O Le Tupe Faaagaga mo Aoga Ua Ola Lauusiusi i le Iva Tausaga Mulimuli Ane
Na taia Tyson Kemege, i le ma’i pipili ma sa leai ni matua a o pepe meamea, sa tupu ae i Nairobi, Kenya, ma sa le’i moe lava o ia i luga o se faamalu ma sa seasea ona ‘ai faalua i se aso. Na pau le mea sa fesoasoani ia te ia e savali ai o se pea tootoolima.
Sa tonu ia te ia e a’oga i le Kolisi a Augustana e aoao ai i faamatalaga faatekinolosi, peitai sa leai se tupe a lona aiga, ma sa foliga mai e leai se faamoemoe.
O Brother Kemege, o le sa auai i le Ekalesia i ni nai tausaga ua mavae ina ua maea lana aoga maualuga, sa ia faafesootaia se ulugalii matutua faamisiona ma faamatala i ai ona naunauga. Sa faafesootai atu e le ulugalii faamisiona o ia i le komiti o le Tupe Faaagaga mo Aoga (TFA). Sa fesoasoani se nonogatupe i le TFA, na talia ai o ia i le aoga.
“O a’u o se tagata e sili ona laki i le fogaeleele,” o le tala faisoo lea a Brother Kemege i faifeautalai.
Na avea Brother Kemege ma se peresitene o tamaiti aoga o le Iunivesite a Augustana, ma e lua ona valaauga i le uarota.
E iva tausaga talu ona faatoa fofogaina mai e Peresitene Gordon B. Hinckley (1910–2008) le TFA, a ua silia ma le 38,000 tagata mai atunuu e 42 ua auai i le polokalama. E ui i faigata faaletamaoaiga o le lalolagi atoa, o loo maloloina pea le Tupe Faaagaga mo Aoga ma o loo fesoasoani ai i tagata e pei o Tyson Kemege ia a’otauina, e o ese mai ai i le mativa, ma saofagā atu ai i o latou nuu.
E silia ma le 87 pasene o i latou o loo auai i le TFA o e ua maea a latou a’oga, o loo faigaluega nei.
Foiaina o Luitau
E ui ina e le o faamata’uina le polokalama i le pau o le tamaoaiga, ae fai mai i latou o loo faafoeina le polokalama e i ai ni nai luitau e tatau ona faatoilaloina. O se tasi o luitau sili o loo feagai ma le polokalama, o le faatupulaia o le aofai o i latou e auai.
“O mea faalavefau matou te feagai ma tatau ona faatoilalo, o faafitauli masani lava e fuifui lua ma le tele’a’i o le faatupulaia ma se taumafaiga faavaomalo,” o le tala lea a Elder John K. Carmack, o se uso ua faamalolo faamamaluina o le Au Fitugafulu, ma o ia foi o le faatonusili faapitoa o le tupe lea. “O nisi o faafitauli e aofia ai le faasalalau atu o le tala, faailoa atu o tulaga manaomia o i ai, ma le lagolagoina o i latou e auai.”
E faafoe lava le polokalama i le laumua o le Ekalesia e se vaega e matua toaitiiti lava faalepulega, e aofia ai ni nai tagata faigaluega toaitiiti, ulugalii faamisiona, ma tagata o le lotoifale e galulue fua. O loo vaaia e ni Pulega Aoao se toalua ua faamalolo faamamaluina, o Elder Carmack ma Elder Richard E. Cook.
Ina ia pulea lelei le polokalama ua salalau tele, e galulue le au ofisa o le TFA ma faifeau faamisiona, faatasi ma Au Peresitene o Eria e aoao ia taitai o eria, o e o le a galulue ma taitai i lotoifale, e aoao ma lagolagoina faiaoga o nuu, aufaigaluega, volenitia, ma i latou e auai i le polokalama.
“O se galuega faatino e fou a’ia’i,” o le tala lea a Rex Allen, o le faatonusili o aoaoga faatino ma fesootaiga mo le polokalama. “E fou i ona itu uma, o le mea lea e taua ai lava ia fesootaiga ma aoaoga faatino.”
E Faapefea Ona Faatino
Ua mafai ona i ai lenei polokalama ona o le fiaselau afe o tagata taitoatasi o loo foai mai a latou tupe i le teugatupe. O tupe uma lava e foai mai, e alu i le lagolagoina o tagata o loo auai i le polokalama.
