Fesoasoani e Fafaga Tamai Mamoe a le Faaola

Saunia e Peresitene Henry B. Eyring

Fesoasoani Muamua i le Au Peresitene Sili

Mai se lauga o le konafesi aoao o Oketopa 1997.

President Henry B. Eyring

Na faasatauroina le Faaola ma na toe tu mai. Sa malaga atu ona soo i Kalilaia. Sa latou fagogota i le po atoa, ae leai se ia na maua. Ina ua latou latalata atu i le matafaga, i le vaveao, sa latou le iloa o Ia i le taimi muamua. Sa Ia fetalai atu ia te i latou, ma faasino le mea e lafo i ai a latou upega, ina ua latou faia, sa faatumulia a latou upega. Sa latou faataalise atu e faafetaiai ia te Ia i le matafaga.

Sa latou mauaina se afi malala o loo tunu ai i’a ma areto. Ona Ia tuuina atu lea o se poloaiga ia i latou lea o loo tu mai pea mo i tatou taitoatasi.

“Ua uma ona latou aai, ona fetalai atu lea o Iesu ia Simona Peteru, Simona, le atalii o Iona, pe sili mai lou alofa ia te au nai lo latou nei? Ua fai mai o ia ia te ia, Ioe, le Alii e; ua e silafia ou te alofa ia te oe. Ona fetalai atu lea o ia ia te ia, Ia e fafaga i au tamai mamoe” (Ioane 21:15).

O le Au Paia a le Atua o loo i lalo pea o le feagaiga e tausia e le tasi le isi i le faaleagaga, ae maise lava i latou e fou mai i le talalelei.

E mafai e se tamaitiiti ona faia ni mea e fafagaina ai le faatuatua o isi. E mafai e tamaiti ona valaaulia se tagata faatoa liliu mai latou te o faatasi i se sauniga. E mafai e tamaiti ona ataata ma faafeiloai atu i se tagata fou e sau i le falesa po o totonu foi o se vasega. Ma afai tatou te faia lena mea, o le a avea le Agaga Paia ma a tatou soa.

Soo se upu lava tatou te tautatala ai e mafai ona faamalosia ai pe faavaivaia ai foi le faatuatua. Tatou te manaomia le fesoasoani mai le Agaga e tautatala atu ai i upu na o le a tausia ai ma faamalosia ai [isi tagata].

E mafai ona tatou faia e ala i le na o le usiusitai lava e fesoasoani ai i le Alii e ave tamai mamoe, Ana tamai mamoe, i Ona aao i le aiga i lo latou Tama ma lo tatou Tama.

Ou te iloa o Iesu o le Keriso. Ou te iloa o loo soifua o Ia. Ma ou te iloa o loo Ia taitaiina i tatou i lenei galuega—Lana galuega—o le aumaia lea o le ola faavavau i fanau a Lona Tama. ■

O le tausia o lona uiga o le fafaga.

Tausiaina o Tamai Mamoe

O tamai mamoe e vaivai ma e le mafai ona latou puipuia i latou lava. E manaomia e i latou le tausiga faapitoa ina ia mafai ona latou tutupu ae i le maloloina ma le malosi. Vaai i ata o nisi o mea e manaomia e tamai mamoe.

Meaai

Vaiinu

O se nofoaga saogalemu e momoe ai

Puipuiga mai luko ma isi mea matautia

O Ai Tamai Mamoe a le Faaola?

Na fetalai atu le Faaola i Ona soo e tuuina atu le tausiga faapitoa i tagata o e e lei malolosi i le talalelei po o i latou o tagata fou o le Ekalesia. Na Ia faaigoaina nei tagata o “tamai mamoe.” Latou te manaomia se tasi e fesoasoani ia i latou ina ia mafai ona latou tutupu malolosi—malolosi i le talalelei.

Valivali ata o mea e mafai e tamaiti ona fai e fesoasoani ai i tamai mamoe a le Faaola. Ona tusi lea o se ata se tasi o se mea e mafai ona e faia.

Faafeiloai atu i se tagata fou o lau vasega

Valaaulia se uo e sau i le Peraimeri

Faasoa atu le Liahona

Mai le ituagavale: O Le Tamai Mamoe na Leiloa, na saunia e Del Parson; ata pue o le luko ma le tamai mamoe © Getty Images; ata pue o le pa manu © Corbis; ata pue o meaai ma vai na saunia e David Stoker; ata na tusia e Apryl Stott