi, na veitabaki, na masu, na lagasere, na vakarautaki ni sakaramede, na veivakasalataki, kei na veika kece tale —era qarava ga na lewenilotu, “na veika malumalumu e vuravura.”

Eda raica na nodra segata tiko vakaukauwa na veimatalotu Vakarisito me ra vakatawa na veitutu vakaitalatala. E sega ni yaco tiko vei keda na leqa oqori. Ni sa vunautaki na kosipeli ka tauyavutaki na Lotu, sa tu e dua na ivurevure sega ni oti rawa ni tagane kei na yalewa yalodina sa tu na nodra ivakadinadina ka ra sa vakarau tu me ra ciqoma na kaci ni veiqaravi. Era soli ira ki na cakacaka ni Turaga ka bulataka na ivakatagedegede e gadrevi vei ira.

Sa soli vei ira na lewenilotu na Yalo Tabu ni ra papitaiso oti (raica V&V 33:15; 35:6). Ena vakavulici ira ka vakacegui ira na Yalo Tabu. Ni oti o ya era sa na vakarau tu me ra ciqoma na veituberi, na veidusimaki, kei na veivakadodonutaki, se cava ga e vinakati ena nodra itutu kei na gagadre. (Raica Joni 14:26; V&V 50:14; 52:9; 75:10.)

Na ivakavuvuli oqo sa biuta na Lotu ena dua na gaunisala e duatani duadua mai na veimatalotu kece Vakarisito e vuravura. Eda na raica ni da sa tu ena dua na itutu matalia ni sega ni oti rawa na noda ivurevure ni qasenivuli kei ira me ra veiliutaki, ena veivanua kei na duikaikai kei na duiduivosa kei na veimatatamata, ena vuravura taucoko. Era sa vakatautauvatataki na lewenilotu. E sega ni dua vei keda me nanuma ni yaga cake vakalevu o koya mai vua e dua tale. (Raica V&V 38:24–25.) “Ni sa sega ni dau digitaki ira vakailoa na tamata na Kalou: ia ena veivanua kecega sa vinaka vua ko koya sa rerevaki Koya ka caka dodonu” (Cakacaka 10:34–35; raica talega Roma 2:11; V&V 1:35; 38:16).

Niu se cauravou, au a nona dauveituberi ni matavuvale vua e dua na kena marama qase sara. A vakavulici au mai na veika a sota kaya ena nona bula.

Ni se goneyalewa lailai a lako mai ki na Korolevu ko Brigham o Peresitedi Brigham Young, ena dua na soqo levu ka a vakayacori ena koro e vakayacani vua. Me ra vakaraitaka na nodra rokovi koya, era tuva e yasa ni gaunisala ka curu yani ki na koro o ira na gone ena Lalai, ka ra vakaisulu vulavula kece tu, era yadua kece na kato senikau me ra ceburaka yani me qiqica mai na nona qiqi na Peresitedi ni Lotu.

E dua na ka e sega ni marautaka. A mani sega ni ceburaka yani na nona senikau, ia a caqeta yani ki na mua i liu ni qiqi e dua na vatu, ka kaya, “E sega ni vinaka cake vakalailai mai vei noqu Tutu Lovelund o koya. ”A rogo na nona vosa, ka qai vosataki vakaukauwa sara.

Au vakabauta deivaki ni na imatai me duavata kei Janie Steed lailai o Peresitedi Brigham Young. Ena sega sara ni raica o koya me levu cake na kena yaga mai vei Tutu Lovelund se mai vua tale e dua na lewenilotu bula kilikili.

E matata vinaka sara na Turaga vakataki Koya: “Ka me nomudou tamata ko koya yadua vei kemudou sa viavia turaga” (Maciu 20:27). “E dina ga sa uasivi ko koya, ia sa lailai sara ka sa nodra tamata na tamata kecega” (V&V 50:26).

Ena vica na yabaki sa oti niu taura ena imatai ni gauna e dua na ilesilesi ka qai vakavuna na kena biu ena niusipepa na kequ itaba, a rogoca e dua na noqu qasenivuli, ka kena irairai ni a cudru tiko ena gauna ko ya, ena nona kaya, “Sa vakadinadinataka oqori ni o na sega ni rawa ni tukuna ena nomu raica toka e dua na boto na cecere ni vanua e rawa ni rikava!”

Na iyaloyalo ni boto o ya, ni dabe toka ena soso ka sega ni veirikayaki tiko, e vakaraitaka na noqu vakila ni sega ni ganiti au na itavi sa lesi vei au.

Na yalo oqori sa yaco kina ni sa oti o ya ena sega ni rawa vua e dua me vakalevulevui koya cake mai vua tale e dua, e sega sara ga.

