Taimi o Fetufaaiga
Na Toefuataiina Mai e Iesu Keriso le Atoatoaga o le Talalelei e ala ia Iosefa Samita
Vaai faalemafaufau i se ipu malamalama e tumu i le vai manino, ma le mama. Afai tatou te luluina le ipu, o le a masaa sina vai i fafo ma o le a le toe tumu le ipu.
I le amataga sa i ai le atoatoaga o le talalelei i le lalolagi. Mo le tele o tausaga na aoao mai ai e perofeta le talalelei.
Ao i ai Iesu Keriso i le lalolagi, na Ia faavaeina Lana Ekalesia. Na Ia aoaoina mai le atoatoaga o le talalelei: faatuatua ia Iesu Keriso, salamo, papatiso i le faatofuina, le meaalofa o le Agaga Paia, ma le usiusitai i poloaiga. Sa faaali atu e Iesu i tagata uma le ala e tatau ona tatou ola ai. Sa avea o Ia ma Faaola o i tatou uma. Sa tumu le ipu malamalama o le talalelei.
Ae peitai ao gasolo pea tausaga, na leiloloa ni vaega o le talalelei ona na suia e tagata amioleaga po o le le usitai foi i ai. Sa le toe i ai le atoatoaga o le talalelei i le lalolagi. Na folafola mai e le Tama Faalelagi i Lana fanau o le a Ia toe tuuina mai ia te i latou le atoatoaga o le talalelei. Na Ia valaauina Iosefa Samita e fesoasoani ia te Ia e toefuatai mai le atoatoaga o le talalelei.
Ioane 3:16 o loo aoao mai ia i tatou na tuuina mai e le Tama Faalelagi ia i tatou Lona Alo ma le talalelei ona e alofa o Ia i Lana fanau. Ua Ia valaauina perofeta e aoao i tagata uma Lana talalelei ina ia mafai ona tatou iloa le ala e toe foi atu ai ia te Ia.
Ua faamanuiaina i tatou i le mauaina o le atoatoaga o le talalelei i le Ekalesia a Iesu Keriso o le Au Paia o Aso e Gata Ai. Ua taumasuasua a tatou ipu malamalama o le talalelei, ma ua folafola mai e le Tama Faalelagi o le a le toe aveesea lava le talalelei mai le lalolagi.
Aperila 2010 Api Talaaga o Mau
Faitau le mataupu faavae o le faatuatua lona ono o loo i le Penina Tau Tele.
Tauloto lenei mataupu faavae o le faatuatua.
Tatalo e fesili atu i le Tama Faalelagi e fesoasoani ia te oe ia e iloa o Iesu Keriso na toefuataiina le atoatoaga o le talalelei e ala mai ia Iosefa Samita.
Filifili se tasi o nei gaoioiga, pe fai sa oe lava gaoioiga:
-
Fesoasoani atu i se tasi e aoaoina lenei mataupu faavae.
-
Faitau pe tuuina atu i se tasi e faitau atu ia te oe le Talafaasolopito a Iosefa Samita—o loo i le Penina Tau Tele.
-
Fai le uili e faamatala ai le tala o loo i le itulau 67. Oti ese uili e lua, ma faapipii i se pine faamau. Faaaoga le uili e aoao ai se tasi i le ala na toefuatai mai ai e Iesu Keriso le atoaga o le talalelei e ala mai ia Iosefa Samita.
-
O loo aoao atu e a tatou faifeautalai ia upumoni o le talalelei toefuataiina i le lalolagi atoa. Tatalo mo i latou. Tatalo ina ia iloa po o ai e mafai ona valaaulia e faalogo i le savali a faifeautalai.
E faapefea ona fesoasoani le mea na e faia e te malamalama ai i le mataupu faavae lona ono o le faatuatua?
Tusi i lau api o talaaga pe tusi se ata e uiga i le mea ua e faia.
Na Toefuataiina Mai e Iesu Keriso le Atoatoaga o le Talalelei e ala mai ia Iosefa Samita
Tauagavale: O Le Uluai Faaaliga, na saunia e Gary L. Kapp, e le mafai ona kopiina; luga i le taumatau: ata tusi © Vivid Details; lalo i le taumatau: Iosefa Samita o loo Faaliliuina le Tusi a Mamona, na saunia e Del Parson, © IRI; o isi ata na tusia e Robert T. Barrett