O Le Taleni a Teila

Heather Hall, Iuta, ISA

E mafai ona e ta’u mai ia te a’u ni taleni a Teila e mafai ona ou faasoa atu i le vasega.” o le fesili mai lea a le faiaoga Peraimeri a la’u tama e valu ona tausaga. Sa telefoni mai o ia ona o le a talanoa le vasega a Teila e uiga i taleni na latou maua mai i le Tama Faalelagi.

Sa matuai nimo i lo’u mafaufau. Sa ou toe mafaufau i le valu tausaga ua te’a, ma ou taumafai ia maua se tali. I le fa ai o aso o le matua o Teila sa pagatia ai o ia i se ma’i na pe ai lona tino lea na faaleagaina ai lona mafaufau ma maua ai i se ma’i maliu e le mafai ona taulimaina. E le mafai ona pupula, tautala, pe fesootai ma isi. E lei mafai lava ona sili atu le alualu i luma o lona mafaufau i se tulaga e i ai se tamaitiiti e ono masina le matua. E tele ina faaalu ona aso i luga o se nofoa faataavale a o matou tausia o ia ma taumafai ia ona maua le lagolelei.

Sa matou alalaga ina ua mafai e ia ona ata pe inu foi mai se ipu faapitoa, ma matou olioli ina ua mafai ona tu o ia ma faia ni nai laa. Peitai a o matou alalaga ma sami ana taumafaiga i le itu i fafo, sa tagi o matou loto ma agaga i le iloa o nei mea laiti ua [ia] ausia, atonu e tutusa lava le taua ma mea e mafai e se isi foi tamaitiiti e pei o Teila. Ae peitai, ou te lei manatu o le mea lea sa fia faalogo i ai lona faiaoga Peraimeri.

Sa tau faamanino lo’u leo ma ou tali atu ma le le mautonu, “E leai lava se taleni a Teila e mafai ona ou mafaufau i ai.”

Sa suia e faavavau e lenei uso agalelei le ma mafutaga ma si a’u tama e ala i lana tali.

Sa faapea mai o ia, “A o ou mafaufau i lenei lesona, sa ou iloa ai e tofu uma lava le fanau a le Atua ma se taleni.” “Ou te fia faapea atu o le taleni a Teila o lona aoaoina lea o isi e auauna atu. Afai e le afaina ia te oe, ou te fia talanoa atu i la matou vasega e uiga i le ala ua ou matauina ai le taleni a Teila iinei i le lotu. Ua ou vaai i isi tamaiti Peraimeri o aoao e tulei lona nofoa faataavale, tatala faitotoa mo ia, ma aveese lo latou fefefe e soloi lona auvae i se solosolo pe a manaomia. Ou te manatu o se taleni maoae lena o loo ia faamanuiaina ai o tatou olaga.”

Sa memumemu atu la’u ioe, ma ma faatofa filemu ai lava. Ou te mafaufau pe na silafia e lena faiaoga Peraimeri le matua o’oo’o o le aafiaga o lena talanoaga i lo’u olaga. Sa tumau lava le tulaga o Teila. O loo matuai manaomia pea e ia le tele o le tausiga. O loo faaaluina pea se vaega tele o lo’u olaga i le falemai, i fomai, ma tausimai. Ae na suia la’u vaaiga mamao, ma na amata ai ona ou matauina lana taleni.

Sa ou vaai i le auala na suia ai amioga a tagata o loo siomia i matou a o latou taumafai e tausi ia te ia. Sa ou matauina foi le auala na ia faamanatu mai ai ia te i matou e faifai lemu, e matau ona manaoga, ma faateleina lo matou agaalofa, mataalia, ma le onosai.

Ou te le iloa le faamoemoega o le Atua i le faafeagai ai o Teila ma luitau sili ona faigata, ae ou te talitonu na aumai ia te a’u e lona faiaoga Peraimeri sina vaaiga itiiti i ai. Ua i ai o ia iinei e faasoa mai lana taleni ia i matou. Ua i ai o ia iinei e aumai ia i matou le avanoa e aoao ai ia auauna atu.

“Ua ou vaai i isi tamaiti Peraimeri o aoao e tulei lona nofoa faataavale, tatala faitotoa mo ia, ma aveese lo latou fefefe,” o le tala lea a le faiaoga Peraimeri a la’u tama ia te a’u.