Siitiaina o le Fua
Ia mautinoa e manino lava lou sopoiaina o faatulagaga faatonuina mo le auaunaga ia avea ma se faifeautalai ma o loo e faaauau pea ona siitia i luga le fua.
Sa ou maua le avanoa i le masina ua tuanai ina ua tofia au e auai atu i se semina ma peresitene o misiona mai le Eria i Sisifo o Amerika i Matu. Sa faatasi ai ma peresitene o misiona ia lo’u atalii o Lee. Sa valaauina muamua o ia ae le’i maea lo’u tofiga mo le tausaga atoa i le Au Peresitene o le Eria a Europa Tutotonu. Ua tolu lelei tausaga talu ai sa ou faaaluina ai se taimi faatasi ma lou atalii e ese mai nai feiloaiga pupuu pe a ou sopoiaina lana eria i isi tofiga.
Ina ua maea se taumafataga o le afiafi e faamasani ai ma peresitene uma o misiona ma o latou faletua, sa matou malaga ai ma Lee, ma o ma taitoalua i lo’u potu i le faletalimalo mo se feiloaiga. E moni lava, o le matou talanoaga sa faaautu i le galuega faafaifeautalai. Sa faamatala e Lee le mea na tupu i ana faifeautalai talu ona talosaga mai Peresitene Hinckley ia i tatou ina ia sii i luga le fua o tulaga agavaa mo le auaunaga faafaifeautalai. Na ia lipotia maia se faaleleiga na fuafuaina i le sauniaina o faifeautalai e taunuu atu i le misiona. Na avea le talanoaga ma auala na toe manatua ai se mea na tupu a o aoga ia Lee i le aoga maualuga.
Sa avea ia Lee ma se tagata o le au taufetuli a le aoga maualuga—e le gata i tuuga pupuu ae faapea i le tamoe ma oso. I le gasologa o Taaloga a le Olimipeka o le Taumafanafana i le 1968 sa faia i le Aai o Mekisiko, sa matuai maofa ai le lalolagi i se tagata oso maualuga e faalei-lauiloa e igoa ia Dick Fosbury. Sa ia faataitaia se metotia fou o le oso maualuga lea e aofia ai le tamoe faasasasasa mai agai i le laau faalava, ona oso taliaga lea e u le papatua i luga o le laau faalava. Lea na faaigoa ai o le oso taliaga a Fosbury.
E pei lava o le toatele o isi, sa tele le fiailoa e Lee o lenei metotia fou ae e oo lava i le isi tausaga fou faaleaoga, e le’i maua lava se mea e faataitai ai. Ou te maua mai o ia i lo matou fale i se tasi afiafi o faataitai atu le oso taliaga a Fosbury i le fogafale pito i lalo o lo matou fale. Sa ia faia ni pou se lua e fesiitai i le faaputuina lea o nofoa, ma sa oso o ia i luga o se au pulumu sa faataatia i luga o nofoa, ae faaaoga le sofa e palasi i ai i luga. Sa matuai manino lava ia te au e le taitai ona gafatia e le sofa lea ituaiga faiga, o lea na ou taofia ai loa lana osooso maualuga sa faia i totonu. O lea, sa ou valaaulia ai o ia ma te o i se faleoloa o mea taalo, lea sa ma faatauina mai ai ni momi e faaaoga e palasi i ai i luga, faapea ma pou o le oso maualuga ina ia mafai ona ia aveina i fafo le gaoioiga e fai ai.
Ina ua uma ona ia faataitaia le oso taliaga a Fosbury, sa fuafua loa ia Lee e toe foi lava i le oso faō lea sa ia masani ai muamua. Ae, e oo atu lava i le faaiuga o le taumafanafana atoa, o ia faataitaia le oso maualuga i tua o lo matou fanua mo le tele o itula.
I se tasi afiafi a o o’u foi atu i le fale mai le galuega sa ou mauaina ai Lee o loo faataitai lana oso. Sa ou fesili atu, “O le a le maualuga o le laau faalava?”
Fai mai o ia, “Lima futu, valu inisi.”
“O le a le mafuaaga o lena maualuga?”
Sa ia tali, “E tatau ona e sao i le maualuga lena ina ia e agavaa ai e te tauva i tauvaga a le setete.”
“O a mai la oe?” sa ou fesili atu ai.
“E mafai ona ou sao ai i taimi uma lava. E leai ma se misi.”
Na ou tali: “Se’i o ta siia la le laau i luga ma sei vaai po o le a lou lelei ua i ai.”
