Na Liga Savasava kei na Yalo sa Savasava

Elder David A. Bednar

Ena Kuoramu ni iApositolo Le Tinikarua

Na noda inaki vakayalo sai koya me da vorata rawa na ivalavala ca vata kei na gadreva na ivalavala ca, o ya na ivalavala ca lalai kei na ivalavala ca lelevu.

Au dau nanuma lesu niu se gone ni dau wilika vei au o tinaqu na italanoa eso mai na iVola i Momani. E dau maqosa sara o koya me talanoataka me vaka sara ga niu raica dina tiko ena noqu vakasama vakagone, kau sega ni vakabekataka ni kila tiko o tinaqu ni sa dina sara na itukutuku tabu o ya. Au dau nanuma tikoga na nona dau vakamacalataka na nona a rairai na iVakabula ena vanua o Amerika ni oti na Nona Tucaketale kei na Nona ivakavuvuli a solia vei ira na lewe ni vanua o Sautu. Mai na nona dau tudei tikoga ena nona ivakaraitaki vinaka kei na ivakadinadina, e a vakacaudreva kina o tinaqu na imatai ni bukawaqa ni noqu vakabauta na iVakabula kei na Nona Lotu edaidai. A yaco meu kila ga vakaiau na dina ni iVola i Momani ni sa dua tale na ivakadinadina kei Jisu Karisito ka sa umani tu kina na taucoko ni Nona kosipeli tawamudu (raica V&V 27:5).

Edaidai au gadreva meu na taleva vata kei kemuni e dua vei ira na itukutuku au dau taleitaka mai na iVola i Momani, o ya na Nona a rairai na iVakabula ki na Vuravura Vou, ka me da veivosakitaka na Nona ivakasala vei ira na lewevuqa e kea me baleta na kaukauwa veivakasavasavataki ni Yalo Tabu. Au sa masulaka me noqu ka nomuni vakakina na veidusimaki ni Yalotabu.

Na Nona Cakacaka na iVakabula ena Vuravura Vou

Ena loma ni tolu na siga a cakacaka tiko kina na Turaga ena Vuravura Vou, a vakavulica kina o Koya na Nona ivakavuvuli, a solia na veivakadonui vei iratou na Nona tisaipeli me ratou vakayacora na veicakacakatabu vakalotu vakamatabete, e a vakabulai ira na tauvimate, masulaki ira na tamata, ka vosa vakalougatataki ira na gone ena loloma. Ena gauna sa voleka ni cava kina na nona gauna na iVakabula me tiko vata kina kei ira na tamata, e a vakamatatataka tale vakavinaka o Koya na ivakavuvuli bibi ni Nona kosipeli.

A kaya o Koya, “Ia oqo na noqu ivakaro: Dou veivutuni, koi kemudou kecega na kai vuravura, Dou lako mai vei au ka papitaisotaki ena yacaqu, io mo dou vakasavasavataki e na isolisoli ni Yalo Tabu, mo dou savasava kina e mataqu ena siga mai muri” (3 Nifai 27:20).

Na veivakavuvuli vinaka e vakavulica na iVakavuvuli ena ivolanikalou oqo sa ka bibi dina sara kivei keda me da kila vakavinaka ka bulataka ki na noda dui bula. Na imatai o ya na veivutuni, “na saumaki ni yalo kei na gagadre ki vua na Kalou, kei na kena biu laivi na ivalavala ca” (Bible Dictionary, “Repentance,” 760). Ni da dau vakasaqara ka ciqoma na isolisoli vakayalo ni vakabauta na Dauveivueti, eda na gole ga ka vakararavi ki na veika e dodonu, o ya na loloma veivueti, kei na loloma vakalou ni Mesaia Tabu (raica 2 Nifai 2:8). Na veivutuni sai koya na vua kamikamica e lako mai na vakabauta na iVakabula ka oka kina na gole yani vua na Kalou kei na vuki tani mai na ivalavala ca.

E tarava na Nona vakamacalataka na Turaga sa tucaketale na bibi ni noda lako yani Vua. O ira na lewe vuqa era a soqoni yani ki na valetabu era a sureti “yadua” me ra lako yani vua na iVakabula (3 Nifai 11:15) me ra laki tara na we ni vako ena ligana kei na yavana na iVakavuvuli ka me ra daramaka na ligadra ki na sarisarina. O ira yadua na tamata era a vakayacora na ka oqo e ra “sa vakadinata ni sai Koya dina oqo” (t. 15), o Jisu Karisito, sa lako mai.

