Avea o le Faaipoipoga Faalemalumaluo se Tulaga e Tatau Ona Faamuamua
O Vitaly ma Ekaterina (Katya) Shmakov sa fananau i Omsk, Rusia, ma Yekaterinburg, Rusia. Sa auai i laua uma i le Ekalesia a Iesu Keriso o le Au Paia o Aso e Gata Ai a o la talavou, sa ave ni a la misiona—o Vitaly i le Misiona o Czech Prague a o Katya i le Misiona o Rusia Novosibirsk. Fai mai i laua, o lo laua liliu mai sa tatalaina ai o laua mafaufau i avanoa mo ni olaga fiafia, talitonu o le tagata ia te ia lava, ma le faamalieina, ma o a laua misiona na faamausaliina ai o laua faanaunauga e atiina ae ni aiga e tutotonu ai le talalelei, e amataina lea i le faaipoipoga i le malumalu. O le la tala lenei.
Vitaly: Ina ua atoa ni nai masina talu ona ou toe foi mai i le fale mai la’u misiona, sa valaauina a’u e avea ma faufautua i se konafesi a le autalavou i le lotoifale. Sa valaaulia a’u e Steven C. Smith, o le peresitene o le Misiona o Rusia Novosibirsk, ou te alu atu i lona ofisa. Sa ou manatu o le a maua so’u valaauga fou po o se ituaiga o faatalanoaga aloaia. Ae nai lo lena, sa ta’u mai e Peresitene Smith ia te a’u o loo i ai se tasi o loo manao o ia ou te feiloai i ai—o se tamaitai talavou sa faatoa maea lana misiona ma ua toe foi i lona aiga i se isi vaega o Rusia ae o le a foi mai i le taulaga mo le konafesi.
Ou te lei vaai muamua ia Katya, ae na ou taunuu loa i le konafesi, sa ou faailoa atu lo’u igoa, ona ma talanoa faasamasamanoa ai lea mo ni nai minute. I se taimi mulimuli ane i lena po sa ou talosaga ai loa ia Katya ma te sisiva. I le aso na sosoo ai sa ou toe talosaga foi ia te ia ma te toe sisiva.
Katya: I lo’u tuputupu a’e, e le i toatele ni alii talavou nofofua e umia le perisitua na ou iloaina, ae na ou faamoemoe i taimi uma o le a saunia e le Alii se alii talavou agavaa ou te faaipoipo i ai. Sa ou le iloaina po o afea pe o le a faapefea foi ona ma feiloai, ae sa ou talitonu i le Alii ma Ana folafolaga.
Ina ua uma la’u misiona, sa valaaulia a’u ou te fesoasoani i le vaaiga o se konafesi a le autalavou. Ina ua ou vaai ia Vitaly i le konafesi, sa ou manao loa lava i le taimi lena ina ia ou faamasani ia te ia. Sa ma faaaluina faatasi na aso e tolu na sili ona matagofie ma faagalogata i le konafesi.
Sa vave ona ou lagonaina se musumusuga malosi o Vitaly o le alii lea e tatau ona ou faaipoipo i ai. E moni, e le faapea o le a vave ona maua e tagata uma ia ituaiga o lagona i le amataga o se faamasaniga tumau. E faapefea la ona tatou iloa o loo tatou agai atu i le auala sa’o? Sa ou aoaoina i la’u misiona ia iloa le Agaga ma mulimuli i Lana taitaiga e aunoa ma se masalosalo. Ma ina ua ou lagonaina musumusuga e tatau ona ou faamasani ia Vitaly, sa ou filifili loa e usitai i ai.
Ou te iloa o le a taitaia i tatou uma e le Agaga pe afai tatou te saili mo Lona mafuta mai. E taua le le faatusatusalia o o tatou ala i ala o isi—atonu o le a le taitaia i tatou e le Agaga i se auala e matua tutusa lelei lava—ae afai o loo tatou mulimuli i le Agaga, e mafai ona tatou maua le talitonu o le a sa’o lo tatou ala mo i tatou lava.
Foia o Faafitauli
Vitaly: I na aso e tolu, sa ou iloa ai ua ou maua se tagata faapitoa lava. Sa ou le fiafia ina ua uma le konafesi ma na tatau ai ona ma faamavae ma Katya. Ae o le mea e laki ai, sa i ai se konafesi a le autalavou matutua nofofua i le masina na sosoo ai. Sa amata loa lava ona ou tulimatai atu i ai.
Sa matuai maoae lena konafesi e pei lava ona sa ou faamoemoe i ai. Sa tele se taimi sa ma faaaluina ma Katya e matuai faamasani lelei ai le tasi i le isi. Ina ua maea le gaoioiga, sa fesuiai a ma numera telefoni ma ma toe foi loa i o ma nuu.
I vaiaso na sosoo ai sa tele lava ina ma fesootai i talanoaga i le telefoni ma feau tusitusi i telefoni feaveai. (Ou te manatu e itiiti ifo i se masina na ou aoaoina ai le vave o lo’u tusiina o feau feaveai i la’u telefoni feaveai nai lo le taina e le toatele o tagata o se komepiuta.
