Vaqaqacotaka na iTikotiko kei na Matavuvale
Sa nuitaki iko tiko na Turaga mo veivuke ena kena laki bula vakalou na nomu matavuvale tawamudu.
Ena vei-Sigatabu yadua, tekivu mai Mongolia ki Manchester ka yaco ki Mississippi, era cavuqaqataka na goneyalewa ena Lotu na malanivosa veivakauqeti oqo: “Keimami na vakavakarau ki na kena vaqaqacotaki na itikotiko kei na matavuvale, vakayacora ka maroroya na veiyalayalati tabu, ciqoma na cakacakatabu vakalotu ni valetabu, ka marautaka na veivakalougatataki ni bula vakalou” (iKau ni Goneyalewa,” Na Torocake Yadudua ni Goneyalewa [ivola taba, 2001], 5).
Me vaka ga ni oqo na ikau ni Goneyalewa, sa nodra talega na itabagone taucoko ena Lotu. Au vakabauta au rawa ni vukei kemuni, na taciqu kei na ganequ gone, mo ni kila vakavinaka na mana ni nomuni cakacaka vakayadua ena kena vaqaqacotaki na nomuni itikotiko kei na matavuvale, se cava ga na draki ni nomuni bula. Au kila tu, me vaka, ni vuqa vei kemuni ko ni lewe ni Lotu duadua ga ena nomuni matavuvale.
Na Me iSakisaki ni iTabagone e vakavotuya vei keda ni “sa dua na veivakalougatataki levu na lewena e dua na matavuvale… . E sega ni ra tautauvata na matavuvale kece, ia era bibi kecega ena yavu ni Tamada Vakalomalagi” ([ivola lobi,2001], 10).
Sa gadrevi me ra vaqaqacotaki na veimatavuvale kecega, mai na kena e vinaka ki na kena e vakaleqai vakalevu duadua. Sa rawa sara ga mo veivaqaqacotaki o iko. Na kena dina, ni so na matavuvale sai iko sara beka ga na ivurevure duadua ni kaukauwa vakayalo. Sa nuitaki iko tu na Turaga mo na kauta mai na veivakalougatataki ni kosipeli ki na nomu matavuvale.
Sa ka bibi dina me tauyavutaki e dua na bula vakaivakarau ni ivalavala dodonu ki na nomu bula vakaiko, ka me rawa kina vei iko mo ivakaraitaki vinaka ki na nomu matavuvale, se cava ga na draki ena curuma yani na nomu matavuvale.
Na ivakaraitaki ni nomu bula savasava ena vaqaqacotaka na nomu matavuvale. E a vakaraitaka o Peresitedi Hinckley kivei ira na goneyalewa “e dua na parokaramu e va na kena ituvatuva” ena Soqoni Raraba ni Goneyalewa ena vulaitubutubu sa oti ka na sega walega ni “vakadeitaka mo marau” ia ena vakalougatataka talega na nomu matavuvale. Sa vakasalataki keda yadudua o koya me da: “(1) masu, (2) vuli, (3) sauma na nomu ikatini, kei na (4) tiko ena soqoni ni lotu” (“Me savasava Tikoga na Nomu Vakanananu,” Liaona, Me 2007, 115).
Na vakasaqarai ni veivuke ni Turaga ena veisiga ena masumasu ena kauta mai na veivakalougatataki cecere ki na nomuni matavuvale. Tarogi iko mada: “O cei beka ena noqu matavuvale ena vakalougatataki mai na noqu masu?” “Na cava beka meu na cakava meu cuqena ka vakayaloqaqataka me vakayacori na masu vakamatavuvale?”
Ni ko vulica vakaiko na ivolanikalou, ko na yaco mo kila na iVakabula kei na Nona ivakavuvuli. Mai na Nona ivakaraitaki ko na kila na ivakarau ni loloma, veiqaravi, ka vosoti ira na lewe ni nomu matavuvale. Tovolea mada na sala mo na wasea kina vei iratou na nomu matavuvale na nomu kila na ivolanikalou.
Ena vuqa na gauna, sa dau vakasalataki keda o Peresitedi Hinckley mo “vuli ena kena levu taucoko o rawata”(Liaona, Me 2007, 116). Na nomu vuli ka ena yaga dina vei iratou na nomu matavuvale ena gauna oqo ka na vakalougatataka talega na nomu matavuvale mai muri. Na cava beka ko na rawa ni cakava ena gauna oqo mo vakarautaki iko mo rawata kina na nomu vuli vinaka?