Ena dua na gauna balavu, a vakaleqai au tiko e dua tale na ka. Ena vasagavulu kaono na yabaki sa oti au a supavaisa voli ni semineri, ka yabaki 37. Na noqu ilesilesi ena Lotu, au ivukevuke ni qasenivuli ena dua na kalasi ena Tabanalevu e Lindon.

Ena noqu kurabui levu, au a qiriti mai meu sota vata kei Peresitedi David O. MacKay. A taura na ligaqu ruarua ka kacivi au meu dua na Vakaitutu Raraba, meu iVukevuke ki na Kuoramu ni iApositolo Le Tinikarua.

Ena vica na siga ka tarava, au a lako mai ki Salt Lake City meu sota vata kei iratou na Mataveiliutaki Taumada meu vakatikori me dua na Vakaitutu Raraba ni Lotu. Oqo na imatai ni gauna meu sota kina vata kei iratou na Mataveiliutaki Taumada—Peresitedi David O. McKay kei rau na nona daunivakasala, Peresitedi Hugh B. Brown kei Peresitedi Henry D. Moyle.

A vakamacalataka o Peresitedi McKay ni dua na nodra itavi na iVukevuke ki na Le Tinikarua sai koya me ra tu vata kei ira ena Kuoramu ni iApositolo Le Tinikarua me ra ivakadinadina bula digitaki ka me ra vakadinadinataka ni Karisito ko Jisu. Na veika e tukuna tarava o ya e vakadrukai au: “Ni se bera ni keitou vakatikori iko, au sa kerei iko mo wasea mada na nomu ivakadinadina vei keitou. Keitou vinakata me keitou kila se sa tiko vei iko na ivakadinadina o ya.”

Au vakayacora ena kena vinaka duadua au rawata. Au wasea na noqu ivakadinadina me vaka ga niu soli ivakadinadina tiko ena dua na soqoni ni lolo kei na soli ivakadinadina ena neitou tabanalevu. Ena noqu kurabui, e vaka me ratou taleitaka na Mataveitacini ena Mataveiliutaki ka ratou solia vei au na itutu o ya.

E qai vakaleqai au vakalevu tale o ya, baleta niu dau nanuma tu ni dua e kacivi ki na dua na itutu vakakoya ena tu vua e dua na ivakadinadina duatani ka vakalevulevui sara vakalevu ka vakakina na kaukauwa vakayalo.

A vakaleqai au tu ena dua na gauna balavu me yacova na gauna au sa qai raica rawa kina ni sa tu rawa vei au na veika e gadrevi: e dua na ivakadinadina veivauci e yaloqu me baleta na kena Vakalesui mai na taucoko ni kosipeli mai vua na Parofita ko Josefa Simici, ni tiko e dua na Tamada Vakalomalagi, ka vakakina ni noda Dauveivueti ko Jisu Karisito. Au a sega beka ni kila taucoko sara, ia sa tiko e dua na noqu ivakadinadina, kau sa vakarau tu meu vuli.

E rairai au sega beka ni duatani mai vei ira era tukuni tu ena iVola i Momani: “Ia ko koya yadua sa lako mai vei au ena yalo sa raramusumusu kei na yalo sa bibivoro, au na papitaisotaki koya ena bukawaqa kei na Yalo Tabu, me vakataki ira na Leimani era a vakabauti au ka saumaki mai, raica era a papitaisotaki ena bukawaqa kei na Yalo Tabu, ia era a sega ga ni kila” (3 Nifai 9:20; vakamatatataki).

Ena veiyabaki sa oti, au sa qai mai raica na kena bibi ka kaukauwa na ivakadinadina rawarawa o ya. Au sa qai kila ni o Koya na Tamada Vakalomalagi e Tama ni yaloda.(raica Na Tiko Mai Na Lekutu 16:22; Iperiu 12:9: V & V 93:29). O Koya e dua na Tama ka tu vua na loloma uasivi taucoko sara vakatama. E kaya ko Jisu, “Ni sa lomani kemudou na Tamaqu, ni dou sa lomani au, ka vakadinata niu sa lako mai vua na Tamaqu” (Joni 16:27).

Ena vica na yabaki sa oti, au a tiko vata kei Peresitedi Marion G. Romney ka sota tiko vata kei ira na peresitedi ni daukaulotu kei na dui watidra mai Geneva, e Switzerland. E tukuna vei ira ko koya ni ena 50 na yabaki yani ki liu, ni se daukaulotu gonetagane voli e Ositerelia, au lako ena dua na yakavi ki na dua na valenivola meu vuli lesoni. Ena gauna e qai curu yani kina ki tautuba sa bogi na vanua. E rai cake ki lomalagi ni sinai tu ena kalokalo, ena gauna vata oqori e yaco kina. A tarai koya na Yalotabu ka sucu e yalona e dua na ivakadinadina.

