Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.

“Avea ma se Tagata Maoae i le Taimi Nei,” i. 45: Fola ni aitema (mo se faataitaiga, se penitala, Tusi a Mamona, Liahona, pea seevae), ma fai i tagata ole aiga e faavasega na mea e amata mai i le mea e aupito taua seia oo i le mea e faalē taua tele. Talanoaina pe na faapefea ona latou filifilia le faavasegaga. O a uiga lelei e taua ai le olaga o se tagata? Ia fautuaina tagata taitoatasi e faia se mea patino i le vaiaso a sau, ia avea ai o se tagata maoae.

“Taeao Po o le Aso Sa,” i. 56: Valaaulia tagata taitoatasi o le aiga e mafaufau i se tuaoi e ono manaomia se asiasiga i ai po o se galuega fesoasoani. Fuafua e fai se mea i le vaiaso lenei mo lena tagata. Faitau le Mosaea 18:7–10, ma talanoaina pe faapefea i le fesoasoani atu i isi ona avea o se auala e tausisia ai a tatou feagaiga o le papatisoga.

“Pe A Lē Opeopea Pato,” i. 58: Lisi ni nai tulafono a lou aiga, ma talanoaina pe puipuia ai faapefea lou aiga. Lisi foi ni nai poloaiga a le Tama Faalelagi, ma talanoaina pe faapefea ona puipuia ai i tatou faaletino po o le faaleagaga.

O Le Afiafi Faaleaiga Fiafia

I ni nai tausaga ua mavae, sa faatonuina e lo’u toalua lo matou aiga e sauniuni mo se afiafi faaleaiga faapitoa. Na fai mai le ma tama teine e fa tausaga na te usuina le “O Au o se Afafine o le Atua.” Na fai e le ma tama tama e 10 tausaga le tatalo amata. Sa matou lagonaina le malosi ma le ofoofogia o le i ai o le Agaga.

Sa faasoa mai e lo’u toalua ni nai mafaufauga mai taitai o le Ekalesia ma fautuaina i matou e tutumau i le talalelei a Iesu Keriso. Ona ia tuuina atu lea i le ma teineitiiti se faamanuiaga faatamā. Sa tuuina mai foi ia te au ma lo’u tina ni faamanuiaga, ma mulimuli ai i lo ma atalii. A o lei tuuina atu ona lima i luga o le ulu o lo ma atalii, sa talanoa lo’u toalua i lona agaga faafetai mo le perisitua, ma sa ia fautuaina lona atalii ina ia agavaa mo lenei pule.

Toeitiiti atoa le tasi ma le afa tausaga mulimuli ane, sa fai mai la ma tama teine, “Toe fai se isi a tatou afiafi faaleaiga e pei ona sa tatou faia i le isi taimi.” Sa ou iloa le uiga o lana tala, ae sa ou fesili lava po o le fea afiafi faaleaiga. Na tali mai o ia, “Le afiafi lea na tatou fetagisi ai ma sa tatou matua fiafia ai foi!”

Marlúcia Souza de Jesus Costa, Bahia, Pasila

O Lau Afiafi Faaleaiga e Sili Ona e Fiafia i Ai

Auina mai se faamatalaga o lau afiafi faaleaiga e sili ona e fiafia i ai i le [e-mail].