“Vakatawana na Noqu Sipi”

Silvia H. Allred

iMatai ni Daunivakasala ena Mataveiliutaki Raraba ni iSoqosoqo ni Veivukei

Ena gauna ni noda veisiko vakavula vei ira na marama sa rawa ni da tauyavutaka na veilomani, vakaitokani, kei na veidinadinati.

E tuburi au na yalomalua ena vuku ni gauna e soli meu wasea kina vei kemuni na veika e tara tiko na yaloqu. O au e dua ga na marama, lailai ka sega ni kilai ena ivakatagedegede ni vuravura, ia ena vuku ni Nona yalololoma na Turaga, e sa vakalougatataki au ena veika vinaka kei na dua na isolisoli totoka: Au sa ciqoma oti e dua na isolisoli ni sa dina na kosipeli oqo, kei na dina ni bula tiko o Jisu Karisito kei na Nona Veisorovaki. Au se tekivu vakila mai na veivakauqeti ni Yalo Tabu, niu se qai yabaki 14, na imatai ni gauna au vakarorogo kina vei rau na daukaulotu kei na noqu wilika na iVola i Momani. E caudre tu ga e yaloqu na noqu ivakadinadina kei na noqu vakabauta ka sa tudei tikoga. Na isolisoli oqo ni vakabauta kei na ivakadinadina e sa vakalougatataka sara vakalevu na noqu bula.

Nikua au raica niu sa tu ena kedra maliwa na marama totoka ka vinaka sara e vuravura, kau sa vakila na bibi ni itavi au sa kacivi kina meu qarava ena gauna oqo. Au sa dau masu, vulica ka dau vakasamataka vakabibi na ivolanikalou ena noqu vakasaqara na veivakauqeti meu rawa ni kila na ka e vinakata vei au na Kalou meu mai tukuna vei kemuni nikua.

Me vaka ni keitou mataveiliutaki ni iSoqosoqo ni Veivukei, keitou sa vulica ka vakasamataka sara vakabibi na itukutuku makawa kei na inaki ni iSoqosoqo ni Veivukei—na isoqosoqo ka a tauyavutaki vakalou mai vua e dua na parofita ni Kalou me qarava ka vakalougatataki ira na marama ena loma ni Lotu. Na veivakauqeti oqo e tekivu ena nodra gagadre na marama ena gauna o ya. E a tekivu mai na rua na kena inaki lelevu: me vukei ira na dravudravua, ka vakabula na yalo ni tamata.¹

E kaya o Sisita Beck ni dua na ka e dodonu me kila ka rawa ni cakava ka vakayacora sara vakavinaka na marama ena loma ni Lotu sai koya me dau veivukei.

Vakasamataka na ivakavuvuli e vakavuvulitaki tiko ena Joni 21:15–17. E tarogi Pita na Turaga, “Ko sa lomani au li?” Sauma o Pita, “Io na Turaga: ko ni sa kila niu sa lomani kemuni.” Sauma lesu na Turaga, “Vakania na noqu Lami.” Sa kaya tale vakarua vei koya na Turaga, “Ko sa lomani au li”? Sauma tale o Pita ka kaya,” Io na Turaga ko ni sa kila niu sa lomani kemuni.” Sa kaya vei Pita na Turaga, “Vakatawana na noqu sipi.” Taroga vakatolu na Turaga, “Ko sa lomani au li?” Sauma o Pita, “Kemuni na Turaga ko ni sa kila na ka kecega, ko ni sa kila niu sa lomani kemuni.” Sa kaya vua ko Jisu, “Vakani ira na noqu sipi.”

O keda me vaka ni da tisaipeli i Karisito, eda na dau tukuna tiko ni da lomani Koya. Ia, eda na dau vakania tiko li vakacava na Nona sipi?

E dua na gaunisala ni nodra vakania na sipi na iSoqosoqo ni Veivukei sa ikoya me ra dau veisiko. “Na inaki ni veisiko sa ikoya me ra tarai cake kina na veivukei vakaveiwekani ni marama yadua ka rawati talega na veitokoni, veilomani kei na veitokani.”²Me rawa ni ra vakayacora na itavi oqori o ira na dauveisiko me ra:

Sikovi ira vakawasoma na marama o lesi mo sikova (kevaka e rawa, ena nodra lomanivale, ena veivula).
“Vulica na gagadre vakayalo ka vakakina na gagadre vakayago ni marama o sikova kei na nona matavuvale.”
“Solia na veivuke ena gadrevi”
“Solia na lesoni vakayalo mai na itukutuku vakavula.”³

Na Turaga e sa vakalougatataki ira na marama me ra dau loloma, veilomani, veikauwaitaki, ka dau veivukei. Ena gauna ni veisiko vakavula, e tiko vei keda na kaukauwa ena noda itutu vaka-dauveisiko, me da vakalougatataki ira ena kena dodo yani na liga ni veivukei kei na yalodina sara ni loloma. Kevaka me mani vakacava soti sara na veika eda sotava tiko, ena yaco ga mai vei keda na gauna vinaka me da veivakatatakicake ka veituberi.

