Sa Ia Amanaiaina La’u Talosaga

Juan Carlos Fallas Agüero, San José, Costa Rica

Ina ua ou papatiso i le 18 o o’u tausaga, sa ou iloa o le ola ai i le talalelei a Iesu Keriso o le a avea ma [o’u] ituaiga olaga. Sa ou lagonaina le taua ma le tatau o le ola ai i tulaga faatonuina o le talalelei, ma o le faia o lea ua famanuiaina ai lo’u olaga i le tele o itu.

O le tasi o mataupu o le talalelei ua sili ona taua ia te a’u o le faamamaluina lea o le aso Sapati. E maua ai e a’u le avanoa e taofi ai a’u gaoioiga masani o aso uma ae taulai atu o’u mafaufauga i lo’u Tama Faalelagi.

Ou te faigaluega i se pisinisi mo turisi i Costa Rica. I lenei galuega, o se faiga masani i tagata le galulue i Aso Sa. Ina ua ou amata i la’u galuega, sa ou faailoa atu o a’u o se tagata o le Ekalesia. Sa ou talosagaina—ma sa faamatuu mai a’u—ou te malolo i Aso Sa.

Talu ai o la’u talosaga e le o se mea e masani ai, sa tumu ai a’u uo faigaluega ma lo’u pule i le fia iloa. Sa latou fesiligia a’u i le tele o fesili e uiga i o’u talitonuga. I le aluga o taimi sa ou maua ai ni avanoa e faamalamalama ai ia i latou nisi o mea e talitonu i ai le Au Paia o Aso e Gata Ai. I le tele lava o taimi sa avea a’u faamalamalamaaga o mataupu faavae o le talalelei ma auala na latou faaaloalogia ai a’u.

I se tasi aso sa faapotopoto ai e lo’u pule la matou au faigaluega mo le tuuina mai o se faasilasilaga. “Ou te manaomia outou uma lava ia outou faigaluega i le faaiuga o vaiaso e lua o loo sosoo mai,” o lana faasilasilaga lea. Sa tau pe lo’u fatu. Na ou iloa o lona uiga e manaomia ona ou faigaluega i le Aso Sa.

Ae sa faaauau pea le faasilasilaga a lo’u pule: “O lona uiga, o tagata uma lava sei vagana ai Juan Carlos. Ua tatou iloa e leai se mea o le a mafai ona faamalosia o ia e sau e faigaluega i le Aso Sa.”

Sa ou lagona le faafetai. Sa amanaia e lo’u pule la’u talosaga! Ona o a’u amioga ma tulaga faatonuina sa ou faaalia i le galuega, sa ia faaaloalogia ai a’u. O se taunuuga, sa naunau o ia e faamamalu i o’u talitonuga.

Ou te iloa afai tatou te faamuamuaina tulaga faatonuina o le talalelei i o tatou olaga, o le a faamanuiaina i tatou e le Alii.

“Ou te manaomia outou uma lava ia outou faigaluega i le faaiuga o vaiaso e lua o loo sosoo mai,” o le tala lea a lo’u pule. Sa tau pe lo’u fatu. Na ou iloa o lona uiga e manaomia ona ou faigaluega i le Aso Sa.