E a vakavulici keda o Peresitedi Hinckley, “Ni da sauma tiko na ikatini ena ilavo, sa ka bibi cake me da sauma tiko ena vakabauta”(Liaona, Me, 117). Ko sa vakalougatataki tiko li ena nomu sauma na nomu ikatini—ena vakabauta? Ena nomu muria tiko na ivakaro oqo, na Turaga ena “dolava … na katuba ni lomalagi” (Malakai 3:10) me na vakalougatataki iko kei na nomu matavuvale.
Ena rawa vakacava ena nomu dau tiko ena soqoni eso—vakabibi na soqoni ni sakaramede—me na vakalougatataki iko kei na nomu matavuvale? Na nomu dau vakaivotavota ena sakaramede ena veigauna ena vukei iko mo maroroya kina na nomu veiyalayalati ni papitaiso. Ni ko bula kilikili tiko ka vakavouya na veiyalayalati oqo ena veimacawa, sa na dodonu kina mo dusimaki mai vua na Yalotabu. Ena dusimaki iko na Yalo Tabu ka vakavulici iko ena veika mo cakava mo vakalougatataka kina na nomu matavuvale.
Ni ko yalodina ki na ivakarau ni bula dodonu oqo, ko na vakalougatataki ena nomu bula taucoko ka tauyavutaka kina na yavu ni bula vakayalo ko na vaqaqacotaka kina na nomu matavuvale ena nomu ivakaraitaki. Ena 1 Timoci, a veivakavulici o Paula ena ivakaraitaki: “Me kakua ni beci iko e dua ni ko sa cauravou; ia mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalo savasava” (1 Timoci 4:12).
Na iwasewase ni Matavuvale Me iSakisaki ni iTabagone e vakaraitaka eso na sala cecere mo yaco kina “mo nodra ivakarau era sa vakabauta” ena nomuni dui matavuvale:
“Dau matamamarau, veivukei, ka dau nanumi ira na tani… . Dau kauwaitaka na nodra leqa na so tale na lewe ni matavuvale… .
“Dokai rau na nomu itubutubu ena veivakarokorokotaki veilomani kei na talairawarawa… . Vakaitavitaki iko ena veitavi vakamatavuvale, me vaka na masumasu, lotu vakamatavuvale, kei na wili ivolanikalou vakamatavuvale. Na veika oqo e vakadeitaka ka vakaduavatataka na matavuvale… .
“Vaqaqacotaka na nomu veimaliwai kei ira na tacimu kei na ganemu. O ira e rawa ni ra nomu itokani voleka duadua” (10–11).
Na ivakaraitaki e qasenivuli vinaka duadua. O cei beka ena nomu matavuvale era na kalougata mai na nomu ivakaraitaki—o tacimu beka, o ganemu, o tinamu se o tamamu?
Meu tukuna mada e dua na ka au a sotava ena noqu bula kei na kena sa mai vakalougatataki tawamudu kina na neitou matavuvale ena vuku ni ivakarau ni bula savasava nei taciqu.
Keirau a sucu kei na taciqu mai na dua na itubutubu “erau sa rui vinaka” (1 Nifai 1:1) ka rau dau loloma ka solibula vakalevu ena vukui keirau, ia e se bera ni vakalougatataki na neitou matavuvale ena cakacakatabu vakalotu ni valetabu.
Ena vuqa na yabaki sa oti ena dua na siga ni mua ni vula o Tiseba, keitou a taura kina e dua na ivola mai vei taciqu a kaulotu tiko ena Tabana ni Kaulotu ena Vualiku kei California. E daku ni ivola oqo e vakasalataka tiko: “Kakua ni dolava me yacova ni dou sa tiko kece!!”