Au a sa bula oti mai na so na vanua ena iWasewase e Loma kei na Ceva kei Amerika ka vakakina mai na Yatu Caribbean kei Sipeni. Au raica kina na qaravi ni veisiko ena yalodina ka ni caka na taubale voleka vakakina na taubale vakayawa se ena vodo basi, kei na sitimanivanua. O Ana na noqu itokani e dua na tina gone sara mai Costa Rica, e dau qarava ena yalodina ena veivula na nona veisiko, so na gauna me dau taubale ni taubi sara tu ga na uca. Ena gauna oqo ni sa oti e tolusagavulu na yabaki sa mai buinigone sara, ia e se dinata voli ga na nona itavi vaka-dauveisiko. Sa levu sara na bula e sa vakalougatataka.

Ena gauna ni noda veisiko vakavula vei ira na marama, sa rawa ni da tauyavutaka na veilomani, vakaitokani, kei na veidinadinati. Kevaka me da vakarorogo ki na vakasolokakana ni Yalotabu, ena tosocake na noda na kila se o cei soti era gadreva tiko na veivuke. Kevaka me da cakacaka me vaka na veivakauqeti vakalou, eda sa na rawa ni itakataka ni kalougata vei ira era gadreva dina tiko. Ia, me tiko dina vei keda na yalo ni solisoli—solia na noda iyau kei na noda gauna. Na ivakarau dina ni noda bula sai koya na ka eda dau solia ka sega ni ka eda taura mai. Na siko vuvale e solia e dua na gauna ni noda soli ka ni da qarava yani na nodra gagadre vakayago, vakayalo kei na lomadra o ira ko qaravi ira tiko.

Ena noqu a se tu voli ena Dominican Republic, au a laki sikova e dua na marama e nodratou vale ka se qai vakasucu oti ga mai valenibula ena ikatolu ni luvena. Au vakadrukai ena kena irairai totoka ka bulabula. Erau se gonelalai sara na luvena tale e rua! Oti e vica na miniti na neirau veitalanoa, sa qai wasea vei au o koya ni dei tu na yalona baleta ni o ira na lewe ni iSoqosoqo ni Veivukei era sa yalataka me ra na dau mai vukei koya me rauta ni vica na siga mai oqo. E vakila ni lomani.

Erau dau imatai ni mai sikovi au na noqu dauveisiko ka rau dau kau kakana mai niu sa dau yaco mai vale ena noqu lesu mai na vakasucu vei rau na luvequ, e San José Costa Rica.

E kaya o Peresitedi Boyd K. Packer ni veiqaravi ni iSoqosoqo ni Veivukei e “veivakauqeti ka veivakavoui ki na marama yadua,” ka sa vakasalataki keda yadua, me da dau “vakaliuca na veiqaravi ena iSoqosoqo ni Veivukei ka me ra qai muri na veisoqosoqo tale eso ka tautauvata kaya.”⁴

Na veisiko e dau vukea vakalevu na sasaga ni veimaroroi kei na veivakabulabulataki. E dua na goneyalewa dawai a tukuna mai vakaoqo:

“Na gauna au wilika tiko kina na nodratou iTukutuku na Mataveiliutaki Taumada ena Ensign, e vakalesuya mai vei au na vakasama ni noqu itavi vaka-dauveisiko. Keirau veitokani vinaka sara kei noqu ilawalawa ni dauveisiko, ia e dau veicalati voli ga na neirau gauna galala me keirau veisiko kina. Ena mataka o ya au nanuma meu sa qiriti ira ga na taci keirau, vakatura e dua na gauna, ka nuitaka ni na veiriti kei na nona ituvatuva o noqu itokani. Ia e leqa ni a sega ni rawa vua me lako. Au kerea e vica na noqu lewe ni rumu vata me ratou tomani au ena veisiko oqori, ia e sega sara ni dua e galala. Me vaka niu sa kila tiko ni sega ni dodonu meu cakava duadua na noqu veisiko, au sa nanuma meu sa qiri ka vakadaroya na veisiko, ia sa guta na yaloqu ni vinaka cake meu sa lako ga ki veisiko vakataki au, ka ca me na sivi tale e dua na vula ka sega ni dua na veitaratara kei ira na taci keirau.