E vakavulici ira talega na tamata na iVakabula me ra lako mai Vua ena veiyalayalati tabu, ka vakadeitaka tale kivei ira ni sai ira “na gone ni veiyalayalati” (3 Nifai 20:26). E vakamatatataka o Koya na bibi tawamudu ni cakacakatabu vakalotu ni papitaiso (raica 3 Nifai 11:19–39) kei na kena ciqomi na Yalo Tabu (raica 3 Nifai 11:35–36; 12:6; 18:36–38). Ena ituvatuva vata ga oqori, eda sa vakamasuti me da gole yani ka vuli mai vua na Karisito ka lako mai Vua ena veiyalayalati kei na cakacakatabu vakalotu ni Nona kosipeli vakalesuimai. Ni da vakayacora oqo, ena yaco me da laki kilai Koya sara (raica Joni 17:3), “ena gauna sa lewa ko koya, io ena sala sa kilikili vua, me vakayacori kina na nona lewa” (V&V 88:68), me vaka era a vakayacora o ira na lewe ni vanua o Sautu.

Na veivutuni kei na noda lako yani vua na Karisito ena veiyalayalati kei na cakacakatabu vakalotu ni veivakabulai sa gadrevi dina ka sa vakavakarau tiko ni noda vakasavasavataki mai na kena ciqomi na Yalo Tabu ka savasava ena mata ni Kalou ena iotioti ni gauna. Au gadreva ena gauna oqo me da vakanamata mada ki na veivakauqeti veivakasavasavataki ni Yalo Tabu ki na noda bula.

Na Noda iLakolako Vakayalo

Na katuba ni papitaiso e veimuataki yani ki na salatu sa rabalailai ka qiqo kei na gauna donu ni kena biu laivi na itovo vakayago ka yaco me da tamata yalo savasava ena Veisorovaki nei Karisito na Turaga (raica Mosaia 3:19). Na inaki ni noda bula vakatamata oqo e sega ni mai malele na yaloda ki na totoka kei vuravura se mai vakatabakidua wale tu ga na noda gauna ena veika ga e baleti keda, ia sai koya me da sa “ivalavala vakatalega kina ena bula vou” (Roma 6:4), me yaco me da savasava ka solia na yaloda ki vua na Kalou (raica Ilamani 3:35), ka me tu vei keda “na loma i Karisito” (1 Korinica 2:16).

Eda sa vakaroti ka vakasalataki me da mai bula eke me rawa kina ni veisautaki na keda ituvaki lutu ena kaukauwa veivakasavasavataki ni Yalo Tabu. E vakavulica o Peresitedi Marion G. Romney ni veipapitaisotaki ena bukawaqa ni Yalo Tabu ena “vakavoui [keda] mai na itovo vakayago ki na itovo vakayalo. Ena vakavouya, vakabula, ka vakasavasavataka na yalo ni tamata… . Na vakabauta na Turaga o Jisu Karisito, na veivutuni, kei na veipapitaisotaki ena wai era sa itekitekivu ka gadrevi taumada ki na ka oqo, ia [na veipapitaisotaki ena bukawaqa] sai koya ga na kena vakataucokotaki. Na kena ciqomi [na veipapitaisotaki ena bukawaqa oqo] sa gadrevi kina na vakasavasavataki ni nona bula e dua na tamata ena dra veisorovaki nei Jisu Karisito” (Learning for the Eternities, comp. George J. Romney [1977], 133; raica talega 3 Nifai 27:19–20).

Sa yaco kina, me da sa sucu vou ka gumatua tiko me tikoga vata kei keda na Nona Yalotabu, ka vakasavasavataki ka vakavinakataki sara na yaloda mai vua na Yalo Tabu me vaka ena bukawaqa (raica 2 Nifai 31:13–14, 17). Me yacova, ni da savasava tu ena mata ni Kalou.

Na kosipeli i Jisu Karisito e sega walega ni da drotani, valuta rawa, ka vakasavasavataki mai na ivalavala ca kei na veivakayarayataki ca ni noda bula; sa ka bibi talega na noda caka vinaka tiko, yalo vinaka, ka me da uasivi sara. Na veivutunitaki ni ivalavala ca kei na veivosoti sa ka bibi vakayalo, ka sa gadrevi me da vakayacora tikoga. Ia na veivakabokoci ni ivalavala ca e sega ni inaki duadua ga se cecere ni kosipeli. Na kena gadrevi me veisautaki na yaloda mai vua na Yalo Tabu sai koya ni da sa “ biuta tani na gagadre ca, ka via kitaka tikoga na ivalavala dodonu” (Mosaia 5:2), me vaka era a cakava na tamata nei Penijamini na Tui, sai koya na ilesilesi ni veiyalayalati eda sa ciqoma. Na veisau cecere oqo e sega walega ni vu mai na noda cakacaka vagumatua se torocake ni noda bula vakaivakarau vakatamata yadua. Ia sai koya ga na veisau ni gagadre ni yaloda, na noda inakinaki, kei na keda ituvaki e a rawa ga mai na Veisorovaki i Jisu Karisito na Turaga. Na noda inaki vakayalo sai koya me da vorata rawa na ivalavala ca vata kei na gadreva na ivalavala ca, o ya na ivalavala ca lalai kei na ivalavala ca lelevu.

