O Se Ofu Faaipoipo ma se Fuafuaga

Saunia e Jane McBride Choate

“O le faaipoipoga e faapaiaina lea e le Atua” (MFF 49:15).

Sa nofonofo Lori i luga o le moega a lona uso matua ao faamaeaina e Kalini le teuina o lana ato o le malumalu. O Kalini o le a faaipoipo nei.

Sa fiafia tele Lori o le a alu i le ‘aiga o le faaipoipoga i lena afiafi, ae sa lagona foi e ia le faanoanoa. O lona tuagane matua, sa auauna atu i se misiona, e mafai ona o i totonu o le malumalu faatasi ma Kalini. E mafai foi ona o ona matua. Ae o Lori ma ona tuagane laiti e toalua e le mafai ona o i totonu.

“Maumau pe ana mafai ona ou i ai i totonu o le malumalu faatasi ma oe,” o le tala a Lori.

Sa ea ae Kalini mai lana tapenaga o fai. “E faapena foi au, ae o le a e faatalitali atu lava i fafo. Ma e i ai se aso o le a ta o faatasi ai i le malumalu pe a e faaipoipo.”

Sa lei toe faanoanoa loa Lori, ae ua tau manatunatu loa i se isi mea. “Na faapefea ona e iloa e te fia faaipoipo ia Mati?” na ia fesili ai.

Sa nofo ane i lalo Kalini i tafatafa o Lori. “I aso la ua leva na ou aoao ai o loo i ai se fuafuaga a le Tama Faalelagi mo au. Ina ua ou feiloai ia Mati, na ou iloaina e mafai ona ma faataunuuina faatasi lena fuafuaga.”

“Ua uma la ona faataunuuina lena fuafuaga?” na fesili ai Lori.

Sa lulu le ulu o Kalini e leai. “Ma te mananao ma Mati ia maua se ma fanau, faauma ma aoga, ma le tele lava o isi mea.”

Sa tilotilo atu Lori i le ofu faaipoipo paepae matagofie o loo tautau i le faitotoa o le kapoti lavalava a Kalini. “E ese le manaia o lou ofu,” sa ia fai atu ai.

Sa ataata Kalini. “O le isi lena vaega o le fuafuaga,” sa ia fai atu ai. “Sa ou manao i taimi uma ou te faaipoipo i totonu o le malumalu, ma o lou ofu e tatau lava ona tauagafau.”

I ni nai itula mulimuli ane na vaai atu ai Lori ao o mai i fafo Kalini ma Mati mai le malumalu. Sa susulu o la foliga.

Sa tamoe atu Lori ia Kalini ma fusi mai o ia.

I ni nai vaiaso mulimuli ane na maua ai e Lori se ata i le meli. O se ata o Kalini ma Mati o loo tutu i luma o le malumalu. Sa tusia e Kalini i le pito i luga, “O loo i ai se fuafuaga a le Tama Faalelagi mo oe.”

Sa tuu e Lori le ata i luga o lana pusa tu. Sa ia folafola ia te ia lava o le a i ai se aso e alu ai i le malumalu ma maua le susulu lava lea e tasi na susulu mai i foliga o lona uso.