Suega o le Talitonu o le Tagata ia te Ia Lava Mai le Mata’u i le Faatuatua i le Filifiliga Faalefaaipoipoga
Mai se faigalotu a le Iunivesite o Polika Iaga–Idaho i le aso 25 o Setema, 2007.
Ina ua uma ona ou faauu mai le kolisi i le 1964, sa tofia a’u o se fitafita i le Ami a le Iunaite Setete. Sa ou volenitia mo ni toleniga e avea ai o se Taitai Fitafita [Ranger] i le Ami a le I.S. O toleniga e avea ai ma se taitai fitafita o se aoaoga e matua faigata tele ma sili ona lelei i metotia mo taua ma fetauiga. O le sini ia maua ni fitafita ma ni fitafita faaolioli e sili ona maualuluga ni tomai.
O a’u toleniga o se Taitai Fitafita na aofia ai se faagasologa o le “suega o le talitonu o le tagata ia te ia lava,” e pei ona taua ai e le vaega o Taitai Fitafita, ia na faamoemoe e avea o ni luitau i le malosi faaletino, finafinau, ma le lototoa. O ala faigata e luitauina ai, o le feaei i luga ma lalo o mauga maa tu sa’oa e soo i le aisa e 100 futu (30 m) po o le sili atu, o le savalia i le po o vaivai e tumu i kolokotaila ma gata uogo, ma se savaliga e faia i le po e faaaoga ai tapasa i le uia o le 10 maila (16 km) o laufanua gaoa—ua na o nisi nei o suega sa matou faaolatia mai ai. O se tasi o faamoemoega o nei suega o le talitonu o le tagata ia te ia lava, e aoao ai Taitai Fitafita, a oo i tulaga faigata ma luitauina o le taua, sa sili atu mea na mafai ona matou faia nai lo mea na matou manatu matou te mafaia. Sa aoaoina i matou e o matou taitai ina ia matou talitonu ia i matou lava ma a matou lava toleniga. I taimi o tofotofoga faigata o lo’u aafiaga i taua, sa sili atu nai lo le faatasi ona ou toina mai ai le faamalosiauga mai lesona a Taitai Fitafita, o suega o le talitonu o le tagata ia te ia lava.
I o tatou olaga, tatou te feagai ai ma isi suega o le talitonu o le tagata ia te ia lava, e sili atu ona taua nai lo ia na ou faaolatia mai ai i a’u toleniga. E le o ni suega la o le talitonu o le tagata ia te ia lava, ae o le talitonu i mea tatou te maua mai le Agaga o le Atua. Ua fautuaina i tatou e perofeta uma ina ia tatou manatua mea ua tatou iloa—ina ia faamautuina ai lo tatou talitonu i le Alii. A o taumafai Iakopo e toe faaolaina le faatuatua o lona nuu, sa ia folafola soo atu ia i latou, “Ou te iloa ai ua iloa foi e outou” (2 Nifae 9:4, 5; ua faatusilima mea e faamamafa). Sa sili atu le tuusa’o o le lapataiga a Paulo: “O le mea lea aua le lafoai ai o outou faamalosi, ua i ai le taui e tele” (Eperu 10:35; ua faatusilima mea e faamamafa). E feagai i tatou taitoatasi uma lava ma se lumanai le mautonu. Ae a tatou fetaiai ma se lumanai le mautonu, ma manatua mea ua uma ona tatou iloa, tatou te faafetaiaia ma le faatuatua. Tatou te faafetaiaia ma le fiafia tele. Tatou te faafetaiaia ma le talitonu o le tagata ia te ia lava.
O se tasi o suega o le talitonu o le tagata ia te ia lava e sili ona taua i le olaga nei, e masani ona feagai ai i le vaitaimi o le olaga faaletalavou matua. O le filifiliga lea e faaipoipo. E leai se filifiliga e sili ona faafetauia ma le mata’u tele e lenei augatupulaga o talavou matutua. O se mataupu e aumaia ai le atuatuvale tele.
Popolega e uiga i le Faaipoipoga
Ou te le mautinoa po o a uma mafuaaga o lenei mea, ae ou te talitonu o nisi nei o ia mafuaaga:
-
O le faigofie o taaga. E toatele tagata talavou ua aveesea i latou lava “mai le taaloga” i le sailia o se soa moni ona ua matele i a latou agafesootai faavaega. Talu ai o nei taaga e faia i vaega fefiloi o alii ma tamaitai, ua manatu sese ai nisi o loo latou auai lelei i le faagasologa o le iloiloga lea e matuai taua i le sailia o se soa e faavavau a se tasi. Peitai, e le o le mea lena. O agafesootai faavaega e mafai ona aveesea ai le avanoa o se tagata e iloilo toto’a ai uiga ma amioga o lena tagata faapitoa lea e taua tele i le faia o se filifiliga sa’o.