Sa ia tali, “Atonu o le a ou le sao ai.”
Sa ou fesili, “Afai e te le siia le laau faalava, o le a faapefea ona e iloa lou malosiaga?”
O lea na amata ai loa ona ma siia le laau faalava i luga i le lima futu, sefulu inisi; sosoo ai ma le ono futu; ma faasolo ai lava, ao ia sailiili ina ia faaleleia. Sa avea Lee ma tagata oso maualuga sili ona lelei aua sa le’i faamalieina o ia i le na ona sao i le faatulagaga pito i maualalo. Sa ia aoaoina afai e tusa lava pe o lona uiga e le sao ai, sa ia manao e siisii pea i luga le laau faalava ina ia avea ai ma tagata oso maualuga silisili ona lelei e mafai ona ia oo i ai.
O le manatuaina o lenei aafiaga ma lo’u atalii ua toe manatua ai le savali na tuuina mai e Elder M. Russell Ballard i le sauniga a le au perisitua i le konafesi aoao ia Oketopa 2002, lea sa ia luitauina ai alii talavou o le Ekalesia ina ia avea ma augatupulaga sili ona maoae o faifeautalai. Sa ia faasilasilaina e faapea o le fua, o le faatulagaga faatonuina o le auaunaga faafaifeautalai ua siitia i luga. Sa ia aoaoina alii talavou o le Perisitua Arona ina ia matuai saunia i latou lava ina ia ausia lenei faatulagaga fou ma maualuga atu. Sa ia tuuina atu foi faatonuga i tama, epikopo, ma peresitene o siteki e uiga i le fesoasoani atu i alii talavou ia saunia e auauna atu i ni misiona. (Tagai “O Se Tupulaga Sili Ona Maoae o Faifeautalai,” Liahona, Nov. 2002, 46–49.)
I lana saunoaga faaiu i lena lava sauniga perisitua, sa lagolagoina ai e Peresitene Hinckley le saunoaga a Elder Ballard. Sa ia saunoa: “Ua saunoa atu Elder Ballard e faatatau i faifeautalai. Ou te faamoemoe o le a talia ma agavaa o tatou alii talavou ma tamaitai talavou, ma tauaveina le lui ua ia faatuina. E tatau ona tatou siitia le tulaga faatonuina o le agavaa ma tulaga manaomia o i latou e o atu i le lalolagi o ni avefu’a a le Alii o Iesu Keriso” (“Mo Alii o le Perisitua,” Liahona, Nov. 2002, 57).
E lei leva lena, ae oo mai se tusi na tusia i le aso 11 o Tesema 2002, na faatonuina ai e le Au Peresitene Sili ia taitai o le Ekalesia e uiga i mataupu faavae o le agavaa mo le auaunaga faafaifeautalai. O loo faapea mai ia faatonuga: “O le auaunaga faafaifeautalai faamisiona o se avanoa lea mo i latou o e ua valaauina e ala i musumusuga e le Peresitene o le Ekalesia. Ua i ai i epikopo ma peresitene o siteki le tiutetauave mamafa o le iloaina lea o tagata agavaa ma le tauaogaina o e ua saunia i le faaleagaga, faaletino, ma lagona mo lenei faiva paia, ma o e foi e mafai ona fautuaina e aunoa ma le masalomia. O tagata taitoatasi e le mafaia ona ausia ia tulaga manaomia i le faaletino, mafaufau, ma lagona o le galuega faamisiona, e mafai ona talia aloaia la latou faanoi, ma e le tatau ona fautuaina atu. E mafai foi ona valaauina i latou e auauna atu i isi valaauga ia o le a faamanuiaina ai o latou olaga.”
Na siitia i luga e taitai o le Ekalesia le fua, ma o le taimi nei o le faatulagaga faatonuina mo le auai ai i le galuega faafaifeautalai o le matuai amio mama a’ia’i lea; soifua maloloina ma le malosi faaletino; faaleatamai, atinaega faalevafealoai, ma lagona. I soo se tauvaga o le oso maualuga e i ai se maualuga faatonuina lea e amata ai le tauvaga. E le mafai e le tagata oso maualuga ona talosaga atu e amata i se maualuga e i lalo ifo. O le auala lava foi lea e tasi, e le tatau ia te oe ona e faamoemoe e faamaualaloina ia faatulagaga ina ia faataga ai oe e te auauna atu i se misiona. Afai e te fia faifeautalai, e tatau ona mafai ona e sili atu nai lo faatulagaga faatonuina.