O tagata e auai ai, e amata le faagasologa i se laasaga o le tapenaga lea e faamaopoopo e ala atu i le polokalama a le inisitituti o aoaoga faalelotu, lea e lesitala ai le tagata. Faatasi ai ma le fesoasoani mai nofoaga autu o punaoa a le AAG mo galuega, e ave ai e tagata e auai i le polokalama ia kosi o le “Fuafua mo le Manuia” ma mafutaga faaleaoaoga mo galuega, a o lei faatumuina le talosaga i luga o le initoneti mo se nonogatupe.
A faamaonia loa ia nonogatupe, ona alo atu loa lea o ē auai ia latou aoaoga, faatasi ai ma lo latou malamalama o le a latou toe totogiina a latou aitalafu, ina ia mafai ai foi ona faamanuiaina isi mai lea lava teugatupe. E totogi e i latou e auai ai le silia ma le $2.5 miliona Tala Amerika, mo a latou nonogatupe i tausaga taitasi.
Fai mai Elder Carmack, ua manuia le polokalama ona e le gata i le lagolagosua tele a tagata o le au paia i foai tautupe, ae faapea foi i le lelei o le au taitai. “O le tamā o le Tupe Faaagaga mo Aoga, o Gordon B. Hinckley,” o lana tala lea, “peitai o le lagolago a Peresitene [Thomas S.] Monson ma lona naunau i ai, e faapei lava foi o Peresitene Hinckley. Sa i ai [Peresitene Monson] i le faagasologa mai le amataga ma o loo ia faatonutonuina i le taimi nei i lana tofa faaperofeta.”
O Taunuuga
Ina ua fofogaina mai le polokalama i le masina o Aperila 2001 i le konafesi aoao, na saunoa Peresitene Hinckley: “O le i ai o tomai lelei faafaigaluega, o le a mafai ai e nei alii ma tamaitai talavou ona tulai a’e mai le matitiva na latou i ai faapea augatupulaga na muamua ia te i latou. O le a sili atu le auala latou te saunia ai mea e tausi ai o latou aiga. O le a latou galulue e auauna atu i le Ekalesia ma tuputupu a’e ai i tiutetauave ma tomai faaleautaitai. O le a latou toe totogiina a latou faaunegatupe ina ia mafai ai ona faamanuiaina isi tagata e faapei ona faamanuiaina o i latou” (“O Le Tupe Faaagaga mo Aoga,” Liahona, Iulai 2001, 60; Ensign, May 2001, 51).
O loo faaauau pea ona vaaia e taitai o le polokalama le faataunuuina o upu a Peresitene Hinckley. E 10 i le 15 pasene le toatele o taitai o i ai nei i le Ekalesia i nisi o atunuu ua faamaonia ai le faaaogaina o le TFA, o i latou foi na faamanuiaina talu ai i lea teugatupe.
“E le o se miti faivavale lenei,” na faaauau ai le saunoaga a Peresitene Hinckley. “Ua i ai a tatou risosi. Ua i ai ni a tatou uo lima foai. Ua i ai la tatou faalapotopotoga. Ua i ai o tatou tagata e faia le galuega ma auauna faamaoni a le Alii latou te faia ina ia faamanuiaina. O se taumafaiga e galulue fua tagata e leai ni totogi, ma e leai se tupe a le Ekalesia e alu ai. Matou te tatalo ia faamanuiaina e le Atua lenei taumafaiga, tamaoaiga ma le matagofie, i luga o ulu o le faitau fia afe e faapei foi o le faalapotopotoga na mua i malae, le Teugatupe Faaagaga mo Femalagaaiga, na aumaia faamanuiaga e le mafaitaulia i olaga ma soifuaga o i latou na faataumafalia i ona avanoa.”
E tusa ai ma le saunoaga a Brother Allen, e iva tausaga mulimuli ane, a ua amata ona ola le polokalama, ma ua mafai, “ona o le agalelei tele ma le faatuatua maoae.”
E mafai ona faamanuiaina tagata o le ekalesia ua agavaa mo le mauaina …
e ala i le taumamafa ai i fua o le Tupe Faaagaga mo Aoga …
ma le toe totogi atu ina ia manuia ai foi ma isi.
Ata na tusia e Brad Teare