-
O le fefe ina nei faia se mea sese. Ua matua lauiloa fuainumera o faaipoipoga ua tatala. O nisi tagata talavou sa feagai ma le loto mafatia i le vaai atu lea ua faaletonu faaipoipoga a o latou matua po o a latou uo, pe ua feagai foi i latou lava ma teteaga. Ua feagai i latou ma le matautia o le puapuagatia e oo mai ona o nei ituaiga o teteaga. O nisi taimi, o le aafiaga ua matatau ai i latou e faia ni faaipoipoga o le faapea nei sese le tagata latou te filifilia.
-
O tagata talavou ua o ese mai tiutetauave. O le mea e lelei ai mo nisi e toaitiiti, o loo i ai se lagona musuā e tuu faatasia ona faanaunauga ma manaoga o se isi. O lea ituaiga o manatu faapito ua faatupuina ai i isi le manatu e tolopo le filifiliga o le faaipoipoga.
Mafaufauga Sese
Po o le a lava le mafuaaga o le fefe e faia filifiliga o le faaipoipoga, e oo atu lava i ni mafaufauga sese, e oo atu i le “lafoai ese” o le lagona talitonu o le tagata ia te ia lava. O le iuga, o lenei mea e tupu ai i se tagata le le mafaia ona uumau i lona lava tiutetauave o le faia lea o lena filifiliga. E tusa lava foi pe le avea le fefe lena e tolopo pe aloese ai mai le faaipoipoga, ae e mafai ona oo atu ai i isi sese. Mo se faataitaiga, ua manatu nisi o le filifiliga lea o se filifiliga faaleagaga atoatoa lava. Ua latou le faataunuuina ai lo latou lava tiute i lea faatinoga, a ua latou faatalitali i se vavega e pei o le tusia e le aao o le Atua o se tali i le puipui po o le vaeluaina o le sami po o se isi aafiaga faaleagaga e ta’u mai ai ia i latou e aunoa ma se fesili o pai-ma-lafai o le “tagata tonu” lea.
O nisi ua faamoemoe i se isi tagata e filifili mo i latou. Na saunoa mai se tasi peresitene o se siteki a le Iunivesite o Polika Iaga ia te a’u, o se faiga ua masani ai nisi o tamaitai le faatalitali i le manatu o sana uo tama o loo i ai nei, o ia lava o le “tagata tonu” lea. O nisi e faatalitali i le faaiuga e faia e se matua—e masani lava o se tamā—o lē sa faia filifiliga mo i latou i taimi ua mavae atu. I tulaga uma ia, ua i ai se faatalale i tiutetauave mo le faia o le filifiliga e silisili ona taua e faia e se tagata i lenei olaga.
E taua fautuaga mai matua, epikopo, ma isi tagata agavaa. Ae i le faaiuga lava, e le mafai e se tasi—pe tatau foi—ona tau atu ia te oe le mea e fai. O le filifiliga po o ai le tagata e faaipoipo i ai o se filifiliga e matuai patino lava i le tagata ia.
“O le mea lea aua le lafoai ai o outou faamalosi, ua i ai le taui e tele!” Manatua ua tatou o mai i lenei olaga ua uma ona faapolokalamaina i tatou, e pei o lea faaupuga, ina ia i ai o tatou lagona gaualofa. Aua tatou te faafaigataina! Manatua mea ua e iloa, ma agai i luma ma le talitonu i le Tama Faalelagi ma le tulaga o loo e fiafia ai o Lona atalii po o Lona afafine.
Fautuaga mo Faamasaniga Tumau
O le faamasaniga tumau o se taimi lea e faamasani lelei ai ni tagata se toalua. O se taimi ia iloa lelei ai se tasi, ona manaoga, ana amioga, ma faamoemoega o le olaga ma le talalelei. O se taimi e fefaasoaai ai sini ma miti, faamoemoega ma popolega. O se taimi e tofotofoina ai le tautino o se tagata e ola i le talalelei.
Na faamatala mai e Elder David A. Bednar o le Korama a Aposetolo e Toasefululua e uiga i se faifeautalai ua maea lana misiona o lē sa tafafao faamasani ma se tamaitai talavou faapitoa. Sa alofa tele o ia i lea tamaitai ma sa mafaufau loloto foi e talosaga atu ia te ia la te faaipoipo. O le taimi lea ina ua maea ona fautuaina e Peresitene Gordon B. Hinckley (1910–2008) ia tamaitai ina ia faaaogaina tau lava o le tasi se pea tautaliga. Sa faapea mai Elder Bednar, sa faatalitali ma le onosai lenei alii talavou mo se taimi, i lenei tamaitai talavou e aveese le isi pea tautaliga faaopoopo sa i ona taliga. Peitai sa lei tupu lea mea. Ona o lenei mea ma isi mafuaaga, sa faamuta ai ma le loto mafatia e lenei alii la laua faamasaniga.