Ae afai loa e te ausia na faatulagaga faatonuina, pe le tatau ea ona e taumafai e siisii pea i luga le fua? Ou te fai atu ia te outou le fesili lava lea e tasi sa ou tuuina atu i lo’u atalii i le tele o tausaga ua alu: “Afai e te le siia i luga le fua, o le a faapefea la ona e iloa lou malosiaga?” O la’u luitau ia te outou, ia iloa o loo i ai se faatulagaga faatonuina—ma e tatau ona e ausia ina ia e auauna atu ai o se faifeautalai faamisiona—ae aua ne’i gata ai iina. O le a le ausia e le augatupulaga sili o faifeautalai le malosiaga atoatoa seiloga e siisii pea i luga le fua.
Se’i o’u tuuina atu ni nai fautuaga e uiga i le mea e mafai e outou taitoatasi ona fai ina ia sii ai i luga le fua e tusa lava pe maualuga atu a o e saunia mo le auaunaga faafaifeautalai.
O le faatulagaga faatonuina o le faaletino mo le auaunaga faafaifeautalai faamisiona o loo faatatau lea i le ola maloloina ma le malosi faaletino o le faifeautalai. Mo se tasi o faataitaiga, o se tasi o fesili o loo i totonu o le fomu e fautuaina ai le faifeautalai o loo fesili atu ai pe “mafai ona e galue mo le 12 i le 15 itula i le aso, savali i le 6 i le 8 maila i le aso, tietie i le uila mo le 10 i le 15 maila i le aso, ma a’ea’e i faasitepu i aso taitasi.“ E faigata le galuega faafaifeautalai, ma o faifeautalai faamisiona e tatau ona tulaga lelei le faaletino ina ia auauna atu ai. O le siiina i luga o le fua i se faatulagaga maualuga o le faaletino e mafai ona aofia ai nisi toleniga faaletino.
E mafai foi ona ou faaaofia ai le faaleleia o ou foliga vaaia. Ua faamoemoeina se faifeautalai e patino le faiga o ona laei, e atagia mai ai le tumama lea e aofia ai le faafuga lelei o le ao; sele mama le soesa; ofuina o se ofutino paepae mama, o se fusiua, ma se peleue e mafolafola lelei—e oo lava i lalo i seevae ia iila lelei. Amata nei ona saunia mo se misiona talai e ala lea i le faataitai ona foliga i se faifeautalai faamisiona.
Sii faamaualuga le fua i au sauniuniga faaleatamai. Ia matuai faataua lau aoga. E taua tele le mafai ona faitau, tautala, ma tusitusi ma le atamai. Faalautele lou malamalama i le lalolagi o loo siomia ai oe e ala lea i lou faitau i tusi lelei. Aoao ia iloa ona suesue. Ona faaaoga lea o au tu masani faalesuesuega e aoao ai le talalelei a Iesu Keriso. Ia faitau soo ma ia le aunoa mai le Tusi a Mamona.
Aua le lafoaia le avanoa e auai atu ai i le seminare ma vasega o le inisititiuti. Ia auai ma maua uma mai mea e te mafaia mai tusitusiga paia o loo aoaoina i nei aoaoga maoae faalelotu. O le a latou saunia oe e tuu atu le savali o le talalelei toefuataiina ia i latou e te maua le avanoa e te feiloai i ai. Suesue mai le Talai La’u Talalelei, ae faamamafa i aoaoga faavae o loo aoaoina i le mataupu e 3. O taimi uma e talosagaina ai oe e te lauga i le lotu pe e te aoao atu se lesona o le afiafi faaleaiga, ia taulai i nei aoaoga faavae.
I le Mataupu Faavae ma Feagaiga 11:21, o loo tau mai ai e le Alii ia i tatou ina ia “aua le saili e talai atu la’u upu, a e muai saili ia maua la’u upu, ona matala ai lea o lou laulaufaiva; o lea, afai e te manao ai, o le a e maua lo’u Agaga ma la’u upu, ioe, o le mana lea o le Atua i le faatalitonuina o tagata.” O tausaga a o lumanai le avea ma faifeautalai o se taimi tonu lea e faatu maualuga ai le fua a o e saunia lou mafaufau e ala lea i le mauaina o le malamalama ma le upumoni o le talalelei a Iesu Keriso.