Ena neitou sa dolava vata kei tamaqu kei tinaqu na nona ivola ka vitu na draunipepa e taipataki tu mai, keitou wilika kina na nona ivakadinadina ni masu. A vakavulica vei keitou na vunau mai na ivolanikalou me baleta na matavuvale tawamudu. Keitou a wilika kina na veika sa sotava rawa me baleta na veivuke ni lolo kei na masumasu vei ira na nona dauvakatataro me ra vakarautaki ki na nodra ciqoma na cakacakatabu vakalotu ni papitaiso. A vakadeitaka vei keitou ni sa rawa talega me vakalougatataki na neitou matavuvale ena lolo kei na masumasu. Keitou sa qai bolei ena ka oqo: “Ena vica na vula sa oti a vosa na bisopi mai na Tabanalevu o Stanford ena dua na iulutaga e veivakayavalati sara ga… . Na vosa nei bisopi a vakavuna meu tu ka raica rawa na inakinaki au gadreva meu rawata rawa ena bula oqo. E bibi tiko ki na noqu vakasama na inakinaki au gadreva meu rawata kei na noqu matavuvale vakataki au … o ya meu vauci vei kemudrau, o Na kei Ta, ena bula oqo kei na veigauna tawamudu ena Vale ni Turaga. Au lomani kemudou vakalevu sara kau vinakata na nodatou matavuvale me laki duavata ki na veigauna tawamudu.”
E a qai tinia vakaoqo: “Me na dusimaki kemudou na Turaga ena vakatulewa bibi oqo ka sa noqu masu mo dou dau masu vata tiko vakamatavuvale.”
Me vaka e dua na itabagone, au a dau masulaka talega me yaco mai ki na noqu matavuvale na kalougata oqo. Sa kauta mai na ivola oqo na inuinui ni noqu gagadre dodonu.
Ena yabaki vou sa yaco mai na gauna ki na noqu matavuvale me sa veisautaki na veika eso. Ena vuqa na veivula ka tarava, keitou a tauyavutaka na ivakarau ni bula dodonu vakamatavuvale. Keitou sa daumasu vata, vulica na veika ni cakacakatabu vakalotu ni valetabu, saumi ikatini, ka tiko ena neitou soqoni ni lotu—vakamatavuvale. Ni oti toka ga vakalailai na nona sa lesu mai o taciqu mai na kaulotu, keitou sa vakavakarau sara me keitou laki ciqoma na cakacakatabu vakalotu ni valetabu. Au sa kila kina ni sa rogoca na Turaga na masu nei taciqu kei na noqu masu ena neitou sa laki tekiduru wavokita na icabocabo ni soro ena loma ni valetabu ka vauci kina vakamatavuvale ena bula oqo kei na veigauna tawamudu.
E rawa beka mo na veisautaka na nomu matavuvale? Io, e rawa! Au dau vakasamataka na cava beka ena rawa ni yaco ki na torocake tawamudu ni noqu matavuvale kevaka e a sega ni vola mai o taciqu na ivola qaqa o ya. E a veisautaka na neitou bula na ivakarau ni nona bula dodonu kei na nona ivakaraitaki.
E kaya vakaoqo o Elder Robert D. Hales: “Kevaka e sega ni vinaka na nodra ivakaraitaki vei keda na noda itubutubu, sa noda itavi me da tagutuva laivi na ivakarau ni itovo o ya… . Sa rawa ki na tamata yadua me vulica e dua na sala e vinaka cake kei na nona vakayacora sara ena vakalougatataka kina na nona lewe ni matavuvale ena gauna oqo ka vakavulica na veivakavuvuli e dodonu me ra na muria o ira na kawa era na muri mai” (Robert D. Hales, “How Will Our Children Remember Us?” Ensign, Nov. 1993, 10.)
Me nanumi tiko, ni “Matavuvale sa iusutu ni Nona yavu na Dauniveibuli me baleta na nodra rawata na bula tawamudu o ira na luvena” (Na Matavuvale: Ai Vakaro ki Vuravura Raraba”, Liaona, Okot. 2004, 49). Na matavuvale tawamudu era umani kina na tamata yadua. “Vakayacora na nomu itavi me tauyavutaki kina e dua na vuvale bula marau” (Me iSakisaki ni iTabagone, 10). Tauyavutaka na ivakarau ni bula dodonu ena nomu bula. Ka mo ivakaraitaki vei ira sa vakabauta. Sa nuitaki iko tiko na Turaga mo veivuke ena kena laki bula vakalou na nomu matavuvale tawamudu.
Au kila ni bula tiko o Jisu Karisito. E kilai iko ka lomani iko. E sa vakalougatataka o Koya na noqu matavuvale kau kila ena vakalougatataki iko kei na nomu matavuvale. Sa noqu ivakadinadina malumalumu oqo, ena yaca i Jisu Karisito, emeni.