O Le a Ia Tauave i Ona Luga o Latou Faaletonu

Saunia e Elder Jean A. Tefan

Na auauna atu o se Fitugafulu Eria mai le 2000 i le 2009

I le mavae ai o ni nai tausaga talu ona ma toe foi mai ma lou toalua o Gisèle mai le pulefaamalumalu ai i le Misiona a Fiti Suva, ae gasegase loa Gisèle i le kanesa o le laualo. O le tulaga faigata o le a iu ina aofia ai ni taotoga maaleale se tolu ma ni faafitauli lea na oo ai ina aveesea atoa lona laualo. O le faatumutumuga o lo’u vaai atu i mafatiaga o lo’u toalua na oo ai ina ou malamalama lelei i le Togiola a Iesu Keriso.

Ou te manatua le lagona o le matua lofituina i mea na oo i ai Gisèle. O le a se mea na ia faia ua oo mai ai se puapuaga faapena? Pe na te lei auauna atu ea ma le faamaoni i le Alii? Pe na te lei tausia ea le Upu o le Poto? Aisea na le mafai ai ona Ia puipuia [o ia] mai lenei ma’i? Aisea?

I se tasi po faapitoa sa ou tuu atu ai lou loto ma ou lagona i se tatalo a o ou tolaulau atu i le Alii ou lagona le fiafia uma. “E le mafai ona ou toe vaai atu i lou toalua pele o onosaia na tiga!” Sa ou fai atu ai ia te Ia. Ona ou filifili lea e liliu atu i tusitusiga paia. Sa ou maua nei fuaiupu faamafanafana e uiga ia Iesu Keriso i le Alema 7:11–12:

“E maliu foi o ia, e onosai i mea tiga, ma puapuaga, ma tofotofoga uiga eseese; e faapea foi ina faataunuuina le upu ua faapea mai, na te ave i ona luga puapuaga ma ma’i o lona nuu.

“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu; na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu e tusa ma o latou vaivai.”

E oo mai i lena taimi, ou te lei mafaufau lava i taunuuga uma o le Togiola matagofie a le Faaola. Ou te lei iloa moni lava o le a ave e Iesu Keriso i Ona luga ia puapuaga a Gisèle—po o au foi. Sa ou sii atu ou tiga ma atuatuvalega i Ona luga o lē tauave “ia puapuaga ma ma’i o lona nuu.” Faatasi ai ma lenei malamalama fou, sa ou lagonaina le aveese atu o se avega mamafa!

I le taimi lenei, o loo manuia lava Gisèle, e pei lava e lei gasegase o ia i le kanesa. I ana siaki masani, sa ta’u atu ai e le fomai o ia “o se vavega.” Ou te matua fiafia lava mo lona faamalologa faaletino, ae ou te fiafia foi i le faamalologa lea na ou tofo ai, o se faamalologa o le loto. O le mafanafana lea e maua mai i le na o le Faaola lava na aumaia ai ia te au se faamautinoga toafilemu o le a lelei mea uma.

O le taimi nei pe a ou feagai ma faafitauli, e liliu atu lava e le aunoa ou manatu i lena lesona mamana ma i le mea na fetalai atu ai le Alii i le Perofeta o Iosefa Samita: “Na oo ifo i lalo o mea uma le Atalii o le Tagata. Pe sili ea oe i lo ia?” (MFF 122:8). O le manatuaina o le taulaga a Iesu Keriso e faamafanafana ai pea e le aunoa au.

E faavavau ona ou faafetai mo le naunautai o lo tatou Faaola e faataunuu mea na Ia onosaia ma le tiga. Ou te molimau atu i Lona alofa, Lona agalelei, ma Lana tausiga mataala o Lana fanau. O Ia o lo tatou Faaola, ma ou te alofa ia te Ia.

Lo’u Tama e, saunia e Simon Dewey, e le mafai ona kopiina