E tatau ona e iloa o le auaunaga faafaifeautalai e matuai manaomia ai le mautu o lagona. O le a e le toe mauaina i latou sa masani ona lagolago ia te oe a o e tuua le aiga ma alu atu i le lalolagi. O le tele o auala o loo e faaaogaina nei ina ia taulimaina ai le lofituina o lagona—e pei o le tafafao ma uo, alu lava na o oe, taalo i taaloga vitio, po o le faalogologo musika—e le faatagaina e tulafono mo le amio a le faifeautalai. O le a i ai aso o le teenaina ma le faanoanoa. Aoao nei e uiga i tapulaa o ou lagona, ma aoao i le auala e pulea ai ou lagona e tusa ma ni tulaga o le a e oo i ai i le avea ai ma se faifeautalai. O le faia o lenei mea, ua e siitia ai le fua i luga i se maualuga maoae, ma, o lona aafiaga, e faamalosia ai oe lava ia e tetee atu i luitau o lagona i le taimi o lau auaunaga faafaifeautalai.
E ui e le’i ta’ua e Peresitene Hinckley le mea lenei, ae tatau foi i faifeautalai faamoemoeina ona saunia i tomai masani e moomia ina ia auauna atu ai i se misiona. Ua faateleina pea lava, ia le autalavou ua latou faaesea i latou lava mai isi e ala lea i le taaalo i taaloga vitio; o le faia o mea faalogo i taliga; ma le fesootai e ala i telefoni feaveai, o i-meli, feau e ave i telefoni, ma isi mau mea nai lo tagata. O le tele o le galuega faafaifeautalai e aofia ai le fesootai faafesagai ma tagata, ma seiloga e te faatulagaina le fua ia maualuga atu i le atiina ae o ou tomai masani, o le a iloaina ai e lei lava saunia lou lava tagata. Sei ou tuuina atu sina fautuaga faigofie: ia maua se galuega e aofia ai le fesootai ma tagata. I le avea ai ma se uunaiga faateleina, ia faatu se sini ina ia lava ni tupe e maua mai lau galuega faavaitaimi pe faasoloatoa e totogi ai sina vaega o lau misiona. Ou te folafola atu faamanuiaga silisili—o faamanuiaga faalauaitele, faaletino, faalemafaufau, faalelagona ma faaleagaga—i alii talavou uma o e totogiina sina vaega taua o lana misiona.
O le agavaa faaletagata o le faatulagaga faaleagaga faatonuina lea mo le auauna atu i se misiona. O lona uiga o lenei mea o loo e agavaa i mea uma ina ia osia ma tausia ai feagaiga paia o le malumalu. Aua nei e faaleaogaina mai oe mai faamanuiaga na tuuina atu i luga o i latou o e auauna atu i lenei valaauga e sili ona paia e ala i le faia o solitulafono e faapea ona e le agavaa ai e auauna atu.
Faamolemole ia iloa e tusa lava po o le a le faatauanau o lau aoao atu i le avea ai ma se faifeautalai, e na o le Agaga lava e faaliliuina mai. O le Talai La’u Talalelei o loo tuu mai ai se faamatalaga lelei o le uiga atoa o le galuega faamisiona. O loo faapea mai: “I le avea ai ma se sui faatagaina o Iesu Keriso, e mafai ona e aoao atu i tagata i le mana ma le pule ‘e oo mai le togiola talu le Mesia Paia,’ ma e leai lava se tasi ‘e mafai ona nonofo faatasi ma le Atua, seiloga ona o le taui ma le alofa mutimutivale ma le alofa tunoa o le Mesia Paia’ (2 Nifae 2:6, 8)” ([2004], 2).
Matou te faamanatu atu ia te outou e faapea, o le ua foaiina atu i ai mea e tele, e sueina mai ia te ia mea e tele. Matou te toe tuuina atu le valaau mo alii talavou uma ua agavaa i le faaleagaga, faaletino, ma faalelagona ina ia o mai ua saunia e avea ma faifeautalai o le Ekalesia a Iesu Keriso. Ia mautinoa e manino lava lou sopoiaina o faatulagaga faatonuina mo le auaunaga ia avea ma se faifeautalai ma o loo e faaauau pea ona siitia i luga le fua. Ia saunia lou lava tagata ina ia matuai aoga i lenei valaauga maoae.
Ia faamanuia outou e le Atua ina ia avea lenei mea ma ou manao a o e tuua lenei sauniga perisitua o le konafesi aoao ma amata nei ona saunia lou lava tagata mo le auaunaga faamamaluina lea o loo i ou luma o le avea ma se faifeautalai a le Alii o Iesu Keriso. I le suafa o Iesu Keriso, amene.