“Au yaco yani ki na vale nei Alejandra ka vaka meu sautaninini ena noqu sa toro voleka yani ki katuba, baleta niu sega ni kila seu na kilai koya se sega. E a vosa vinaka sara yani o koya ena talevoni kau kila ni o koya e dua na marama kau sa na rairai sotava oti e valenilotu. E a kidavaki au mai o Alejandra ena matadredredre ka mokoti au. Au raica e dua na mata vou! Ena neirau veitalanoa tiko, sa vakaraitaka sara o Alejandra ni sa lomana voli me sa na lesu tale mai ki lotu ka sa dau nuitaka voli ena vica na vula sa oti me dua mada ga me bau laki sikovi koya. E tukuna ni oqo na imatai ni gauna me bau dua na dauveisiko e laki sikovi koya yani. Keirau veiwaseitaka e vica na ivakavuvuli ni kosipeli vakakina na ka keirau kila me baleta na iVaqa ni Veisiko ni vula o ya. Sa qai vakadeitaka ni sa na lako yani ki lotu ena macawa o ya. E mani vaka dina kina, ni a vakayacora sara (ka kauta tale tikoga mai na nona itau cauravou)!

“Mai na gauna o ya, keirau sa veitokani vinaka sara kina kei Alejandra. Au sa sega ni nona dauveisiko ena gauna oqo, ia keirau se dau veigadivi voli ga ena veivula. Sa mai lotu sara tiko o Alejandra ka dau tiko ena lotu vakamatavuvale ka sa kalasi tale tikoga ena inisitute.

“Sa qai tiko qo vei au e dua na ivakadinadina e qaqaco cake ka sega vei au e liu me baleta na veisiko. Au vakavinavinaka ena veivakauqeti ni Yalo Tabu kei na Nona veivakauqeti qaseqase me rawa kina ni liutaki au vua e dua na itokani vinaka ka dauloloma vakataki Alejandra. Keirau vakaukauwataki ruarua ena ka e yaco oqo, ka keirau gadreva ruarua tiko me baleta na neirau itosotoso vakayalo.”⁵

Ni dua na ivakatawa e kauwai, ena rawa ni ra na vakalesui mai o ira era sa tekivu lakosese. Ena rawa ni ra vakatudaliga mai ki na dua na veisureti me ra lesu mai ki na nodra lomanibai.

Ena Moronai 6:4 eda sa vakasalataki kina me da dau nanumi ira ka dau vakani ira o ira era sa papitaiso mai ki na Lotu i Karisito.

Na itukutuku ni kosipeli ni veivula eda dau laki wasea ena gauna ni veisiko e dau tara cake na vakabauta kei na ivakadinadina. Erau na vakavukui ruarua o koya e solia kei koya e ciqoma ni rau sa veiwaseitaka na ivakavuvuli erau vulica mai na ivolanikalou, kei na nodra ivakavuvuli na noda parofita.

E dua tale na veivakalougatataki, sai koya na nodrau veidredreti kei na veitokani na rua na marama erau ilawalawa vata ena veitalai oqo. Eda vuli mai vei koya ka dua, eda dau veilomani, ka da veiqaravi vata.

E rawa ka dodonu me da solia na veivukei e vakaibalebale cake vakalevu. E dui tu ena noda bula na veinanuma va-kosipeli. E tiko vei keda na veivakauqeti vakalou ka dau veivakayarayarataki me da caka vinaka. Me da sa vakadeitaka ka vakavouya na veisiko. E rawa ni da solia na veivakani vakayago kei na vakayalo. E rawa vei keda ka dodonu me da veikilai vakavinaka ka rawa me da vakavulica na ivunau. E rawa ni da vakaceguya na viakana vakayalo ka vakania na sipi. Na vakani ni sipi e rawa ni kena ibalebale na nodra vakaukauwataki ka vakavulici na lewenilotu vou, ko ira era sa luluqa tu, se ko ira sara mada ga na lewenilotu era kaukauwa vinaka tu ena lotu.

Na noda veiqaravi e dodonu me soli bula, caka lo, ka qaravi ena yalodina, ka me sinai e yaloda na lomana na Kalou kei ira na luvena. Me ka ni yalo na nodra vakasokumuni ira vata na qele ni sipi na ivakatawa ni sipi, ena nodra tuberi ira vei Karisito.

Sa noqu masu ni da na yalataka me da tosoya cake na noda dinata na kena dodo yani na liga ni loloma kei na veivukei me da ia na veivakalougatataki, veivukei, veivakaukauwataki vakaikeda ena noda lako voli ka veisikovi ena yalololoma kei na yalo ni vakavinavinaka. Ena yaca i Jisu Karisito, emeni