O i Latou Ua Totogi a Latou Saofaga o le a Maua Tamaitusi Ua Faafou o le Malumalu

O i latou ua totogi a latou mekasini o le Liahona ma le Ensign o le a maua atu a latou tamaitusi ua faafou o Malumalu o Le Ekalesia a Iesu Keriso o le Au Paia o Aso e Gata Ai faatasi ma a latou lomiga masani o le masina o Oketopa 2010.

O lenei tamaitusi o se faafouga o se lomiga na lolomiina i le silia ma le 50 tausaga. Na amata i se lomiga o le mekasini a le Ekalesia o le Improvement Era i le 1955. Na mulimuli ane avea ma se tamaitusi ua tasi lava ia, ua faavalu ona faafou. O le lomiga aupito lata mai o le a aofia ai ni tala fou ma ata ma o le a lolomiina i gagana e 45.

O loo faaauau pea ona faamalosiau mai perofeta o Aso e Gata Ai, e aofia ai Peresitene Thomas S. Monson, i tagata o le Ekalesia ina ia maua o latou lava sauniga o le malumalu ona toe foi atu lea i le malumalu e faia galuega o o latou augatuaa.

Na fuafuaina le tamaitusi e aoao atu ai aoaoga faavae ma mataupu faavae o le tapuai i le malumalu. Ua uunaia tagata o le Ekalesia ina ia le itiiti ifo i le tasi le kopi e i ai i o latou fale, ina ia mafai ai e matua ona faaaoga ia tamaitusi i afiafi faaleaiga ma isi faatulagaga e aoao ai o latou aiga e uiga i le malumalu.

E mafai e tagata uma ona maua se mea e faatatau i o latou olaga i le tamaitusi lea. O tusiga fou o i ai i lenei lomiga o le tamaitusi e aofia ai “Faamanuiaga o le Malumalu,” na saunia e Peresitene Thomas S. Monson, ma le “Ia Saunia mo Faamanuiaga o le Malumalu,” saunia e Elder Russell M. Nelson o le Korama a Aposetolo e Toasefululua. O loo i ai foi i le tamaitusi se tusiga mo le autalavou ua faaulutalaina “Avea o le Malumalu ma se Vaega o Lou Olaga,” ma e mafai e tamaiti ona aoao e uiga i malumalu mai se tusiga ua faaulutalaina “O Lou Ala i le Malumalu.” O le a fiafia le aufaitau uma e matamata i ata faaalia o malumalu i le lalolagi atoa. O loo i ai foi i le tamaitusi ia tali i fesili e masani ona fesili ai e fesoasoani ai i le au paia o loo sauniuni e ulufale atu i le malumalu mo le uluai taimi.

Ua fautuaina tagata o le ekalesia ina ia faasoa atu lenei tamaitusi i tagata o o latou aiga ma uo o isi faatuatuaga. O le a maua nisi kopi o le tamaitusi i faletusi autu o le Ekalesia ma i le LDScatalog.com.

E mafai e peresitene o siteki, epikopo, ma faiaoga o le vasega sauniuni mo le malumalu, ona filifili e faaaoga nei mea e fai ma punaoa faaopoopo i le Faaee mai Luga tusi lesona a le faiaoga ma le tamaitusi o le, Saunia e Ulufale Atu i le Malumalu.

Pe a talafeagai ai, e mafai e taitai perisitua ona tuu atu se tamaitusi i tagata ua uma ona maua o latou faaeega e fesoasoani ai ia latou manatua o latou lava aafiaga i le malumalu. E mafai foi ona aoga e fesoasoani atu ai ia i latou ua toe foi mai ma toaaga i le Lotu, o e o loo sauniuni ina ia faamauina i le malumalu.

“E mafai ona avea lenei tamaitusi ma se punaoa ofoofogia mo tagata uma o le Ekalesia,” na saunoa ai Elder Yoshihiko Kikuchi o le Fitugafulu. “O se fesoasoani e manatua ai aafiaga paia i le malumalu, o feagaiga ma faamanuiaga e faatatau i ai, ma tiutetauave taitasi a tagata e fai i le galuega o talafaasolopito o aiga ina ia faailoa o latou augatuaa ma tuuina atu sauniga e tatau ai o le malumalu mo i latou, e ala i le toaaga e auai i sauniga o le malumalu.”

O le masina o Oketopa, o le a maua ai e le au fai saofaga se lomiga ua faafou o le tamaitusi o le malumalu.