E Tatau Ona Ou Alu i le Malumalu
O se faalavelave, o le tele o ao ma po e tietie ai i le pasi, o tietiega uumi i luga o vaa, ma le maualuga o le tau o femalagaaiga sa lei taofia ai lenei tamalii mai Pasila mai le auai atu i le malumalu.
Sa faafuasei lava ona ala i luga ia José Gonçalves da Silva i le tauvalaau atu o tagata i lona igoa. Sa pogisa, ma sa leai ma sona iloa po o fea na i ai o ia.
“Sa ou moe i le taimi na taavalevale ai le pasi,” o le tomanatu lea a José i le faalavelave i le taeao po o Ianuari 2008. “Sa leai se tasi na mafai ona mauaina au, aua sa ou pito i tua o le pasi ma na punitia au i atopau. Na iu lava ina maua au e nisi o uso ao amata ona latou faaputuina faatasi ia atopau.”
Ina ua le mafai ona taofiofi e le avepasi le pasi i se vaega vaiti o le auala fepiopioai i le togavao malu i Venesuela i saute, na tusa ua toeitiiti lava afa le faigamalaga e tolu aso a José ma isi tagata o le Au Paia o Aso e Gata Ai mai Manaus, Pasila, e o atu i le Malumalu o Caracas Venesuela. Na o nai manua mitimiti na afaina ai José, ae o nisi o uso ma tuafafine na taofia i le falemai.
“Ua oo i le taimi e tatau ai ona faamuta lau alu i le malumalu,” sa fai atu ai nisi o le aiga na popole ia José, o lē na 80 [tausaga o lona soifua] i le taimi na tupu ai le faalavelave. Peitai, sa ia tautino atu ma le leai o se faavaivai: “e tatau ona ou alu i le malumalu. Afai e faatagaina e le Alii, o le a ou toe foi mai.”
Sa vave amata ona ia faaputuina se tupe mo lana malaga lona fa i Caracas, lea na ia faataunuuina i le amataga o le 2009. Mo Uso Gonçalves da Silva, o le 40-itula e alu ai i le pasi e faigofie atu pe a faatusatusa i malaga e tolu ia sana faia muamua atu i le Malumalu o São Paulo Pasila. Mo le tele o tausaga, o le Malumalu o São Paulo, lea e tu i le faitau afe o maila i sautesasae o Manaus, sa avea ma malumalu aupito latalata i lenei aai e lua miliona ona tagata i le setete i matu o Amasona. Ona oo lea i le 2005, na avea ai Manaus ma se vaega o le Malumalu Faaleitu o Caracas Venesuela.
I na tausaga o le malaga atu i São Paulo, “matou te o ai i vaa i Manaus ma faaalu ni aso se fa e o atu ai i Pôrto Velho,” o le laumua o le Setete o Rondônia, o le tala lea a José. Ona matou o lea i le pasi mo aso e fa i São Paulo. E le auai lou toalua i le Ekalesia, ma ina ua ou alu i le malumalu mo le uluai taimi i le 1985, sa ou alu na o au. Sa ou moe i le po i le fale faatali pasi i Pôrto Velho ona sa tuai ona ou taunuu atu ma na leai se pasi. Ona ou alu ai lea i São Paulo i le taeao na sosoo ai. O se aafiaga manaia, peitai sa fai si ou vaivai laitiiti i le taimi na ou taunuu ai.”
Ona ia faaaluina lea o ni aso atoatoa se tolu e auauna atu ai i le malumalu a o lei toe amataina lana malaga e valu aso e toe foi atu ai i le fale. E tausaga atoa na ia sefeina ai ia lava se tupe mai lana penisione e faatupe ai mea uma mo le malaga atu i le malumalu.
“O se osigataulaga le alu, ae e matuai aoga lava,” o le tala lea a Uso Goncalves da Silva, o lē ua faia le tele o galuega sui mo lona aiga. “Sa ou lagona se olioli faapitoa i le aso na ou papatiso ai mo lo’u tamā, ma papatisoina se isi tagata mo lo’u tina, ma le taimi na ou sui ai i lo’u tamā a o faamauina ou matua. Sa avea o se avanoa matagofie. Ua leai uma ni ou uso ma tuafafine, ae ua ou faia galuega mo i latou i le taimi o au malaga i le malumalu.”
E talitonu José o le ositaulaga moni i le malaga mamao atu i le malumalu o le a fesoasoani lea i le Au Paia o Aso e Gata Ai i Manaus ia maua le loto faafetai mo le aso o le a faapaiaina ai se malumalu iina. “O loo matuai ou tulimatai lava mo lena aso,” o lana tala lea.
Sa tasi se paranesi laitiiti i Manaus ae 20 tagata o le ekalesia i le taimi na auai ai José i le Ekalesia i le 1980. Talu mai lena taimi, ua ia vaaia le ola o le Ekalesia iina e lata i le 50,000 tagata o le ekalesia o loo alala ma papaaao i siteki e valu.
“Ina ua oo mai le faasilasilaga i le 2007 o le a fausia se malumalu i Manaus,” o le tala lea a José, “sa ou tagi ona o le olioli tele na ou lagonaina, ma sa ou tatalo ina ia faataga au e le Alii ia ou ola e aulia atu lena [aso] e vaai ai i le suatiaina o le eleele [mo le fausiaina o le malumalu],” lea na taunuu i le tausaga mulimuli ane. I le taimi nei o loo tatalo o ia ina ia ola pea e vaai i le faamaeaina o le malumalu ma ia papatisoina lona toalua ina ia mafai ona faamauina i laua.
“Tatou te le mailoa le taimi tatou te feoti ai, ae e tatau ona tatou saunia ma fiafia pe a oo mai lena taimi,” o le tala lea a Uso Gonçalves da Silva. “Ou te tulimatai atu e toe foi atu i le afioaga a lo’u Tama oi le Lagi ma lo’u Faaola o Iesu Keriso. O le i ai i le malumalu e fesoasoani ou te saunia ai mo lena aso.”
Agavale: ata pue o le Malumalu o Caracas Venesuela © IRI; luga i le agavale ma luga i le taumatau: ata na pueina e Michael R. Morris
O le Malumalu o Caracas Venesuela.
Luga: O Le Rio Negro, lea e amata ai e José Gonçalves da Silva lana malaga e valu aso mo le Malumalu o São Paulo Pasila.
Lalo: O Uso Gonçalves da Silva i le malaga e 40 itula i le pasi mo le Malumalu o Caracas Venesuela. Fai mai a ia o le auauna atu i le maota o le Alii e matuai aoga ai lava le osigataulaga e auai atu i ai.