Sa nofo Katya i Yekaterinburg, lea e 11 itula e mamao ai pe a malaga i le nofoaafi mai le mea sa ou nofo ai i Omsk, Siberia. Ae ui lava i lea, sa matua ma mananao lava ina ia ma toe fevaaia’i. Sa amata ona ma faia ni malaga masani i faaiuga o vaiaso. Ou te alu e vaai o ia i se faaiuga o se vaiaso, ae i ni nai vaiaso mulimuli ane, e sau ai o ia e asiasi mai ia te a’u. Ina ua ou asiasi atu ia Katya, sa ou nofo i ni a ma uo lelei i lona nuu, ae ina ua asiasi mai o ia ia te a’u, sa nofo o ia ia ma uo lelei i lo’u nuu. Sa masani ona matou tafafao faatasi ma ia uo mai le lotu i taimi o ma feasiasiaiga.
Katya: O le sefulutasi itula atonu o se taimi umi lea e faimalaga ai, ae i Rusia, ua na o sina savaliga puupuu lava! Talu ai o le mamao, sa le tele ni taimi na ma tafafao faamasani ai e pei ona sa ma mananao ai. E na o le faatasi i ni nai vaiaso ona ma feiloai ma faaalu faatasi ni nai aso se lua pe tolu ao lei toe foi le tasi o i maua. E masani lava, sa ma lagona le manaomia o ni taimi se tele atu ma te mafuta ai, ma sa matua faigata taimi ma te faamavae ai. Ae talu ai sa ma matuai taumafai lava ina ia ma fevaaia’i, sa matuai ma talisapaia ai minute uma sa ma faaaluina faatasi. A o agai i luma la ma mafutaga, sa amata ona ma tulimatai atu i se taimi o le a le manaomia ai ona ma toe faatofā.
Na matuai manaia ma fesuisuiai a maua tafaoga faamasani: sa ma tietie uila ma tietie solofanua, asiasi atu i fale mataaga, faitau tusitusiga paia, kuka, savalivali i le paka (sa ma sisiva foi i se tasi o paka), sa ma o atu foi i se nofoaga o tamaiti ua leai ni aiga e auauna atu ma taaalo ai ma i latou.
Soo se taimi lava ma te feiloai ai, sa ma faia ai se mea fou, o lea sa tele ai mea malie na ma faia. Sa ou talisapaia le manatu fatufatuai o Vitaly i le fuafuaina o a maua tafaoga. Sa fesoasoani ia i maua gaoioiga sa ia fuafuaina ina ia matua malamalama ai lava le tasi i le isi.
Vitaly: Talu ai o a’u sa ou aoga, sa le mafai ai ona lava se tupe ou te maua ma te faia ai le tele o ni mea faafiafia. Sa ou faaaluina le tele o a’u tupe ou te alu ai e vaai Katya ma totogi ai le pili o la’u telefoni. Ae e le faapea o le utiuti o le seleni o le a le manaia ai ma le aoga ai a maua tafaoga faamasani. O le mea moni, o nisi o a maua tafaoga faamasani na sili ona manaia sa lei faaaluina ai se pene se tasi.
Atonu e foliga e faavalevalea, ae na ou fia iloa pe o le a se uiga faaalia o Katya pe a i ai i tamaiti, o le mea lea na ma o ai i le nofoaga o tamaiti ua leai ni aiga. Sa faapena le tele o a maua tafaoga faamasani; sa ma taumafai lava ina ia iloa e le tasi le tele o mea e uiga i le isi.
Ola i le Ala o Le Alii
Vitaly: I Rusia, e pei lava o le tele o isi atunuu, o se mea masani le nonofo faatasi o tagata a o lei faaipoipoina. Ina ua uma ona ou faamalamalama ia Katya, sa fesili mai nisi o a’u uo pe o le a faapefea ona ou faaipoipo ia te ia e aunoa ma lo’u iloa muamua pe talafeagai lelei i maua. Sa latou faapea mai, e pei foi ona faia e le isi toatele ia Katya, e na o le pau lava le auala e iloatino ai pe o ia o le tagata sa’o mo a’u o le ma nonofo faatasi muamua lea mo se taimi faaumiumi.
Sa ou fai atu ia i latou e le manaomia ona nonofo faatasi ma se tagata ina ia iloa ai o ia. Sa ou taumafai foi e faamalamalama atu i a’u uo i se auala latou te malamalama ai sa ou tatalo ma maua se tali e tatau ona ou faaipoipo ia Katya. Ina ua uma ona ou tatalo e uiga i la’u filifiliga, sa leai ni o’u popolega e uiga i le olaga faaipoipoina. Sa ou matuai fiafia lava ma ou lagonaina e pei o se olaga fou atoa ua fofola mai i o’u luma. E lei tetee pe faitioina lava a’u e se tasi i lo’u faia o lenei faaiuga. O le mea moni, sa latou lagolagoina a’u i la’u filifiliga.