Era sa veivakasalataki tiko mai na parofita ena veigauna ena kena gadrevi me da (1) drotani ka vorata rawa na veika ca kei na (2) noda caka vinaka tiko ka me da tamata vinaka sara. Me da vakananuma mada na taro veilauti nei koya na Daunisame:

“Ko cei ena cabe cake ena ulunivanua i Jiova? se ko cei ena tu ena nona yasana tabu?

“O koya sa liga savasava, ka sa yalo savasava; o koya sa sega ni vagolea cake na yalona ki na ka walega, ka sa sega ni bubului vakailasu” (Same 24:3–4).

Kemuni na taciqu kei na ganequ, sa ka rawarawa vei keda me savasava tiko na ligada ia sa dredre ni savasava na yaloda. Me da nanuma tiko ni liga savasava kei na yalo savasava sa gadrevi ruarua me cabe cake ki na ulunivanua nei Jiova ka tu ena Nona vanua tabu.

Meu vakatura mada eke ni kena vakasavasavataki na liga e rawa ga ena kena biu laivi na itovo vakayago ka vorati rawa na ivalavala ca kei na veivakayarayarataki ca ni noda bula ena Veisorovaki ni iVakabula. Ena savasava na yaloda ni da ciqoma na Nona kaukauwa veivaqaqacotaki me da caka vinaka ka, se cava ga na kena iwalewale, ena sega ni rawa ni savasava kina na liga ka savasava na yalo. E rawa ga ena Veisorovaki nei Jisu Karisito e vakarautaka na kaukauwa veivakasavasavataki ka veivueti ena vukei keda me da vorata rawa kina na ivalavala ca kei na kaukauwa veivakatabui ka veivaqaqacotaki ena vukei keda me da tamata uasivi cake sara mai na kena eda saga voli mai ena noda kaukauwa ga. Na Veisorovaki tawamudu sa baleta na tamata ivalavala ca kei koya e ivalavala dodonu tiko.

Ena iVola i Momani, eda wilika kina na ivakavuvuli cecere nei Penijamini na Tui me baleta tiko na cakacaka kei na Veisorovaki nei Jisu Karisito. Ena vuku ni matata ni ivakavuvuli a vakavulica o koya era a bale vakatobuicu ki na qele o ira na tamata,“ni ra sa rerevaka na Turaga. Era sa kila vakai ira na nodra malumalumu vakayago, ni ra sa uasivi sobu mai na kuvu ni soso. Era sa kaci ka vaka: Mo ni lomani keimami mai, ka laiva me bokoci na neimami ivalavala ca, ka vakasavasavataki na yaloi keimami; ena dra ni isoro i Karisito, na Luve ni Kalou, o koya sa bulia na lomalagi kei na vuravura, kei na ka kecega, ka na lako sobu mai vei ira na luve ni tamata” (Mosaia 4:2; vakamatatataki).

Eda wilika tale ena tikina oqo na veivakalougatataki e rua ena vosoti ni ivalavala ca, na savasava ni liga, kei na vakavoui ni keda ituvaki, sa vakaraitaka tiko na yalo sa savasava.

Ena nona tinia o Penijamini na Tui na nona vosa, a tokaruataka kina o koya na bibi ni rua na ituvatuva taumada oqo ni torocake vakayalo.

“Ia au na lesuva tale na veika au sa tukuna oti vei kemuni—me rawa ni bokoci na nomuni ivalavala ca ena veisiga, ka mo ni dodonu kina ena mata ni Kalou—Au sa kaya tale vei kemuni mo ni vakacegui ira na dravudravua” (Mosaia 4:26; vakamatatataki).

Sa qai noda gagadre dina o ya me savasava na ligada ka savasava na yaloda—me bokoci kina na noda ivalavala ca ena veisiga ka dodonu kina ena mata ni Kalou. Ena sega soti ni yaga na ligada sa savasava ni da tu ena mata ni Kalou ni sa savasava sara o Koya, ka sai Koya na “lami sa sega ni ca e dua na tikina” (1 Pita 1:19), ka solia wale vei keda na Nona dra talei.

