Noda Kila Ni Da Sa Kila Tiko
Na nodra ivakadinadina na tani ena rawa beka me vakauqeta ka susuga cake na vakabauta kei na ivakadinadina, ia ena yaco ga mai na gauna ki na tamata yadua me na kila ga vakaikoya.
Ena vica na yabaki sa oti a beitaki e dua na tamata ena dua na cala bibi. Eratou a solia mai na tabana ni veibeitaki e tolu na tamata me ivakadinadina, ka ratou a raici koya yadua ni a cakava na cala o ya. Eratou a qai solia mai na loya nei koya ka beitaki tiko, e tolu na tamata ka sega ni ratou raica na vakayacori ni cala me nodratou ivakadinadina. Era sa mai veilecayaki tu yani o ira na daunivakatulewa. Ni ra sa mai tautauvata tu na iwiliwili ni ivakadinadina, sa tautauvata kina vei iratou na daunivakatulewa na levu ni ivakadinadina vua kei na kena ka saqati ko ya. E a talaci kina na turaga o ya. E sega kina ni a gadrevi, e milioni na tamata era sega ni a raica na vakayacori ni cala o ya. E a gadrevi kina e dua ga na ivakadinadina.
Ena cakacaka cecere ni ituvatuva ni kosipeli sa na gadrevi kina e dua ga na ivakadinadina, ia me sai iko sara ga na ivakadinadina o ya. Na nodra ivakadinadina na tani ena rawa beka me vakauqeta ka susuga cake na vakabauta kei na ivakadinadina, ia ena yaco ga mai na gauna ki na tamata yadua me na kila ga vakaikoya. E sega ni rawa vua e dua me na vakararavi tikoga ki na nona cina e dua tani tale na tamata.
E sega ni qai mai dina cake ga edaidai na kosipeli vakalesuimai ia mai na gauna ga a lesu duadua mai kina na gonetagane mai na Veikau Tabu ena 1820. Na dina ena sega vakadua ni vakatau ki na iwiliwili ni tamata era vakabauta. Ena gauna a biuta mai kina o Josefa na veikau e a dua walega na tamata e vuravura e sa kila na dina me baleta na Kalou na Tamada kei na Luvena o Jisu Karisito. Sa qai dodonu sara, kivua na tamata yadua me na kila ga vakaikoya ka kauta vata yani kei koya na ivakadinadina qaqa oqo ki na bula e tarava.
Ena gauna sa vakatikori kina o Herber J. Grant yabaki 23 me peresitedi ni iTeki o Tooele, a cauraka kina o koya kivei ira na Yalododonu ni kila ni sa ka dina na kosipeli. E a qai vakataroga o Peresitedi Joseph F. Smith, e dua na daunivakasala ena Mataveiliutaki Taumada, “Heber, o a kaya ni ko vakabauta na kosipeli ena vu ni yalomu taucoko, ia ko a sega ni tukuna na nomu ivakadinadina ni ko kila ni sa ka dina. E sega beka ni ko kila vakaidina ni dina na kosipeli oqo?”
A sauma mai o Heber “E sega.” E a qai vuki yani o Joseph F. Smith kivei John Taylor, na Peresitedi ni Lotu, ka kaya “Au duavata ena kena vakavinakataki na veika sa yaco ena yakavi nikua mai na veika eda a vakayacora ena mataka edai. Au sega ni vakabauta ni dodonu vua e dua na tamata me na veiliutaki ena dua na iteki ni sega ni kila tu vakaikoya ni sa ka vakalou vakaidina na cakacaka oqo.”
A qai sauma mai o Peresitedi Taylor, “Josefa, Josefa, Josefa, e kila talega o [Heber] na veika o kila tu. Na ka ga e sega tu ni kila o koya ni sa kila tiko.”
Ena loma ga ni vica na macawa e a kidavi rawa na ivakadinadina o ya ka tagi ena marau o cauravou Heber J. Grant ena vuku ni kena sa tadu mai ki na nona bula na ivakadinadina e uasivi sara, veikaroni ka taucoko. 1
Sa dua dina na ka cecere me kilai—na nomu kila ni ko sa kila dina ka sa sega ni vakararavitaki tiko na rarama oqori ki vua e dua tale na tamata.
Ena vica na yabaki sa oti au a laki dabe vakatulewa ena itikotiko liu ni kaulotu e Midwest. Ena dua na siga, au a vosa vata kei na dua na mata dokai ni dua tale na matalotu va-Karisito, kivei ira eso na noda daukaulotu. E a cauraka na turaga vinaka oqo na veika me baleta na tauyavu kei na ivakavuvuli ni nona lotu, ka laki tukuna sara kina na tikina rogolevu: “A loloma walega dou sa vakabulai kina. Sa dodonu sara ki na tagane kei na yalewa yadua me cakacakataka na nona vakabauta na Karisito me rawa ni vakabulai kina.”
E a vakarorogo tale tikoga e kea e dua na daukaulotu vou. E sega sara tu ga ni kila o koya na veika me baleti ira na veilotu tale eso. Sa qai yaco kina me taroga na ka oqo “Ia, e sa qai vakacava saka, na gone lailai e mate ni bera ni qase me kila ka vakaraitaka na nona vakabauta na Karisito?” E a cuva sobu na tamata vuku o ya, rai sobu ki na fuloa, ka kaya: “Ena gadrevi me sega ni wili eso. Ena sega ni oka kina eso. Sa dodonu me tiko na kena sala ia e sega.”
E a raici au mai na daukaulotu o ya, e tonawanawa na matana ka kaya mai “Isa, Peresitedi, sa noda dina tiko na dina, se vavei!”