Katya: Ina ua faamalamalama mai Vitaly, sa taumafai o’u matua e talanoa mai ia aua nei ou faaipoipo. Sa manatu i laua ua vave tele ona ma faamau, ma na tatau ona ou iloa lelei ia Vitaly nai lo le mea na ou iloa. Sa ta’u mai foi e lo’u pule ia te a’u lea lava mea e tasi ma faaopoopo mai, “E tatau ona ma nonofo faatasi a o lei faia se filifiliga faapena.”
Ou te faanoanoa i le faapena o lagona o tagata e uiga i le faaipoipoga ma le aiga. Ou te manatu latou te le malamalama i le fiafia e mafai ona maua e ulugalii pe a faaipoipoina ma faamauina i le malumalu. O le alofa tele ma le fiafia na ma lagonaina ma Vitaly i la maua faaipoipoga, sa faamalosia atili i le malamalama ua faamauina i maua e faavavau.
Vitaly: Sa ma faaipoipo ma Katya i Omsk i le aso 25 o Fepuari, 2006. (O tulafono a Rusia e manaomia ai se faaipoipoga faalemalo a o lei faia se faamauga faalemalumalu, e pei ona faia i le tele o atunuu.) O le taeao na sosoo ai sa ma malaga ai loa i le Malumalu o Stockholm Suetena. Sa ma o i se vaalele i Omsk ma felelei ai mo le tolu itula i Moscow, lea na faaalu ai lo ma aso atoa. Ona ma o lea i se nofoaafi i le po atoa i Saint Petersburg. Ina ua ma taunuu iina sa matou malaga loa i se pasi ma isi tagata o le Au Paia o Aso e Gata Ai mo le valu itula i Helsinki, Finelani. O le vaega mulimuli o le ma faigamalaga o se malaga i se vaa mo le 11 itula i Stockholm.
Mulimuli ane, sa ma taunuu loa i le malumalu.
Mo nisi, atonu o lenei malaga umi e foliga o se luitau, ae i le tele lava o ala, sa avea le ma faigamalaga i Europa ma avanoa matagofie e hanimuni ai.
O le aso o la maua faamauga, 1 Mati, 2006, o se aso sili ona matagofie lea—o se aso o le filemu ma le mautinoa. Sa ou iloaina o le tagata sa ou uuina lona lima o le tagata lea o le a ma mafuta faatasi i le faavavau. O lenei lava manatu e tasi sa faatumulia ai a’u i le olioli silisili ma le faafetai i le Tama Faalelagi mo le faatuatuaina o a’u e avea ai Lona afafine ma a’u ava. Sa ou lagona le sili atu o lou latalata ia te Ia nai lo se isi lava taimi muamua.
Sailia o Uiga FaaKeriso
Katya: O lea ua maua la maua tama teine laitiiti. E matagofie o ia. Ou te manao ia faaipoipo o ia i le malumalu i se aso, ma o le lagolagosua sili e mafai ona ma tuuina atu ia te ia, o le avea lea o i maua o ni soa ma ni matua alolofa.
Ou te faamoemoe o le a mafai ona maua e ia se alii agavaa e umia le perisitua ma tele ni ona uiga FaaKeriso. O lo’u vaaia o na ituaiga uiga ia Vitaly na fesoasoani ia te a’u ou te iloa ai e mafai ona ou faaipoipo ia te ia.
O le a le mea na ou tosina ai ia Vitaly? E moni, e aulelei ma atamai, ma e iloa foi aumoe i se tamaitai. Ae e le ni o itu taua ia. Sa ia te ia le mea ou te fia taua o “foliga o se soo o Keriso.” Sa ou vaaia se malamalama i totonu ia te ia. O ia o se alii amiotonu e umia le perisitua.
Vitaly: E moni lava, e matagofie naua le faaipoipo i se tasi ua e tosina i ai. Ae a taulai la tatou vaai i na o uiga faaletino, e mautinoa lava le misia o uiga silisili ona taua—uiga faaletagata lava ia, faaleagaga, ma isi uiga e sili ona taua i se faaipoipoga faamanuiaina.
Ua ou iloa e ono avea ma luitau mo nisi o le autalavou matutua le sailia o se soa i totonu o le Ekalesia, ona e le toatele nisi o le Au Paia o Aso e Gata Ai i mea latou te nonofo ai. Ou te alofa ia i latou. E ui lava i lea, ou te iloa po o a lava tulaga tatou te oo i ai, afai tatou te faia la tatou vaega ma saunia i tatou lava ina ia faamauina i le malumalu, o le a saunia e Tama Faalelagi le ala.
Agavale: O le aiga o Shmakov i le aso o la laua faamauga i le 2006; o la laua malaga i le Malumalu o Stockholm i Suetena e tusa e 30 itula le umi.
Taumatau: O le taimi nei, ua maua se tama teine laitiiti a le aiga o Shmakov. Fai mai Katya, “Ou te manao ia faaipoipo o ia i le malumalu i se aso, ma o le lagolagosua sili e mafai ona ma tuuina atu ia te ia o le avea lea o i maua o ni soa ma ni matua alolofa.”
Ata o le aiga mai faaaloaloga a le au Shmakovs