Vosa ena Vosa

Eso era na rogoca se wilika na itukutuku oqo era na nanuma beka ni ra na sega ni rawata rawa ena nodra bula na tubu vakayalo au vakamacalataka tiko oqo. Eda na vakabauta beka ni yaco ga na veika oqo kivei ira na tamata tale eso ka sega kivei keda.

Eda na sega ni rawata rawa e dua na ivakatagedegede ni bula savasava cecere ena bula oqo, ia me da gumatua ga ki liu ena noda vakabauta tiko na Karisito ena sala sa rabalailai ka qiqo ka mua yani ki liu ki na noda icavacava ni bula tawamudu. Na ituvatuva ni tubu cake vakayalo e solia na Turaga sai koya na “vosa ena vosa, vunau ena vunau, vakalailai eke ka vakalailai mai kea” (2 Nifai 28:30). Na tubu cake vakayalo e lalai, e tudei, ka toso tikoga sai koya na veikalawa sa gadreva vei keda na Turaga me da taurivaka. Na noda kakavaka me da sega ni cala e mata ni Kalou sai koya na imatai ni inaki ni bula oqo kei na kena vakayacori tiko yani ena bula taucoko oqo; e sega ni na yaco mai ena sasaga ni bula vakayalo e veilecayaki wale tu ga.

Au vakadinadinataka ni sa vakaukauwataki keda ka vukei keda tiko na iVakabula me da gugumatua tikoga ka toso tikoga ki liu. Na ivakaraitaki ka tiko ena iVola i Momani me baleti ira “era sa lewe vuqa sara” (Alama 13:12) ena Lotu taumada era sa yalo savasava ka sega ni cala ena mata ni Kalou sa ivurevure ni noqu kaukauwa kei na vakacegu. Au vakabauta ni o ira na lewenilotu ena Lotu taumada o ya era vakataki keda tu ga, na tagane kei na yalewa oqo. O ira yadua na tamata oqo era sa sega ni taleitaka na ivalavala ca ka ra vakasisilataka, ka sa yaco me ra “vakasavasavataki ka curu ki na nona ivakavakacegu na Turaga na nodra Kalou” (t. 12). Na ivakavuvuli kei na ituvatuva oqo ni tubu cake vakayalo sa yaco talega kivei keda kece sara ka na yaco tikoga.

Na iTinitini ni Veisureti nei Moronai

Na kena gadrevi me kau laivi na itovo vakayago ka yaco me da tamata yalododonu, na noda drotani ka vorata rawa na itovo ca ka yaco me da tamata vinaka, me savasava tiko na ligada ka savasava na yaloda, sai koya e dua na iulutaga e cavuti tiko vakawasoma ena iVola i Momani. Io, na itinitini ni nona veisureti o Moronai ena iotioti ni ivola sai koya na iusutu ni iulutaga oqo.

“Io dou lako vei Karisito, ka biuta tani na ivalavala sa sega ni vakalotu, mo dou vinaka kina, ia kevaka dou sa biuta tani na ivalavala sa sega ni vakalotu, ka lomana na Kalou ena lomamudou taucoko, kei na yalomudou taucoko, kei na nomudou igu taucoko, sa na qai rauti kemudou na nona loloma, ia na nona loloma dou sa vinaka kina ena vuku i Karisito… .

“Ia kevaka dou sa vinaka ena loloma ni Kalou ena vuku i Karisito, ka sega ni cakitaka na nona kaukauwa, dou sa qai vakatabui ena loloma ni Kalou mo dou nei Karisito, ia sa dave na dra i Karisito, me vaka na veiyalayalati i Tamada me bokoci kina na nomudou ivalavala ca, ka mo dou savasava sara” (Moronai 10:32–33; vakamatatataki).

Sa gadrevi kina vei iko kei au me daru veivutuni mai na vu ni yalodaru ka lako yani vei Karisito ena yalodina. Sa noqu masu ni da na saga ena vuku ni Veisorovaki ni Turaga me savasava kina na ligada kei na yaloda, me yaco me da tamata vakalou, sa sega na noda cala. Au vakadinadinataka ni ko Jisu Karisito sa Noda iVakabula ka sa Luvena na Tamada Tawamudu. Sai Koya sa sega ni cala ka sa vueti keda mai na noda ivalavala ca ka sa vaqaqacotaki keda me da ivalavala vinaka ka uasivi sara. Sa noqu ivakadinadina ena yaca tabu i Jisu Karisito, emeni.