Savali a le Au Peresitene Sili
O Se Galuega Maoae a le Atua
6 Aperila, 1830
I le selau valusefulu tausaga ua mavae, na faapotopoto ai Iosefa Samita, Oliva Kaotui, ma nai tagata toaitiiti e faatulaga Le Ekalesia a Iesu Keriso o le Au Paia o Aso e Gata Ai. E tusa ai ma faamatalaga uma sa avea o se sauniga faatauvaa ae faaleagaga. Na tusia e Iosefa ina ua mavae le faamanatuga, “na liligi mai i o matou luga ae le Agaga Paia i se tulaga matua maoae lava—o nisi na perofeta ane, a o matou vivii uma atu i le Alii, ma faatumuina i le olioli.”1
O mea na tutupu i lenei aso e lei iloaina e le lalolagi; e lei tusiaina i ni nusipepa pe faalauiloa atu i le lalolagi. Ae ui i lea, ai se olioli o le lagi ma vivii atu i le Atua—ona o lena aso, na toe aumai ai i le lalolagi le Ekalesia a Iesu Keriso!
Solomona Chamberlain
Mai lava i lena aso seia oo mai nei, ua faitau miliona atalii ma afafine e tumu i le faatuatua o le Tama Faalelagi ua mulimuli i musumusuga a le Agaga Paia ma ulufale mai i vai paia o le papatisoga. O se tasi o na tamalii o Solomona Chamberlain.
O Solomona o se tamalii e tumu i le agaga ma e faaaluina le tele o itula e tatalo ai, e saili ai mo le faamagaloga o ana agasala ma aioi atu i le Tama Faalelagi e taitai atu o ia i le upumoni. I se vaitaimi pe tusa ma le 1816, sa folafola atu ai ia Solomona i se faaaliga, o le a ia soifua pea e vaai i le aso o le a faavaeina ai le Ekalesia a Keriso pe a uma ona toe faatulagaina faaaposetolo i le lalolagi.
I tausaga mulimuli ane ao malaga atu Solomona i se vaa e agai atu i Kanata, sa malolo lana vaa i le tamai taulaga o Palmyra i Niu Ioka. O iina na ia lagona ai se uunaiga malosi na uunaia o ia e aluese mai lana vaa. Ma le le mailoa o le mafuaaga na i ai o ia iina, na amata loa ona talanoa atu i tagata o le aai. E lei umi ae ona faalogo loa i se tala e uiga i se “Tusi Paia auro.” Sa fai mai o ia o na upu e tolu na auina atu “se mana e pei o se eletise [lea] na sau mai le tumutumu o lona ulu seia oo i ona matiutiuvae.”
O ana sailiiliga na taitai atu ai o ia i le fale o le aiga o Samita, lea na ia talanoa ai i e na i ai e uiga i le talafou matagofie o le talalelei toefuataiina. I le mavae ai o le faaaluina o aso e lua iina ma maua ai se molimau o le upumoni, sa faaauau loa e Solomona lana malaga i Kanata, ma na ia aveina ni lomiga fou e 64 o itulau e lei faamauina o le Tusi a Mamona. Soo se mea lava na malaga i ai o ia, sa ia aoao atu tagata, “o e maualuluga ma e le tauoloa, mauoa ma e matitiva, … ina ia saunia mo le galuega maoae a le Atua lea o le a amata ona oo mai.”2
O Se Galuega Maoae a le Atua
Mai lena aso ia Aperila 1830, e faitau miliona ua mauaina le upumoni o le talalelei toefuataiina ma ua ui ifo i vai o le papatisoga. Ou te molimau atu o lenei “galuega maoae a le Atua” ua i ai nei i luga o le lalolagi. Ou te molimau atu e tausia e le Alii Lana Ekalesia ma taitaia e ala i Lana perofeta o, Peresitene Thomas S. Monson. E le o se faamanuiaga masani le ola ai i nei aso e gata ai. O aso nei o le mamalu, na muai vaaia e perofeta anamua ma na auai ai le au agelu mataalia. O Loo Silafia e le Alii Lana Ekalesia. Na te silafia foi i latou o e, pei o Solomona Chamberlain, na mulimuli i musumusuga a le Agaga Paia ma au faatasi ma o latou uso ma tuafafine i le lalolagi atoa e fesoasoani i le aumaia o lenei galuega maoae a le Atua.
Ata na pueina e Matthew Reier i le tulaga ma le nofoaga na pueina ai le Iosefa Samita: O Le Perofeta o le Toefuataiga
Ata na pueina e Matthew Reier; ata na tusia e Maryn Roos
Sone a Tamaiti