E tukuna o koya vei ira na peresitedi ni kaulotu o ya ni a sega ni se bau kila vakavinaka cake ena gauna ko ya me vaka ena nona sa mai lewena na Mataveiliutaki Taumada ni bula tiko na Kalou na Tamada; ni Karisito ko Jisu, na Luve ni Kalou, na Le Duabauga nei Tamana, ka vakakina na kena sa vakalesui mai na taucoko ni kosipeli me vaka na nona kila ni se daukaulotu gonetagane ena 50 na yabaki yani ki liu e Ositerelia. E kaya ni sa veisau na nona ivakadinadina ni sa rawarawa cake sara na nona rawata na isau ni nona taro mai vua na Turaga. Sa voleka cake na Nona iserau na Turaga, ka sa kila vakavinaka cake na Turaga mai na 50 na yabaki sa oti.

Sa dau noda ivakarau me da raici ira era tokoni ki na itutu ni veiliutaki eso ka nanuma ni ra sa cecere cake ka ra yaga cake ena Lotu se ki na nodra matavuvale mai vua e dua na lewenilotu walega. Ena so na gauna eda nanuma ni ra yaga vakalevu cake vua na Turaga mai vei keda. E sega ni vakakoya!

Ena rarawataki sara vei na watiqu vata kei au kevaka keirau nanuma ni vakasamataka e dua vei ira na luvei keirau ni keirau nanuma ni keirau yaga vakalevu cake ki na matavuvale se ki na Lotu mai vei ira, se me nanumi ni vakalevulevui cake e dua na ilesilesi ena Lotu mai na dua tale, se ni nanumi ni sega soti ni bibi e dua na ilesilesi mai na dua tale.

Ena dua na gauna lekaleka sa oti, a tokoni e dua na luvei keirau tagane me iliuliu ni kaulotu ena tabanalevu. E tukuna vei keirau na watina na nona taleitaka na nona ilesilesi. E ganita vinaka na levu ni osooso ena nona cakacaka. E tu vua na yalo ni cakacaka ni kaulotu ka na rawa ni vakayagataka vakavinaka kina na nona vosa vaka-Sipeni, sa dau vakavinakataka cake tiko me tekivu mai na gauna ni nona kaulotu. Keirau sa bau marautaka talega vakalevu na nona ilesilesi.

Na veika erau vakayacora tiko na luvequ kei na watina vei ira na luvedrau e sivia sara na kena bibi na veika kece erau rawa ni cakava ena loma ni Lotu se e taudaku. E sega ni dua na veiqaravi e rawa ni rau solia e bibi cake vua na Turaga mai na nodrau veidinadinati vakataki rau kei na nodrau dina vei ira na luvedrau lalai. Na ulumatua ka icavacava ni veika kece e qaravi ena Lotu e vagolei ki na loma ni vale kei na matavuvale.

Ni keimami Vakaitutu Raraba ena Lotu, keimami tautauvata ga kei kemuni, ka ko ni tautauvata ga kei keimami koi kemuni. E tautauvata na nomuni katuba ki na kaukauwa ni ivakatakila me baleta na nomuni matavuvale, kei na nomuni cakacaka, kei na nomuni ilesilesi kei na neimami.

E dina talega ni tu na ivakarau ni veika ena Lotu. Ni o kacivi ki na dua na itutu, o sa na taura na ivakatakila me baleta na itutu o ya ka na sega ni soli vei ira tale eso.

E sega ni dua na lewenilotu se dua na ilesilesi e raica na Turaga me levu cake se lailai sobu mai na dua tale. E sega ni vakakoya! Nanuma tiko o koya e dua na tama—na Tamada. Na Turaga e “sega ni dau digitaka vakailoa na tamata.”

E sega ni levu cake na keda yaga ki na kena tosoi tiko na cakacaka ni Turaga mai vei Baraca kei Sista Toutai Paletu’a mai Nuku’alofa, Toga; se o Baraca kei Sista Carlos Cifuentes mai Santiago, Chile; se o Baraca kei Sista Peter Dalebout mai na Netherlands; se o Baraca kei Sista Tatsui Sato mai Japani; se o ira na lewe vica tale na drau au sa sotavi ira ena noqu veilakoyaki voli e vuravura. E sega ni dau vakakoya.

Ia sa toso tiko na Lotu. E tosoi tiko ena usouso ni domodra na lewenilotu bula kilikili ka ra bula tu ena bula rawarawa ena loma ni veimatavuvale rawarawa, ka ra tuberi voli ena Yalo Tabu kei na Rarama i Karisito sa tu vei ira.

Au vakadinadinataka ni dina na kosipeli ka sa talei ena mata ni Kalou na tamata kecega— na yalo vakayadua—eda vakalougatataki ni da lewena na Lotu. E tu vei au na ivakadinadina me muataki au ki na veikacivi oqo. Sa tu vei au ena gauna au sota vata kina kei iratou na Mataveiliutaki Taumada ena vica na yabaki sa oti. Au tukuna vei kemuni ena yaca i Jisu Karisito, emeni.