Mo Alii Talavou e uiga i Tafaoga Faamasani

Saunia e le Au Peresitene Aoao o Alii Talavou

O Le a le Mea e Ta’u o le Tafaoga Faamasani?

Alii talavou, o tafaoga faamasani o le taimi e te valaaulia ai se tamaitai talavou e auai ma oulua fegalegaleai i se gaoioiga faaagafesootai e fuafuaina.

Aisea ua Taua ai Tafaoga Faamasani?

O tafaoga faamasani e mafai ona avea o se aafiaga aoaoina matagofie mo oe ma tamaitai talavou e te tafao faamasani i ai. E mafai ona e aoaoina ni mea se tele e uiga ia te oe, ma e mafai ona e atiina ae le malamalama, faaaloalo, ma le talisapaia o afafine maoae ma faapelepele o le Atua.

E foliga mai e mamao lava mo le taimi nei, ae o le faaipoipoga o se tasi lea o faaiuga aupito sili ona taua o lou olaga. O tausaga o lou talavou e le o le taimi lena e faia ai lena faaiuga, ae o tafaoga faamasani talafeagai o le a fesoasoani ia te oe e te saunia ai e faia lena faaiuga pe a oo i le taimi e tatau ai. O tafaoga faamasani o le a tuuina atu ai ia te oe ni avanoa e atiina ae ai tomai faalevafealoai o le a fesoasoani ia te oe ia e to’a ma fiafia i ai tamaitai talavou tou te tafafao faamasani. O le a e malamalama ma tosina atu ia i latou e i ai agavaa ma uiga ia o le a taua ia te oe i se soa e faavavau. O tafaoga faamasani talafeagai o le a fesoasoani foi ia te oe e te agavaa ai ma saunia e faaipoipo i le malumalu mo le taimi nei ma le faavavau atoa i le tagata sa’o i le taimi sa’o.

O nei mea uma o le a saofagā i lou olioli ai i se tasi o faamanuiaga silisili o le olaga: o se faaipoipoga fiafia ma le faamanuiaina.

O A Tulaga Faatonuina o Tafaoga Faamasani Talafeagai?

Ua fautuaina outou e perofeta a le Alii e aua nei outou tafafao faamasani seia ta’i 16 tausaga le matutua agai i luga. A amata loa ona e tafao faamasani, ia tafao na o i latou e maualuluga tulaga faatonuina, ma e mafai ona e tausia ai ou tulaga faatonuina pe a e faatasi ma i latou. Ia auai e le aunoa i gaoioiga faafiafia atoatoa lelei ia e faatagaina ai oe ma lau uo e tausisia le faaaloalo ia te oe lava ma ia latalata atili atu ai i le Agaga o le Alii. E faapitoa lava le taua o le i ai o mafaufauga ma lagona mama. Ia aloese mai se fegalegaleaiga e matele atu i talanoaga ma amioga faalefeusuai. Ia aloese mai le tuua ai na o oe ma lau uo po o le umi foi ona lua o. Ua ia te oulua se matafaioi e fesoasoani ai le tasi i le isi e faatumau le paia o le perisitua ma le mamalu faaletamaitai ma puipuia ai o oulua tulaga mamalu ma mamā. Ia e agalelei e le aunoa ma faaaloalo i tamaitai talavou pe a e talosaga atu pe talia foi se valaaulia mo se tafaoga faamasani ma le taimi atoa o ou aafiaga i tafaoga faamasani.

A amata loa ona e tafao faamasani, ia outou o taitoalua pe toatele atu foi. Ia aloese mai le o soo ma le tagata lava e tasi pe vave faia foi se faamasaniga tumau.

Ia manatua lava e faatumau le paleni o lou olaga pe a e tafao faamasani. E le tatau ona e tafao faamasani soo, e iu ina faaleagaina ai le mafutaga a lou aiga pe taofia ai foi oe mai lou alualu i luma i le aoga po o le atiina ae foi o tomai ma taleni. Ia e mautinoa ua feiloai ma toamalie ou matua i tamaitai talavou tou te tafafao faamasani.

Matou te fautuaina outou e auai i gaoioiga fuafuaina lelei o tafaoga faamasani, lelei, taugofie, ma o le a fesoasoani e te masani lelei ai i tamaitai talavou tou te tafafao faamasani.