Na gauna ni kena kidavi na ivakadinadina—ni ko sa kila ni ko sa kila—e kamikamica ka totoka. Na ivakadinadina o ya, kevaka me susugi cake, ko na vakasulumi kina me vaka e dua na kote. Ni da sa raica na rarama, ena caudre wavokiti keda. Na rarama ni kila ena waqa tu e lomada.
Ena dua na gauna keirau a veivosaki kei na dua na cauravou e sega ni lewe ni noda lotu, e dina ga ni dau lakova talega mai na neimami soqoni ni sokalou ena dua na yabaki vakacaca. Au a tarogi koya se cava na vuna e sega kina ni lewena na Lotu. A sauma mai “Baleta niu sega ni kila se dina. Au vakabauta ni rairai dina beka, ia au na sega ga ni rawa meu tu ka tukuna, me vakataki iko, ‘au kila vakaidina ni sa dina sara.’”
Au a qai taroga, “O sa bau wilika li na iVola i Momani?” A qai kaya ni sa wiliwili talega ena ivola o ya.
Au a taroga se a masulaka beka na ivola. A sauma mai “Au sa dau vakaraitaka tiko ena noqu masu.”
Au a tukuna vei noqu itokani ni balavu ga ni gauna e vakawalena tu ga kina na nona wiliwili kei na nona masu, ena sega tikoga ni kila rawa, na veivuravura sa tawayalani. Ia ena gauna ena yalodina ki na nona lolo kei na masumasu kei na vakatakekere, ena yaco me katakata e lomana na dina, ka na kila ni sa kila vakaidina. A sega tale ni vosa vei au, ia a mani tukuna vei watina ena mataka e tarava ni sa na lolo tiko. E a qai papitaiso sara ena Vakarauwai ka tarava.
Kevaka mo na kila ni ko sa kila vakaidina, sa na gadrevi kina na solibula. O iko sara ga vakaiko mo na solibula. E dau vakayacori na veisosomitaki ena veicakacakatabu vakalotu, ia e sega ni vakayacori na ka oqo ena kena rawati e dua na ivakadinadina.
E a tukuna o Alama na nona saumaki mai ena vosa momona oqo: “Au a lolo ka masu ena vica na siga, me vakatakilai kina vei au na veika oqo. Ia au sa kila ni sa ka dina; ni sa vakatakila vei au na Turaga na Kalou” (Alama 5:46).
Ni sa kidavi rawa e dua na ivakadinadina, sa na yaco vei koya sa taukena e dua na yalo qaqa dina me na wasea na nona ivakadinadina kivei ira na tani. Ena gauna sa biuta mai kina o Brigham Young na wai ni papitaiso, a kaya vakaoqo: “E a sobuti au na yalo ni Turaga, kau sa vakila ni sa vaka me yali yani na veisuiqu kevaka au na sega ni vosa vei ira na tamata. Sai koya na isevu ni noqu vunau me dua na auwa vakacaca. Au dolava na gusuqu ka sa vakasinaita na Turaga.”2 Ena sega ni rawa ni waqa na buka, kevaka e sega na yameyame, ena sega ni rawa ni taukeni e dua na ivakadinadina vakavo ga ke tukuni yani.
E muri a kaya kina vakaoqo o Brigham Young baleti Orson Pratt: “Kevaka me na musuki vakamatailalai o Baraca Orson, na veitikina yadua era na kaya mai, ‘Sa dina sara na vakabauta vaka-Momani.’”3 E a vakacerecerei Nifai na luvena vakaturaga o Tamada Liai, ena malanivosa oqo: “Ia sa sega ni vosa ko koya, sa vosa ga na Yalo ni Turaga sa tiko vua, ka sa sega ni rawa vua me tarova” (2 Nifai 1:27).
Na veigauna kei na itavi ni kena wasei na ivakadinadina ena vakayacori taumada ena loma ni dua na matavuvale. Sa dodonu kina me ra nanuma tiko o ira na luveda na rarama mai na matada, na kena voqalesu tiko e daligadra na noda ivakadinadina kei na nodra vakila e lomadra ni da cauraka tiko na noda ivakadinadinataka ni sa rogoca tiko e dua sa talei dina ni ko Jisu sa Luvena dina na Kalou, ka sa Nona parofita o Josefa. E dodonu me ra kila tiko o ira na noda kawa mai muri ni da sa kila tiko, baleta ni da sa dau tukuna wasoma tiko vei ira.
Era a solibula vagumatua sara o ira na iliuliu taumada ni Lotu me tauyavutaki kina na itabagauna oqo. Eda na qai laki sotavi ira beka ena bula ka tarava ka rogoca na nodra ivakadinadina. Ena gauna sa gadrevi kina me da wasea na noda ivakadinadina, na cava beka eda na kaya? Ena bula e tarava era na tiko kina o ira era malumalumu vakayalo kei ira era sa kaukauwa vakayalo. Sa dua na gauna balavu dina na bula buto tawamudu, vakabibi kevaka me ra bula talega ena butobuto oqo o ira na watida kei ira na noda kawa baleta ga ni sa sega e lomada na rarama kei ira na tani, ia, ni sa sega ni rawa me da waqara na nodra cina.
Sa qai dodonu sara vei keda me da tekiduru ena masu ena veimataka kei na veibogi ka tagi vua na Turaga me kakua ni cawadru laivi mai vei keda na noda vakabauta, na noda ivakadinadina se na noda bula dodonu. Sa qai dodonu ga me dua na tamata me ivakadinadina, ia sai iko ga.
E tiko na noqu ivakadinadina. Sa gadrevi me na vakaraitaki yani. Au sa vakadinadinataka ni kaukauwa ni Kalou bula sa tiko ena Lotu oqo. Au sa kila tiko na veika au kila, ka sa dina sara na noqu ivakadinadina. Ena yaca i Jisu Karisito, emeni.