Pe a Le Opeopea Pato
Sa faapea lava i matou o a matou tamai pato o le a masani i le vai. Ae sa o se mea na faateia ai i matou.
Na amata uma lava i le meaalofa faalilolilo na aumai e Tama i le fale mo ona afafine e toatolu. A o matou autilo atu i totonu o se atigipusa pepa pisapisao, sa feei i matou o teine i le fiafia. Tamai pato! Sa le mafai ona matou faatali e aapa atu i totonu ma uu mai se pato se tasi. Sa matou tautuleia solo Tama, lea na toeitiiti lava pau ai le atigipusa.
“Sei faaeteete, tamaitai!” na ia ataata ma fai mai ai. “E tofu lava outou ma le pato!”
Sa ou ofo i le lagonaina o le laitiiti tele o lena tamai pato i lou lima. I lou uuina ma le faaeteete, o lona tino mafanafana sa pei o se afatala, ma sa faapena foi i lona mamafa.
“Auoi, e ese le māmā!” Sa ou alaga atu ai. “E leitioa a mafai ona faaopeopea tamai pato!”
Sa toe ata Tama a o savali ese atu ia Tina i le umukuka. E lelei tele Tama i le taufaate’i, ae maise lava i mea e mafai ona talie ai lona aiga. O le taimi lena na ou manatuaina ai le faatanoa pau e taeele ai. O le a avea ma se nofoaga sili ona lelei mo a matou pato fou.
“Nora, aumai le faatanoa pau tuai mai le fale taavale,” sa ou faatonuina ai lou uso.
A o pamuina atu e la matou faagaau i tuafale le vai manino, malulu i totonu o le faatanoa pau, sa amata ona matou iloiloina a matou pato ma amata loa ona faaigoa i latou. O lau pato na i ai se tamai togi lanu enaena i lona gutu lapotopoto ma ona vae e ese lava le lapopoa ma e sosoo faatasi.
Na faafuasei lava ona ou manatuaina au uo. O le a latou talie i lou fiafia tele i nei fagafao fou. Ona ou toe manatuaina lea o le a le i ai au uo iinei mo ni nai aso. Na faatagaina i latou e o latou matua e o e tolauapi i mauga lata mai. O tietiega uila i luga o se auala pefu ua leva, filifiliga o se nofoaga e tolauapi ai, faatuina o se faleie. Atonu o le a tele lo latou fiafia ma o le a taunuu mai i le aso e sosoo ai, e talie ma talanoa e uiga i la latou tolauapiga. Sa le tuuina mai e Tina ia te au le faatagaga. Na fai mai o ia ou te laitiiti tele!
Ua tumu nei le faatanoa pau, sa faapotopoto loa i matou o teine i tafatafa o le faatanoa, ma le fiafia tele i lenei taimi. Sa matou tuuina a matou manulele o loo feapataai ma feei i le vai ma TOTOFU, sao lava i lalo i le taele. Na magoto uma le tolu!
Na vave lolō atu o matou lima i totonu o le vai ma laveai mai nai manulele a momole. O le a le mea na sese? Matou te lei fai atu ia i latou e fai se mea faigata, e pei o le feausi. Pau lava le mea latou te faia o le faaopeopea. E le faigofie lena mea mo se pato?
“O le a le mea na tupu?” sa taumanatunatu ai lou uso.
“Masalo na tatou faateia i latou!”
Sa matou ioe uma lava e pei lava o pepe pe a latou aoao e savavali. E tatau lava ona pauu i nisi taimi. Sa matou ioe uma e toe taumafai.
“Tasi, lua, tolu, alu!”
Goto! Goto! Goto! faasasao lava i lalo e pei o ni polo uamea.
O le mea na laki ai mo nai tamai pato, e leai se tasi o i matou na i ai se loto e mulimuli i lo matou manatu, na pau lava le mea latou te manaomia o le faataitai. Ina ua fautua mai Nora matou te faaaogaina le masini faamago lauulu mo o latou fulu, sa matou faanatinati atu loa i totonu o le fale. Ma le faapelepele lava, sa faamamagoina nai manulele e ou uso i lau masini faamago piniki ao ou sueina le numera o le telefoni mai le igoa o loo i le atigipusa.
“Talofa, lau susuga? O matou lea na faatoa faatauina mai—ia, o le matou tamā na faatoa faatauina mai—ni tamai pato se tolu. Ioe, lau susuga. Ia, o loo i ai se faafitauli i a matou pato. Vaai oe, matou te mananao i a matou pato e faaopeopea.”
O le tala na tau mai e lenei tamaloa sa ou malamalama lelei ai. Ou te lei iloaina sa ou aoaoina ni mea se tele seia oo ina ou faalogo atu o loo ou faamalamalamaina ia Nora ma Susi: “Vaai oulua, o fulu vaivai fou e le teteeina le vai. E susu sao lava. Tatou te faatali mo se isi vaiaso po o le lua mo o latou tino e faia le suauu gaoa lena o le a see ai le vai i o latou fulu.”
“Ae e le moni lena mea,” na finau mai ai Nora. “Na ou vaai i tamai pato o mulimuli i lo latou tina i luga o le vai. Na o ni nai aso lava lo latou matutua.”
“Na faamalamalama mai e le tamaloa ia te au. A fananau mai pato, e ofoofotai e le tina i ona apaau ia pepe e faamafanafana ai i latou. O le ga’o mai apaau o le tina e olo atu i ana pepe. Faatasi ai ma lo latou tina, e mafai ona latou faaopeopea. Pe a na o i latou, e manaomia sei tau matutua ona faatoa saogalemu lea i totonu o le vai.”
O le taimi lena na alu ai loa lo’u mafaufau i le mauga po o fea lava, i le mafaufau i au uo i totonu o o latou faleie. Masalo e manao tina e tuu pea au i lalo o ona apaau mo sina taimi sei toeitiiti. Sa ou milimiliina le patua itiiti o lau pato i lou tamai lima e tasi.
“O le a matou le toe tuuina outou i le faatanoa mo le taimi nei, si au tamai pato,” Sa ou folafola atu ai ia te ia. Ma, na pei o se toe manatunatuga, na ou faaopoopo atu, “O e misia lou tina?” ■
Ata na tusia e Jim Madsen