I lona faasoa mai o lenei aafiaga, sa faapea mai ai Elder Bednar: “Ou te manatu … atonu tou te talitonu ua fai si faamasino tele o le alii talavou pe faapea, ua faavae se filifiliga taua e faavavau, e tusa lava pe o se vaega, i se mataupu laitiiti e faavalevalea pe matuai talitonu i ai. Atonu tou te le fiafia ona o le faataitaiga ua taula’i atu i se tamaitai talavou o lē na le mafai ona talia le fautuaga faaperofeta nai lo le taula’i atu i le alii talavou. [Ae ou te fia faailoa atu ia te outou] e le o tautaliga le mataupu talanoaina!”1
O se isi lea motugaafa. O se vaega o lenei aafiaga o faamasaniga tumau, ia faaeteete ia aua le faavaeina a outou faamasinoga tau lava o mea taitasitasi e pei o le “faapupuina o pepa ulufale.” O le uiga o lena mea, aua le faavaea a outou filifiliga tau lava i le faapea, pe sa faia se misiona a lea tagata pe na te umia foi se valaauga faapitoa i la outou uarota. O nei mea e mafai, ma e tatau, ma e masani lava ona avea ma faaaliga o le tuuto, faamaoni, ma le amiosa’o. Ae le o taimi uma foi. O le mafuaaga lena e tatau ai ona outou faamasani. Ia lava lou iloa lelei o se tagata e te malamalama lelei ai i lona loto ma ona uiga ae le na o lona “talaaga faaletalalelei.”
O se taunuuga lenei: aloese i le faamasino atu o se tasi seiiloga ua e iloa lelei o ia. O faamasinoga faatopetope o mea le lelei e tutusa lava le sese ma le taitaiseseina ma faamasinoga faatopetope o mea lelei. Ia tutusa lou matua mataalia mo se taimane o loo natia ma lou matua nofouta i le auro a le vale.
Tatalo e uiga i le Filifiliga
Faatoa e tatalo lava mo se faamaoniga pe a ua lava ma totoe se taimi talafeagai sa faia ai lau oe lava faamasinoga ma lelei ou lagona i le mafutaga. Ia manatua, e pei lava o isi filifiliga taua uma, o le faaipoipoga o lau filifiliga lea. O le a faamoemoe le Alii e te faaaogaina lau faamasinoga. E pei ona Ia fetalai atu ia Oliva Kaotui, “Faauta, e te le i malamalama; fa te oe ou te tuuina atu ia te oe, i le na o lou ole mai a e te le’i mafaufau i ai” (MFF 9:7). E te faatinoina loa lau vaega e ala i se faamasaniga tumau talafeagai ma faia se filifiliga e lei mautinoa, ia e talitonu o le a tali mai le Tama Faalelagi i lau talosaga.
O loo faamoemoe le Alii e te faaaogaina lau lava faautautaga lelei. O loo faamoemoe o Ia e te faalagolago i ou lava lagona faanatura o le tosina atu i le alii po o le tamaitai lea na totoina i totonu ia te oe mai lava i lou fanau mai. Afai loa ua e tosina atu i se tagata o le isi itupa, ma ua faafiafiaina oe i se vaitaimi umi o se faauoga—faamasaniga tumau—ma ia, ma ua faamalieina oe i le tutusa o a oulua tulaga faatauaina, ma o ia o se tasi e mafai ona oulua fefaasoaai fiafia i le mafutaga sili ona vavalalata—ona tuuina atu loa lea o le mataupu i le Tama Faalelagi. O le leai o ni lagona faafeagai i ou lava lagona atonu o Lana auala lea e ta’u atu ai ia te oe e le tetee foi o Ia i lau filifiliga.
Ia E Talitonu i le Alii
Ua tele tausaga ua te’a talu lena vaitaimi luitauina i a’u toleniga faaTaitai Fitafita. O le aave o peau o le olaga nei ua aveina mamao atu ai a’u mai suega o le talitonu o le tagata ia te ia lava o aso na avea ai a’u ma fitafita. Ae e manatua pea ma latalata mai a latou lesona. E mafai lava ona tatou faaolatia mai i afa o le olaga, ma mafaia i ni auala e sili ona aoga, nai lo le mea sa tatou manatu i ai. Pau lava o lea o le manatua pea lava pea o mea ua tatou iloa.
“O le mea lea aua le lafoai ai o outou faamalosi, ua i ai le taui e tele.” Ia talitonu i le mea ua e iloa! Ona e fetaiai ai lea ma au oe lava suega o le talitonu ia te oe lava, ma le lototele ma le lē gaoia, ma e mautinoa lava e le Alii ou ala.
Ata na tusia e Dilleen Marsh
O agafesootai faavaega e mafai ona aveesea ai le avanoa o se tagata e iloilo toto’a ai uiga ma amioga o lena tagata faapitoa lea e taua tele i le faia o se filifiliga sa’o.
E tatau ona outou faamasani. Ia lava lou iloa lelei o se tagata e te malamalama lelei ai i lona loto ma ona uiga ae le na o lona “talaaga faaletalalelei.”