Tuugamau Faamaufaailogaina

Saunia e David L. Frischknecht

Matagaluega o Mataupu Aoaoina

O faaupuga o loo tuuina mai i se tamaitusi o oloa e faatau atu sa foliga mai e le moni—toetoe a taufaaata—ae na latou faamanatuina mai ia te au se folafolaga lea e faavavau lona faamaoniga.

O le aso na sosoo ma le aso na maliu ai Tama, sa matou faia ai ma lo’u tina, ou uso, ma lo’u tuafafine, se asiasiga moomia i le fale maliu mo fuafuaga o toe sauniga o Tama. O o matou tiute e aofia ai le filifiliaina o se pusa maliu ma se nofoaga mau o le a tuu ai le pusa maliu.

Ao matou manatunatu i mea e filifili ai, sa ou vaaia se tamaitusi o oloa faatau atu na faalauiloa mai ai se ituaiga nofoaga mau. Sa faapea mai, faatasi ma isi mea, o le nofoaga mau sa faamaufaailogaina, ma na faamaonia lena faamaufaailogaina mo le 75 tausaga. E ui lava i le faanoanoa o lea taimi, ae sa malie ia te a’u le faamaoniga.

“O ai o le a siakia le faamaufaailoga i le 75 tausaga?” Na ou mafaufau ai. “Afai foi e siaki e se isi ma ua le moni, o ai o le a mauaina le faamaoniga? O le mea moni, o a avanoa,” sa ou ataata ai, “o le tumau ai o le faamaufaailogaina o lena nofoaga mau?”

I lena taimi o manatunatuga loloto, sa taulai atu ai lou mafaufau i se isi nofoaga mau, lena o loo faamatalaina i le Mataio 27. O lenei nofoaga mau, o le mea moni o se tuugamau i se taimi ma se nofoaga ua leva lava, sa i ai se avanoa e tapunia e se maa tele lava:

“O le aso lea e tuaoi ma le aso o le sauniga, ua faapotopoto atu ai ia Pilato le au fataulaga sili ma le au faresaio,

“Ua faapea atu, Le alii e, ua matou manatua, ua fai mai lena tagata pepelo, ina o ola mai o ia, A mavae aso e tolu ou te toe tu mai ai.

“O lenei, ia e fetalai ane, ia faamauina le tuugamau seia oo i le aso tolu, ina nei o atu ona soo i le po, ma gaoi ia te ia, ma latou fai atu i le nuu, Ua toe tu mai ia nai e ua oti; ona sili ai lea o le pepelo e mulimuli i le na muamua.

“Ona fai ane lea o Pilato ia te i latou, Ua ia te outou leoleo, ina o ia, faitalia lava outou ona faamau ai.

“Ona latou o ai lea, ua faamauina le tuugamau, ua faamaufaailoga i le maa, ma tuu ai tagata e leoleo.” (Mataio 27:62–66).

Mai poloaiga uma lava na tuuina atu i le talafaasolopito o tupu ma alii ma faitulafono, o le poloaiga a Pilato ia mautinoa le puipuia o le tuugamau e masalo na sili le le aoga.

O le a le avanoa na maua e lena tuugamau e tumau ai lona faamaufaailogaina? O le mea moni lava, e leai se auala e mafai ai e fitafita ona faataunuuina lena faatonuga aua sa leai se auala e le mafai ai ona matala lena tuugamau: “Faauta foi, ua to le mafuie tele: aua na alu ifo le agelu a le Alii mai le lagi, ua alu atu, ma fuli ese le maa i le gutu o le tuugamau” (Mataio 28:2).

Ona o le tatalaina o lena tuugamau e tasi, o nofoaga mau uma lava ma loa ma tuugamau na faamaufaailogaina o le a matala. Faamaoniga.

O le Papa o lo tatou Faaolataga o lo tatou faaola lea mai le oti faapea ma seoli. O Ia “o le toetu, ma le ola” (Ioane11:25). Ona o Ia “e avae e seoli o agaga ua faatagataotauaina o i ai, e avae foi e le tuugamau o tino ua faatagataotauaina o i ai, ona toe faatasi ai lea o agaga ma tino o le tasi i le tasi, e faia i le mana o le toe tu mai o Le Paia o Isaraelu” (2 Nifae 9:12).