O Le Auala Na Ou Iloa Ai
O Le Opo a se Tamā
Na maliu lo’u tama ae faatoa fitu o o’u tausaga. O taunuuga lē mautinoa na toetoe a taofia ai a’u mai lo’u faatuatuaina o lo’u Tama Faalelagi.
O le a o ese lo’u aiga mai le pati, ae sa ou mana’o lava ou te alu i faaseega i seevae faiuili. Na opo a’u e lo’u tamā ma fesili mai pe ou te mana’o ou te nofo ina ia alu e ave a’u ou te faasee.
“Leai!” Sa ou fai atu ai ma le ita.
“E mafai ona e faatuatuaina a’u,” sa ia fai mai ai.
Sa manana’o isi e o, o lea sa matou feosofi ai loa i le taavale. E sefulu minute talu ona matou o, ae matou aafia loa i se faalavelave tau taavale. O se vavega lava, na ou ola ai, ae na maliu si o’u tamā. O lena “leai!” o le upu mulimuli lena na ou fai atu ai ia te ia, ma o ia foi le tagata mulimuli na ou opoina mo le tele o tausaga.
Mo le isi 11 tausaga, na i ai lo’u olaga i tulaga le lelei. Sa leai so’u talitonuga ia te a’u lava ma na amata ona ou lē toe faatuatuaina tagata uma. Sa matuai le fiafia lo’u olaga, o lea na oo ai i se tasi aso ina ua 18 ou tausaga, sa ou tauivi ai ma le matuā leai o se faamoemoe, ao ou augani atu i le Atua e faaali mai ia te au le ala i se olaga fiafia.
I se vaiaso mulimuli ane, na o mai ai ni faifeautalai se toalua ia te a’u. Na la faaali mai ia te a’u se tusi ma fai mai e ao ona ou tatalo mo se molimau i lona moni. E foliga laitiiti le mea na la mananao i ai, ao manu’a na oo mai ona o le maliu o lo’u tamā sa loloto, ma ou te manatu o le matou feiloaiga ma faifeautalai ua na o se mea na tupu faafuasei ae le o se tali mai se Atua o lē e alofa ia te a’u.
Ae, sa ou faitauina lava le Tusi a Mamona ma tatalo ina ia ou maua se tali—e ui lava e lei faia ma le manatu tonu i ai. Mulimuli ane, o lona uiga e tatau ona ou faatuatua i le Atua, ia talia o Ia ma Lana tali. Sa faigofie atu ona talia faitioga faatalasua na i ai e uiga i le Ekalesia. Ma na ou iloa ai foi o le tele o tagata iloga ua mavae na faafeiloai mai ia te a’u i le a’oga na sese. Ae faapefea pe afai o Iosefa Samita e faapei foi o i latou?
Ae ui i lea, na iu lava ina papatisoina ma faamauina a’u. Na ou iloa sa ou manaomia se taitaiga i lo’u olaga, ma na ou fiafia i le Ekalesia ma le au paia. Ae o lea ua ou iloa na ou auai i le ekalesia e aunoa ma se molimau moni, se molimau e mumu i le loto. O le talitonuga na ou maua na mafua mai i lo’u iloaina o finauga na faia e ē na tauleagaina le Ekalesia e pepelo. Ae i lo’u le talitonu lava, na ou iloa ai o le faatumauina o lena talitonuga na lofituina ai a’u. O lo’u oo atu i le Ekalesia na amata ona o lo’u le talitonuina [o isi ma a’u lava] ma lo’u le fiafia, ma na ou toe oo lava i lena tulaga.
Ona ou faia lea o se faaiuga taua: O le a ou tatalo, a o le taimi lenei o le a ou faia e pei ona apoapoai mai ai Moronae, ma le “faatuatua ia Keriso,” “i le manatu tonu i ai,” ma se “loto faamaoni” (Moronae 10:4). I le aso na ou filifilia, sa ou tatalo ai ma anapogi mo le taitaiga. Sa ou faaaluina le aso e mafaufau loloto ai i mea uma na tutupu.
I lena po sa ou tootuli ai i lo’u moega. Sa punou lo’u ulu ma ou fesili atu i le Tama Faalelagi e uiga i le moni o le Tusi a Mamona. Na amata ona manatua e lo’u mafaufau o’u masalosaloga uma. Na moeiini o’u mata, uumau o’u lima, ma toe fesili atu—ma le faamaoni lava, ma le manatu tonu i ai, ma le faatuatua i lo tatou Faaola.
Na foliga mai ua le minoi le lalolagi. Sa ou lagonaina le mafanafana ma le fusia i le malamalama. Mo le umi e 11 tausaga sa ou faananau lava mo lenei mea, ae o lenei ua toe opoina a’u e se tamā—o se Tama Faalelagi. Mulimuli ane sa ou maua se tasi ou te faatuatuaina. “Ioe,” sa ou fai atu ai, ma le maligi o o’u loimata, “Ou te talitonu i Lau Afio.”
Ata na tusia e Doug Fakkel