Valaau se Taavale a le Falemai!

Simon Heal, Kuiniselani, Ausetalia

I le 1991 a o ou tu’i laupapaina le avanoa pito i luga o le matou fale, sa ou faalogoina se tiga matuitui i lo’u mata tauagavale. Sa vave ona sosolo atu le tiga, e pei o se fasi laau ulufia, i lo’u ulu atoa. Sa faaauau pea ona ou galue seia faamalosia a’u e le tiga ou te malolo i lo’u potumoe.

Ae peitai, ou te taoto atu loa i lalo ae musuia a’u e le leo malu ma le itiiti. “Nofo i luga,” na fai mai ai le Agaga. “Aua e te moe.”

A o ou mafaufau loloto i le lapataiga ma mafaufau i se mea e tatau ona fai, sa ou filifili loa e aumai se tasi o fualaau sa inu e lo’u tina mo lona ulu tiga. Sa ou savali atu i le potu o o’u matua ma maua fualaau, ae a o amata ona ou tatalaina le fagu, sa toe fai mai foi le leo: “Aua e te inuina fualaau na.”

I se taimi puupuu mulimuli ane, sa toe oo mai faatolu le leo: “E tatau ona e telefoni mo se taavale a le falemai—i le taimi nei lava!”

Ou te lei valaauina lava muamua se auaunaga mo mea e tutupu faafuasei, ae peitai sa ou valaau loa lava. Sa vave ona taunuu mai le taavale a le falemai, ona faataoto lea o a’u e ni fomai se toalua mo faalavelave faafuasei i luga o se fata sii ma’i. O le mea mulimuli na ou manatua o le fesili mai lea po o ai lo’u igoa. Ona pogisa loa lea o mea uma.

Mulimuli ane, sa ou ala ae i le potu o ma’i tigaina i le falemai. Sa ou vaivai lava ma sa i ai lava aafiaga o le vailaau faagase, ae sa ou manatua lo’u faalogoina o lima o lo’u tamā ma lo’u epikopo i luga o lo’u ulu a o la faamanuiaina a’u. Sa ou lagonaina upu “O le a e toe maua le ola maloloina, e pei lava e leai se mea na tupu.”

Ina ua mavae aso e tolu i le potu tigaina ma isi aso e fa i le i isi potu o le falemai, na mafai loa ona ou foi i le fale. Na faatoa ou iloa ai iina na pa se uaua o lo’u ulu ma aafia ai lo’u faiai. Sa faapea mulimuli mai le fomai sa faia lo’u taotoga sa “na o se sekone lava lo’u mamao mai le oti” ma na semanu ou te oti pe ana ou inuina le fualaau o le ulu tiga.

O lenei la ua ou malosi ma maloloina, ma e faafetai ona sa taialaina e le Alii lo’u mafaufau i lena aso. Ua faamauina i le malumalu maua ma si o’u toalua lelei, ma e toalima le ma fanau matagofie.

Ou te faafetai i lo’u Tama Faalelagi ma lo’u Faaola, o Iesu Keriso, mo le vavega o le ola. Ou te taumafai i aso uma e faaaoga o’u taimi uma ua Laua tuuina mai ia te a’u, ma ou te manatua ma le faafetai le faatosinaga malu o le leo o le Agaga.

Sa vave ona sosolo atu le tiga o lo’u mata tauagavale i lo’u ulu atoa. Ou te taoto atu loa i lalo ae musuia a’u e le leo malu ma le itiiti: “Nofo i luga. Aua e te moe.”